Santiago, 3 de Outubro de 2017.- O secretario xeral do PPdeG, Miguel Tellado, valorou os datos de desemprego do mes de setembro publicados esta mañá e asegurou que “ninguén pode negar que Galicia está mellor que hai un ano en xeración de actividade económica e creación de emprego”.
Segundo apuntou, todos os indicadores da nosa economía están en verde e consolídase a tendencia iniciada hai xa catro anos. Así, a nosa comunidade continúa cunha boa evolución cara á creación de emprego e de calidade: baixa o paro, aumenta a afiliación e crece a contratación.
Nese senso, precisou que, malia que o mercado laboral segue mellorando en Galicia, recuperándose xa máis da metade do emprego perdido na crise, os populares, “lonxe de conformarnos, seguimos traballando coa satisfacción de saber que as nosas políticas de emprego funcionan e dan os seus froitos”. Deste xeito, puxo en valor iniciativas impulsadas polo Goberno galego como a Axenda 20 o emprego estable e a Estratexia Autónomo 2020. Con respecto a esta última, recordou que no último mes activáronse diversas medidas para favorecer aos traballadores por conta allea como o Bono Autónomo e a ampliación da tarifa plana, ás que se sumará este ano unha nova medida para favorecer a conciliación da súa vida familiar coa laboral.
Tellado tamén se referiu ás manipulacións da oposición con respecto a este tema: “Intentan enganar aos cidadáns aproveitándose daqueles que peor o están pasando utilizando o paro como ferramenta, pero hoxe a única verdade é que Galicia se sitúa a niveis de desemprego inferiores aos de hai oito anos e que o aumento nas afiliacións é o segundo maior producido nun setembro desde o inicio da crise económica”.
“Logramos borrar o rastro da destrución de emprego do bipartito”, remarcou o número dous dos populares galegos antes de sinalar que xa levamos preto de catro anos de baixadas do desemprego consecutivas, desde novembro de 2013, e que as cifras descenden nas catro provincias galegas, nas sete grandes cidades, en todos os sectores, e nos colectivos prioritarios da Xunta.
Por outra banda, Tellado tamén fixo referencia aos datos intermensuais, lembrando que este ano a tempada da vendima se adiantou a agosto en moitos puntos de Galicia e que xullo e agosto tiveron no sector servizos máis contratacións que en anos anteriores, polo que a subida do paro este mes está asociada á caída do emprego estacional. “Aínda así, para nós nunca será unha boa nova que haxa subidas no desemprego xa que o noso principal obxectivo é que, mes a mes, a recuperación chegue cada vez a máis galegos”, subliñou.
Cómpre lembrar que, concretamente, o desemprego baixou no último ano en 10.279 persoas, o que supón un descenso do 5,29%, encadeando catro anos consecutivos de caídas nun mes de setembro. De feito, un de cada tres parados abandonaron as listas do paro neste período.
