Pazos di que, fronte as receitas ideolóxicas e decretos-parche de Pedro Sánchez, “Galicia elixe o camiño do rigor e das solucións reais”

O portavoz do Grupo Popular no Parlamento de Galicia, Alberto Pazos, contrapuxo, hoxe, o modelo en materia de vivenda do Executivo de Pedro Sánchez co da Xunta. Así, dixo que, fronte as “receitas ideolóxicas, parches e propaganda de última hora”, o Goberno de Alfonso Rueda “elixe o camiño do rigor e o das solucións reais”.

“Galicia demostra que hai outra forma de facer política”, salientou Pazos, quen apuntou, así, que, por unha parte, a Xunta fai respondendo con feitos e o PPdeG propón a través de iniciativas no pleno do Parlamento: “Temos en marcha máis de 4.000 novas vivendas de promoción pública, con protección permanente, e mantemos firme o obxectivo histórico de acadar as 10.000 vivendas públicas para o ano 2030”. Así mesmo, lembrou que antes de que remate o ano convocaranse axudas para subir ata os 51.000 euros os apoios aos promotores por cada vivenda protexida de réxime especial.

Aproveitou, tamén, para recordar a batería de iniciativas parlamentarias que se debaterán na sesión plenaria da vindeira semana. En primeiro lugar, unha proposición non de lei para esixir recursos reais para Galicia, cualificando de “cantidade ridícula” os 5 millóns anunciados polo Ministerio, “que non chegan nin para financiar 30 vivendas públicas”. En segundo lugar, os populares esixirán a corrección inmediata do portal Casa47, ao que Pazos se referiu como unha “estafa publicitaria”, que ofrece 7 vivendas en Lugo para máis de 2.100 demandantes inscritos. Por último, abordará os efectos da declaración da Coruña como Zona Tensionada tras un ano en vigor.

UN GOBERNO CREPUSCULAR E INESTABLE
“Estamos ante un Goberno central crepuscular, sumido nunha enorme inestabilidade”, apuntou Pazos, quen indicou o rexeitamento parlamentario ás medidas estrela do Executivo central é a mostra de que “non se pode gobernar un país dependendo de cambios de cromos a última hora e de contar votos á desesperada no último minuto”.

Segundo Pazos, o texto redactado polo sanchismo é un “novo exercicio de propaganda”, que ignora a realidade do país e que avoga por un modelo intervencionista que “volve provocar pánico no mercado”. Tal e como sinalou o portavoz popular, desde o anuncio o pasado martes deste “decreto-parche”, o número de pisos en alugueiro caeu en picado en cuestión de horas.

A maiores, Pazos cualificou as propostas de “totalmente inviables e de moi dubidosa legalidade”, censurando que dependan duns Orzamentos do Estado, que nin están nin se lles espera, e que pretendan esixir que as Comunidades asuman con cargo aos seus fondos propios as rendas de contratos privados.

“A xente que está reclamando nas rúas estao facendo en contra das políticas de oito anos de Pedro Sánchez”, sinalou, para recordar que, a vivenda pasou de ser o décimo sexto problema para os españois para ser hoxe o primeiro: “Quen creou o problema non vai solucionar o problema”.

DOUS MESES DE ABANDONO E SILENCIO EN CEUTA
Finalmente, Alberto Pazos aproveitou para pór o foco sobre a situación de Ceuta, tras cumprirse dous meses nos que a cidade autónoma leva “sumida no caos máis absoluto”: “Os ceutís están a vivir un auténtico calvario pola nula xestión e a inexistente atención de Pedro Sánchez”, criticou Pazos, quen acusou ao Goberno de querer tapar a súa inacción a golpe de titular. “Pretenden ocultar e silenciar a desesperación de toda unha cidade autónoma. Por iso, dous meses despois, seguimos dicindo ben alto e claro: Galicia está con Ceuta. Galicia esixe ao Goberno central que actúe dunha vez e que deixe de mirar para outro lado”, concluíu.

O PPdeG esixe ao Goberno a cobertura urxente das prazas médicas vacantes nos equipos que avalían as baixas laborais

O Parlamento de Galicia vén de aprobar unha iniciativa do Grupo Parlamentario Popular na que urxe ao Executivo central a que cumpra coa súa responsabilidade e cubra, á maior brevidade posible, as prazas médicas vacantes dos Equipos de Valoración de Incapacidade (EVI) das direccións provinciais do Instituto Nacional da Seguridade Social (INSS).

Tras recordar que a “competencia é única e exclusivamente do Goberno de España”, a deputada popular Encarna Amigo incidiu en que “cubrir as prazas vacantes do INSS é permitir que miles de galegos reciban a resposta que están agardando”. Neste punto, fixo referencia a que, desde 2019, produciuse un 25 % de redución destes profesionais. “En marzo de 2026 –engadiu- había en Galicia 55 postos de médicos avaliadores, pero só 38 profesionais efectivos no seu posto de traballo. É dicir, aproximadamente, un 31 % das prazas estaban sen cubrir”.

