O PP logra o apoio do Senado para esixir ao Goberno de Sánchez que cofinancie xunto ás comunidades autónomas centros de apoio ao emprendemento

O Grupo Popular no Senado logrou aprobar sen votos en contra -con 26 votos a favor e 2 abstencións- unha moción para instar ao Goberno de España a seguir impulsando accións de emprendemento como unha forma de afrontar o reto demográfico e fixar poboación no territorio e financiar con fondos estatais os recursos necesarios para dar cobertura ao Centro de Orientación, Emprendemento, Acompañamento e Innovación de Galicia (CUELE-Galicia) e outros centros similares.

O senador lucense, José Manuel Balseiro, defendeu esta iniciativa este luns na Comisión de Traballo e Economía Social reivindicando o cofinanciamento por parte  do Goberno de España en colaboración coas comunidades autónomas, os recursos necesarios para o funcionamento do CUELE-Galicia e doutros centros similares noutras autonomías, garantindo así a súa continuidade e eficacia no apoio ao emprendemento.

O popular defendeu que “o Goberno do Estado e as distintas CC.AA. comparten retos comúns” como son, por exemplo, “facer fronte á modernización e ao avance do tecido produtivo, o reto demográfico especialmente importante para o noso rural e a necesidade de potenciar a empregabilidade dos demandantes de emprego”.

Balseiro pediu “vontade” ao Goberno de España para “redobrar a aposta polo emprendemento”. E engadiu que “se as distintas administracións coma o Estado, as CC.AA. e, incluso, os Concellos son capaces de sumar esforzos, serán capaces de xerar máis e mellor emprego e máis emprego de calidade”.

O senador lucense tivo palabras de recoñecemento para os emprendedores que “son tanto os grandes empresarios que xera miles de postos de traballo coma os autónomos que madrugan e arriscan o seu patrimonio persoal para facer realidade unha idea de negocio”.

Balseiro puxo a Galicia como “exemplo de boas prácticas en materia de emprendemento. O Goberno autonómico do Partido Popular  sempre apostou polo emprego autónomo e os emprendedores”. De feito, “as súas medidas fixeron posible que Galicia recibira o premio de ‘Rexión Emprendedora Europea 2025’ do Comité das Rexións que recoñece ás rexións europeas que presentan estratexias innovadoras de impulso ao emprendemento”, explicou.

Francisco Conde insta ao Goberno central a cumprir coa súa responsabilidade co proxecto de Altri logo que o informe medioambiental avale a súa viabilidade

O deputado nacional pola provincia de Lugo e portavoz de Industria do Partido Popular no Congreso, Francisco Conde, valorou a situación actual do proxecto de Altri, subliñando que conta cun informe medioambiental que avala a súa viabilidade desde o punto de vista do impacto no territorio.
Neste contexto, Conde reclamou compromiso tanto por parte de Altri como do Goberno central. A empresa debe garantir o cumprimento de todos os condicionantes establecidos pola Xunta de Galicia, así como demostrar a viabilidade económica e financeira do proxecto e o seu impacto positivo en Galicia, sinalou o deputado popular.
Así mesmo, instou ao Goberno de Pedro Sánchez a rectificar e cumprir coa súa responsabilidade. Lembrou que o Ministerio de Industria mantén o proxecto bloqueado e que lle corresponde defendelo en Bruxelas, xa que cumpre cos requisitos medioambientais e industriais establecidos pola Comisión Europea.
Ademais, Conde destacou que o Ministerio para a Transición Ecolóxica coñece a necesidade de dotar ao proxecto das infraestruturas necesarias para a súa conexión á rede, elemento fundamental para garantir a súa viabilidade.
En definitiva, o deputado popular fixo un chamamento á rectificación por parte do Goberno para permitir o desenvolvemento dun proxecto que pode xerar novas oportunidades para a mocidade galega, especialmente na provincia de Lugo.
Conde subliñou tamén que Altri está aliñado cos obxectivos de loita contra o cambio climático, sustentabilidade e transformación dixital. Por este motivo, instou ao ministro de Industria a comparecer no Congreso dos Deputados para comprometerse coa viabilidade deste proxecto, asegurando un trato igualitario con outras iniciativas industriais que cumpren cos criterios ambientais e industriais marcados pola Unión Europea.

