Alfonso Rueda sostén que o peso de Ourense no novo Goberno galego é acorde á importancia da provincia na Galicia que funciona

O presidente do PPdeG, Alfonso Rueda, salientou hoxe que o peso de Ourense na estrutura do novo Goberno galego responde á importancia que esta provincia ten á hora de facer que Galicia funcione e siga facéndoo aínda con maior intensidade ao longo desta nova lexislatura.

Así o asegurou hoxe na reunión da Xunta Xestora Provincial do PP de Ourense, na que tamén participaron o responsable de Emprego, Comercio e Emigración, José González, e o resto de novos altos cargos ourensáns da Administración autonómica: Marisol Díaz Mouteira (directora xeral de Patrimonio Natural), Gabriel Alén (director xeral de Comercio e Consumo), Victoria Núñez (directora da Axencia de Protección da Legalidade Urbanística) e Iago Borrajo (secretario xeral técnico da Consellería de Vivenda e Planificación de Infraestruturas).

Cómpre salientar tamén a continuidade de Miguel Santalices como presidente do Parlamento de Galicia, así como de Antonio Rodríguez Miranda (secretario xeral de Emigración), José Manuel Merelles (director da Axencia de Turismo de Galicia), Ana Méndez (xerente de Galicia Calidade), Pablo Fernández Vila (director xeral de Planificación Enerxética e Recursos Naturais), Judith Fernández (directora xeral de Ordenación e Innovación Educativa) e Sonia Rodríguez-Campos (directora da Escola Galega de Administración Pública) e Belén Gómez (xefa da Área de Turismo Termal).

A todos eles o líder dos populares galegos pediulles responsabilidade, esforzo e compromiso; reafirmando así mesmo a súa aposta persoal por cumprir a palabra dada no que respecta á provincia e as propostas electorais formuladas durante a campaña. Unha aposta que se traduce na súa decisión de acompañarse dun equipo que, tal e como asegurou, traballará ao estilo de Ourense.

Agradecendo novamente os resultados electorais acadados na provincia, o presidente Rueda asegurou que os ourensáns terán voz no lugar onde se toman os decisións e terán ademais a 8 defensores de Ourense no Parlamento galego.

Na reunión tamén interviñeron os novos conselleiros do Goberno galego, María Martínez Allegue, Antonio Gómez Caamaño, José López e María José Gómez, que se deron así a coñecer entre o partido provincial e fixeron unha breve presentación das liñas mestras dos seus departamentos.

LUIS MENOR PIDE “TRABALLO E DEDICACIÓN” AOS NOVOS CARGOS

Pola súa banda, o líder provincial do partido, Luis Menor, agradeceu ao presidente Rueda “a confianza depositada nas mulleres e homes do PP de Ourense elixidos para formar parte do goberno galego” e afirmou que “responderán con traballo e dedicación para contribuír a desenvolver o estilo Galicia”. Con todo, pediu aos novos cargos que “non esquezan que tamén representan a Ourense e a un partido que sempre está baixo a mirada atenta dos ourensáns”.

Para Luis Menor, esa atención da cidadanía “parte da necesidade de ter alternativas”, destacando que nas eleccións autonómicas “os electores puideron comprobar que o PP de Ourense estaba forte e ofrecía un proxecto serio e rigoroso”. Algo que se reflectiu nos bos resultados obtidos nas autonómicas, “onde un de cada dous ourensáns votaron ao PP”.

“Os votos pídense, pero logo débense”, advertiu neste sentido antes de incidir en que chegou o momento de comezar a cumprir os 12 compromisos adquiridos durante a campaña electoral para desenvolver proxectos na cidade de Ourense. “Farémolo coa axuda de Alfonso Rueda e do novo goberno representado hoxe aquí na figura das novas incorporacións e aos que felicito publicamente”, concluíu.

Manifesto do PPdeG en defensa da Lei de ordenación e xestión integrada do litoral de Galicia

Galicia non se entende sen a súa costa. Non en van, somos a comunidade autónoma marítima por excelencia, co litoral máis longo de toda España, e dispoñemos dun dos ecosistemas mariño-costeiros máis variados e ricos do mundo. A esta riqueza ambiental súmase unha beleza paisaxística excepcional.

Uns extraordinarios valores ambientais do litoral que deben ser obxecto de especial protección. Estamos a falar de 2.500 quilómetros de costa, 40.000 postos de traballo e 9.000 millóns de euros de actividade económica, o que supón case un 5% do PIB da Comunidade.

