O Parlamento galego apoia a implantación da iniciativa empresarial de Altri en Palas de Rei, sempre que cumpra a máis estrita normativa medioambiental, técnica e sectorial

O Parlamento de Galicia aprobou hoxe unha proposición non de lei a través da que manifesta o seu apoio á implantación da iniciativa empresarial de Altri en Palas de Rei, sempre que se garanta o cumprimento da máis estrita normativa medioambiental, técnica e sectorial, por canto supón unha oportunidade para xerar riqueza e emprego cualificado na Comunidade galega, fomentar o asentamento de poboación no rural, pechar o ciclo produtivo e de valor da madeira, favorecer aos propietarios de montes, e xerar sinerxías con dous sectores clave da economía galega como son o téxtil e o forestal. Así mesmo, ínstase ao Goberno central a concretar liñas de apoio no marco dos fondos europeos Next Generation para o desenvolvemento deste proxecto coa maior celeridade posible, ao tempo que lle esixe que inclúa na Planificación da rede de transporte de enerxía eléctrica 2021-2026 a construción dunha subestación eléctrica para a subministración desta planta.

A viceportavoz do Grupo Popular, Cristina Sanz, lamentou que, “entre tanta desinformación, medias verdades, mentiras e fotos falsas que se están espallando sobre este proxecto, a verdade é que estamos perdendo a gran oportunidade de falar do verdadeiramente importante: o cumprimento das normas vixentes”. “Das normas europeas, españolas e galegas, as máis respectuosas co medio ambiente de todo o mundo e que determinarán se o proxecto de Altri cumpre ou non para a súa implantación”, indicou.

“Nós apoiaremos todas as iniciativas que, cun estrito cumprimento da normativa, permitan captar novos investimentos industriais e xeren novos postos de traballo, cualificados e de calidade, en Galicia”, asegurou a viceportavoz popular.

DEIXEN DE MENTIR

Neste sentido, Cristina Sanz pediu ao BNG que “deixe de mentir” e cualificou aos nacionalistas galegos como “o partido do non: non aos parques eólicos, non á eólica mariña, non á minaría, non ao turismo e non á implantación de calquera proxecto industrial en Galicia”. “Teñen vertido moitas mentiras, ben directamente ou ben mediante as súas plataformas afíns, que o único que perseguen é confundir aos cidadáns e intentar que Galicia non sexa un lugar atractivo no que investir”, lamentou.

Respecto do proxecto de Altri en Palas de Rei, a viceportavoz popular lembrou que será a primeira fábrica de lyocell de España e a segunda de Europa, e converterase nun referente mundial, xa que será a primeira fábrica do mundo que integrará todo o ciclo produtivo de transformación da madeira ata a elaboración dun tecido de alta calidade totalmente biodegradable.

O proxecto suporá un investimento próximo aos 1.000 millóns de euros e terá capacidade para xerar ata 4.000 empregos durante a súa construción e 2.500 postos de traballo, cualificados e de calidade, durante o seu funcionamento. Ademais, xerará sinerxias con outros sectores clave da economía galega, como é o caso do téxtil ou do forestal, ata o punto de que permitirá pechar en Galicia o ciclo produtivo e de valor da madeira.

O PPdeG presenta a súa campaña para as eleccións europeas apelando directamente a cada galego: “Somos a túa resposta”

O Partido Popular de Galicia presentou hoxe as liñas mestras da súa campaña para as eleccións europeas e fíxoo poñendo o foco na importancia das decisións que se toman no Parlamento Europeo para o dia a día dos galegos, a quen se dirixe directamente o seu lema: “Somos a túa resposta”.

“O noso obxectivo é responder ás dúbidas dos galegos e galegas, responder aos seus problemas e responder aos seus retos de futuro. Tamén responderemos a aqueles partidos, como o BNG, que elixiron compartir lista co independentismo e cos herdeiros de ETA; ou como o PSOE, cuxa prioridade é seguir socavando os principios básicos do Estado de Dereito”, explicou a secretaria xeral Paula Prado antes de reunirse co Comité de Campaña do partido.

