Santiago, 16 de maio de 2017.- O Grupo Popular defenderá no Pleno da vindeira semana que a Xunta de Galicia manteña e promova as axudas para a rehabilitación de vivendas nos Camiños de Santiago e que o Goberno central mellore e clarifique a regulación da publicidade sanitaria para evitar anuncios enganosos.

Ao remate da Xunta de Portavoces, Pedro Puy explicou que a orde do día da sesión plenaria que terá lugar a vindeira semana incorpora 28 cuestións, das que 21 son a iniciativa dos grupos da oposición. “Unha vez máis queda demostrado que o Parlamento galego está aberto ao control ao Goberno por parte da oposición, que tamén trae todas as iniciativas que estima oportuno para o impulso da acción gobernativa”.

PARTICIPACIÓN POPULAR

O portavoz do Grupo Popular indicou que no Pleno debaterase a proposición de lei de iniciativa lexislativa popular para a creación do hospital público e único de Pontevedra mediante a ampliación do Hospital Montecelo, unha vez que cumpre os requisitos para o seu debate nunha sesión plenaria. Deste xeito, manifestou que “os mecanismos de participación popular están funcionando de xeito adecuado, mellorando a apertura do lexislativo ás iniciativas populares”.

Así mesmo, a orde do día do Pleno incorpora a comparecencia do conselleiro de Sanidade para explicar o novo modelo de atención primaria. Puy sinalou que este novo modelo avanza na atención “ás novas circunstancias sanitarias, principalmente o envellecemento da poboación e o incremento da cronicidade, con novas tecnoloxías e formas de organización que facilitan a atención primaria e domiciliaria dos pacientes que precisan asistencia”.

VIVENDAS NO CAMIÑO E PUBLICIDADE SANITARIA

Por parte do Grupo Popular, defenderá dúas proposicións non de lei. A primeira ten que ver coa rehabilitación de vivendas nos distintos Camiños de Santiago, solicitando á Xunta que manteña e promova as axudas como mínimo ata o vindeiro ano 2020. Esta iniciativa busca, por unha banda, “contribuír á mellora da calidade de vida dos veciños que viven no ámbito de afección dos Camiños de Santiago, ao tempo que se recupera o coidado da contorna da Ruta Xacobea”, indicou.

A segunda proposición no de lei ten como obxectivo que o Goberno central mellore e clarifique a regulación da publicidade sanitaria, no relativo a centros, establecementos, bens e servizos, para evitar anuncios enganosos, limitando especialmente todo aquilo que poda constituír un risco para a saúde.

No apartado de preguntas ao Goberno galego, o Grupo Popular cuestionará sobre a avaliación da Consellería do Medio Rural dos efectos das xeadas no sector vitivinícola galego, así como das medidas que se están a adoptar para paliar os danos causados aos viticultores; sobre as actuacións da unidade de Policía Autonómica no ámbito de protección das mulleres vítimas de violencia de xénero; e sobre os novos programas en materia de vivenda que a Xunta ten en marcha ou ten previsto no futuro.

COMPARECENCIA FERROATLÁNTICA

Cuestionado sobre a empresa Ferroatlántica, Pedro Puy avanzou que a Xunta comparecerá no Parlamento “no momento en que haxa unha análise tecnico-xurídica que fundamente a decisión do Goberno galego sobre a petición desta empresa, que goza dunha concesión administrativa”. Neste sentido, apuntou que esta análise “ten que ser fundamentada en dereito e en defensa do interese xeral, que inclúe a defensa dos postos de traballo”.