Unha costa única no mundo e que Galicia quere e pode xestionar, xa que conta desde hai anos coas competencias de ordenación. Así o recoñece o noso Estatuto de Autonomía, e así o ratificaron o Consello Consultivo e o Tribunal Constitucional.

O Tribunal Constitucional vén de avalar por unanimidade a Lei de ordenación do litoral, unha norma feita por e para Galicia, que aposta por unha xestión integrada desde unha tripla perspectiva: ambiental, social e económica, seguindo o camiño que marca Europa. E que ademais persegue a xestión sostible da nosa costa tanto no ambiental como no socioeconómico, promulgada desde onde mellor se coñece.

Tras este respaldo xudicial, agora é o momento de recuperar os meses perdidos debido ao recurso do Goberno central. Un recurso máis político que xurídico, e que é un claro exemplo da diferenza de trato a Galicia con respecto a outras comunidades, coas que si dialogou e chegou a acordo, como Cataluña, Illas Baleares e o País Vasco.

A sentenza do Alto Tribunal avala que a norma galega é plenamente constitucional, fronte a todos os que a definiron como unha auténtica declaración de independencia. Deixa claro que non é necesario reformar o noso Estatuto e pon de manifesto a pouca altura de miras da oposición galega, BNG e PSOE, que deixaron pasar a oportunidade de apoiar unha norma vital para Galicia e para o seu desenvolvemento, só por buscar rédito político.

Ábrese, neste momento, un tempo novo para Galicia. O tempo de xestionar o noso litoral con todas as garantías e con toda a seguridade. É o momento de aportar seguridade xurídica ás empresas e á cidadanía, e de poñer fin a situacións incomprensibles que tratan de borrar toda presencia humana no litoral.

É a hora de recuperar o tempo perdido e de comezar a aplicar o antes posible a lei, sempre en beneficio de Galicia e do seu futuro. E tamén de esixir ao Goberno central o inmediato traspaso de medios materiais e persoais para que a Xunta poida outorgar as concesións no dominio público marítimo-terrestre.

Galicia merece poder empezar a xestionar a súa costa sen atrancos. Favorecendo o mantemento das vilas litorais que viven do mar, garantindo o desenvolvemento das súas actividades por medio da explotación sostible, equilibrada e responsable dos recursos. Todo isto tendo como base un asesoramento científico sólido e tendo en conta os aspectos ambientais, económicos e sociais.

Galicia xa o sabía, pero agora xa o sabe todo o mundo: cumprindo cos preceptos establecidos pola Unión Europea, a Lei de ordenación e xestión integrada do litoral é o mellor para a nosa Comunidade e para o noso futuro.

Como defendemos sempre desde o Partido Popular: Galicia sae gañando. É o momento de xestionar o noso litoral.

O Grupo Popular solicitará no Parlamento galego que o Goberno central ceda os medios materiais e persoais para xestionar o litoral

O Grupo Popular pedirá no Parlamento de Galicia que o Goberno de España, unha vez que o Tribunal Constitucional recoñeceu que a Comunidade galega ten as competencias en materia de litoral, traspase os medios materiais e persoais necesarios para xestionar a súa costa. Neste sentido, o portavoz popular, Alberto Pazos, criticou que o BNG volvera presentar onte, por terceira vez, unha proposición de lei pedindo ao Goberno de España esta transferencia sobre o litoral, levando á práctica o que esconderon durante a campaña electoral: que o Tribunal Constitucional deixe de exercer funcións en Galicia e, para iso, non atopan mellor reacción que facer oídos xordos á sentenza que esta institución xudicial acaba de ditar favorecendo os intereses de Galicia”.

Alberto Pazos comezou a súa comparecencia ante os medios felicitando, no nome de todo o Grupo Popular, “aos deputados que esta semana nos deixaron para asumir responsabilidades no Goberno galego ou como novo senador: Martina Aneiros, Delegada da Xunta en Ferrol; Javier Arias Fouz, delegado da Xunta en Lugo; José Manuel Balseiro, novo senador; Victoria Núñez, directora da Axencia de Protección da Legalidade Urbanística; Gabriel Alén, director xeral de Comercio e Consumo; Antonio Rodríguez Miranda, secretario xeral da Emigración; Marisol Díaz Mouteira, directora xeral de Patrimonio Natural; e Silvestre José Balseiros, director xeral de Gandaría, Agricultura e Industrias Agroalimentarias”. Ao mesmo tempo, deu a benvida aos novos deputados que, ao longo destes días, cumprimentarán a documentación correspondente para tomar posesión no vindeiro Pleno.