O PPdeG denuncia o “veto” do Goberno central ao Xacobeo 2027 e insiste en reclamar que se declare acontecemento de excepcional interese público

O Partido Popular de Galicia fala abertamente de “veto” por parte de Pedro Sánchez ao Xacobeo 2027 ante as “negativas” e as “evasivas” do Goberno central no que se refire á declaración do próximo Ano Santo como acontecemento de excepcional interese público.

Así o denuncia a senadora pola provincia de Pontevedra e portavoz de Xustiza do Grupo Popular na Cámara Alta, Pepa Pardo, ao tempo que insiste no “fundamental” desta declaración “para os intereses de Galicia” e censura a actitude amosada neste sentido polo Executivo central. “Non podemos entender as súas negativas e evasivas máis que como un novo desprezo a Galicia”, sostén.

Recorda que o Ministerio de Cultura adquiriu no seu día o compromiso de promover a declaración do Xacobeo 2027 como acontecemento de excepcional interese público e incorporar as exencións fiscais vinculadas a esta figura nos Presupostos Xerais do Estado. Un compromiso que viu motivado logo da aprobación unánime en maio de 2024 dunha proposición non de lei no Parlamento de Galicia na que, a iniciativa do Grupo Popular, se solicitaba esta declaración.

De feito, esta semana o Parlamento de Galicia aprobou tamén por unanimidade unha iniciativa do PPdeG no mesmo sentido.

“A realidade é que o Ministerio de Cultura non só non cumpriu o seu propio compromiso, senón que tampouco atendeu ás demandas do Parlamento galego”, alega Pepa Pardo ao tempo que recorda que os populares tamén levaron esta reclamación ao Congreso dos Deputados a través dunha proposición de lei cuxa tramitación foi vetada pola Mesa desta Cámara (dominada polo PSOE e Sumar).

De aí que, ante a consideración de que “é fundamental garantir as exencións fiscais ás empresas patrocinadoras do Xacobeo 2027”, con efectos desde o 1 de xaneiro de 2025, por tratarse dunha ferramenta “esencial e eficaz para dotar a tan importante acontecemento de maior capacidade económica”, os populares galegos trasladen agora esta cuestión ao Senado a través dunha moción que defenderá a próxima semana o senador José Manuel Barreiro e coa que agardan que, por fin, o próximo Ano Santo sexa declarado acontecemento de excepcional interese público.

“A ver que fan os senadores galegos do PSOE”, pregúntase ironicamente Pepa Pardo apuntando ao acontecido no que se refire á AP-9 e ás contradicións do socialismo galego “dicindo unha cousa en Galicia e votando a contraria en Madrid”.

O CAMIÑO DE SANTIAGO E A SÚA PROXECCIÓN INTERNACIONAL

O patrocinio tense revelado como clave e moi eficaz para incentivar a participación de empresas privadas na celebración deste evento e dotalo dunha maior capacidade económica. Tamén é unha oportunidade excepcional para que Galicia, e por extensión España, consoliden a súa marca e a proxección internacional do Camiño de Santiago.

Ademais, medidas coma esta contribúen a desenvolver un programa de dinamización turística, social e cultural. De feito, grazas ao desenvolvemento do programa de patrocinios que permiten as desgravacións fiscais das achegas no marco da lexislación de mecenado, no Xacobeo 21-22 adheríronse un total de 40 empresas, o que se traduciu nunha achega total de 28 millóns de euros.

O PPdeG salienta que 320 mozos gandeiros, 133 novos agricultores e 370 explotacións beneficiáronse das axudas para a modernización do sector e a incorporación de novos profesionais

Os deputados do Grupo Popular Miguel Viso e Víctor Manuel Baladrón salientaron hoxe que 320 mozos menores de 40 anos, 133 novos agricultores e 370 explotacións galegas beneficiáronse o pasado ano das axudas da Xunta para a modernización do sector gandeiro e a incorporación de novos profesionais ao sector.

Miguel Viso e Víctor Baladrón visitaron a explotación gandeira familiar Gandainas no concello ourensán de Riós, que se beneficiou dunha axuda da Xunta para a construción dun novo almacén, infraestrutura fundamental para optimizar a xestión de recursos e garantir o almacenamento de forraxe, ademais de acceder a un plan de mellora destinado ao peche perimetral da explotación, mellorando así a seguridade e o benestar animal.