Anunciou que o PPdeG dará inicio á súa campaña na noite de mañá coa tradicional pegada de carteis en Pontevedra e que, a partir de aí, tratará de estar “en cada recuncho” tanto con actos sectoriais como con mitins. Unha axenda na que o presidente Alfonso Rueda volverá estar presente nas catro provincias e nas sete cidades e na que os candidatos Francisco Millán Mon, Adrián Vázquez e Pablo Gómez Cedrón “terán cada un o seu propio percorrido polo territorio”.

A número dous dos populares galegos adiantou así mesmo a presenza na tradicional Romaría do Pino –que se celebrará o sábado 1 de xuño– do presidente nacional do Partido Popular, Alberto Núñez Feijóo; ao que agradeceu por adiantado a súa visita “fronte a outros presidentes que parece que non pisarán Galicia durante a campaña”.

DOUS ANOS DE ÉXITOS CON ALFONSO RUEDA Á FRONTE DO PARTIDO

Os temas que segundo os populares “ocupan e preocupan” aos galegos –como a economía, o rural, a pesca, a seguridade e o Estado de Dereito– serán o que tratarán de abordar ao longo dos próximos quince días nos que o seu principal obxectivo será “poñer o colofón a un ciclo electoral de éxitos cun novo triunfo”.

Así se refería Paula Prado ao feito de que hoxe mesmo cúmprense dous anos desde que Alfonso Rueda asumira o liderado do PPdeG e que, desde entón, o partido obtivo tres grandes éxitos electorais en forma de maiorías nas eleccións municipais, xerais e autonómicas. Un tempo no que “a maquinaria do partido funcionou a pleno rendemento, nos 313 concellos, con ducias de actos dentro e fóra das campañas”.

“Non nos conformamos e queremos máis: o 9 de xuño temos un novo reto, as eleccións europeas, que afrontamos coa mesma ilusión e, sobre todo, coa mesma confianza nos galegos”, concluíu.

UNHAS ELECCIÓNS CLAVE PARA ESPAÑA E PARA GALICIA

Na reunión do Comité de Campaña tamén participaron os tres candidatos galegos Francisco Millán Mon, Adrián Vázquez e Pablo Gómez Cedrón, que incidiron na importancia destes comicios non só para Europa, senón tamén para España e especialmente para Galicia.

“A Galicia que votou masivamente ao PPdeG e de Alfonso Rueda o pasado 18 de febreiro ten que ir votar o próximo 9 de xuño e renovar o seu compromiso co partido que máis se parece a Galicia”, subliñou neste sentido Millán Mon.

Unha mensaxe na que tamén incidiu Adrián Vázquez ao asegurar que “votar pola política centrada, moderada, e responsable que encarna o Partido Popular é a mellor resposta a Pedro Sánchez e aos seus constantes ataques a Galicia”.

O Parlamento de Galicia pide á Xunta accións divulgativas para difundir o legado científico e político do matemático Rodríguez

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita que a Xunta desenvolva accións divulgativas que axuden a difundir o legado científico e político do matemático Rodríguez no bicentenario do seu falecemento.

Pedro Xosé Rodríguez e González naceu na parroquia lalinense de Bermés en 1770 e foi un dos matemáticos e astrónomos galegos máis destacados do século XIX. “O seu traballo foi fundamental para o desenvolvemento da ciencia moderna e a creación de sistema métrico decimal, pero, a pesar das súas aportacións, é un deses nomes que ficaron esquecidos co paso do tempo e a maioría dos galegos na actualidade descoñecen a importancia do seu traballo”, manifestou o deputado popular José Luís Ferro.

BOA OPORTUNIDADE

A celebración neste 2024 do bicentenario do falecemento en Santiago de matemático Rodríguez “é unha boa oportunidade para que institucións públicas e axentes culturais colaboren na divulgación do seu legado entre todos os galegos e galegas”, dixo o deputado popular, quen lembrou que xa se están a realizar algunhas actividades, especialmente vinculadas ao concello de Lalín.

Ademais, a Real Academia Galega de Ciencia escolleuno como Científico galego do ano, polo que se lle renderá unha homenaxe o vindeiro 8 de outubro. Porén, José Luís Ferro considerou “oportuno e necesario que durante os vindeiros meses se programen actividades para dar a coñecer a figura do matemático Rodríguez e as súas contribucións ao conxunto da sociedade”.