O ESFORZO DO GOBERNO GALEGO FRONTE AO DÉFICIT ESTATAL
Neste sentido, Encarna Amigo destacou que a Xunta de Galicia está a tomar medidas ante a evolución das incapacidades temporais. Como mostra diso, fixo referencia ao plan específico que puxo en marcha, en agosto de 2024, para mellorar a xestión e o control: revisáronse máis de 143.000 procesos de incapacidade temporal e realizáronse máis de 40.000 citacións presenciais.

Lembrou que o Goberno galego reforzou a dotación de recursos humanos da inspección médica coa incorporación de 18 profesionais, distribuídos polas sete áreas sanitarias. E, nesta mesma liña, aprobou o Plan integral para a mellora da prevención, o benestar laboral e a reincorporación saudable ao traballo 2026-2029.

Para rematar, Encarna Amigo afeou a actitude dos grupos da oposición: “Cando lle pedimos ao Goberno de España que cumpra coa súa responsabilidade, aparecen todas as escusas posibles e a súa cegueira permanente”.

MÁIS FONDOS PARA INSERCIÓN LABORAL
Por outra banda, o Parlamento de Galicia aprobou demandar ao Goberno central máis fondos para que o Goberno galego poida levar a cabo programas ou iniciativas desenvolvidas por entidades de iniciativa social para que as persoas regularizadas no proceso extraordinario poidan acceder a oportunidades laborais. “Pedimos máis flexibilidade para que Galicia poida destinar ese fondos a onde fan falta e se atendan as necesidades reais das entidades”, dixo a deputada popular Noelia Pérez, quen continuou instando ao Executivo de Pedro Sánchez a que deixe de poñer “impedimentos”.

Así mesmo, sinalou que a falta de planificación por parte do Goberno central supón un risco real de colapso administrativo e un impacto elevado nos servizos públicos autonómicos. Por este motivo, considerou imprescindible que Galicia dispoña destes fondos finalistas para que dito colectivo de persoas poida formarse e acceder con garantías ao mercado laboral galego: “A regularización debe continuar con formación, orientación e acceso a un posto de traballo”.

A deputada popular lembrou que o real decreto naceu mal desde o primeiro momento. E denunciou que a norma fose aprobada sen o necesario consenso parlamentario, sen escoitar ás Comunidades autónomas, que son precisamente as que deben integrar a estas persoas traballadoras e asumir o impacto directo nos servizos públicos.

Paula Prado lamenta os “oito anos de improvisación” de Sánchez en materia de vivenda fronte ás “solucións reais” do Goberno de Rueda

A secretaria xeral do PPdeG, Paula Prado, lamenta a “falta de rigor e responsabilidade” do Goberno de Pedro Sánchez e os seus socios do BNG co principal problema da sociedade: a vivenda. Para a número dous dos populares galegos, o Executivo central “leva oito anos improvisando, sen construír unha soa vivenda e operando de costas ás comunidades autónomas”, mentres o Goberno galego, pese aos recortes do Executivo central,  segue centrado en construír vivenda, defendendo a seguridade xurídica dos propietarios e inquilinos, apostando pola oferta e aportando solucións reais ante a preocupación dos galegos e galegas.

Así o manifestou hoxe a número dous dos populares galegos nunha rolda de prensa na sede autonómica do PPdeG, onde criticou as medidas intervencionistas ineficaces e o “fume” de Pedro Sánchez, que se viu obrigado a aprobar dous reais decretos de vivenda tras un mediático desafiuzamento e, ademais, “sen informar a Galicia, unha vez máis”.

Para a secretaria xeral do PPdeG, estas medidas “chegan mal e tarde” e son un “refrito” de iniciativas xa aprobadas que o único que fan é “retirar vivendas do mercado do alugueiro e xerar inseguridade xurídica aos propietarios”. Deste xeito, a improvisación do Goberno central “queda evidenciada”, lembrando que a propia ministra de Vivenda non sabía responder as preguntas dos xornalistas sobre os decretos e o retraso da publicación dun deles.

Ademais, Prado lamenta que o BNG apoie estas medidas, “non porque queiran resolver o problema da vivenda ou porque defendan a Galicia, senón por intereses partidistas”. Neste punto, preguntouse que lle pasa ao independentismo galego, xa que hai semanas que a líder dos nacionalistas, Ana Pontón, cuestiona onde están as vivendas prometidas polo presidente Alfonso Rueda e mesmo trata de confundir aos galegos nas redes sociais sobre o número de vivendas construídas en Santiago. “Están moi perdidos. A pena foi que en vez de ir a entrega de vivendas programada polo Goberno galego, a que estaba invitada, en Lamas de Abade, fose ás vivendas do Castiñeiriño, que están en proceso de rematar”, explicou.

