Indica que os alcaldes e alcaldesas actuais das urbes “teñen o 28 de maio de 2023 a súa data de caducidade” e engade que os populares “saímos a gañar”

A secretaria xeral dos populares galegos, Paula Prado, reivindicou ao PPdeG como o partido das cidades e asegurou que a súa formación contará cos mellores candidatos en cada unha das urbes galegas: “Coma no balonmán, teremos un sete inicial de luxo”.

Deste modo se expresaba antes de dar comezo á reunión no Comité de Cidades, un órgano que lidera José Manuel Rey -no que participaron representantes do partido en todas as urbes- e que ten como finalidade poñer en común sete obxectivos primordiais para Galicia, as medidas na contorna urbana e os intereses dun millón de galegos, xa que as cidades teñen que ser unha parte relevante das políticas da organización.

Prado apuntou que os populares avanzan “de xeito seguro” e aclarou que “para nós sempre veñen primeiro o proxecto común, que xa o temos; despois os equipos, que están rematando de definirse; e finalmente os nomes concretos”. Nese senso, lembrou que xa contan con tres líderes confirmados en Vigo, Pontevedra e Santiago, e pronto se coñecerán os da Coruña, Ferrol, Lugo e Ourense.

Como resaltou, o partido traballa para que a vida dos habitantes das sete cidades sexa cada día mellor e explicou que o traballo, a familia e o futuro, eixos desta nova etapa do PPdeG, marcarán os quefaceres da organización sen esquecerse de escoitar aos verdadeiros protagonistas: os veciños.

“Os sete alcaldes e alcaldesas actuais teñen o 28 de maio de 2023 a súa data de caducidade”, dixo engadindo que os populares “saímos a gañar”. Igualmente, salientou que o PPdeG é o partido da cidade: o da veracidade en todas as súas accións, o da felicidade para todos os veciños, o que está ao carón da nosa mocidade, o da velocidade á hora de solucionar os problemas e o que ten capacidade para xestionar un gran municipio.

O PPdeG MELLORA AS CIDADES

En declaracións aos medios de comunicación, a número dous dos populares galegos subliñou que, aínda que non sexa desde a Alcaldía, a súa formación é a que está facendo mellores as nosas cidades. Neste sentido, fixo referencia ao que acontece en Vigo, onde, fronte ao victimismo constante de Abel Caballero, o seu partido ofrece proxectos reais, a Sanidade pública e o Hospital Álvaro Cunqueiro son unha referencia a nivel mundial, acaba de rematarse a Cidade da Xustiza e a Xunta segue impulsando a vivenda pública.

No que respecta á Coruña, recordou que o Goberno autonómico inviste máis de 400 millóns de euros no Novo CHUAC, impulsou a nova intermodal e realiza actuacións de futuro como a pasarela de Santa Cristina. Así, ante experimentos do PSdeG reconvertidos en enfrontamentos internos, remarcou que os populares si contan cunha alternativa apegada á realidade da urbe.

Sobre Lugo, Prado lamentou que o bipartito que goberna o Concello non teña reparos en dar a coñecer as súas discrepancias mentres a cidade languidece, contrapoñendo esta actitude coa dos populares, que seguen adiante co novo Barrio da Residencia e coa nova residencia de maiores, un elemento común en todos estes concellos.

No caso de Ourense, manifestou que formar parte do Executivo municipal capacita á súa formación para decidir o que cre que é mellor para a urbe, batendo tamén alí récords en investimentos, principalmente no eido sanitario.

Pola súa parte, admitiu que “Santiago non sería Santiago sen o noso apoio ao Xacobeo e a todo o sector turístico, pero á vez ao Clínico ou á unha mobilidade sostible”: “Nós tomamos a iniciativa fronte o cansazo que carrexan o alcalde e o seu equipo”.

Finalmente, aseverou que o seu partido tamén é a mellor alternativa en Pontevedra e Ferrol, dous concellos nos que os proxectos non funcionan se non levan a marca PPdeG.