Santiago, 31 de xaneiro de 2022.- O portavoz de Emprego do Grupo Popular, José Manuel Balseiro, demandou hoxe ao Goberno central que reasigne á Comunidade galega os 70 millóns de euros que quedaron sen executar dos dous últimos plans de rescate deseñados polo Goberno central, “pero cunhas condicións de acceso máis sinxelas para que os cartos cheguen aos empresarios e autónomos que o necesitan”.

José Manuel Balseiro lamentou que a viceportavoz socialista “volva hoxe a insistir nunha cuestión que xa foi aclarada pola conselleira de Emprego no último Pleno do Parlamento galego, informando, ademais, de que xa remitiu sendas cartas ás ministras Nadia Calviño e María Jesús Montero pedindo que se reasignaran a Galicia estes cartos que non quedaron comprometidos”.

En concreto, o portavoz popular explicou que “Galicia executou o 70 por cento dos fondos estatais xestionados a través dos 3º e 4º plans de rescate, o que supón cerca de 70 millóns de euros”. “O motivo desta falta de demanda foi os difíciles requisitos e a sobrecarga burocrática esixida polo Goberno central para acceder a estes fondos, o que ocasionou que en seis meses só se recibiran pouco máis de 15.000 solicitudes e se abonaran 166 millóns de euros”.

SEMENTAR DÚBIDAS

“Esta situación contrasta notablemente coa execución dos 1º e 2º plans de rescate activados con fondos autonómicos, que permitiron que o tecido empresarial galego recibira nun tempo récord de catro meses 182 millóns de euros logo da tramitación de 80.000 solicitudes”, apuntou.

Balseiro lamentou que a viceportavoz socialista “semente dúbidas sobre a xestión dos fondos de rescate por parte da Xunta co único obxectivo de defender ao Goberno de Pedro Sánchez, cando o que debería preocuparlle son as trabas que os empresarios e autónomos galegos tiveron que salvar para poder acceder a estes fondos polos requisitos que se lles esixían desde a Administración do Estado”

“Se extrapolamos os datos de Galicia, que é das comunidades con mellor execución destes fondos, ao conxunto do Estado, resulta que o Ministerio de Facenda vai recuperar uns 2.000 millóns de euros dos 5.000 millóns que destinou ás comunidades autónomas peninsulares”, sinalou.