O presidente do Partido Popular de Galicia, Alfonso Rueda, contrapuxo hoxe o compromiso “con feitos” do seu Goberno coa provincia e coa cidade de Ourense fronte a un Pedro Sánchez “tan cercado pola corrupción que non lle queda tempo para gobernar”.
Durante a súa intervención na cea de Nadal do PP na provincia de Ourense, que encabezou xunto ao presidente provincial do partido, Luis Menor, o líder dos populares galegos reivindicou o fundamental de contar con equipos cohesionados, unidos e nos que todos contribúan ao obxectivo de estar pegados ao territorio, saber o que demanda a cidadanía e responder ante iso.
Unha cuestión que, como explicou, ten que facerse valer ao longo do próximo ano coa vista posta nas eleccións municipais de 2027. “Temos que demostrar do que somos capaces, saír a dalo todo e sen dar nada por gañado”, remarcou ao tempo que se amosaba convencido de que o PP de Ourense, como sempre, volverá superar calquera expectativa.
“A xente confía en nós porque gobernamos, porque temos sentidiño e porque damos certeza”, reivindicou poñendo como exemplo destas certezas as que se recollen nuns Orzamentos de 2026 que “apostan decididamente por Ourense”.
Neste sentido, sinalou a aposta do Goberno galego por reforzar o investimento en vivenda, o esforzo investidor no Complexo Hospitalario de Ourense —con máis de 35 millóns de euros—, a nova residencia da Fundación Amancio Ortega ou os 14 millóns de euros destinados a melloras en centros educativos de toda a provincia. Ao que habería que engadir ademais outros investimentos en abastecemento, saneamento ou no centro de ciberseguridade.
Mentres Galicia goberna, remarcou Rueda, o exemplo de todo o contrario atópase nun Goberno de España cuxo presidente está “cercado por una corrupción que é un suma e segue”, ao que “nunca lle dan as contas” e que “nunca cumpre o que promete”. Neste sentido concluíu: “España merece moito máis que a trama do 2%, que Koldos, que Ábalos ou que Leires”.
O 2026 PRESÉNTASE COMO “UN ANO DECISIVO”
Pola súa banda, o presidente provincial do PP de Ourense, Luis Menor, quixo poñer en valor na súa intervención a multitudinaria resposta da militancia a esta convocatoria na medida en que demostra a capacidade de mobilización dos populares ourensáns.
Agradeceu a presenza do presidente do PPdeG, “cumprindo unha vez máis coa súa palabra” logo de que se comprometera a visitar Ourense periodicamente. Ademais, destacou a implicación mostrada polo líder dos populares galegos coa provincia “desde o minuto un” durante a terrible onda de lumes de agosto.
O presidente provincial afirmou que a cea de Nadal do PP de Ourense “é a Xunta Directiva máis importante de cantas pode celebrar o partido”, xa que “grazas a todas ás persoas que nos seguen, apoian e votan —en referencia aos militantes e simpatizantes asistentes— podemos presumir de ser o partido de Ourense”.
O 2026, engadiu, pode ser “un ano decisivo” tanto pola proximidade dunha posible dunha convocatoria de eleccións xerais como polo traballo que hai que facer de cara ás eleccións municipais de 2027: “Imos acelerar a actividade do partido, o contacto e a escoita da veciñanza para ofrecer a mellor resposta que a cidadanía espera de nós”.
Precisamente coa mirada posta nas municipais, lembrou que o PP de Ourense está desenvolvendo “un traballo de actualización, renovación e consolidación dos seus piares como son as agrupacións locais”. Un proceso que é, segundo concluíu, “o paso fundamental para construír unha alternativa de goberno cun proxecto que ilusione”.
