A Comisión 4ª, de Educación e Cultura, do Parlamento de Galicia aprobou hoxe por unanimidade unha proposición non de lei, presentada polo PPdeG, para apoiar e impulsar a elaboración da nova Estratexia de Excelencia da Biotecnoloxía 2030, unha folla de ruta chamada a consolidar Galicia como unha biorrexión europea de referencia.
A iniciativa, defendida polo deputado popular Julio García Comesaña, contou co respaldo de todos os grupos parlamentarios, evidenciando o amplo consenso arredor do carácter estratéxico da biotecnoloxía para o desenvolvemento económico e social da comunidade.
Durante a súa intervención, Comesaña salientou que Galicia leva máis dunha década desenvolvendo políticas públicas continuadas neste ámbito, pasando “dun sector emerxente a un ecosistema innovador estruturado, competitivo e con impacto real na economía galega”.
GALICIA AVANZA CARA Á EXCELENCIA BIOTECNOLÓXICA
O deputado popular puxo en valor os resultados acadados polas sucesivas estratexias impulsadas pola Xunta desde 2015, que permitiron situar Galicia cun ecosistema formado por 66 empresas biotecnolóxicas, máis de 160 entidades vinculadas ao sector e máis de 1.700 profesionais dedicados á I+D biotecnolóxica.
Segundo destacou, os últimos datos publicados polo Instituto Nacional de Estatística confirman esta evolución positiva, cun incremento próximo ao 19 % do gasto en I+D interna en biotecnoloxía en 2024, demostrando que “as políticas públicas aplicadas están a funcionar”.
Neste contexto, a nova Estratexia de Excelencia da Biotecnoloxía 2030 supón un salto cualitativo, orientado non só a impulsar o sector, senón tamén a alcanzar posicións de liderado internacional en innovación, talento e captación de investimento, indicou o deputado popular.
ESTRATEXIA CONSTRUÍDA POLO PROPIO SECTOR
A iniciativa aprobada insta á Xunta de Galicia a culminar a elaboración da nova estratexia garantindo o seu aliñamento co Plan Galego de Investigación e Innovación 2025-2027 e reforzando o seu carácter participativo, coa implicación activa de empresas, universidades, centros de investigación e clústeres como BIOGA.
Comesaña destacou especialmente que o proceso se está desenvolvendo mediante diálogo directo co ecosistema biotecnolóxico galego, a través de consultas públicas e mesas de traballo que permitirán identificar necesidades reais en materia de talento, financiamento e transferencia tecnolóxica.
EMPREGO CUALIFICADO, TALENTO E FUTURO PARA GALICIA
O deputado popular subliñou que apostar pola biotecnoloxía significa tamén avanzar en cohesión territorial e oportunidades profesionais: “Falar de biotecnoloxía é falar de emprego cualificado, de reter talento formado nas nosas universidades e de ofrecer oportunidades de futuro sen que os mozos teñan que marchar de Galicia”.
A proposición aprobada tamén promove a captación de investimento público e privado, o acceso a financiamento competitivo nacional e europeo, e a creación de mecanismos de seguimento que permitan avaliar periodicamente os resultados da estratexia.
O Grupo Popular valorou moi positivamente o apoio unánime da Cámara, ao considerar que reforza a estabilidade e continuidade das políticas de innovación necesarias para consolidar un modelo económico baseado no coñecemento, a ciencia e o talento.
“Cando falamos de ciencia e innovación, o importante non é quen impulsa as iniciativas, senón que Galicia siga avanzando”, concluíu Comesaña.