O Grupo Popular pedirá no Pleno que o Goberno central publique de inmediato a normativa básica para os novos currículos da formación profesional

O Grupo Popular demandará no Pleno da vindeira semana que o Goberno central publique de inmediato a normativa derivada da Lei orgánica de ordenación e integración da formación profesional, de xeito que a Xunta poida iniciar a tramitación da normativa autonómica. Así mesmo, pedirá ao Goberno de España que cumpra o compromiso de dotar de redes de comunicación de nova xeración a toda Galicia, tendo en conta as características orográficas e sociodemográficas desta comunidade autónoma e a disposición de fondos europeos para o incremento da cobertura de redes ultrarrápidas e 5G.

Ao remate da Xunta de Portavoces, o portavoz popular, Alberto Pazos, informou que na sesión plenaria comparecerá o conselleiro de Emprego, Comercio e Emigración, que dará a coñecer os principais proxectos e liñas de actuación do seu departamento a curto e medio prazo.

NORMATIVA FP

Dentro do apartado de proposicións non de lei, o Grupo Popular urxirá ao Goberno de España a publicación da normativa que permita pechar as incertezas e inseguridade que está a provocar na FP galega a Lei Orgánica 3/2022 de ordenación e integración da Formación Profesional, xa que a ausencia desta normativa está a provocar que Galicia non poida iniciar a tramitación da súa propia normativa autonómica.

“Estamos diante dunha nova improvisación do Goberno de Pedro Sánchez, neste caso no eido educativo, que está a provocar importantes problemas e tensións dentro do sistema de ensino da formación profesionais, un ámbito que en Galicia está a vivir unha importante evolución, tanto de alumnos como de materias impartidas”, manifestou Alberto Pazos.

Porén, o portavoz popular lamentou que, a poucos meses de que comece o novo curso escolar, “o Ministerio aínda non publicou a normativa básica necesaria para a posta en marcha dos novos currículos e os catálogos de ofertas de FP”, tendo presente que ten previsto modificar 179 reais decretos nos que se establecen os currículos básicos das ensinanzas de FP, que afectan a máis de 200 ciclos e cursos de especialización.

A segunda proposición non de lei que o Grupo Popular defenderá no Pleno da vindeira semana ten que ver co compromiso asumido polo Goberno central de dotar de redes de comunicación de nova xeración a toda Galicia, tendo en conta as características orográficas e sociodemográficas e o investimento de fondos europeos do Plan de Recuperación, Transformación e Resiliencia.

CUMPRIR OS COMPROMISOS

“Pedimos que o Goberno de Pedro Sánchez cumpra os compromisos que asumiu de forma unilateral para levar a cobertura de redes fixas ultrarrápidas de máis de 100 Mbps a todo o territorio español e unha cobertura 5G sen interrupcións nas zunas urbanas e grandes vías de transporte antes de que remate o ano 2025”, concretou Alberto Pazos, quen apuntou que “para iso conta con máis de 4.300 millóns de euros de fondos europeos dentro do Programa de Universalización de Infraestruturas Dixitais para a Cohesión, unha capacidade orzamentaria inédita que non tiveron outros gobernos para dar resposta aos retos da conectividade en España e Galicia, especialmente nas zonas rurais”.

Neste sentido, o portavoz popular considerou “necesario mellorar a xestión das actuacións para evitar que as zonas que actualmente teñen previsión de cobertura con algunha das convocatorias estatais queden finalmente sen cubrir por incumprimento dos obxectivos dos operadores a causa das características orográficas e sociodemográficas específicas que presentan algunhas comunidades autónomas, como pode ser o caso de Galicia coa súa dispersión poboacional”.

Polo que respecta ás preguntas ao Goberno galego, o Grupo Popular interesarase, en primeiro lugar, polas consecuencias que para os veciños da área de Vigo está a ter o peche do aeroporto de Peinador, “a pesar da boa disposición amosada pola Xunta ao ofrecer transporte directo entre o aeroporto vigués e o Rosalía de Castro en Santiago”. “Unhas consecuencias negativas que se están estendendo aos usuarios do aeroporto de Santiago, logo das folgas convocadas polos traballadores de Iberia ao comprobar que o incremento de traballo non se viu compensado coa presenza de máis persoal para atender a demanda”, indicou..

