Santiago, 24 de marzo de 2021.- O Parlamento de Galicia aprobou hoxe a proposición non de lei do Grupo Popular a través da que se solicita ao Goberno de España que promova as modificacións oportunas na lexislación estatal co obxecto de reducir o tipo impositivo do Imposto sobre o Valor Engadido do 21 ao 10 por cento en todas as prestación de servizos deportivos e de actividade física.
“Os tipos reducidos do IVE, coma calquera instrumento de política fiscal, teñen o obxectivo de abaratar os bens e os servizos considerados esenciais para a poboación, minorando o prezo do produto ou servicio e fomentando o seu consumo”, sinalou a deputada popular Lupe Murillo.
Na súa intervención no Pleno, Murillo explicou que “o deporte é unha actividade presente na vida dunha grande parte da poboación, sendo declarado actividade de interese xeral polo Congreso dos Deputados o pasado ano, ao inicio desta crise sanitaria, sen ningún voto en contra”. Neste sentido, apuntou que “os beneficios desta actividade para a saúde son evidentes, mais non se lle escapa a ninguén que o deporte, como actividade económica e social, foi un dos sectores mais afectados pola pandemia e está a ser unha das últimas en volver á normalidade”. Na actualidade, Galicia é a cuarta comunidade autónoma española en número de empresas dedicadas ao mundo do deporte, e de esas o 85 por cento son instalacións, clubs e asociacións deportivas, e ximnasios.
CLAVE PARA A REACTIVACIÓN
“A redución do IVE, imposto de carácter indirecto que grava o consumo, nun momento como o que estamos a vivir cunha recesión económica por mor da pandemia do COVID-19, pode ser unha das claves da reactivación económica para este sector”, asegurou a deputada popular. Así, engadiu que “a rebaixa deste imposto na cota final vai repercutir no prezo dos servizos, facendo máis atractiva esta actividade”.
Lupe Murillo afirmou que “calquera axuda que potencie o deporte e a actividade física vai ser positivamente valorada polo sector, pero principalmente a diminución do IVE a aplicar ás cotas a cobrar aos usuarios dos servicios e instalacións deportivas fará este servicio moito mais accesible para a poboación, fomentando a actividade física dunha forma importante e pouco gravosa para as arcas públicas”.
Para rematar, a deputada popular agardou que na Comisión de reactivación do Parlamento galego “academos un consenso que permita axudas para bonificar as taxas municipais, deducións en cotas por prestación de servicios deportivos ou licencias federativas ou calquera outras medida que permita temporalmente minorar certas cargas económicas asumidas polo mundo do deporte, nun momento tan complexo coma este”.
A proposición non de lei incorporou, ademais, unha emenda do Grupo Socialista a través da que se demanda á Xunta incluír o sector deportivo nos plans e accións habilitados para as consecuencias económicas derivadas da paralización ou diminución da actividade.
