Santiago, 17 de febreiro de 2021.- A portavoz de Enerxía do Grupo Popular, Marta Nóvoa, incidiu hoxe no Parlamento galego en que “o Goberno central convoque canto antes a mesa para garantir o futuro industrial da fábrica de Alu Ibérica en A Coruña, onde se explique tamén os motivos dos despedimentos realizados nos últimos días que van en contra de todo intento de acadar a paz social nesta empresa”.
Marta Nóvoa lembrou que “a Xunta xa advertiu, desde o primeiro momento, a partir do acordo entre Alcoa e Parter coa supervisión do Goberno de España a mediados de 2019, que o proceso de venda levado a cabo na fábrica de A Coruña era un peche en falso do conflito”. “Non nos cansaremos de repetir que, antes de tomar calquera decisión, é necesario que o Goberno central realice unha auditoría técnica e financeira, para coñecer o grao de cumprimento dos compromisos acordados en xullo de 2019 por parte de Alcoa e Parter, e que despois foron ratificados polo Grupo Riesgo”, engadiu.
INDUSTRIA EN SERIO PERIGO
“É evidente que cun prezo eléctrico en España que está máis de 20 euros/MWh por riba de calquera competidor europeo, o futuro da industria electrointensiva galega está en serio perigo”, manifestou a portavoz popular, que insistiu na necesidade de que o Goberno central “aborde as decisións que garantan un prezo eléctrico competitivo, xa que este será un elemento determinante para o futuro da planta de A Coruña”.
Neste sentido, Nóvoa apuntou que o estatuto da industria electrointensiva, recentemente aprobado polo Goberno central, “resulta a todas luces totalmente insuficiente, xa que nin achega solucións, pois establece máis obrigas que beneficios para a continuidade desta industria; nin achega certezas, pois non recolle as medidas solicitadas por Galicia, Asturias e Cantabria para competir en igualdade de condicións a nivel europeo”.
“Non podemos permitir que en España continuemos sen interrumpibilidade, que en Francia ou Italia é perfectamente legal; nin desmantelando as centrais térmicas, que se tiveron que activar polo alto consumo de enerxía cando non hai enerxía renovable e cando se produce unha eventualidade, cada vez máis probable”, sinalou.
A XUNTA, AO LADO DOS TRABALLADORES
Para rematar, Marta Nóvoa considerou “ofensivo que a oposición diga que a Xunta estivo de espectador, cando desde o primeiro día traballou de forma conxunta e coordinada co comité de empresa e os traballadores de Alu Ibérica”. Así, lembrou que o Goberno galego xa presentou no seu momento, xunto con Asturias e Cantabria, alegacións ao borrador do Estatuto Electrointensivo solicitando un prezo xusto da enerxía para estas empresas.
“Alegacións que non se tiveron en conta e por ese motivo temos un estatuto aprobado hai dous meses que rebaixa a luz para estas empresas electrointensivas arredor de 6 euros no mellor dos casos”, concretou.
