Os deputados do PPdeG no Congreso veñen de presentar sendas preguntas na Cámara Baixa para que o Goberno central aclare cales son as medidas “urxentes e efectivas” que ten previsto adoptar para solucionar as “recorrentes deficiencias e atrasos” na prestación do servizo ferroviario de media distancia en Galicia e para que confirme se cumprirá o prazo de entrega dos trens Avril en novembro de 2023 para así garantir a chegada da Alta Velocidade ás cidades galegas.
Lamentan os populares que coa volta ao curso persistan en Galicia os atrasos dos trens de media distancia que periodicamente denuncian os usuarios deste servizo tanto no Eixo Atlántico como tamén no corredor Avant Ourense-Santiago-A Coruña. Unhas deficiencias derivadas, entre outras razóns por “fallos da infraestrutura, limitacións temporais de velocidade, problemas de diferente índole nas estacións ou fallos mecánicos nos trens”.
“Incidencias que non son puntuais nin esporádicas convertéronse en frecuentes e a veces ata podería aventurarse que se trata de atrasos programados e as limitacións de velocidade, permanentes”, explican os deputados do PPdeG no texto da iniciativa coa que denuncian que “os usuarios non teñen a obriga de aceptar estes atrasos” e piden ao Ministerio de Transportes, a Renfe e a Adif medidas “urxentes e efectivas” para reverter esta situación.
“NON IMOS ADMITIR DO GOBERNO DE SÁNCHEZ O ENÉSIMO RETRASO NA CHEGADA DOS TRENS AVRIL”
A través doutra iniciativa, os deputados do PPdeG no Congreso fanse eco tamén do novo atraso na posta en servizo dos trens Avril de Alta Velocidade en Galicia “coa desculpa da demora na formación dos maquinistas”. Un novo incumprimento que se sumaría a toda a lista de datas “sistematicamente incumpridas” ofrecidas polo Goberno de Sánchez sobre a entrega a Renfe destes trens.
Recordan os parlamentarios populares que en xaneiro de 2022 preguntaron por escrito sobre a data prevista para que os trens Avril circularan pola línea de Alta Velocidade Madrid-Galicia e que “o prazo de verán do 2022 ofrecido pola ministra Raquel Sánchez foi incumprido”. Logo, dixeron que sería no primeiro trimestre de 2023 e “sen pudor incumpriron”.
Insisten neste sentido en que a importancia da chegada destes trens é “imprescindible para incrementar o número de prazas ofertadas e abaratar o prezo dos billetes ao poder transportar máis usuarios con menor gastos”. E, sobre todo, para “facer efectivos os beneficios da Alta Velocidade a Galicia no referente a mellorar os tempos de viaxe que polo momento só se cumpriron coa cidade de Ourense” mentres o resto de cidades galegas “seguen esperando”.
“Estamos cansos e fartos de tanta espera e de tantos incumprimentos do Goberno socialista”, conclúen ao tempo que esixen “que se cumpra a data ultimamente comprometida de novembro de 2023” e “información certa sobre a chegada deste material rodante de ancho variable ás nosas vías e cal e o número de trens e frecuencias contará Galicia para conectarse con Madrid”.
A maiores destas dúas preguntas, os deputados do PPdeG tamén rexistraron a solicitude de comparecencia no Congreso da ministra de Transportes e do presidente de Renfe para informar sobre estes temas.