O portavoz popular amosou a súa satisfacción pola sentenza do Tribunal Constitucional que, por unanimidade, avalía a Lei de ordenación e xestión integrada do litoral de Galicia, “desestimando 70 das 72 impugnacións realizadas polo Goberno de Pedro Sánchez; referendando o traballo levado a cabo por parte do Goberno galego de cara a dar seguridade xurídica ás actividades estratéxicas no dominio público marítimo-terrestre, e ratificando que Galicia ten plenas competencias para xestionar o seu litoral, sen necesidade de solicitar ao Goberno do Estado a súa transferencia, como pretendían tanto desde as filas do BNG como do PSdeG, a pesar do informe elaborado polo Consello Consultivo de Galicia que avaliaba a postura do Goberno galego”.

Deste xeito, felicitou “ao Goberno de Alfonso Rueda e aos técnicos e especialistas que elaboraron a Lei galega do litoral e defenderon a Galicia ante o ataque que perpetrou o Goberno central contra o noso autogoberno, porque a súa eficacia e bo traballo tivo como recompensa o recoñecemento do máximo tribunal de xustiza español”. “Conseguiron sacar adiante unha norma sobre a que o Goberno de Pedro Sánchez negouse a dialogar e negociar, ao tempo que recoñecía a outras comunidades estas mesmas competencias, a pesar de que os seus Estatutos de Autonomía teñan exactamente a mesma redacción nesta materia que o galego”, dixo.

Á ESPERA DAS DESCULPAS DE BNG E PSdeG

Pazos lamentou que “seguimos á espera de que tanto o BNG como o PSdeG presenten as súas desculpas, tanto á Xunta como a todos os galegos, por desprezar o noso Estatuto de Autonomía e pretender demorar a aplicación da nosa Lei do Litoral insistindo na necesidade dun engorroso proceso de transferencia para que Galicia tivera as competencias sobre o seu litoral”.

En concreto, sobre o BNG lembrou que a súa defensa do autogoberno de Galicia traduciuse, de xeito sorprendente, no rexistro e debate no Parlamento galego de dúas proposicións de lei a través das que pedían a tramitación no Congreso da solicitude ao Goberno do Estado da transferencia das competencias sobre o litoral”. Ambas iniciativas foron rexeitadas porque “atrasarían sine die a cesión das competencias sobre o litoral a Galicia, cando, como lles repetimos incansablemente, estas competencias xa están recollidas no noso Estatuto de Autonomía”.

“Pero é que onte mesmo, para seguir incidindo no ridículo, volveron presentar por terceira vez a mesma proposición de lei”, sinalou o portavoz popular, quen explicou que deste xeito os nacionalistas galegos “levan á práctica o que esconderon durante a pasada campaña electoral: a súa intención de que o Tribunal Constitucional deixe de exercer funcións en Galicia, e para iso, non atopan mellor reacción que facer oídos xordos á sentenza que acaba de ditar o máximo órgano constitucional favorecendo os intereses de Galicia”.

Respecto dos socialistas galegos, Alberto Pazos lembrou que “pasaron nun primeiro momento de dividirse sobre a necesidade ou non de reformar o Estatuto de Autonomía para que Galicia tivera as competencias sobre o seu litoral, a posicionarse, coa chegada de Besteiro á Delegación do Goberno, totalmente a favor de reformar o Estatuto para asumir estas competencias”. “Felizmente, a sentencia do Tribunal Constitucional botou abaixo as pretensións tanto de nacionalistas como de socialistas e recoñeceu que o Estatuto de Autonomía xa recolle as competencias de Galicia sobre o seu litoral”, incidiu.

“Agora queda pendente que o Goberno de Pedro Sánchez dea o trato que se merece a Galicia e traspase os medios materiais e persoais necesarios para xestionar a súa costa, nas mesmas condicións e coa mesma tramitación que as comunidades que recibiron antes estes servizos a través dun Real Decreto”, sinalou Pazos. Con este obxectivo, o Grupo Popular xa rexistrou unha proposición non de lei no Parlamento galego, “onde se poderá volver a comprobar de que lado están o BNG e o PSdeG: se seguen coa súa negativa a recoñecer as lexítimas competencias que ten Galicia no seu Estatuto ou se suman ao PPdeG pedindo ao Goberno central a transferencia dos medios necesarios para exercer as súas competencias, poñéndose do lado dos galegos e defendendo os seus intereses”.

