Santiago, 22 de decembro de 2020.- A proposición de lei de simplificación administrativa e de apoio á reactivación económica de Galicia continuará a súa tramitación no Parlamento galego logo de superar hoxe a toma en consideración, co único voto favorable do Grupo Popular.

“Ten un obxectivo moi claro: xerar confianza, porque a confianza é fundamental para lograr a reactivación da nosa economía, apoiar ás empresas, incentivar o consumo e protexer o emprego”, subliñou o viceportavoz popular, Miguel Tellado.

En concreto, Tellado explicou que “para lograr esta confianza esta lei traballa sobre tres eixes: axilización dos trámites administrativos, apoio a empresas e profesionais, e anticipación para aproveitar a oportunidade que representan os fondos europeos”.

Respecto da axilización administrativa para impulsar a actividade económica e a creación de novos proxectos en Galicia, o viceportavoz popular concretou que se fará “simplificando os trámites burocráticos, eliminando duplicidades, aforrando custos, reducindo os tempos de tramitación, simultaneando procedementos e informes, e fomentando a coordinación entre diferentes administracións”.

“Porén, esta axilización en ningún caso significa diminuír garantías nin eliminar a protección a outros valores fundamentais como o medioambiental, o cultural ou o natural”, asegurou.

Un segundo eixo desta proposición de lei do Grupo Popular busca apoiar as iniciativas empresariais, especialmente as máis novas e localizadas no rural. Para isto, Miguel Tellado apuntou que “deseña mecanismos de financiamento para pequenas empresas, crea un sistema múltiple de acompañamento ás empresas e establece beneficios fiscais para apoiar ao rural”.

Neste sentido, salientou que “por primeira vez se regula o concepto de proxecto tractor, ademais de redefinir os proxectos industriais estratéxicos e as iniciativas empresariais prioritarias que amplían a súa capacidade para absorber máis iniciativas e proxectos”.

MECANISMO DE PLANIFICACIÓN

En terceiro lugar, Miguel Tellado afirmou que esta proposición de lei “crea un mecanismo completo e integral de planificación, xestión e control dos fondos europeos”, que “representan unha oportunidade única para minimizar o impacto da pandemia e para transformar a economía galega, impulsando un modelo máis sostible, máis verde e máis dixital”.

O viceportavoz popular indicou que neste ámbito se reforzará a Comisión Next Generation, se creará un comité técnico que auxilie a esta comisión e se establecerán grupos de traballo para a simplificación dos procedementos de subvencións e contratacións, homoxeneizando modelos e boas prácticas.

Tellado sinalou que “as administracións deben ser un apoio para a actividade dos profesionais e das empresas, especialmente nos momentos máis complexos como na actualidade”. Deste xeito, considerou necesario que “mudemos a cultura administrativa” porque “a reactivación pasa porque os gobernos impulsen a actividade e faciliten os procedementos administrativos para que as empresas e profesionais poidan desenvolver a súa actividade para atraer novos investimentos a Galicia e para apoiar iniciativas tanto dos emprendedores como dos proxectos xa consolidados”.

Para rematar, Miguel Tellado amosou a “vontade do Grupo Popular para enriquecer este texto con propostas sensatas dos grupos da oposición e facer unha lei que faga fronte á pandemia sanitaria, económica e social, ao tempo que convertamos a crise nunha oportunidade para avanzar na simplificación administrativa e na reactivación económica”.