En segundo lugar, o Grupo Popular solicitará a valoración do Goberno galego sobre o incremento de criminalidade experimentado en Galicia no arranque do ano, segundo os recentes datos feitos público polo Ministerio do Interior. En concreto, no primeiro trimestre deste ano producíronse en toda Galicia 23.058 delitos, un 3,2% máis que os 22.349 que se cometeron neste mesmo período do 2023. “Asistimos a un alza da criminalidade na nosa comunidade, fundamentalmente motivada, entre outras, pola subida dos ciberdelitos, que o fixeron nun 18,6 por cento; ou, o que é especialmente preocupante, das agresións sexuais con penetración, que aumentaron un 27,9 por cento”, dixo.

E, por último, o Grupo Popular cuestionará ao Goberno galego sobre os resultados da inclusión de novas vacinas no calendario para toda a vida, “unha decisión pioneira que aumenta a protección contra algunhas enfermidades infecciosas que se poden previr mediante a inmunización e que converte a Galicia nunha das rexións co calendario máis completo do mundo”, salientou.

O PPdeG aposta por afondar a nivel europeo na loita contra a violencia de xénero, a fenda salarial e a trata

O Partido Popular de Galicia márcase como obxectivo de cara ás vindeiras eleccións europeas impulsar a nivel comunitario medidas que afonden en cuestións como a loita contra a violencia de xénero, a redución da fenda salarial entre homes e mulleres ou a erradicación da trata de seres humanos con fins de explotación sexual.

Esta semana reuniuse a Comisión de Igualdade do partido para analizar a situación actual das mulleres en Galicia e avanzar en propostas de futuro coa vista posta nas eleccións europeas do próximo 9 de xuño. Unha xuntanza encabezada pola secretaria xeral do PPdeG e directora de campaña, Paula Prado, na que se puxo o foco na necesidade de adoptar medidas efectivas no que se refire á prevención e eliminación da violencia contra as mulleres, así como a protección ás vítimas.

Poñendo en valor a recente aprobación da Directiva europea sobre a loita contra a violencia contra as mulleres e a violencia doméstica –na que se insta aos países da Unión Europea a adoptar medidas específicas para protexer ás vítimas, apoiar e facilitar o acceso á asistencia xurídica e poñer en marcha liñas telefónicas de axuda e centros de apoio –, desde o PPdeG sitúan a Galicia como referente e pioneira na adopción de medidas neste eido.

Cómpre recordar que Galicia xa ten en marcha moitas das medidas propostas nesta Directiva e, de feito, a nosa Comunidade foi pioneira cunha Lei de Igualdade destinada a blindar os dereitos das mulleres no eido laboral, da ciencia, o deporte ou a cultura. Ademais, a día de hoxe, Galicia é a única Comunidade que ofrece unha axuda mensual ás vítimas de violencia de xénero para impulsar a súa autonomía.

De aí o compromiso do PPdeG por seguir reforzando as axudas e a rede de apoio ás vítimas e avanzar na prevención de posibles novos tipos de agresións ou discriminacións. Un compromiso que se materializa na proposta do presidente Alfonso Rueda de poñer en marcha Centros de Información á Muller (CIM) móbiles para ampliar este servizo ás vítimas de violencia de xénero e achegalo a todos os recunchos de Galicia.

OS INCUMPRIMENTOS DA ESQUERDA COAS MULLERES

Pola contra, as populares lamentan que o suposto feminismo e compromiso coas vítimas de violencia de xénero da esquerda nunca pasan das pancartas á realidade. Poñendo como exemplo disto o incumprimento por parte do Goberno de Pedro Sánchez –co apoio e a complicidade do BNG– do Pacto de Estado contra a violencia de xénero aprobado en 2018 no que se refire á aprobación dunha Lei de Trata a nivel estatal.

Ou tamén o feito de que, mentres os orfos das mulleres vítimas de violencia de xénero son recoñecidos en Galicia como vítimas e beneficiarios de axudas, o Goberno do Estado segue sen recoñecelos como tal e imposibilitándolle, polo tanto, o acceso a apoios económicos.