Alberto Pazos critica a “mandíbula de cristal dos socialistas para lanzar bulos sobre políticos que non sexan da súa cor, pero non aceptan crítica ou denuncia sobre as súas actuacións sospeitosas”

O portavoz do Grupo Popular, Alberto Pazos, criticou hoxe a “mandíbula de cristal que teñen os socialistas, e particularmente Pedro Sánchez, aos que lles gusta parecer vítimas para, deste xeito, intentar conseguir algún beneficio político e a condescendencia dos cidadáns ante as súas presuntas fechorías”. Neste sentido, manifestou que “os galegos debemos amosar o noso orgullo e satisfacción pola estabilidade política da que gozamos en Galicia, cun goberno que traballa e que só busca o benestar de todos os galegos”.

Alberto Pazos afirmou, ante o “retiro de meditación” que decidiu facer o Presidente Sánchez, que “estamos diante dunha decisión sen precedentes na política española, asumindo unha deixación de funcións e irresponsabilidade total por parte de quen preside o Goberno de España”. Neste sentido, explicou que “Pedro Sánchez ten un problema xudicial ao atoparse a súa muller nun proceso xudicial por presunto tráfico de influencias e corrupción de negocios, e coa súa decisión converte a todos os españois en telespectadores do seu melodrama, degradando aínda máis a nosa democracia e as nosas institucións”.

EXEMPLOS QUE AFECTAN AO PP

Os socialistas “son libres de lanzar bulos e sospeitas sobre calquera político ou os seus familiares que non sexan da súa cor, pero son incapaces de aceptar unha soa crítica ou denuncia sobre as súas actuacións sospeitosas”, manifestou o portavoz popular, quen indicou que “todo o que supoña un cuestionamento legal ou ético das súas actividades é xogo sucio, pero en cambio para eles todo vale con tal de atacar a imaxe e a credibilidade do Partido Popular e dos seus representantes”.

Neste sentido, lembrou que “temos moitos exemplos que nos afectan directamente ao PP de Galicia” e citou o caso das denuncias realizadas sobre as supostas contratacións da Xunta coa empresa na que traballaba a muller do ex presidente Feijóo, que resultaron totalmente faltas e o medio que publicou a información tivo que rectificar posteriormente; as constantes alusións aos contratos asinados pola Xunta coa empresa na que traballa a irmá tamén do ex presidente da Xunta; os supostos beneficios dos contratos asinados pola empresa do marido da nosa secretaria xeral coa Xunta de Galicia; ou o cuestionamento das actividades dunha empresa porque nela traballa un cuñado do ex presidente da Xunta.

“Non fai falta ir moito atrás para comprobar como desde o BNG e o PSdeG se utilizan estas artimañas, que tanto lles doen cando van na súa contra”, sinalou Alberto Pazos, quen recordou que “no último Pleno deste Parlamento, celebrado esta mesma semana, os grupos da oposición incorporaron nas súas intervencións continuas referencias á parentes e familiares do ex Presidente da Xunta”.

Así, demandou que, “do mesmo xeito que BNG e PSdeG saíron onte en defensa de Pedro Sánchez, fagan o mesmo cos representantes do PPdeG e pidan as correspondentes desculpas”.

Ademais, e relacionado coa decisión de Pedro Sánchez sobre as competencias de Galicia sobre o litoral, “onde se demostrou que para os socialistas existen comunidades de primeira, ás que se lles recoñecen as súas competencias de xeito directo, e de segunda, ás que se lles presenta un recurso ante o Tribunal Constitucional; tamén está demostrado que hai españois de primeira, aos que se lles aproba unha Lei de amnistía a medida, e de segunda, os que estamos sometidos á lei; e tamén existen familias de primeira, as súas propias, e de segunda, as dos representantes do PPdeG”.

O PPdeG dá luz verde ao Comité de Campaña para as eleccións europeas co obxectivo de poñer a disposición dos galegos un proxecto en positivo e apegado ás súas necesidades

O Partido Popular de Galicia deu hoxe luz verde ao seu Comité de Campaña para as eleccións europeas, que contará con Paula Prado como directora de campaña e que buscará poñer a disposición dos galegos propostas en positivo e un proxecto apegado ás súas necesidades.

Así o acordou esta tarde o Comité de Dirección do PPdeG, encabezado polo presidente Alfonso Rueda, nunha reunión celebrada na sede autonómica do partido e na que, entre outros asuntos, se deu un último repaso aos resultados electorais do 18 de febreiro.

