Santiago, 20 de marzo de 2018.- O deputado do Grupo Popular Alberto Pazos subliñou hoxe no Parlamento que “tanto a Xunta como o PPdeG apoiaron e apoian a reclamación para a transferencia da AP-9 á Administración galega”. Así mesmo, criticou a “falta de pudor” dos socialistas por cualificar de “aumento extraordinario” a suba das peaxes na AP-9 aprobada cando gobernaban e indicou que o BNG presente agora iniciativas sobre a autoestrada “por mala conciencia e para limpar o seu historial”.

Alberto Pazos criticou a “ignorancia dos grupos da oposición ao descoñecer o estado das xestións realizadas polo PPdeG para mellorar a situación da AP-9”. Neste sentido, lembrou os avances conseguidos logo da creación da Comisión Mixta integrada por representantes do Ministerio de Fomento e da Xunta, dos que destacou “os últimos: a eliminación definitiva da peaxe de Redondela fixada para o mes de xullo e a non repercusión nas peaxes das novas obras que se executen na AP-9”.

Dirixíndose aos socialistas, o deputado popular criticou a súa “falta de pudor ao cualificar agora na emenda que presentaron como aumento extraordinario a suba das peaxes aprobada polo Goberno socialista”. Ademais, lamentou “o seu cinismo por pedir agora a eliminación da peaxe en Redondela ou a urbanización das Torres de Padín en Vigo, cando non foron capaces de levalas a cabo nun momento no que o Ministerio de Fomento de José Blanco dispoñía de 21.000 millóns de euros de orzamento, o triplo que na actualidade ten ese mesmo departamento”.

Respecto do BNG, Alberto Pazos explicou que presentan iniciativas relacionadas coa AP-9 “pola súa mala conciencia e para limpar o seu historia relacionado con esta autoestrada, xa que sempre actuaron en contra de Galicia”. Neste sentido, lembrou que “no seu momento cualificaron a AP-9 como navallada a Galicia e votaron neste Parlamento en contra da súa transferencia a Galicia, ao tempo que cos seus votos no Congreso de apoio ao Goberno socialista mantiveron a peaxe de Redondela, asumiron obrigas do Estado por sete millóns de euros ao ano e garantiron un beneficio empresarial do 8 por cento para a concesionaria sen tope de vehículos usuarios”.