30 de marzo de 2023. O deputado do Grupo Popular e candidato do PP á Alcaldía de Carballo, Rubén Lorenzo, asegurou hoxe no Parlamento de Galicia que a Xunta garante unha praza educativa a todos os alumnos do centro de educación especial de Aspaber, logo de que os xestores deste centro privado-concertado decidiran unilateralmente o cese desta actividade educativa o vindeiro curso 2023-2024.
“A día de hoxe, a solución máis realista, funcional e áxil para responder ás demandas das familias pasa por escolarizar en unidades especiais da contorna aos 20 estudantes que ocupan estas aulas de Aspaber”, concretou.
Rubén Lorenzo afirmou que “compartimos a inquedanza por buscarlles unha solución axeitada e, por suposto, adaptada ás necesidades deste grupo de alumnos, xa que compartimos a crenza de que a atención recibida no centro Aspaber está a ser fundamental no seu desenvolvemento e na súa integración socioemocional”.
CONTINUIDADE NA ESCOLARIZACIÓN
Neste sentido, considerou “fóra da realidade e operatividade” a proposta defendida hoxe polos socialistas no Parlamento galego de garantir a continuidade do centro de educación especial. “Tendo en conta que estamos practicamente no mes de abril, a solución de continuidade deste centro pasa pola total privatización, co custo que isto suporía para as familias, porque a solución dun novo centro posto en marcha nun tempo récord para botar a andar no mes de setembro é sumamente complexa”, explicou o deputado popular.
“O que si teñen asegurado os alumnos e as súas familias é que terán continuidade na escolarización durante o curso 2023-2024 e que será en unidades de educación especial, porque, dentro dun marco inclusivo, respectamos a liberdade das familias á hora de escoller a educación especial para os seus fillos e fillas, particularmente cando estes presentan discapacidades de grao severo”, manifestou.
Lorenzo salientou que “a Xunta respectou a decisión dunha entidade privada de non seguir co concerto educativo que tiñan coa Administración galega, ante o que, no seu momento mantivo diferentes reunións de traballo co equipo xestor, aos que se lles ofreceu total colaboración e disposición para seguir adiante co acordo de concerto”.
“Porén, e ante a decisión unilateral de non presentar a solicitude para renovar o concerto educativo de cara ao vindeiro curso, a Xunta se puxo a disposición das familias buscar as mellores opcións e alternativas que garantan unha praza educativa a estes alumnos no vindeiro curso académico e a normal continuidade do seu proceso de escolarización”.
