Hoxe, no 19º Congreso Provincial do PP de Pontevedra
O presidente dos populares galegos, Alfonso Rueda, subliñou hoxe que o PPdeG debe ser “un partido unido” ante os “moitísimos retos e reclamacións” que ten por diante.
“Temos moitísimos retos por diante, moitísimas cousas que temos que facer e que reclamar. Hai que darlle solucións a toda esa xente que empeza a pasalo mal, por moitos contos que nos conten desde o Goberno”, sinalou durante a súa intervención no 19º Congreso Provincial do PP de Pontevedra.
Rueda incidiu en que o PPdeG ten que enfrontarse a un Partido Socialista que “non é capaz xamais de sacarlle as cores” aos seus dirixentes en Madrid cando “ten tantos motivos”; e a un BNG que “se quere esconder e ir de suave,” cando ao final están mantendo ao Goberno central “para moitísimas cousas”.
Así mesmo, aproveitou para animar aos seus no “reto fundamental” que son os comicios locais do vindeiro ano: “Aí non podemos fallar”, dixo, e engadiu que “falar da quinta maioría absoluta en Galicia e de axudar ao presidente Feijóo está moi ben, pero todo iso pasa por ter bos resultados nas municipais”. “Temos que gañar, non nos vale outro resultado. É a realidade”, apuntou.
“Queda moito traballo por facer, moitas conversas e moitas peticións, e para iso hai que ter moita empatía e moita comprensión”, dirixiuse aos membros do PPdeG, aos que lles pediu “seguir traballando, coller o legado e ser conscientes dos retos que hai, que non son menores”.
“GRAZAS POR SER VALENTE”
No Congreso, celebrado no Auditorio Mar de Vigo, Luis López foi elixido presidente provincial do PP de Pontevedra cun 97,30 % dos votos. Rueda, o seu antecesor, agradeceulle ser “valente” no seu paso adiante e salientou tanto a súa cercanía como o seu “gran equipo”.
“Estou realmente orgulloso de pasar este testemuño”, sinalou o número un dos populares galegos, quen lembrou que esta era a última peza por cubrir dunha transición na que “este partido estivo á altura”.
“Fronte á proba que acabamos de ter, superámola con nota”, concluíu Rueda, quen engadiu por último sobre Luis López que vai ser un “gran” dirixente, no que confía e que lle vai dar “moitas alegrías”.
