Celebra que Galicia decidise non importar o desgoberno do Executivo central e teña un Goberno cun proxecto único, definido e con rumbo claro.
18, setembro, 2020. O secretario xeral do PPdeG, Miguel Tellado, asegurou que o seu partido cumpriu co compromiso de poñer a funcionar o antes posible todas as institucións autonómicas logo das eleccións e conseguiron adaptarse en moi pouco tempo ás novas necesidades ocasionadas polo contexto actual. “Demostramos que seguimos a traballar en todas as frontes para combater a pandemia, mellorar a situación sanitaria e reactivar todas as actividades coas máximas garantías posibles”, salientou.
Pola contra, manifestou que sería un exercicio de política-ficción pensar como sería hoxe o Goberno galego co multipartito na Xunta. De feito, explicou que non hai mellor espello no que mirarse que o Executivo central coa súa incapacidade para aprobar os proxectos de lei e os decretos que queren levar adiante, con problemas serios de descoordinación entre ministros e con carencias notables para negociar uns novos Orzamentos, o que semella que os está levando a asumir que teremos que comezar 2021 prorrogando unha vez máis as contas de 2018 -aprobadas o Goberno do PP-.
“Afortunadamente, Galicia decidiu non importar a fórmula de desgoberno que temos no Executivo central, así que hoxe temos un Goberno autonómico cun proxecto único e definido, cun rumbo claro e preparado para o que se vai atopar nos vindeiros meses”, destacou o número dous do PPdeG. Ademais, subliñou que isto quedou claro con tres fitos acontecidos esta mesma semana: o reforzo no persoal educativo para mellorar a seguridade na volta ás aulas, a renovación de equipos na estrutura da Xunta e a tramitación de tres proxectos de Lei que quedaron pendentes da pasada lexislatura.
PROFESORADO REFORZADO
Na súa comparecencia en rolda de prensa, Tellado resaltou que a Xunta vén de reforzar o cadro de persoal de profesorado dos centros de ensino públicos coa contratación de 1.890 profesores neste curso, o que supón un incremento do 6,2% sobre a plantilla total de profesorado en Galicia.
Concretamente, 1.107 son novos profesores para as etapas de ESO, Bacharelato e FP (847 para dar aínda maior seguridade nas aulas e 260 novos para atender ao incremento de oferta) que se incorporarán de xeito inmediato e estarán a vindeira semana no primeiro día de clase. Do mesmo xeito, tamén se incorporaron 240 novos docentes de Infantil e Primaria (xa desde a semana pasada) e 543 novos docentes de apoio (221 para Primaria e 322 para ESO que se contratarán a través do Programa ARCO de reforzo educativo).
“Con este reforzo dos equipos docentes, entendemos que se dá resposta á principal demanda da comunidade educativa e que se cumpre co compromiso de atender as necesidades de profesorado expostas polos centros”, aseverou indicando que esta é a acción máis importante da Xunta para o desenvolvemento do curso coas máximas garantías de seguridade e calidade.
Igualmente, malia que unha minoría empregou esta cuestión como arma política contra un Goberno recén nomeado e lexitimado polas urnas, Tellado sinalou que “é de xustiza darlle ás grazas ao profesorado, pola súa responsabilidade e profesionalidade neste arranque de curso”.
EQUIPOS PREPARADOS E ILUSIONADOS
Por outra banda, o secretario xeral falou dos nomeamentos que onte realizou o Consello da Xunta e que definiu como “uns equipos que combinan experiencia e renovación, que sempre foi a clave do éxito deste proxecto; adaptados á nova situación e ás novas necesidades da Comunidade; e preparados e ilusionados para traballar por Galicia e para acertar nas decisións que haxa que tomar, que é o máis importante”.
Nese sentido, agradeceu a xenerosidade e a disposición dos que asumen os seus novos cargos pero tamén a daqueles que os deixan, conscientes de que sempre traballaron na defensa dos intereses da nosa autonomía. “Os relevos non só significan unha renovación da estrutura do Goberno, senón un reforzo do Grupo Parlamentario, con perfís cunha ampla traxectoria e experiencia, que será necesaria tamén no ámbito do lexislativo”, engadiu.
AS PRIORIDADES DE GALICIA
Tellado tamén se referiu a reactivación do calendario lexislativo autonómico, retomando tres proxectos de Lei de primeira magnitude: o de ordenación do territorio, o de pesca continental e o de impulso demográfico -este último un texto pioneiro en España, que persegue o obxectivo de seguir convertendo a Galicia no mellor lugar para formar unha familia-.
“Estas tres leis son tres mostras de que, malia que a pandemia condicionou e ralentizou moitas cuestións, sabemos cales seguen a ser as prioridades e os problemas de Galicia e seguiremos traballando desde as institucións para dar resposta ás necesidades dos galegos”, salientou.
