Santiago, 24 de xaneiro de 2022.- O portavoz do Grupo Popular, Pedro Puy, cualificou hoxe como “unha oportunidade única para Galicia e para España” a chegada de fondos europeos pola pandemia da Covid-19, polo que considerou necesario facer “un bo uso deste esforzo da Unión Europea” e reclamou ao Goberno de España “unha xestión transparente sen ningún tipo de cuestionamento”.
Ao remate da reunión dos deputados do Grupo Popular para preparar o Pleno desta semana, Puy salientou a comparecencia do conselleiro de Sanidade nesta sesión “a petición propia e para dar cumprimento ao compromiso asumido polo Grupo Popular na Deputación Permanente celebrada o pasado 13 de xaneiro”.
PROBLEMA XERAL DE FALTA DE MÉDICOS
Pedro Puy sinalou que “estamos nun momento de estabilización da onda de contaxios, aínda que persiste unha importante incidencia do coronavirus”. Neste sentido, lembrou que “estamos ante un problema común de ausencia de médicos no conxunto de España, ante o que a Xunta está a adoptar moitas decisións dirixidas fundamentalmente a minorar a carga de traballo que soportan os profesionais de atención primaria”. En concreto, referiuse á posta en marcha do Covid-auto para a realización de probas, a creación da central de seguimento de contaxios, a colaboración coas farmacias para a realización de test, o acceso aos certificados a través dos sistemas informáticos implantados ou a vacinación en recintos amplos e con persoal específico.
Así mesmo, recordou que na Lei de medidas incorporouse a creación da nova categoría de facultativo especialista en atención primaria, así como a habilitación da categoría de técnico de saúde para levar a cabo funcións de apoio ao persoal médico de atención primaria na xestión de incapacidades temporais e no traballo de prevención da enfermidade.
Porén, o portavoz popular lamentou que desde o Goberno central non se atenda as insistentes demandas realizadas pola Xunta, o Parlamento galego e o PPdeG para o incremento de prazas MIR ou o recoñecemento da especialidade de médico de urxencias. “É importante manter estas reivindicacións, porque o traballo en atención primaria vaise manter no futuro e vai ser moi difícil cubrir os déficits de persoal sanitario”, apuntou.
REPARTO TRANSPARENTE DOS FONDOS
Respecto dos fondos europeos, Pedro Puy salientou que “é a primeira vez que a Unión Europea fai un esforzo deste xeito e un paso adiante esencial na construción da unión europea”. Por este motivo, considerou unha “obriga das autoridades encargadas de xestionar estes fondos de facelo de xeito transparente e sen ningún tipo de cuestionamento”. Neste sentido, considerou “unha obriga do Goberno de España facer unha boa distribución”, polo que demandou que unha “comisión de expertos estableza criterios de reparto que permitan que, de verdade, se faga unha cogobernanza na distribución dos fondos”.
Pedro Puy explicou que o sistema de adxudicación de fondos do Goberno central “exclúe unha avaliación obxectiva externa que evitaría moitos problemas” e lamentou que “para unha vez que Europa da un paso tan importante non sexamos capaces de xestionar un bo reparto destes fondos para transformar a economía produtiva española e galega”.
Respecto do Pleno que se celebra esta semana, o portavoz popular concretou que “demandamos cuestións relevantes para o futuro de Galicia e a recuperación económica”. Así, lembrou que unha primeira proposición non de lei demanda ampliar o programa de apoio ao Xacobeo mediante a extensión das desgravacións fiscais ata o 31 de decembro de 2023. “É unha medida moi importante porque permite conseguir importantes patrocinios para as actividades relacionadas co Xacobeo e facer investimentos ao longo do Camiño de Santiago para dar servizo aos peregrinos”, apuntou.
Unha segunda proposición non de lei ten como obxectivo que Goberno central e Alcoa garantan a reactivación da planta de San Cibrao canto antes. Pedro Puy asegurou que “para nós non é unha boa noticia que en España se deixe de producir aluminio primario”, aínda que recoñeceu que “entendemos a postura dos traballadores, pero debemos preocuparnos pola rápida recuperación da actividade na factoría da Mariña”.
Neste sentido, afirmou que “canto antes se poña en funcionamento e se recupere a produción nesta factoría de Alcoa mellor será para todos”, pero reiterou que “é necesario que o prezo da enerxía en España sexa competitivo e seguiremos insistindo nisto porque non se pode falar dunha crise industrial absoluta en Galicia, senón dunha crise centrada nas industrias electrointensivas”.