GANDERÍA SOSTIBLE E RENDIBLE

Miguel Ángel Viso resaltou que “a modernización das explotacións gandeiras é clave para manter un sector competitivo e preparado para afrontar os retos do futuro”. Deste xeito, lembrou que desde a Xunta “apostamos por un modelo de gandería sostible e rendible, facilitando aos profesionais as ferramentas necesarias para mellorar as súas instalacións e procesos produtivos”. Ademais, destacou que “estes investimentos favorecen a profesionalización e a incorporación de novos profesionais ao agro galego”.

Pola súa banda, Víctor Manuel Baladrón sinalou que “estas axudas non só melloran as condicións laborais no sector agrogandeiro, senón que tamén axudan a fixar poboación no rural, dinamizando economicamente as nosas vilas e aldeas e garantindo que o rural galego sexa un espazo de oportunidades”. “Contar con instalacións modernas e ben acondicionadas é esencial para que os profesionais do sector poidan desenvolver o seu traballo con maior eficiencia e comodidade”, apuntou.

Finalmente, ambos os deputados “felicitaron aos responsables da explotación visitada polo seu esforzo e compromiso cun modelo produtivo que combina tradición e modernidade, contribuíndo a facer do rural galego un lugar atractivo para vivir e traballar”.

O PPdeG solicita ao Goberno central o arranxo urxente da estrada N-550 entre A Coruña e Santiago

As deputadas do Grupo Popular Carmen Pomar e Cecilia Vázquez anunciaron hoxe a presentación dunha iniciativa no Parlamento de Galicia solicitando ao Goberno central o arranxo urxente da estrada N-550 entre A Coruña e Santiago, “un exemplo evidente dunha vía extremadamente perigosa, tanto para os condutores como para os peóns, polo pésimo estado do firme, a sinalización e a iluminación”.

Carmen Pomar e Cecilia Vázquez percorreron diversos tramos desta estrada nacional acompañadas dos alcaldes de Ordes, José Luís Martínez, e de Oroso, Álex Doval, para comprobar “as condicións deplorables nas que se atopa, cun asfalto moi deteriorado que precisa dunha intervención integral urxente, tanto para a seguridade como para a comodidade dos usuarios”.

DESPREZO DO GOBERNO CENTRAL

Así mesmo, as deputadas populares comprobaron como “a sinalización e a iluminación desta estrada, tanto horizontal como vertical, é deficiente en moitos puntos, o que incrementa a sensación de inseguridade para os condutores e incluso para os peóns que cruzan esta estrada nas numerosas poboacións polas que pasa”.

“Os galegos xa sufrimos o desprezo e o castigo do Goberno de Pedro Sánchez co aprazamento sine die da transferencia da AP-9 a Galicia e as maiores peaxes de España nesta autoestrada, pero non podemos consentir que tamén teñamos que sufrir a penitencia dunha N-550 que se atopa nunhas condicións deplorables, poñendo en serio risco aos que circulamos habitualmente por esta estrada e tamén aos veciños que viven nos seus arredores”, sinalaron.

Rueda comprométese a ir a Teo durante esta lexislatura para facer moitos proxectos realidade

O presidente do PPdeG, Alfonso Rueda, comprometeuse hoxe a ir a Teo ao longo desta lexislatura para facer realidade os proxectos que o Goberno galego ten en marcha neste concello con “moitísimo futuro”. “Imos facer moito no que queda destes catro anos”, subliñou.

Rueda participou na I Xuntanza Anual do Partido Popular de Teo, na que exerceu como anfitrioa a alcaldesa e presidenta do PP local, Lucía Calvo, e na que participaron preto de 600 persoas.

“A diferenza entre un concello que durmía e un concello que espertou e vai a por todas chámase Lucía Calvo”, salientou sobre a rexedora, e asegurou que “desde hai dous anos, en Teo respírase outro ambiente”.

Así, o líder dos populares galegos sinalou que este municipio “necesitaba un revulsivo para saír desa parálise na que estaba e necesitaba unha persoa que lle puxera as pilas a todo o mundo e que dixera que as oportunidades que estaban aproveitando noutros sitios, aquí había que aproveitalas tamén”.

Neste sentido, destacou tamén de Lucía Calvo que é “unha persoa que non acepta un non por resposta, insistente e firme á hora de esixir o que faga falta”: “O único que quere é protagonismo para o concello que goberna”.