“Conseguimos en total máis de 700.000 votos. O que supón máis dun 47% do total, 84.000 votos máis que en 2020 e 30.000 votos máis que o PSOE e o BNG xuntos”, lembrou Paula Prado ao tempo que remarcaba que o PPdeG foi “o partido preferido pola xente nova e o que aglutinou maior voto feminino”.

A número dous dos populares galegos engadiu a este respecto que se trata dun resultado “absolutamente lexítimo” fronte ao que pretende facer ver unha oposición que “segue sen asumir a súa derrota”. Unha oposición que, ademais, tampouco é capaz de pedir desculpas “pola súa negativa á Lei do litoral de Galicia”.

“O Goberno galego fixo unha lei necesaria para protexer a nosa costa, para encontrar un equilibrio entre o medio ambiente e a actividade económica, e esta semana foi avalada polo Tribunal Constitucional”, explicou ao tempo que anunciaba que “solicitaramos de xeito inmediato o traspaso dos medios materiais e persoais para xestionar a nosa costa”.

Paula Prado subliñou que, con esta sentenza do Tribunal Constitucional, “Galicia gañou e Sánchez volveu naufragar aquí”. Incidindo acto seguido na “deriva” na que están sumidos tanto Pedro Sánchez como o seu goberno.

Precisamente ao fío do tempo de reflexión que se vai tomar o presidente do Goberno, Paula Prado ironizou con que “para Galicia non vai cambiar moito o conto” na medida en que “Sánchez leva xa moito tempo desaparecido de Galicia e sen atender aos problemas dos galegos e galegas”.

“A estas alturas pouca xente cre xa en Sánchez, que no día de hoxe tiña que estar dando explicacións dunha trama que envolve a un bo número de membros do Goberno de España”, asegurou recordando o positivo que sería para Galicia que “algún día se dignase a aparecer con fondos europeos, bos proxectos ou  novas infraestruturas”.

Todo isto fai concluír á secretaria xeral do PPdeG que os recentes acontecementos  que envolven ao presidente do Goberno “responden a unha planificación e a un interese persoal” máis que a calquera outra cuestión.

O Parlamento galego pide ao Goberno central que retire a obriga do rexistro das explotacións de autoconsumo avícolas

O Pleno do Parlamento de Galicia aprobou hoxe a proposición non de lei do Grupo Popular, que non contou co voto favorable de BNG, PSdeG nin Democracia Ourensana, a través da que se demanda ao Goberno central a modificación do Real Decreto 637/2021, que regula as normas básicas de ordenación de granxas avícolas e obriga ao rexistro das pequenas explotacións de autoconsumo. “O Goberno de Pedro Sánchez non só non contestou ás alegacións que se fixeron desde Galicia a esta normativa, senón que unha vez máis impuxo aos galegos unha normativa inxusta, ineficaz e que non atende as especificidades do noso territorio”, manifestou o deputado popular Silvestre José Balseiros.

Na súa intervención, Balseiros explicou que as explotacións de autoconsumo “son aqueles currais familiares que crían aves para o propio consumo de carne e ovos, e non comercializan con ningún destes produtos”. En concreto, segundo a táboa de equivalencias, o número máximo de unidades de gando equivale a 30 galiñas poñedoras ou a 50 polos de engorde para carne, ou ben calquera outra combinación mixta que non supere a capacidade máxima por cada explotación ou curral.

A XUNTA FIXO OS DEBERES

“O feito de incluír estas pequenas explotacións de autoconsumo no Rexistro Xeral de Explotacións Gandeiras ocasiónalle aos seus titulares, maioritariamente habitantes das aldeas do rural galego e, en moitos casos, persoas maiores, innecesarios trastornos e trámites que supoñen para eles unha maior carga burocrática”, lamentou o deputado popular.

Diante desta situación motivada pola decisión do Goberno central, Balseiros dixo que a Xunta “fixo os deberes desde o primeiro minuto e intentou facerlle ver ao Ministerio de Agricultura o grave erro de obrigar a estas pequenas explotacións de autoconsumo a rexistrarse e non solo pola complexidade no seu cumprimento, senón tamén pola ineficacia ou nulo resultado do seu cumprimento”.

Porén, o Ministerio fixo “caso omiso a esta demanda, polo que á Xunta non lle quedou outro remedio máis que presentar varias veces as correspondentes alegacións ao Real Decreto 637/2001, solicitando que as explotacións de autoconsumo deberían quedar fóra do ámbito de aplicación desta norma”. “De novo, o resultado foi o desprezo absoluto por parte do Goberno central, ou sexa, o habitual trato que se presta a Galicia desde o Goberno de Pedro Sánchez”, criticou o deputado popular.

