A secretaria xeral do Partido Popular de Galicia, Paula Prado, afirmou hoxe que “con Pedro Sánchez e co BNG non é que España e Galicia perdan aos penaltis, senón que perden por goleada”, xa que o presidente do Goberno “é unha marioneta do independentismo” e os nacionalistas galegos “están ao carón daqueles que queren romper España”.
Así o manifestou esta mañá nunha rolda de prensa celebrada na sede autonómica do partido e na que, coincidindo coa semana na que se conmemora o cuadraxésimo cuarto aniversario da Constitución Española, non dubidou en contrapoñer “aos que desatan lazos e os que os unen” e “a quen trata de construír pontes e quen trata de rompelos en pedazos”.
Referíndose especificamente ao Goberno central, Paula Prado asegurou que “non bastou coa sedición, que agora queren condonar tamén a malversación”. “Mentres no resto do Estado observamos como meros espectadores este intercambio de cromos entre Pedro Sánchez e os independentistas”, dixo.
Congratulouse da “boa nova” que supón a chegada da Axencia de Intelixencia Artificial a Galicia, pero a contrapuxo cos “centos de malas novas” que chegan á Comunidade desde Madrid, como as máis de 200 emendas aos Presupostos Xerais que agora están no Senado: “O que buscamos con estas emendas é mudar os agravios a Galicia, pero xa sabemos onde rematarán: nas papeleiras de cada un dos ministerios”.
Sobre a Lei do ‘só si é si’, a secretaria xeral dos populares galegos volveu reclamar a Pedro Sánchez, así como ás ministras Irene Montero e Pilar Llop, que asuman “as súas responsabilidades por esta chapuza” e afirmou: “Non temos nin desculpas nin ceses, pero si temos xa catro rebaixas de penas a delincuentes sexuais en Galicia”.
Neste sentido, afeou ao Goberno de Sánchez que neste asunto “non atendera ás advertencias”, que “respondera dunha forma inmadura chamando ‘fachas con toga’ aos xuíces” e que “tres semanas despois só se atrevan a dicir que farán ‘algún axuste técnico’ mentres seguen botando a culpa aos xuíces e ao Partido Popular”.
“O BNG ESTÁ A CARÓN DOS QUE QUEREN ROMPER ESPAÑA”
Paula Prado puxo tamén en evidencia que “esta semana o BNG mudou a chaqueta moderada e puxo a chaqueta radical”, citando algunhas das frases pronunciadas nos últimos días por Ana Pontón e Néstor Rego e nas que “deixan ben claro que as súas intencións moderadas son levantar a República de Galiza”.
“É necesario que a sociedade galega saiba que o principal partido na oposición está ao carón de Esquerra Republicana e de Bildu. O BNG está ao carón daqueles que queren romper España”, engadiu.
“SOMOS MAIORÍA OS QUE APOSTAMOS POR UN CAMBIO DE ADESTRADOR”
A secretaria xeral do PPdeG concluíu sinalando: “Afortunadamente somos maioría os que nos sentimos orgullosos da nosa Constitución, os que cremos en España e na fortaleza do modelo autonómico e os que en Galicia apostamos por un Goberno estable, solvente e eficaz fronte a camiños que non levan a ningures”.
Por último, facendo un símil futbolístico, Paula Prado pediulle aos españois que cando chegue a hora de ir votar “aposten por un cambio de adestrador para que saia Pedro Sánchez e o seu recambio se chame Alberto Núñez Feijóo” e reivindicou que Galicia “siga confiando no mesmo estilo de xogo que apenas notou os cambios dos últimos meses”.
