Santiago, 5 de xuño de 2018. A deputada do Grupo Popular María Antón demandou hoxe no Parlamento a En Marea, no debate dunha moción sobre a protección do patrimonio cultural do Camiño de Santiago, que “amosen ese interese nos concellos onde gobernan para facer bo o dito de que valen as obras, non as palabras”.

María Antón salientou que “foron os gobernos do PPdeG os que creron no Camiño de Santiago, tanto que en 1991 un Goberno do PP creou a Sociedade de Xestión do Plan Xacobeo, un ente exclusivo para poñer en valor a ruta xacobea desde todos os ámbitos e coa vista posta na celebración do Ano Santo de 1993”.

PROXECTO CONXUNTO

“Ademais, se os responsables de En Marea leran o Plan Director do Camiño de Santiago aprobado en 2015 verían multitude de accións dentro de cada liña estratéxica que non son de índole turística”, sinalou. Neste sentido, afirmou que para o PPdeG “o Camiño é un proxecto de conxunto da acción do Goberno galego, integrador con outras administracións e participativo coa sociedade civil, particularmente coas asociacións de amigos do Camiño de Santiago”.

Respecto da solicitude dun informe sobre os danos patrimoniais producidos na última década no Camiño de Santiago, María Antón asegurou que “se a Xunta tivera coñecemento de danos no pasado ou no presente non faría informes, actuaría coa lei, requirindo ou sancionando”.

A deputada popular tamén sinalou que “a solicitude de En Marea de delimitar nun prazo máximo de tres meses os Camiños de Santiago pendentes ratifica que descoñece o que significa un procedemento de delimitación, da súa complexidade para obter o documento de inicio que permita a incoación, e de todo o proceso posterior”.