11 de abril de 2023. O Parlamento de Galicia aprobou hoxe a proposición non de lei do Grupo Popular a través da que se solicita ao Goberno de España a convocatoria urxente dunha xuntanza do comisario do Corredor Atlántico coas comunidades de Galicia, Asturias e Castela e León para tratar as necesidades específicas desta infraestrutura de comunicación, para o que se pide un investimento de 8.000 millóns de euros en actuacións prioritarias.
Así mesmo, solicítase a inclusión na rede transeuropea ferroviaria de mercadorías (TEN-T) o denominado trazado norte: liña Ferrol-A Coruña-Betanzos-Lugo-Monforte-León, coa correspondente dotación orzamentaria que permita a súa completa electrificación.
O portavoz popular de Infraestruturas, José Manuel Balseiro, manifestou que “a falta de impulso e de avances no desenvolvemento do Corredor Atlántico é hoxe unha evidencia incuestionable que motiva unha gran preocupación por parte da Xunta e das comunidades do noroeste, preocupación compartida tamén polas organizacións empresariais”.
NADA SE FIXO DESDE 2019
“Practicamente nada se tiña movido no Corredor Atlántico noroeste desde que, a comezos de 2019, o Ministerio de Transportes presentara o seu plan”, lamentou Balseiro, quen salientou que “para rachar esta parálise o pasado 27 de xaneiro tivo lugar en Santiago un cumio no que as comunidades do noroeste insistiron na súa petición de impulsar o corredor”.
Froito desta reunión, e coincidindo coa súa celebración, o Goberno de Pedro Sánchez nomeou un comisario para o Corredor Atlántico, como interlocutor entre as administracións e as entidades, ao tempo que as comunidades autónomas presentaron unha estratexia conxunta para que o Goberno de España elabore o futuro Plan Director, no que se recolla de forma detallada e cun calendario preciso os investimentos e as actuacións necesarias, cifradas en preto de 8.000 millóns de euros.
“O nomeamento deste comisario serviu para constatar que o Goberno de España non iniciou aínda a elaboración deste Plan Director do Corredor Atlántico, que non se espera que estea elaborado ata o futuro mes de outubro”, explicou o portavoz popular, quen engadiu que “o documento trasladado polo comisionado ás comunidades inclúe erros, imprecisións e ausencias notorias, como a saída sur de Vigo ou as variantes dos Peares, Canabal, Monforte, Covas e Manzanal.
HORIZONTE TEMPORAL PARA 2040
Respecto dos prazos de execución do Corredor Atlántico, José Manuel Balseiro cualificou de “pouco crible a data de 2032 para estar operativo, porque a estratexia coordinada e conxunta elaborada polas comunidades autónomas, identificando obxectivos concretos e actuacións prioritarias, establece como horizonte temporal o ano 2040”.
“A unidade de acción puxo sobre a mesa a necesidade de que o Goberno de España impulse con decisión o Corredor Atlántico, unha infraestrutura clave para que Galicia non quede illada no mapa das infraestruturas continentais”, manifestou o portavoz popular.