Silvestre José Balseiros anotou que a resposta da Xunta foi “dar todas as facilidades ás persoas solicitantes para dar de alta no rexistro correspondente as súas explotacións de autoconsumo, facilitando a posibilidade de realizar todos os trámites a través da páxina web da Consellería do Medio Rural, a través da oficina virtual agraria e dando instrucións ao persoal das oficinas agrarias par que lle cumprimentasen a documentación aos que o solicitaran”.

Neste momento xa van rexistradas máis de 79.000 explotacións e, “se temos en conta as previsións do sector, seguramente esta cantidade se podería chegar a duplicar”, rematou Balseiros.

O Parlamento galego solicita a ampliación da Rede de unidades de atención temperá para evitar gastos e desprazamentos ás familias

O Pleno do Parlamento de Galicia aprobou hoxe a proposición non de lei do Grupo Popular, que non foi apoiada polo Grupo Socialista, a través da que se solicita á Xunta que siga estendendo a Rede de unidades de atención temperá para que chegue a máis concellos, co fin de seguir incrementando a presencia territorial das unidades, de evitar gastos e desprazamentos ás familias, e de reducir a lista de agarda.

A deputada popular Raquel Arias explicou que a atención temperá é o conxunto de intervencións dirixidas á poboación infantil de 0 a 6 anos, e tamén ás súas familias e á súa contorna, para dar resposta o antes posible ás necesidades transitorias ou permanentes que presentan os nenos e nenas con trastornos no desenvolvemento ou en risco de padecelos.

“Non ano 2009, cando o PPdeG chegou ao Goberno da Xunta, en Galicia só existían dúas unidades de atención temperá, que daban cobertura a 15 vilas galegas e 160 nenos”, lembrou a deputada popular, quen apuntou que “hoxe son 46 as unidades espalladas por toda a Comunidade galega, que dan servizo a 200 concellos e atenden a máis de 4.000 nenos”. “Todos os concellos que solicitaron a creación dunha unidade de atención temperá obtiveron a axuda da Xunta, que aporta a totalidade do custo das horas do servizo”, destacou.

ATENDER A TOTALIDADE E PRETO DE ONDE VIVEN

Porén, Raquel Arias afirmou que “mentres non estean atendidos o cento por cento dos nenos con necesidades específicas e o estean, ademais, preto de onde viven, non nos conformaremos”.

A Xunta de Galicia dedica este ano máis de 8 millóns de euros a consolidar a Rede Galega de Atención Temperá, o que supón un 60 por cento máis que en 2023.“As familias galegas contan hoxe con máis facilidades que nunca para acceder aos servizos de atención temperá e facelo preto das súas casas, o que ademais fomenta a igualdade entre todos os galegos, independentemente de onde veñan”, dixo Raquel Arias.

Para rematar, a deputada popular subliñou que “mentres en Galicia Alfonso Rueda cumpre os seus compromisos, o Goberno de Pedro Sánchez, co beneplácito do BNG, incumpre a lei e nega aos galegos o 50 por cento dos custos da Lei de dependencia, o que supón 2.500 millóns de euros cada ano”. “Son cartos dos dependentes galegos cos que se queda o Goberno central, mentres os socialistas e os nacionalistas galegos calan, pero que desde o PPdeG imos seguir demandando para continuar mellorando a vida dos galegos e galegas”, manifestou.

O Grupo Popular insistirá no Pleno desta semana no agravio que supón para Galicia o traspaso ao País Vasco da xestión do litoral

O Grupo Popular insistirá no Pleno do Parlamento de Galicia que se celebra a vindeira semana no agravio que supón para Galicia o acordo asinado polo PSOE e o PNV para o traspaso ao País Vasco da xestión do litoral, mentres a Lei de ordenación do litoral de Galicia, aprobada sen votos en contra nesta Cámara, está recorrida polo Goberno de Pedro Sánchez e en suspenso.

A iniciativa parlamentaria, que se substanciará á través dunha pregunta ao Goberno galego na sesión plenaria, lembra que un dos puntos do acordo asinado polo PSOE e o PNV para facilitar a investidura como Presidente de Pedro Sánchez é a transferencia ao País Vasco da xestión do litoral, “exactamente a mesma reclamación que desde hai anos está a facer Galicia e que rexeita o Goberno central”.

