Santiago, 27 de maio de 2022- A Comisión 7ª do Parlamento de Galicia aprobou hoxe sendas iniciativas do Grupo Popular encamiñadas a impulsar a Lei de recuperación de terra agraria de Galicia, coa promoción dunha nova convocatoria de axudas para proxectos de cooperación entre grupos de desenvolvemento rural na que se valore de xeito prioritario os proxectos que impulsen os instrumentos de recuperación de terra agraria, e impulsar as agrupacións forestais de xestión conxunta e a figura do silvicultor activo creadas a través, entre outras, desta Lei.
Ao respecto da primeira iniciativa, a deputada popular e voceira de Medio Rural, Elena Candia, recordou que Galicia foi unha das primeiras autonomías en garantir a continuidade dos GDRs, despois de que a UE ofreceu aos Estados membros a posibilidade de prorrogar a financiación dos seus programas de desenvolvemento rural no 2021 e 2022, á espera dun novo Leader 2023-2027, e grazas a esta medida garántese o funcionamento axeitado dos 24 GDRs espallados por toda Galicia.
Elena Candia sinalou que unha das prioridades da Consellería de Medio Rural está sendo a loita contra o abandono da terra e traballar na súa recuperación para poñela a producir e deste xeito poder xerar actividade económica, novos postos de traballo e asentamento da poboación no rural galego.
Nese sentido, “o Grupo Popular considera relevante que todos os GDRs galegos poidan seguir aproveitando ao máximo as posibilidades que ofrece o poder traballar na modalidade de cooperación, e sacarlle o máximo proveito as ferramentas que pon a disposición a nova Lei de recuperación da terra agraria de Galicia”, sinalou a voceira de Medio Rural.
Deste xeito, sería moi positivo que a convocatoria de axudas, ao abeiro da medida Leader, contemple de xeito prioritario a posibilidade de dar soporte a proxectos de cooperación entre os GDRs que impulsen os instrumentos orientados ao aproveitamento agrícola, gandeiro ou forestal da terra, como son os polígonos agroforestais, as das aldeas modelo, como a aqueles destinados a mellorar a calidade de vida da poboación rural, como son os plans de dinamización do núcleo rural das aldeas modelo, sinalou Elena Candia.
AGRUPACIÓNS FORESTAIS DE XESTIÓN CONXUNTA E SILVICULTORES ACTIVOS
Por outra banda, o deputado popular José Antonio Armada defendeu tamén no seo da Comisión 7ª unha iniciativa, aprobada por unanimidade da Cámara, encamiñada a impulsar as agrupacións forestais de xestión conxunta e a figura do silvicultor activo creadas ao abeiro da Lei 7/2012 de Montes de Galicia e da lei 11/2021 da recuperación da terra agraria.
“A Lei de recuperación da terra agraria promovida dende o Grupo Popular ten como obxecto levar a cabo a mobilización da terra produtiva, como impulso ao sector primario e ampliación da base territorial das explotacións e o fomento da mobilidade das terras forestais en Galicia debe situarse no marco xeral da política de ordenación de usos e recuperación e posta en valor das terras agrarias” sinalou o deputado popular.
Deste xeito, indicou, debe fomentarse de xeito prioritario a promoción da dispoñibilidade dos terreos ás diferentes iniciativas de xestión conxunta dos terreos forestais, independentemente do grao de compromiso dos titulares forestais que as compoñan.
“As ferramentas básicas con que se conta para modificar o problema estrutural do minifundismo son as reestruturacións parcelarias, o fomento de fórmulas de xestión conxunta e a activación e dinamización da xestión forestal activa mediante o recoñecemento e fomento das agrupacións forestais de xestión conxunta e a concienciación de silvicultor no propietario galego de terreos forestais” indicou o deputado popular
Podedes ver as iniciativas parlamentarias completas na nosa web:
Promoción dunha nova convocatoria de axudas para proxectos de cooperación entre grupos de desenvolvemento rural:
http://www.ppdegalicia.com/index.php/gl/novas-3/item/5963-promocion-dunha-nova-convocatoria-de-axudas-para-proxectos-de-cooperacion-entre-grupos-de-desenvolvemento-rural
Impulso as agrupacións forestais de xestión conxunta e a figura do silvicultor activo
http://www.ppdegalicia.com/index.php/gl/novas-3/item/5964-impulso-as-agrupacions-forestais-de-xestion-conxunta-e-a-figura-do-silvicultor-activo