Pero sen dúbida o maior atentado contra os dereitos das mulleres en España, segundo denuncian desde o PPdeG, foi a Lei do só si é si que aprobou o PSOE co voto a favor do BNG. Unha lei coa que, por primeira vez na historia da lexislación en materia de protección á muller, se lexislou a favor dos agresores e en prexuízo das vítimas e que tivo como consecuencias a rebaixa de penas a máis de 1.200 delincuentes sexuais e a excarceración de máis de 120 agresores antes de tempo.

Desde o PPdeG instan ás mulleres galegas a que non esquezan cuestións como estas e que o próximo 9 de xuño teñan en conta quen lexisla ao seu favor con medidas efectivas e quen se limita a repetir slogans que nunca van máis aló.

O PPdeG reivindica o modelo de convivencia lingüística “con sentidiño, harmonía e liberdade” de Galicia fronte ao “sectarismo e a polarización”

O Partido Popular de Galicia reivindicou hoxe nun acto con motivo da conmemoración do Día das Letras Galegas o modelo de “normalidade e convivencia lingüística” da nosa Comunidade, defendendo o “sentidiño, a harmonía e a liberdade” fronte a aqueles que queren “impoñer o sectarismo e a imposición”.

A secretaria xeral do PPdeG, Paula Prado, amosou durante a súa intervención o orgullo de que o galego siga a ser a lingua máis falada en Galicia e subliñou que se trata dunha lingua que forma parte do ADN do seu partido: “O PPdeG construíuse en galego e, tamén en galego, seguirá medrando”.

De feito, asegurou que a política lingüística promovida desde o Goberno galego ao longo destes anos contribuíu a que “se lograse incrementar o número de falantes da nosa lingua e, ao mesmo tempo, converter a nosa terra nun exemplo de convivencia lingüística”.

“En Galicia non hai imposicións e por iso defendemos o galego con sentidiño e afastados do sectarismo: co sentidiño que achega o noso modelo de bilingüismo cordial que queren a maioría dos galegos e afastados do sectarismo e a polarización daqueles que queren converter a nosa lingua nunha arma política”, afirmou.

A número dous dos populares galegos subliñou que os datos avalan que “somos unha Comunidade Autónoma con dúas linguas que os cidadáns coñecen e escollen falar con harmonía e liberdade” e por iso, engadiu, o PPdeG será sempre o único partido que garanta a defenda este “modelo de éxito que forma parte do noso patrimonio cultural e que queremos que siga vixente”.

“A nosa normalidade e convivencia lingüística son tamén un exemplo ante Europa, e estamos seguros de que os galegos o valorarán nas eleccións do 9 de xuño”, apuntou en clave europea.

LÓPEZ CAMPOS: “CONSTRUAMOS UNHA GALICIA ONDE CAIBAMOS TODOS”

Pola súa banda, o responsable de Cultura, Lingua e Mocidade do Goberno galego, José López Campos, quixo destacar na súa intervención que “se o PPdeG é o partido que máis se parece a Galicia é porque falamos o mesmo idioma que os galegos”.

Neste sentido explicou que a clave do éxito desta simbiose radica na “transversalidade” dunha lingua que permite que todas as persoas, con independencia do seu xénero, idade ou procedencia poida entenderse. E este, engadiu, é o camiño que se debe seguir.

“Debemos seguir construíndo unha Galicia onde caibamos todos, sen exclusións, e facelo desde a moderación e o respecto”, subliñou facendo un chamamento a seguir o exemplo de vitalidade e compromiso coa lingua que nos deixou Luísa Villalta.

MÚSICA DE VIOLÍN E POEMAS PARA HOMENAXEAR A LUÍSA VILLALTA

O acto estivo conducido polo coordinador de Cultura do PPdeG, Daniel Chapela, e contou coa participación dunha parella de violinistas encargados de interpretar en directo dúas das pezas favoritas da homenaxeada este ano no Día das Letras Galegas.

Logo da intervención do presidente local do PP da Coruña, Miguel Lorenzo, deuse lectura a catro poemas de Luísa Villalta por parte dos candidatos do PP ás eleccións europeas Francisco Millán Mon e Pablo Gómez Cedrón, e os deputados autonómicos do PPdeG Carmen Pomar e José Luis Ferro.

