2, xullo, 2019. O secretario xeral do PPdeG, Miguel Tellado, valorou os datos de paro do mes de xuño, que reflicten que, na evolución anual, Galicia é a comunidade na que máis baixa o paro (un 8,71%) superando á media estatal en catro puntos. “A estabilidade política permite ao noso mercado laboral ter os mellores datos do Estado”, subliñou.
Como recalcou, as cifras de xuño avanzan un gran verán para o emprego na nosa Comunidade, que suma xa seis anos consecutivos de caída do paro neste mes, situándose a niveis inferiores aos de hai unha década. Así mesmo, a creación de emprego continúa en crecemento e Galicia supera o millón de cotizantes á Seguridade Social aumentando no último ano nun 1,86%, o mellor dato desde agosto de 2010.
Xa na evolución mensual, Tellado salientou que o desemprego descende e a contratación aumenta, reducíndose o paro no último mes nun 3,46% (5.556 persoas), e superando tamén ao Estado en 1,39 puntos. Igualmente, na comparativa co conxunto de España, en Galicia crecen máis o número de afiliacións e a contratación sobe nun 3,76%, mentres que a nivel estatal diminúe nun 3,21%. “Todas estas cifras veñen a confirmar a necesidade de seguir protexendo á nosa Autonomía da inestabilidade institucional do conxunto do Estado», incidiu.
Ademais, o secretario xeral manifestou que os datos nacionais do paro de xuño confirman o que levan repetindo os populares dende hai meses pola falta de iniciativa do Executivo de Pedro Sánchez, que está vivindo dos réditos económicos do legado do PP mentres a economía española se estanca avalada polo descenso por terceiro trimestre consecutivo da venda de coches, unha das principais industrias do noso país.
UNHA GALICIA MÁIS COMPETITIVA, INNOVADORA E PREPARADA
Lonxe de amosarse satisfeito ou caer en triunfalismos, o número dous do PPdeG asegurou que hai que continuar traballando para que a diminución do paro sexa unha constante, poñendo en valor o compromiso do Goberno galego coa humanización da economía para que todas as políticas públicas sigan pensando nas persoas.
Como indicou, a Xunta avanzará nesta estratexia reforzando nos próximos anos aquelas medidas que contribúen a lograr unha Galicia máis competitiva -consolidando o crecemento do PIB a través da transformación dixital da nosa industria-, máis innovadora -continuando na aposta polo talento e pola I+D+i-, e máis preparada -favorecendo o emprego de calidade e apoiando aos nosos emprendedores-.
“Non se trata dunha teoría a vender senón dunha realidade”, aclarou Tellado lembrando que o Executivo autonómico amosa a súa implicación con este obxectivo cada vez que defende a formación flexible, á carta e dual a través do Plan Galego de Formación, co que pretende chegar a 26.000 galegos e galegas nos dous próximos anos; así como cada vez que apoia aos autónomos para tratar de facerlles máis doado ao seu día a día.