Entre os proxectos, Rueda mencionou o avance para completar a autovía entre Santiago e A Estrada (AG-59), que beneficiará directamente aos veciños de Teo.

DIEGO CALVO: “EN TEO QUEREMOS MÁIS PP E MÁIS LUCÍA”

Pola súa banda, o presidente provincial do PP da Coruña, Diego Calvo, felicitou á agrupación local e a Lucía Calvo pola iniciativa desta xuntanza, un tipo de encontros que “dan forza” para seguir co proxecto que os populares puxeron en marcha hai dous anos. “Un proxecto de estabilidade e de seriedade no seo do goberno local, pensado só para servir aos veciños de Teo e para conseguir que Teo teña todo aquilo que necesita”, subliñou.

Calvo abundou en que agora este concello está “apartado de liortas de tripartitos formados por todo o que os galegos levamos anos dicindo que non queremos: nin BNG, nin PSOE, nin mareas”. “Por iso, aquí en Teo queremos máis PP e máis Lucía, un grande exemplo por moitas cousas e todas boas”, concluíu.

MIGUEL TELLADO: “O PSOE É O PARTIDO DOS PEORES GOBERNOS”

Pola súa banda, o portavoz do PP no Congreso dos Deputados, Miguel Tellado, acusou ao Goberno de Sánchez de non ter principios por sentar a Bildu na Moncloa. Segundo denunciou, o Executivo “sen principios” de Sánchez borrou os delitos de malversación e sedición e “normalizou” aos herdeiros de ETA.

“Esta semana tivemos que ver unha imaxe tremendamente lamentable: como a portavoz de Bildu accedía ao Palacio da Moncloa para pactar non se sabe que co Goberno de Pedro Sánchez”, censurou, á vez que afirmou que o PSOE é hoxe “o partido da corrupción, dos peores gobernos, do enchufismo e do amiguismo, e de tanta hipocrisía”.

Miguel Santalices participa nas xornadas ‘Máis España, máis Europa’ sobre democracia e parlamentarismo

O presidente do Parlamento de Galicia, Miguel Santalices, participou nas xornadas ‘Máis España, máis Europa. A preservación dos valores democráticos no debate parlamentario’, un foro no que se abordaron os principais desafíos que afectan á democracia e ao parlamentarismo en España.

Durante a súa intervención, Santalices resaltou o compromiso dos presidentes autonómicos na defensa da dignidade da democracia e do parlamentarismo democrático, como base para fortalecer a confianza da cidadanía nas institucións. Apostou tamén por unha rexeneración política e institucional que garanta o respecto aos valores democráticos e fortaleza o debate parlamentario como instrumento esencial na vida política do país.
Estas xornadas serviron como espazo de reflexión e diálogo sobre o futuro da democracia en España e en Europa, poñendo de manifesto a necesidade de traballar en conxunto para preservar os principios fundamentais que sustentan as nosas institucións.

Paula Prado celebra que os veciños de Outes volvan ter en Fran Calo un alcalde responsable e centrado nas necesidades do concello

O Partido Popular de Galicia celebra que os veciños de Outes volvan ter, da man de Fran Calo, un alcalde responsable e centrado en atender as necesidades deste concello desde a responsabilidade e o sentidiño.

Así o manifestou hoxe a secretaria xeral dos populares galegos, Paula Prado, que arroupou ao novo rexedor e á familia do PP de Outes na 27ª edición da laconada organizada pola agrupación local do partido e na que todos eles brindaron polo inicio dunha nova etapa de éxitos e de maior benestar para os veciños.

Na xuntanza, con máis de 150 asistentes, tamén estiveron presentes o responsable de Cultura, Lingua e Xuventude no Goberno galego, José López Campos, e o secretario xeral provincial do PP da Coruña, Evaristo Ben.

Logo de ser o candidato máis votado nas pasadas eleccións municipais, con case un 46% de apoio, Fran Calo vén de ser investido alcalde como resultado dunha moción de censura na que o PP actuou desde a responsabilidade e co único obxectivo de impulsar Outes ante a inestabilidade dun goberno paralizado e derivado dun pacto de perdedores que en nada beneficiou á cidadanía.