A xornada concluíu coa entrega dun ramo de flores por parte de Paula Prado e José López Campos á nai, a irmá e o sobriño da homenaxeada, que serviu para poñer o broche ao acto e trasladar o orgullo e o agradecemento do PPdeG pola contribución de Luísa Villalta ao engrandecemento da lingua galega.

O PPdeG prepara a campaña das europeas apelando a unha gran mobilización e a un resultado co que “facer oír alta e clara a voz dos galegos en Europa”

A unha semana do inicio da campaña das eleccións europeas, o PPdeG xa ten “a maquinaria perfectamente engraxada” e aos seus equipos preparados para afrontar “con ilusión e confianza” uns comicios nos que agardan unha gran mobilización e un resultado co que “facer oír alta e clara a voz dos galegos en Europa”.

Así o explicou esta mañá a secretaria xeral do PPdeG e directora de campaña, Paula Prado, en declaracións aos medios antes de encabezar a reunión do Comité de Campaña que se celebrou na sede autonómica dos populares. Unha reunión na que se puxo de manifesto que “aínda que a veces parece que o que ocorre en Bruxelas queda lonxe, o certo é que Galicia xógase moito”.

“O Parlamento Europeo é o lugar onde, da man dos candidatos do PPdeG, os galegos podemos loitar por ter máis fondos europeos e mellores infraestruturas, negociar mellores condicións para o rural e garantir un futuro próspero para a nosa pesca”, explicou neste sentido.

Fronte a un proxecto popular que aposta por “máis Galicia en Europa”, a alternativa da esquerda supón, segundo afirmou Paula Prado, “menos Galicia” na medida en que o PSOE “demostrou estes anos atender pouco ou nada os nosos intereses” e o BNG “integrouse novamente con Bildu e ERC nunha lista cun condenado por terrorismo no segundo posto e defende o ecoloxismo máis radical”.

Por todo isto a número dous dos populares galegos apela a “mandar unha mensaxe en Europa na defensa de Galicia, da nosa economía, do noso rural, da nosa seguridade e das nosas institucións” e a demostrar nestas eleccións que “Galicia non quere independentismo nin tampouco escándalos de corrupción cada vez máis graves”.

Parafraseando ao presidente Alberto Núñez Feijóo, concluíu subliñando que “non cabe nin un minuto de descanso neste mes” e que o Partido Popular é “a única opción para defender a igualdade e a prosperidade dos galegos, dos españois e da nosa democracia en Europa”.

Alfonso Rueda chama aos seus a facer forza para reclamar en Europa os fondos e as infraestruturas que Vigo merece e necesita

O presidente e candidato do PPdeG, Alfonso Rueda, fixo hoxe un chamamento a facer forza desde o partido de cara á próximas eleccións europeas para reclamar os fondos Next Generation e as infraestruturas que Vigo, como primeira cidade de Galicia e motor económico da nosa Comunidade, merece e necesita.

Nun encontro con militantes e simpatizantes celebrado hoxe na cidade olívica e no que estivo acompañado pola secretaria xeral do PPdeG, Paula Prado, o presidente provincial do PP de Pontevedra, Luis López, e a líder local do partido, Ana Ortiz; o líder dos populares galegos incidiu no moito que Vigo se xoga nos comicios do próximo 9 de xuño.

Neste sentido, adiantou que entre as propostas do Partido Popular en clave europea está a de reformar o deseño e a xestión dos fondos Next Generation co fin de eliminar os criterios partidistas na súa adxudicación, acelerar a súa distribución e facilitar o acceso para pemes e autónomos.

A conexión de Galicia co norte de Portugal tamén é unha das prioridades dos populares e por iso se comprometen a seguir reclamando desde o Parlamento Europeo que o Goberno de España impulse canto antes a Saída Sur de Vigo. Unha infraestrutura vital para a cidade e que, a día de hoxe, aínda segue en estudo de alternativas e sen planificación orzamentaria para a súa execución.

Alfonso Rueda aposta por repetir os bos resultados do PP en Lugo nas eleccións europeas para defender a importancia do rural e do mar nas políticas comunitarias

O presidente do PPdeG, Alfonso Rueda, amosou hoxe o seu convencemento de que o Partido Popular volverá repetir os seus bos resultados na provincia de Lugo nas próximas eleccións europeas e puxo o foco na importancia de defender o rural e o mar galegos no eido das políticas comunitarias.

