A secretaria xeral do PPdeG, Paula Prado, valorou hoxe as cifras de turistas que visitaron a Comunidade ao longo destes meses e prognostica outro ano de récord para o sector: “Galicia non para, tampouco de recibir visitantes e de consolidarse como turístico de preferencia para cada vez máis persoas”.
Unha afirmación que se produciu esta mañá no marco da reunión que mantiveron os membros da Comisión de Turismo do PPdeG, presidida por Noelia Martínez, na sede autonómica do partido en Santiago de Compostela e á que asistiu tamén o xerente de Turismo de Galicia, Antonio Casas.
Esta reunión tiña por obxecto poñer sobre a mesa a situación actual deste sector en Galicia e avanzar na posta en común de propostas de cara ao futuro. Neste sentido, a número dous dos populares galegos considera que “non podíamos estar nun mellor posto de saída”; referíndose así aos últimos datos turísticos.
“Todo parece indicar que este ano volverá ser un ano de récord. Xa o foi o ano pasado, cando rexistramos un total de 6,5 millóns de visitantes. E de aquí a decembro prevese superar esta cifra, xa que a día de hoxe rexistramos xa máis de 5,7 millóns de viaxeiros aloxados na nosa Comunidade”, explicou.
Unhas cifras que, tal e como engadiu, non son froito da casualidade: “Son o resultado de moitos anos de traballo por facer de Galicia un destino turístico amable, acolledor, sostible, adaptado ás novas tecnoloxías e con sentidiño”.