Por último, Paula Prado agradeceu á agrupación local o traballo realizado para que, hai pouco máis dun ano, o presidente Alfonso Rueda recibira neste municipio máis de 2.000 votos e un 57,37 % de apoio para lograr a súa primeira maioría absoluta.

O PPdeG celebra o avance no obxectivo de que España rebaixe o nivel de protección do lobo e garantir así o equilibrio no medio rural

 

Un gran avance que se acadou esta semana logo de que o Senado aprobase as emendas dos populares á lei de desperdicio alimentario e nas que o partido incluíu esta reiterada reivindicación das comunidades lobeiras e do sector gandeiro.

Non obstante, lamentan desde o PPdeG, as emendas contaron co voto en contra tanto dos senadores galegos do PSOE como da representante do BNG, que “en Galicia din defender o medio rural, pero en Madrid fan todo o contrario”.

Agora, as emendas deberán ser ratificadas o próximo xoves no debate do proxecto de lei no Congreso dos Deputados e, no caso de que os partidos que as apoiaron no Senado manteñan a coherencia do seu voto na Cámara Baixa, isto suporá a saída inmediata e definitiva do lobo do Lespre.

O GOBERNO DE ESPAÑA NON ATENDEU O MANDATO DE EUROPA

Deste xeito, tal e como destaca o eurodeputado do PPdeG Adrián Vázquez, España situaríase na mesma liña que Europa no que se refire á defensa do equilibrio entre a conservación desta especie e a garantía de futuro do sector gandeiro.

Recorda neste sentido que Bruxelas “cambiou as regras de xogo” para avanzar no control cinexético do lobo “outorgando aos Estados membros liberdade para decidir como manexar as superpoboacións desta especie que tantos problemas está a causar aos nosos gandeiros”. Algo que nunca fixo o Goberno de España, que desde 2021 outorga ao lobo a categoría de especie especialmente protexida.

Trátase dun nivel de protección que, tal e como denuncia, está “frustrando o esforzo diario de quen sofre os seus ataques e ve minguados os seus gandos”, un extremo que se pode comprobar no caso de Galicia, que é unha das comunidades máis afectadas e onde o sector gandeiro leva anos pedindo solucións.

“Ninguén cuestiona que o lobo deba ser protexido, pero tampouco debería cuestionarse que é imprescindible garantir un control efectivo da súa poboación para frear os danos que está provocando”, explica incidindo en que, co novo marco europeo e cos avances lexislativos acadados polo Partido Popular, España ten agora a oportunidade de equilibrar a conservación do lobo e a supervivencia dun sector gandeiro “que xa non aguanta máis abandono”.

O Grupo Popular solicita ao Goberno de España a elaboración dun informe no que xustifique que o rescate da AP-9 non é viable

O Grupo Popular solicita ao Goberno central a elaboración dun informe que xustifique que o rescate da AP-9 non é viable, no que se recolla expresamente unha estimación do custo que suporía este rescate e o gasto que tería que afrontar o Goberno de España en bonificacións das peaxes ata o remate da concesión. “Sería todo un exercicio de transparencia que nos permitiría a todos xogar coas mesmas cartas e valorar con obxectividade a mellor opción a seguir respecto do futuro da AP-9”, sinalou o portavoz popular, Alberto Pazos.

A secretaria xeral de Transporte Terrestre do Ministerio de Fomento anunciou esta semana no Congreso que o rescate da concesión da AP-9 “non é viable polo altísimo volume de gastos que conlevaría, inasubmibles agora mesmo polo Estado”, “unha afirmación que tivo lugar dous días despois de que o reelixido secretario xeral dos socialistas galegos anunciara a bombo e prato en Santiago que ‘nós chegaremos á liberación das peaxes’”, lembrou Pazos. “Un anuncio que fixo diante do mismísimo Pedro Sánchez, quen non dixo nin mu na súa intervención a pesar de que era perfectamente consciente de que o que estaba vendendo o seu fiel soldado Besteiro era mentira e que para nada entraba nos plans do Goberno de España esa gratuidade”, engadiu.

“Descoñecemos os argumentos sobre os que se sustenta esta decisión do Goberno de España de non proceder ao rescate neste momento da concesión da AP-9, polo que desde o Grupo Popular imos solicitar a través dunha iniciativa neste Parlamento galego que o Goberno central elabore con urxencia un informe xustifique esta decisión”, indicou o portavoz popular.

