Iniciativa sobre a demanda da Xunta de Galicia ao Goberno de España respecto do reforzo do servizo público postal
Nun contexto como o actual, o servizo público postal prestado por Correos xoga un indubidable e valioso papel para contribuír á cohesión social, territorial e económica do país, tanto a nivel nacional como autonómico, provincial e, especialmente, municipal.
O servizo público postal atende diariamente a todas as localidades e municipios de España e garante a prestación dun servizo público á cidadanía, empresas e administracións na totalidade dos núcleos de poboación, ao marxe da rendibilidade económica.
Como mostra da súa capacidade vertebradora, o servizo de Correos público do noso país fai chegar envíos postais a máis de 8.000 municipios, 16 millóns de fogares (familias) 3,2 millóns de empresas (máis dun 99% son pemes) e un total de 7.100 puntos de atención á cidadanía no ámbito rural (carteiros rurais e oficinas); para o que se realizan máis de 100.000 quilómetros diarios.
O servizo postal universal declarouse durante o Estado de Alarma servizo esencial, xogando un papel chave nun momento tan crítico como o foi o inicio da pandemia provocada pola covid-19. Algo que, en ningún caso, puido facerse desde o ámbito privado, orientado á rendibilidade económica e non a dar unha reposta social ás necesidades do conxunto da cidadanía.
Amosamos a nosa fonda preocupación pola actual política de debilitamento do servizo público postal e do operador público que ten encomendada a súa prestación -Correos- que está levando a cabo a súa dirección a través de transvasamento da actividade da matriz á filial Correos Express, a externalización de certos servizos rendibles da compañía, a cesión ou venda do patrimonio inmobiliario histórico de Correos -19 edificios nos dous últimos anos e un total de 88 este ano-. Tamén polos resultados económicos negativos (275 millóns de déficit nos PXE 2020-2021) Por todo iso cremos que se require unha recondución no rumbo do seu liderado e xestión.
Non é aceptable que, mentres se enxalza a reversión da España Baleira, se recorten servizos rurais e servizos en xeral, minguando o dereito da cidadanía á recepción de correspondencia de xeito accesible.
Non é aceptable a redución do financiamento público, que quedou lonxe dos 220 millóns acordados na Comisión Mixta Fomento 2017 (110 millóns menos nos PXE
2020-2021, e case 100 millóns menos no futuro plan de prestación do servizo postal universal)
O resultado é que, concretamente, na Comunidade Autónoma de Galicia Correos suprimiu 156 postos de traballo, así mesmo, a empresa pública está a levar a cabo un recorte na contratación que está a deixar sen cubrir o emprego estrutural e calquera tipo de permiso ou licenza. Como consecuencia disto, a prestación do servizo público postal baixará a súa calidade drasticamente.
Amais, Correos adoptou esta decisión sen que, previamente, se consultara o informase por vía algunha os representantes políticos do Parlamento de Galicia, a pesar de afectar directamente os intereses da cidadanía.
Por todo o exposto, as deputadas e deputados do Grupo Parlamentario Popular presentamos a seguinte proposición non de lei en comisión:
“O Parlamento de Galicia insta á Xunta de Galicia a dirixirse ao Goberno de
España que para adopte as seguintes medidas:
1º.- Reforzar a financiación do servizo público postal, claramente insuficiente na actualidade, no vindeiro plan de prestación a aprobar polo Consejo de Ministros, de xeito que se asegure un servizo de calidade para o conxunto da cidadanía.
2º- Incluír a Correos, a maior empresa pública do noso país, no reparto dos
Fondos para a recuperación, transformación e resiliencia, para que xogue un papel clave na reposta que, como sociedade, debemos dar á crise sanitaria e económica provocada pola covid.
3º- Actualización e mantemento das Oficinas auxiliares (rurais) e Unidades de Reparto existentes nas zonas rurais, claves na reversión da “España Baleira”. É o único xeito de contribuír a que aquelas áreas xeográficas de reparto deficitarias economicamente poidan gozar dun servizo postal en igualdade de condicións respecto á poboación dos grandes núcleos urbanos.
4º- Reforzo da capilaridade de Correos ampliando o número de oficinas, unidades de reparto e centros de tratamento co fin de lograr o maior achegamento á cidadanía e lograr as condicións óptimas de accesibilidade marcadas pola Lei Postal e pola Directiva Postal Europea.
5º- Garantir a cobertura dos postos de traballo estruturais necesarios, hoxe claramente insuficientes, para dar cobertura e garantir un servizo postal público de calidade, con emprego e dereitos de calidade.
6º- Garantir o cumprimento dos parámetros de calidade determinados pola Lei Postal e polo Regulamento que regula a prestación do Servizo Postal Universal e, en definitiva aproximar de xeito eficaz e eficiente o correcto e necesario desempeño da prestación dos servizos postais públicos, co obxectivo de asegurar a todos os cidadáns da Comunidade Autónoma de Galicia a recepción da súa correspondencia, polo menos 5 días á semana, como está establecido tamén na Directiva Postal Europea.
Iniciativa:https://www.parlamentodegalicia.es/Expedientes/11/PNC-002762
