Santiago, 1 de xuño de 2022.- O Parlamento de Galicia aprobou hoxe por unanimidade a proposición non de lei do Grupo Popular a través da que se reivindica ao Goberno de España un compromiso firme cos proxectos de cooperación transfronteiriza en materia de infraestruturas estratéxicas como a saída sur de Vigo, o trazado por territorio español do AVE Vigo-Porto, a conexión internacional transfronteiriza entre Macedo de Cavaleiros e A Gudiña, pasando por Vinhais; así como a conexión por estrada entre a AG-31 e a IC-28 pola fronteira da Madalena.
“Pedimos que o Goberno de Pedro Sánchez impulse o AVE Vigo-Porto coa mesma intensidade que o está a facer o Executivo luso na parte portuguesa, aproveitando a oportunidade extraordinaria que supoñen os fondos europeos de reconstrución”, manifestou o deputado popular José Antonio Armada.
“Agardamos e pedimos un impulso decidido da saída sur de Vigo por parte do Ministerio de Transportes, que aínda está co estudo de alternativas, e que este sexa un primeiro paso para que, dunha vez por todas, presente unha planificación completa de obras e investimentos para avanzar na conexión en alta velocidade entre Vigo e Porto, en paralelo ao que fará o Goberno portugués na parte lusa”, sinalou Armada.
O deputado popular destacou que o Eixe Atlántico ferroviario é unha liña de éxito desde a súa posta en marcha, en abril de 2015, como así o demostra a boa acollida que este servizo ten por parte dos cidadáns. Deste xeito, indicou que “para facer aínda máis competitiva este liña é preciso que o Goberno de España a impulse decididamente, cunha planificación completa de obras e investimentos, a súa extensión cara a Portugal”.
APROVEITAR POTENCIALIDADE E SINERXIAS EURORREXIÓN
José Antonio Armada explicou que o Goberno galego “vén defendendo desde hai moito tempo a necesidade de impulsar unha liña de alta velocidade entre Vigo, Porto e Lisboa, que permita aproveitar ao máximo a potencialidade e as sinerxias da Eurorrexión e que contribúa ao desenvolvemento económico e social do noroeste da Península Ibérica”.
Neste sentido, considerou necesario que o Goberno central “presente proxectos concretos ás convocatorias de fondos para impulsar a liña Vigo-Porto e o resto de actuacións estratéxicas para que o Corredor Atlántico de mercadorías se converta nunha oportunidade ben aproveitada para modernizar a nosa rede ferroviaria e aumentar a competitividade do noso territorio”.
Armada lembrou que o Goberno de España comprometeu a elaboración dun Plan director do Corredor Atlántico e a creación dun comisionado para artellar o diálogo coas comunidades autónomas implicadas e cos axentes interesados. “Lamentablemente, a realidade é que a día de hoxe eses compromisos non se cumpriron nin existe previsión algunha sobre o seu cumprimento”, dixo.
“A Xunta carece de calquera tipo de información oficial sobre os proxectos presentados polo Goberno de España ás convocatorias de fondos europeos para o impulso dos corredores europeos de mercadorías, ao tempo que tamén se descoñece se eses proxectos se corresponden coas prioridades trasladadas polo Goberno galego ao Goberno de España como actuacións máis prioritarias para a modernización da rede ferroviaria de mercadorías dentro do Corredor Atlántico”, sinalou.