BAILE CONSTANTE DE CIFRAS

Alberto Pazos sinalou que “xa estamos fartos do baile constante de cifras que se ofrecen por parte dos responsables do Ministerio para valorar o rescate, que un día cifran en 4.000 millóns e ao seguinte en 6.000 millóns, cando o que si coñecemos é que o Estado xa ten reservados 3.150 millóns de euros para o abono á empresa concesionaria polas bonificacións das peaxes ata o remate da concesión en 2048, unha cifra moi superior ao máximo de 2.331 millóns que suporía o rescate da AP-9, segundo o informe elaborado para a Xunta por unha consultora de prestixio especializada nestas cuestións”.

“Esiximos seriedade e que o Goberno central cumpra os compromisos anunciados aos galegos, liberando de peaxes a AP-9, como dixeron en plena campaña electoral, e procedendo á transferencia desta autoestrada a Galicia, como temos acordado neste Parlamento en numerosas ocasións”, demandou o portavoz popular. En concreto, dixo que “o primeiro paso sería levantar o bloqueo que a tramitación da proposición de lei aprobada por unanimidade neste Parlamento está a sufrir no Congreso pola decisión da Mesa e da súa Presidenta, que xa que leva 23 prorrogas nesta lexislatura ao prazo para a presentación de emendas a esta proposición”.

Alberto Pazos referiuse, tamén, á actividade desenvolvida esta semana no Parlamento de Galicia, protagonizada pola celebración da sesión plenaria. En concreto, subliñou que “o conselleiro de Facenda deixou ben claro as razóns polas que Galicia non pode aceptar a condonación da débeda que, para cumprir os desexos dos independentismo catalán, o Goberno de Pedro Sánchez pretende impoñer ás comunidades autónomas”.

GALICIA, A MÁIS PREXUDICADA

Así, explicou que “en primeiro lugar, rexeitamos que o Goberno central premie desta forma a comunidades autónomas que se destacaron por malgastar o diñeiro público e incumprir os compromisos de débeda e déficit impostos pola Unión Europea e o Goberno de España para os momentos de crise económica que sufrimos non hai moitos anos; pero tampouco podemos aceptar que os galegos sexan os máis prexudicados nesta condonación da débeda: 1.369 euros por galego fronte afronte a 1.892 euros de media española”.

“Un negocio ruinoso para Galicia, porque a cada galego, polo feito de ser galego, se lle reduce a débeda en 1.477 euros, pero, ao mesmo tempo, a ese mesmo galego, polo feito de ser español, a débeda se lle incrementa en case 1.700 euros, o que da como resultado que cada galego verá incrementada a súa débeda en case 220 euros”, manifestou.

Deste xeito, Alberto Pazos insistiu que “Galicia precisa realmente unha reforma do financiamento autonómico, que atenda realmente o custo da prestación dos servizos e recolla, expresamente, o agravante que supón o envellecemento da nosa poboación e a súa dispersión pola xeografía galega”.

A curto prazo, o portavoz popular reclamou que o Goberno de España “actualice as entregas a conta ás comunidades autónomas, porque este retraso xa supón a retención de case 1.600 millóns de euros a Galicia e 1,5 millóns de euros en xuros adicionais cada mes”.

Pazos considerou “lamentable o apoio incondicional tanto dos socialistas galegos como do BNG a este propósito de impoñer unha condonación da débeda ás comunidades autónomas, que miran máis polos seus intereses partidistas que polos de todos os galegos”.

A TEMPO DE RECTIFICAR

Para rematar, Alberto Pazos amosou “a decepción do Grupo Popular pola covardía amosada polo BNG e, principalmente, pola súa voceira, a señora Pontón, á hora de condenar a noxenta campaña machista levada a cabo pola CIG contra a conselleira de Política Social, un comportamento vergoñento que os levou a negarse a votar unha iniciativa no Pleno e de amosar a máis mínima mostra de apoio á conselleira de Medio Ambiente, polo ataque que sufriu a pasada fin de semana por detractores de Altri, entre os que figuraban representantes e simpatizantes do BNG da comarca de Melide”.

“Aínda están a tempo todas as deputadas do BNG de rectificar, algo que a bo seguro agradecerán as que realmente traballan pola igualdade real de homes e mulleres, e loitan contra este tipo de estereotipos machistas utilizados contra as mulleres”, rematou.