Santiago, 22 de marzo de 2018.- A viceportavoz do Grupo Popular, Paula Prado, criticou hoxe a “dobre covardía” de En Marea en relación coa situación que vive a deputada Paula Quinteiro: “dunha parte, negándose a dimitir, a pesar do clamor dos seus compañeiros que lle piden que deixe o Parlamento; e doutra parte, a do portavoz do grupo parlamentario, Luis Villares, que non se pronuncia sobre se respalda a actuación da deputada ou lle pide a súa dimisión”.

Paula Prado afirmou que, “como deputada desta Cámara, sinto bochorno e vergoña pola imaxe que se está a trasladar á sociedade por parte da deputada Paula Quinteiro e o grupo parlamentario de En Marea”.

SILENCIOS MÁIS CLAROS QUE PALABRAS

Neste sentido, manifestou que “hai silencios que son más claros que as palabras” e indicou que “nin un só dos deputados de En Marea apoiou publicamente a Paula Quinteiro, nin tan sequera en 140 caracteres como é habitual por parte dos seus compañeiros de filas”.

“Na reunión do grupo parlamentario que tivo lugar onte puidemos ver que Paula Quinteiro non conta co apoio dos seus compañeiros no Parlamento, que lle pediron que entregase a súa acta de deputada para deixar de exercer a presión que está sufrindo o grupo parlamentario das Mareas de Podemos, pero ela negouse a dimitir”, sinalou.

Deste xeito, lembrou que “trasladan ao órgano máximo da organización política de En marea a decisión de pedirlle ou non a dimisión a Paula Quinteiro, nun xuízo que parece que vai ter lugar mañá e no que ela vai estar presente”.

FIN Á LOCUACIDADE DE LUIS VILLARES

Paula Prado incidiu que “o silencio máis clamoroso é o do seu portavoz, Luis Villares, ao que esta situación puxo coto á súa locuacidade habitual, que opina de todo menos do que ten que opinar”. “Estamos agardando que Luis Villares se pronuncie sobre que vai facer cunha deputada do seu grupo, tanto se avala a súa actuación na situación na que se viu implicada, nunha intervención policial na que se estaba identificando a uns señores que ao parecer estaban rompendo coches nas rúas de Santiago, como se pide a súa dimisión”, manifestou.

A viceportavoz popular considerou “sorprendente que digan que o PP politiza un asunto que é do ámbito privado, cando estamos a falar dunha señora que esgrime a súa identificación de deputada nunha situación na que a Policía Local está identificando a uns señores que foron denunciados por uns veciños”. “Non forma parte do ámbito privado de ninguén, senón do ámbito público porque ela é a que saca o carné de deputada, utilizando os supostos privilexios que tanto ten criticado a esquerda rupturista”, engadiu

O ALCALDE DE SANTIAGO, DO LADO DOS VÁNDALOS

Así mesmo, e como santiaguesa, Prado lamentou que o alcalde de Santiago “non se tivera posto do lado dos santiagueses defendendo as súas propiedades e intereses, e se puxera do lado dos vándalos porque parece que algún deles forma parte da súa formación política”.

“Non me parece menor que todos os días asistamos a actos vandálicos nesta cidade e que moitos veciños de Santiago se levanten polas mañás cos seus espellos retrovisores rotos, aos que seguro que non lles fai ningunha gracia que o alcalde diga que é unha cuestión menor”, dixo Paula Prado.