Dubida que o Executivo central dea prioridade a Galicia por riba dos seus intereses políticos, cando incluso puxo estes por riba da xestión do COVID
O secretario xeral do PPdeG, Miguel Tellado, agarda que Pedro Sánchez estea igual de interesado en apoiar ao Goberno galego que o está en apoiar ao candidato do PSOE nos comicios cataláns, Salvador Illa.
Así se expresaba nunha comparecencia en rolda de prensa na que se referiu á xuntanza de hoxe entre o presidente da Xunta e o presidente do Goberno, un encontro no que os populares esperan encontrar en Sánchez unha maior sensibilidade cos asuntos que afectan a Galicia da que ten demostrado ata o de agora.
Segundo recordou, desde a última reunión presencial entre os dous dirixentes, en 2018, cambiaron moitas cousas para peor, xa que a Comunidade acumula unha longa lista de agravios do Executivo do PSOE. “Tememos que ás portas duns comicios electorais en Cataluña esta lista aumente. É difícil esperar que o Goberno socialista poña os intereses de Galicia por riba dos seus intereses políticos cando está poñendo os seus intereses políticos por riba, incluso, da xestión da pandemia”, dixo en referencia á renuncia do Ministro Sanidade, en plena crise sanitaria, para ser candidato á Generalitat.
Tellado tamén salientou as seis grandes cuestións que Feijóo demandará ao Goberno central: a ampliación do toque de queda, un calendario de vacinación definido, un consenso nacional sobre o teletraballo, directrices claras para o uso das mascarallas FFP2, un marco normativo axeitado para xestionar a pandemia e un reparto xusto e transparente dos fondos europeos; así como doutras importantes reivindicacións como a improrrogable chegada do AVE, carga de traballo para os estaleiros de Ferrol ou o apoio ao Xacobeo e ás candidaturas a Patrimonio Mundial.
Ademais, sinalou que non se obtivo ningún posicionamento por parte de oposición para estas cuestións, pois a única prioridade do BNG e do PSOE é atacar ao Goberno galego. “Quéixanse de falta de comunicación, pero utilizan as reiteradas comparecencias do presidente no Parlamento unicamente para falar do seu libro e xamais para facer propostas ou buscar acordos”, engadiu.
De feito, lembrou que Ana Pontón chegou ao extremo de criticar o resultado da reunión con Sánchez dous días antes de que esta se produza, demostrando que, ocorra o que ocorra en Madrid, ela xa ten decidida a súa postura, “a de sempre, a critica radical e destrutiva ao Goberno galego”. Mentres, pola súa banda, asegurou que Gonzalo Caballero ten que esperar a ver que di o presidente do Goberno para repetir o mesmo, “continuando co seu labor oficial de loro de repetición de Sánchez en Galicia”.
O EQUILIBRISMO POLÍTICO DO PSOE
Por outra parte, o número dous do PPdeG falou dos dous importantes avances acadados esta semana polo Goberno galego, coa aprobación duns orzamentos excepcionais para a xestión da pandemia e coa primeira lei de España de impulso demográfico; ao tempo que lamentaba que estas iniciativas tivesen que ser aprobadas sen o apoio da oposición.
Como resaltou, mentres o PPdeG avanza na defensa dos intereses dos galegos, o BNG e o PSdeG están tan centrados en ter un pé de páxina nos medios de comunicación que acabarán converténdose “nun pé de páxina na historia de Galicia”, pelexando constantemente consigo mesmos e entre eles.
De igual xeito, o traballo da Xunta tamén contrasta coa actitude dun Goberno central “que vive instalado no equilibrismo político”, empregando cada día piruetas políticas máis extravagantes para manterse no poder, aínda que teña que xogar cos extremos contrarios do arco parlamentario como fixo con Vox e Bildu para aprobar o opaco decreto dos fondos europeos. “Hoxe foi con Bildu e Vox, mañá será con Ciudadanos e pasado con Teruel Existe. O PSOE é o Circo do Sol da política española”, incidiu.
“Fronte a un Goberno do PSOE, moito máis preocupado polas eleccións catalás que por xestionar a crise máis grave da nosa historia recente, e fronte a unha oposición que vive na confrontación permanente; o PPdeG segue traballando co obxectivo para o que o votaron maioritariamente os galegos: poñer fin canto antes á pandemia sanitaria, económica e social”, sentenciou.