Fíxoo na Xunta Directiva Provincial do PP de Lugo celebrada esta tarde e acompañado pola presidenta do partido na provincia, Elena Candia, e a secretaria xeral do PPdeG, Paula Prado. Unha reunión na que tamén interviñeron os novos conselleiros do Goberno galego, María Martínez Allegue, José González, Antonio Gómez Caamaño, José López e María José Gómez, que se deron a coñecer entre o partido provincial e fixeron unha breve presentación das liñas mestras dos seus departamentos.

O líder dos populares galegos incidiu precisamente na importancia de que sectores estratéxicos para a provincia de Lugo como son o agrogandeiro, o forestal e o pesqueiro estean en mans de dous lucenses: Alfonso Villares e María José Gómez. Algo que considera un reflexo do moito que teñen que dicir Galicia e a provincia en Europa á hora de defender os intereses destes sectores.

Tamén quixo dar a benvida e trasladar os seus mellores desexos a Encarna Amigo e a Nicole Grueira, que onte tomaron posesión como novas deputadas do Grupo Popular no Parlamento de Galicia. Dúas novas parlamentarias que se unen ao grupo de 8 deputados que representan a esta provincia no Pazo do Hórreo, ao que lle pediu compromiso e traballo na defensa dos intereses dos lucenses.

O Parlamento de Galicia esixe ao Goberno de España o traspaso inmediato dos medios materiais e persoais para xestionar a costa galega

O Parlamento de Galicia aprobou hoxe por unanimidade a proposición non de lei do Grupo Popular a través da que se esixe ao Goberno de España o traspaso inmediato dos medios materiais e persoais para xestionar a costa e, deste xeito, estar en disposición de poder outorgar as concesións correspondentes. O portavoz popular, Alberto Pazos, fixo un chamamento “á reflexión a todos aqueles que antepuxeron os seus intereses electorais á defensa do interese xeral de Galicia, cuestionando incluso o recollido no Estatuto de Autonomía”.

“Galicia, logo da sentenza do Tribunal Constitucional do pasado 23 de abril, xa é dona do futuro do seu litoral, polo que chegou o momento de aceptar que son as institucións galegas as que deben asumir a ordenación do noso litoral e polo tanto corresponde traspasar ao Goberno galego os instrumentos necesarios para poder exercer esa competencia de forma efectiva”, manifestou Alberto Pazos.

Na súa intervención, indicou que este traspaso de medios humanos e materiais “debería producirse sen necesidade de aumentar a discriminación que xa tivemos que sufrir os galegos”, porque, segundo lembrou, “basta comprobar o distinto tratamento que recibimos galegos e vascos nesta materia tendo redaccións de estatuto idénticas”.

CALENDARIO DE ACTUACIÓN

Alberto Pazos lembrou que o Goberno de Alfonso Rueda acordou no Consello da Xunta celebrado onte un calendario de actuación a través do que se solicita oficialmente o traspaso efectivo das competencias sobre o litoral a través da convocatoria da Comisión Mixta de transferencias, o impulso da Comisión interdepartamental de coordinación dos organismos autonómicos implicados, a posta en marcha do Foro do Litoral e realización de actuacións estratéxicas vinculadas a usos costeiros que xeren valor e cohesión.

“O Partido Popular de Galicia alcanzou nas últimas eleccións autonómicas un pacto cos galegos para seguir impulsando esa Galicia que non para e que inclúe converternos na primeira comunidade autónoma de España que regula mediante lei o seu litoral”, subliñou o portavoz popular, quen incidiu que “non queremos ser máis que ninguén, nin aceptamos sen menos que ninguén”.

Para rematar, Pazos amosou a súa sorpresa porque o BNG “insista nunha proposta que xa cualificamos en dúas ocasións de inxusta, innecesaria e ilegal, porque propoñen a realización dun trámite no Congreso que non necesitaron outras comunidades autónomas, xa que bastaría cun Real-Decreto para facer a transferencia; e aluden ao artigo 150.2 da Constitución, que non pode utilizarse para o traspaso de medios para o exercicio dunha competencia autonómica”.