Iniciativa sobre as actuacións que debe levar a cabo a Xunta de Galicia para demandar do Goerno central que a devolución do IVE de novembro dse faga extensiva a todos os concellos e deputacións galegas
A mensualidade do IVE correspondente a novembro de 2017, por importe de 204 M€, e non liquidada no ano 2019, é unha das principais débedas con Galicia do Goberno de Pedro Sánchez.
Galicia foi a primeira comunidade autónoma de España en alertar deste problema e esixir unha solución. Xa en xullo de 2018 o Goberno galego o denunciou no Consello de Política Fiscal e Financeira e desde entón, e actuando con lealdade institucional, reclamou esta débeda en múltiples ocasións:
– Esixindo reiteradamente unha solución no Consello de Política Fiscal e Financeira,
– Reclamando a súa devolución por carta tanto á ministra de Facenda como ao presidente do Goberno de España,
– Con informes xurídicos que facilitaban unha solución
– E formulando alternativas para facer efectivo o abono.
Todas as reclamacións da transferencia da contía adebedada foron rexeitadas polo Goberno de Pedro Sánchez. Do mesmo xeito, tampouco foron atendidas tres iniciativas do Parlamento galego que solicitaban este aboamento.
Por esta razón, e unha vez esgotadas todas as vías de diálogo no eido da lealdade institucional, o Goberno galego viuse obrigado primeiro a presentar un requirimento de compensación do IVE non liquidado en febreiro de 2020; e, ante a falta de resposta da Administración Xeral do Estado, a presentar un recurso ante o Tribunal Supremo en agosto de 2020. A mesma vía seguiron outras Comunidades Autónomas.
A pasada semana fíxose público que a sala do contencioso-administrativo do alto tribunal estimou o recurso formulado en 2020 pola Comunidade Autónoma de Castela e Léon, que é moi similar ao formulado pola Comunidade Autónoma de Galicia.
Como consecuencia deste recurso de Castela e León, a sentencia Nº 528/2021, de 19 de abril, acredita:
1. Que o Goberno de Pedro Sánchez vulnerou o dereito á autonomía financeira da
Comunidade de Castela e León que consagra a Constitución Española (artigos
140, 142 e 156) e non aplicou o principio de lealdade institucional na actuación das administración públicas (artigo 3.1e/ da Ley 40/2015, de 1 de outubro, de Régimen Jurídico del Sector Público).
2. Que a actuación do Goberno de Pedro Sánchez orixinoulle un quebrante económico a esa comunidade,
3. E que esa actuación produciu un enriquecemento indebido para a Administración do Estado.
Estes pronunciamentos xudiciais son perfectamente reproducibles para a reclamación xudicial promovida por Galicia, xa que se está a reclamar o mesmo.
Por todo isto, o Grupo Parlamentario Popular presenta a seguinte proposición non de lei en Pleno:
“O Parlamento de Galicia insta á Xunta de Galicia a demandar do Goberno Central a transferencia á Comunidade Autónoma os 204 M€ da mensualidade do IVE correspondente a novembro de 2017 e que non se liquidou no ano 2019, sen necesidade de agardar á sentencia sobre o recurso presentado polo Goberno galego ante o Tribunal Supremo.
Igualmente, insta á Xunta de Galicia a que solicite ao Goberno de España que esta devolución do IVE de novembro de 2017 se faga extensiva a todos os concellos e deputacións provinciais galegos, que estimamos supera os 40 M€”.
Rexistro: https://www.parlamentodegalicia.es/Expedientes/11/PNP-001510
