Santiago, 10 de febreiro de 2021.- O Parlamento de Galicia aprobou hoxe por unanimidade a proposición non de lei do Grupo Popular a través da que se demanda á empresa Siemens-Gamesa que suspenda o ERE da planta das Somozas e acepte a formación dunha mesa de traballo conxunta co Goberno de España, a Xunta e a representación dos traballadores da empresa, que teña como obxectivo atopar solucións que garantan a viabilidade e o futuro da planta.
Así mesmo, pídese á Xunta e ao Goberno central que utilicen todos os mecanismos á súa disposición para lograr que Siemens-Gamesa manteña esta planta, apostando pola súa modernización e pola implantación de novos proxectos industriais que garantan a carga de traballo para os traballadores da empresa.
O viceportavoz do Grupo Popular, Miguel Tellado, amosou “todo o noso respaldo aos traballadores afectados pola decisión de Siemens-Gamesa, compartimos a súa preocupación e faremos todo o posible para axudar na súa loita por continuar traballando, máis se cabe neste momento de transición ecolóxica na que a industria eólica debe ter un papel protagonista”. Neste sentido, representantes do Comité de Empresa da fábrica asistiron en directo, convidados polo Grupo Popular, ao debate desta proposición non de lei no Pleno.
TRANSICIÓN ECOLÓXICA
Na súa intervención, Tellado cualificou de “deslocalización inadmisible” a decisión da empresa de pechar todas as súas fábricas en España para trasladalas a outros países buscando unha fiscalidade e uns custes laborais máis reducidos. Deste xeito, criticou ao Goberno central pola súa política de transición ecolóxica que “abandona a industria tradicional, pecha as centrais térmicas 20 anos antes e permite que unha planta de palas eólicas peche sen solución de continuidade, todo elo engadido a que os fondos de transición ecolóxica non dan chegado e deberían asegurar a continuidade da planta de As Somozas”.
Miguel Tellado demandou ao Ministerio de Traballo que “revise e analice o expediente de ERE porque nós cremos que non é de recibo”. Así, manifestou que Siemens-Gamesa “ten propostas de pedidos enriba da mesa de empresas eólicas galegas, logo da intermediación da Xunta, que lle dotarían de carga de traballo para varios anos”.
“Os gobernos deben traballar da man”, sinalou o viceportavoz popular, quen subliñou que “a Xunta actuou e o leva facendo desde hai meses, ofrecendo colaboración económica, financeira, na busca de posibles contactos e mediando con empresas galegas do sector eólico”. Apuntou que “pretendemos que en As Somozas se poida construír un novo modelo de pala eólica que permitiría carga traballo inmediata”.
Para rematar, Tellado incidiu que “o inimigo común chámase Siemens-Gamesa e todos os grupos políticos e as administracións debemos traballar xuntos para conseguir reverter a decisión da empresa e que a planta de As Somozas siga aberta”.
REINDUSTRIALIZACIÓN DE FERROL
Por outra banda, no debate dunha proposición non de lei do PSeG sobre a reindustrialización da comarca de Ferrolterra, o viceportavoz popular alertou de que “cada vez que escoitamos a un socialista falar de reindustrialización botámonos a tremer, porque esa batalla xa nola contaron tantas veces e sempre co mesmo resultado: centos de despedimentos, cortinas de fume e manobras de distracción”.
En concreto, Miguel Tellado insistiu que “neste momento son catro os problemas que afectan directamente á comarca de Ferrolterra: ausencia total de carga de traballo en Navantia Fene-Ferrol; o peche anticipado e inxustificado da central térmica de As Pontes; a deslocalización de Siemens-Gamesa e o peche da súa planta en As Somozas; e a falta dun prezo competitivo para a industria electrointensiva”.
“Todas as administracións públicas teñen que contribuír para sacar a Ferrol desta crise, pero o Goberno de España ten nas súas mans poñer solucións inmediatas para resolver estes problemas, coa contratación dun barco nos estaleiros da ría de Ferrol, a axilización da construción das fragatas F-110, o desenvolvemento do proxecto Estaleiro 4.0 ou a continuidade da central de As Pontes, orientando a súa actividade cara aos biocombustibles”, manifestou.