INXUSTA E INXUSTIFICABLE DIFERENCIA DE TRATO

En concreto, esa transferencia ao País Vasco comprométese sen necesidade de modificar o seu Estatuto de Autonomía, mentres que a Galicia esíxelle unha reforma estatutaria como escusa para non levar adiante o traspaso, a pesar de que a redacción dos estatutos de autonomía de ambas comunidades autónomas é idéntico no que respecta a esta competencia.

Desde o Grupo Popular considérase esta situación un evidente agravio do Goberno de Pedro Sánchez contra Galicia e unha inxusta e inxustificable diferencia de trato, que varía en función do interese político do Presidente do Goberno de España á hora de favorecer determinados territorios para garantir a súa supervivencia na Moncloa.

O Grupo Popular pedirá o apoio do Parlamento galego á implantación do proxecto empresarial de Altri en Palas de Rei

O Grupo Popular solicitará, a través dunha proposición non de lei, o apoio do Parlamento galego á implantación da iniciativa empresarial de Altri en Palas de Rei, instando á Xunta a dar prioridade a este proxecto de interese estratéxico, sempre garantindo o cumprimento da máis estrita normativa medioambiental, técnica e sectorial a nivel galego, estatal e europeo. Así mesmo, pide ao Goberno de España que concrete as liñas de apoio económico a esta iniciativa industrial no marco dos fondos europeos Next Generation e que inclúa na planificación da rede de transporte de enerxía eléctrica 2021-2026 a construción dunha subestación eléctrica para o subministro desta planta.

O portavoz popular, Alberto Pazos, lembra que o proxecto de Altri en Palas de Rei “é unha iniciativa tractora, innovadora e ambiciosa, baseada na transformación da madeira para producir lyocell, un tecido de alta calidade, 100 por cento biodegradable, máis ecolóxico que as fibras artificiais e cada vez máis demandado pola industria téxtil de todo o mundo”.

NOVOS INVESTIMENTOS E POSTOS DE TRABALLO

Deste xeito, incidiu que “avogamos por favorecer a implantación en Galicia de todas aquelas iniciativas empresariais que supoñan novos investimentos na nosa comunidade autónoma e a creación de postos de traballo, pero sempre, insisto, que cumpran estritamente con toda a normativa galega, estatal e europea para a conservación do noso patrimonio natural e cultural”.

Pazos indicou que esta biofábrica “representa unha oportunidade para o desenvolvemento industrial de Galicia”, xa que se prevé un investimento próximo aos 1.000 millóns de euros e a creación de ata 4.000 empregos durante a súa construción e ata 2.500 postos de traballo no seu funcionamento; ao tempo que favorece o aproveitamento sustentable do monte, nun territorio no que contamos con máis de 80.000 propietarios forestais”.

“O obxectivo non é outro que intentar favorecer todas as iniciativas que permitan captar novos investimentos industriais en Galicia, crear novos postos de traballo cualificados e de calidade, e acompañar proxectos industriais que sexan perfectamente compatibles coa conservación do patrimonio natural e cultural galego e cumpran escrupulosamente coa lexislación vixente”, manifestou.

MENSAXE DE TRANQUILIDADE

Alberto Pazos trasladou “unha mensaxe de tranquilidade a todos os galegos e galegas fronte ao alarmismo inxustificado que se quere trasladar desde o BNG e as súas organizacións satélites que, desde unha análise parcial e terxiversada da realidade, se opoñen agora a este proxecto de Altri, logo de que antes das eleccións autonómicas o apoiaban en iniciativas debatidas tanto neste parlamento como en distintos concellos galegos”.

Neste sentido, demandou “confiar no traballo de todos os expertos e técnicos especializados que van avaliar esta iniciativa empresarial en todos os seus ámbitos, porque serán eles os que decidan finalmente se cumpre ou non o recollido na normativa vixente para que finalmente poida ser unha realidade este proxecto industrial de Altri en Palas de Rei”.

Paula Prado: “No PPdeG apostamos por un Goberno ao estilo de Galicia, que recolle o mellor do pasado para blindar o noso presente e construír o noso futuro”

A secretaria xeral do PPdeG, Paula Prado, amosou hoxe a súa satisfacción co Goberno designado esta semana polo presidente Alfonso Rueda, ao que definiu como “un Goberno ao estilo de Galicia, que non pensa nuns poucos, senón en todos os galegos e galegas e que recolle o mellor do pasado para blindar o noso presente e construír o noso futuro”.

“O novo Goberno do presidente Rueda devolve á maioría dos galegos a confianza que depositaron no noso proxecto e ofrécelles a cambio responsabilidade, esforzo, compromiso e traballo”, explicou neste sentido.

