Santiago, 23 de xuño de 2021.- O portavoz de Educación do Grupo Popular, Ovidio Rodeiro, avogou hoxe no Pleno do Parlamento galego porque a Xunta manteña para o vindeiro curso escolar, cando menos, o mesmo número de docentes que no actual curso, sempre que se manteñan as mesmas medidas hixiénico-sanitarias para afrontar a pandemia da Covid-19 e o Goberno central faga efectiva a achega de recursos específicos como Fondo Covid educativo para a contratación deste persoal docente.
?A @Xunta avanza no Plan Recupera que contará con 1.250 profesores extra,Galicia é a 2ª CCAA con menor ratio de profesor-alumno e estanse celebrando as oposicións máis importantes da historia con case 4.000 prazas e contou cun investimento extra de 152M€ @OvidioRodeiro pic.twitter.com/VgXIAg0FpX
— GrupoPopularGalicia (@GrupoPopularGal) June 23, 2021 >
Ovidio Rodeiro afirmou que “o ensino, ao igual que o resto da sociedade, debe ir recuperando gradualmente a normalidade, e para iso é preciso un protocolo de transición que marque as pautas sanitarias que estableza os recursos necesarios”. Deste xeito, demandou que “o Goberno central concrete, canto antes, os fondos estatais para a Covid-19 cos que imos contar e elabore un protocolo sen ambigüidades nin cambios de última hora, porque a comunidade educativa precisa certezas”.
“Ten que haber os docentes que son precisos en cada momento para atender as necesidades educativas do alumnado galego en cada curso académico, ao tempo que hai que adaptarse aos tempos ordinarios e extraordinarios que vivimos”, sinalou. Rodeiro lembrou que a Consellería de Educación “asume con responsabilidade e con respecto á normativa vixente a tarefa de determinar o número de unidades educativas e os postos de traballo de educación infantil, primaria e secundaria, así como o de profesores especialistas que corresponden aos centros docentes públicos”.
FONDOS PARA SOSTER O ESFORZO ORZAMENTARIO
Neste sentido, criticou que tanto BNG como o PSdeG “negaran ao inicio do curso que o sistema educativo galego contara con máis docentes como medida de reforzo, e agora teñen que recoñecer que ese incremento de persoal existiu e admitir que as súas críticas non se correspondían coa realidade”. “Os grupos da oposición e os sindicatos xogan cos números á baixa cando comeza o curso para denunciar recortes e agora xogan á alza para presionar por incrementos”, sinalou.
O portavoz popular reclamou ao Goberno central que “concrete se vai haber fondos específicos para soster o esforzo orzamentario realizado este curso polas comunidades autónomas no eido educativo, que no caso de Galicia ascendeu a 162 millóns de euros”. Neste sentido, pediu que o Goberno central “cumpra coas comunidades autónomas para que o vindeiro curso se desenvolva con garantías e concrete o reparto de fondos, sen que pase o mesmo co cambio de criterio do reparto do fondo Covid anterior onde nos sisaron 36,3 millóns de euros”.
Para rematar, Ovidio Rodeiro salientou que Galicia parte dunha posición adiantada, xa que ocupa a primeira posición de España no que respecta a investimento por alumno (6.932 euros, 1.200 máis que a media nacional), somos a segunda comunidade con menor ratio profesor/alumno; e o sistema educativo galego conta coa taxa de interinidade da plantilla educativa máis baixa de España (o 7%).
