O portavoz de Lingua do Grupo Popular, José Luís Ferro, reiterou hoxe no Pleno do Parlamento galego o apoio ao uso do galego no Parlamento Europeo, instando aos órganos con capacidade de decisión na materia á toma en consideración da habilitación do uso do galego na Cámara europea. Porén, dirixiuse a BNG e PSdeG para afirmar que “de pouco vale defender o uso da nosa lingua no Parlamento europeo se despois non se reclama para o galego recursos e investimentos por parte do Goberno central, e encima se deixa que Galicia quede atrás porque outros territorios acaparan case todo o financiamento”.

José Luís Ferro asegurou que “no Grupo Popular somos coherentes e estamos a favor da presenza do galego no Parlamento Europeo, tal e como o aprobamos por unanimidade no Parlamento galego con anterioridade, e agora o traballo correspóndelle ao ministro Albares”. “Estamos diante dunha aspiración lexítima, pero tamén é unha cuestión extraordinariamente complexa, tanto desde o punto de vista xurídico como institucional, porque depende de acordos no marco da Unión Europea, que afectan a todas as linguas oficiais dos estados membros”, lembrou.

MAN TENDIDA

“Tendemos a man para seguir traballando en todas as iniciativas que reforcen o galego, que melloren a súa aprendizaxe e que impulsen a súa presenza nos medios e nas novas tecnoloxías, pero non apoiaremos propostas que non teñen a día de hoxe encaixe real nin garantía de resultados efectivos”, manifestou.

O portavoz popular considerou “difícil de explicar que BNG e PSdeG estean dispostos a investir grandes cantidades de diñeiro para levar o galego ao Parlamento europeo, pero calen ante o incumprimento do Goberno de Pedro Sánchez nos seus compromisos con Galicia”.

En concreto, referiuse ao financiamento pendente do Proxecto Nós, unha ferramenta estratéxica que situaría ao galego na vangarda tecnolóxica, na intelixencia artificial e nos novos modelos de comunicación, así como a non tradución ao galego do programa de xustiza Atenea ou o reparto proporcional de fondos audiovisuais destinados ás linguas oficiais. “Cataluña recibe arredor do 80 por cento deses recursos mentres Galicia apenas chega ao 5 por cento”, indicou.