O PPdeG pon en valor a receita de “unión e escoita” de cara ás eleccións municipais, na Xornada de Convivencia dos populares de Pontevedra

O presidente do PPdeG, Alfonso Rueda, participou hoxe as Xornadas de Convivencia do PP da provincia de Pontevedra, un encontro para poñer en valor a “receita” de “unión e escoita” que caracteriza aos populares, de cara ás próximas eleccións municipais de 2027. Así o ratificaron o centenar de participantes durante as actividades lúdicas e de formación celebradas na Bodega Lagar de Pintos, en Ribadumia, onde tamén estiveron a secretaria xeral do PPdeG, Paula Prado, e o presidente provincial do PP de Pontevedra, Luis López.

Ademais, alcaldes, voceiros municipais, conselleiros, deputados, senadores, delegados territoriais e persoal técnico asistiron a este punto de encontro baixo o lema “As túas ideas, o noso proxecto”.

O presidente dos populares galegos, que participou nun pequeno paseo polo entorno, destacou o proxecto do PP da provincia de Pontevedra, baixo o liderado de Luis López, á fronte dun partido que goberna en 25 municipios. Así, animou aos asistentes a continuar “engraxando a maquinaria de gañar eleccións” do PPdeG, poñendo a vista nas próximas eleccións municipais de 2027 e agardando que esa receita de escoita e atención aos veciños siga funcionando para acadar aínda máis alcaldías o próximo ano.

Pola súa banda, o presidente provincial tamén subliñou o traballo realizado nos 61 concellos da provincia, con proxectos “fortes e cohesionados”. Do mesmo xeito, reivindicou durante a xornada que o PP é o partido co que máis se identifican os pontevedreses, tras gañar consecutivamente as catro derradeiras eleccións celebradas na provincia.

Os asistentes desfrutaron dunha xornada de coaching sobre xestión de comunicación e de actividades lúdicas, onde se puxo en valor o espírito de equipo dos populares. Este encontro culminará mañá cunha andaina polo entorno de O Grove.

José Luis Novo Teijeiro será deputado do Grupo Parlamentario Popular, tras a toma de posesión como alcaldesa de Lugo de Elena Candia

Tras a toma de posesión de Elena Candia como alcaldesa de Lugo e a súa renuncia á acta de deputada no Parlamento de Galicia, José Luis Novo Teijeiro pasará a incorporarse ao Grupo Parlamentario Popular. Así, o informou, hoxe, o portavoz popular, Alberto Pazos, quen destacou a “súa dilatada experiencia no municipalismo e o seu coñecemento do ámbito rural”. Na actualidade, Novo Teijeiro mantén unha participación activa no partido como membro da Xunta directiva do PP de Lugo e da Comisión de pequenos concellos do PPdeG.

Alberto Pazos aproveitou para agradecerlle a Elena Candia todo o “labor impecable” desenvolvido como vicepresidenta e parlamentaria, ao longo destes seis anos; e puxo en valor o seu compromiso por Lugo, ao antepoñer o ben da súa veciñanza a calquera outra aspiración persoal: “Quen podía escoller Lugo, escolleu un escano no Parlamento e quen, como Elena, podía quedarse no Parlamento, escolleu exercer as súas responsabilidades en Lugo”.

Segundo apuntou, remata un ciclo político esgotado en Lugo e comeza o tempo da “política útil e a pé de rúa”, sen barreiras entre o despacho e a veciñanza, que é o que a cidade reclamaba desde hai un tempo. “Ábrese unha nova etapa de xestión e ilusión”, dixo Alberto Pazos, ao poñer de manifesto que a nova rexedora non perdeu nin un minuto en presentar a estrutura do novo goberno municipal e un proxecto de cidade con medio cento de medidas concretas. “Lugo –engadiu- gaña unha grande alcaldesa”.

A VOLTA AO CLIMA TRANQUILO
Por outra banda, o portavoz popular avogou por retomar o clima tranquilo e deixar atrás as escenas de crispación –con ataques persoais, insultos ou descualificacións- que se viviron nas últimas semanas, tanto dentro como fóra do Parlamento, e que “en nada contribúen á imaxe da boa política nin do prestixio das nosas institucións”; así como tamén, onte, ás portas do concello de Lugo, onde se viviron momentos de gran tensión e se superaron os límites do respecto e da provocación.

No referido ao pleno desta última semana, considerou de “lamentable” os ataques verbais contra Elena Candia e mentiras vertidas sobre a deputada popular Paula Mouzo, a quen o BNG “acusou en falso” de ausentarse nos debates sobre temas do seu concello: “Sabiamos do nerviosismo do BNG en Galicia, pero parece que aínda o hai máis en Camariñas”.

“Cando as ideas se substitúen pola mentira e a ofensa persoal –sinalou-, non só perde quen a pronuncia, senón que se resinte a calidade do noso sistema democrático”. Por todo isto, instou aos grupos da oposición a que non tarden “nin un minuto máis en pedir desculpas e, sobre todo, en rectificar actitudes”. E rematou facendo, de novo, un chamamento a “rebaixar o ambiente irrespirable das últimas semanas”.