Na rolda de prensa celebrada esta mañá na sede autonómica do PPdeG, a número dous dos populares galegos subliñou que Alfonso Rueda “dixo que Galicia funcionaría desde o primeiro día e así foi”, do mesmo xeito que “dixo que cumpriría a palabra dada e así o está facendo”.

Algo que exemplificou en que, transcorrida esta primeira semana desde a toma de posesión do novo Executivo galego, moitos dos compromisos adquiridos polo presidente para os primeiros 100 días da lexislatura “xa pasaron de ser palabras para converterse en feitos”.

É o caso da gratuidade para os gastos de adopción de animais de compañía, a creación da rede de dinamización cultural no rural, a construción das 375 primeiras vivendas de promoción pública, a ampliación ata os 45 anos da idade de acceso á fecundación in vitro ou a gratuidade das matrículas universitarias.

O “GOBERNO DE FICCIÓN” DO BNG

Paula Prado referiuse tamén á “ensoñación” protagonizada esta semana por Ana Pontón ao presentar un “goberno de ficción”. Algo que demostra, na súa opinión, non só que “segue sen asumir que os galegos non apoiaron as súas aspiracións presidenciais”, senón que “aparte das eleccións, tamén perdeu as ideas”.

Recordou así que Xosé Manuel Beiras, logo da derrota electoral do BNG nas eleccións autonómicas de 1997, presentara tamén o seu propio “goberno alternativo” e “todos sabemos como rematou aquela historia”.

“Cando a señora Pontón fala de gobernos na sombra, eu supoño que se refire a aquelas persoas das que se acompañaría pero que non se atreve a presentar publicamente”, afirmou antes de nomear a Arnaldo Otegi como “responsable das Forzas Armadas”, a Oriol Junqueras como “responsable de Institucións Penitenciarias”, a Carles Puigdemont como “responsable de Asuntos Exteriores”, a Pernando Barrena como “asesor de confianza” e a Néstor Rego como “alto mando dos coroneis da UPG”.

Estes serían, segundo a número dous dos populares galegos, “os verdadeiros compañeiros de viaxe de Ana Pontón na súa viaxe sen final cara a Presidencia da Xunta de Galicia” aínda que “ela nunca se atrevería a recoñecelo publicamente”.

“Do mesmo xeito que en campaña agochou o seu programa electoral, segue agochando as súas verdadeiras ideas e alianzas. Pero os galegos non se deixan enganar e por iso non confiaron nas propostas de goberno do BNG nin hai 30 anos nin agora”, concluíu a este respecto.

“PEDRO SÁNCHEZ SÓ ACERTA CANDO COPIA AO PP”

Ante o anuncio realizado esta semana por Pedro Sánchez de ampliar os programas de cribado neonatal a nivel nacional ata incluír 11 probas, Paula Prado sostén que se trata dun anuncio que “antes de facerse realidade xa resulta insuficiente”.

“Fronte ás 11 probas que ofrece Pedro Sánchez, Galicia xa conta co programa de cribado neonatal máis amplo de España e un dos primeiros de Europa: inclúe actualmente 48 probas e este ano incorporará 3 novas patoloxías”, explicou antes de concluír que “está ben que Sánchez copie a Galicia, pero é unha pena que copie mal”.

Pediulle así que copie tamén outras medidas do Goberno galego e cuestións como a xestión das autoestradas, xa que, mentres as autopistas de titularidade autonómica volven ter as peaxes conxeladas por segundo ano consecutivo, as que dependen do Goberno de España –a AP-9 e a AP-53– “rexistraron este ano a maior subida das peaxes da historia”. Ao que habería que engadir ademais que o ministro de Transportes “vén de resucitar o plan oculto de Pedro Sánchez para facernos pagar polo uso de autovías”.

“Pedro Sánchez só acerta cando copia ao Partido Popular. Porque cando lle toca a el facer o exame, o resultado é sempre o suspenso e quen paga as consecuencias, por desgracia, é sempre Galicia”, subliñou.

Ante todo isto, Paula Prado concluíu que os galegos teñen á súa disposición tres modelos: “O Goberno de ficción dun BNG que segue pensando no pasado, o Goberno dun Pedro Sánchez que está a lastrar o presente de Galicia coas súas decisións, e un Goberno presidido por Alfonso Rueda que pensa no futuro da nosa Comunidade e traballará durante os próximos catro anos para construír a Galicia da próxima década”.