Ademais, lembrou que entre as vivendas que visitou Pontón e as que realmente visitou o presidente Rueda, xa son 48, fronte as 24 que aseguraba a líder do BNG. “E só na cidade de Santiago están previstas máis de 430”, recordou Prado. Tamén afeou aos nacionalistas que gobernan no Concello de Santiago que a súa única colaboración na construción de vivenda fose “denegar licencias de obra por entender que había falta de interese público para Galicia, evidenciando que a construción de vivenda non é interese suficiente para o BNG”.

A secretaria xeral lamenta o discurso do  BNG do “negacionismo”, seguindo “a orde da UPG de oposición e intentar incendiar o que funciona”. Neste sentido, advirte que os populares estarán “moi atentos” a actividade do BNG para ver se son eles os que están manipulando as plataformas en contra dos Proxectos de Interese Autonómico (PIA), que buscan paralizar a construción de vivenda.

MÁIS DE 4.000 VIVENDAS EN MARCHA

Prado lembrou que en Galicia, o Executivo do presidente Rueda ten máis de 4.000 vivendas pública xa en marcha, no marco do compromiso de duplicar o parque público para chegar a 8.000 fogares antes de que remate 2028, e coa previsión do Pacto de Vivenda 2026-2030 de chegar a 10.000 en 2030.

Máis alá da construción de vivenda, o Goberno galego traballa en medidas como o desenvolvemento de solo para 25.000 vivendas, 20.000 delas protexidas; a aposta pola rehabilitación para destinala a alugueiro accesible; a cualificación indefinida das vivendas públicas e protexidas en solo público, ou a conversión de locais comerciais en fogares, entre outras.

O PPdeG pon en valor a fortaleza do sector vitivinícola no Baixo Miño e o compromiso da Xunta coas adegas e viticultores galegos

O PPdeG vén de poñer en valor a fortaleza do sector vitivinícola e o compromiso do Goberno galego coas adegas e viticultores galegos do Baixo Miño, especialmente, dos concellos de Tomiño e O Rosal.

Durante unha visita recente a Bodegas Altos de Torona, e coincidindo co remate da tempada de vendima deste ano, os deputados do Grupo Parlamentario Popular Julio García Comesaña e Moisés Rodríguez enxalzaron o traballo do conxunto de viticultores e adegas da subzona do Rosal, unha das cinco que integran a Denominación de Orixe Rías Baixas.

Acompañados polo presidente do PP do Rosal, Iván Gómez, e pola presidenta do PP de Tomiño, Lara Meneses, destacaron “o esforzo realizado durante décadas por centos de profesionais para converter os viños desta zona nun produto de enorme calidade e prestixio”, así como a capacidade das adegas para combinar a tradición vitivinícola coa innovación, a modernización dos procesos produtivos, a sustentabilidade e a apertura de novos mercados.

Neste senso, García Comesaña referiuse a “un sector que vai moito máis alá da produción de viño: crea emprego e riqueza, fixa poboación, coida a paisaxe, mantén vivo o territorio e contribúe a proxectar a imaxe de Galicia dentro e fóra de España”. De feito, segundo sinalou, o sector vitivinícola representa arredor do 1,4 % do PIB galego e uns 16.000 empregos a tempo completo, cun tecido próximo aos 10.000 viticultores e máis de 440 adegas.

O PESO DE RÍAS BAIXAS E DA SUBZONA DO ROSAL
Os populares subliñaron, especialmente, a fortaleza da D.O. Rías Baixas, da que forma parte a subzona do Rosal xunto con Val do Salnés, Condado do Tea, Soutomaior e Ribeira do Ulla.

A denominación contaba, ao peche de 2025, con 4.848 hectáreas inscritas, 4.949 viticultores e 177 industrias. Só durante o pasado ano, produciu máis de 47,5 millóns de quilos de uva e 27,1 millóns de litros de viño cualificado, cun valor económico estimado de 258,7 millóns de euros, o que evidencia a dimensión económica acadada pola denominación e polo tecido de adegas e viticultores que a sostén.

Para Moisés Rodríguez, estes resultados “son froito fundamentalmente do traballo dos viticultores e das adegas, que souberon construír arredor das variedades autóctonas, da calidade e da vinculación co territorio unha marca recoñecida e valorada polos consumidores”.

UN SECTOR QUE CREA FUTURO NO TERRITORIO
Pola súa banda, Iván Gómez e Lara Meneses salientaron a especial relevancia que a actividade vitivinícola ten para os dous municipios.

“Cada viñedo que se mantén produtivo e cada adega que inviste e medra significan actividade económica que permanece aquí, emprego e oportunidades para o noso territorio”, apuntaron.

Os representantes populares concluíron a visita reafirmando o compromiso de continuar apoiando un sector que “converte a calidade da nosa terra e o traballo da nosa xente nun produto de alto valor engadido e nun dos mellores embaixadores de Galicia no mundo”.