O PPdeG urxe aos concellos de Cangas e Vigo a que asuman as súas competencias en materia de saneamento e tomen medidas urxentes ante as constantes verteduras de augas residuais sen depurar á ría.

A portavoz do PP de Cangas e deputada autonómica, Dolores Hermelo, e a parlamentaria do Grupo Popular, Patricia García, denunciaron a degradación que está a sufrir a ría de Vigo por culpa da “neglixencia e a parálise” dos gobernos municipais de Cangas e Vigo na xestión das súas redes de saneamento. Así, advertiron do grave risco que supón para o medio mariño, a saúde pública e a viabilidade do sector marítimo-pesqueiro os continuos vertidos que acaban directamente no litoral.

DOUS VERTIDOS EN MENOS DUN MES
No caso de Cangas, en menos dun mes, “van xa dous vertidos: o pasado 28 de abril e onte mesmo”, informou Dolores Hermelo. O primeiro deles rexistrouse tras un intenso chuvasco, o que provocou “o colapso de toda a rede municipal de Cangas” e, por conseguinte, que o sistema vertera directamente ao mar unha cantidade inxente de augas fecais, deixando a auga tinguida de cor marrón a centos de metros da costa e xerando fortes cheiros.

A portavoz do PP de Cangas amosou a súa preocupación polo acontecido e puxo a voz de alarma no feito de que “sexa suficiente só un chuvasco para deixar en evidencia o lamentable estado da rede, derivado da incapacidade de xestión do seu goberno local”. “E onte mesmo –engadiu-, escasos quince días despois, produciuse un novo vertido de augas fecais”.

“O saneamento é unha competencia municipal básica e exclusiva. Trátase dunha obriga legal que, gobernos como os de Cangas ou Vigo, están a incumprir de forma sistemática por unha nula inversión no mantemento, na separación de pluviais e fecais, e na modernización da súa infraestrutura hidráulica”, sinalou Dolores Hermelo, quen alertou de que o estado das canalizacións nestes municipios é tan deficitario que o sistema colapsa á mínima incidencia meteorolóxica.

AMEAZA PARA O SECTOR DO MAR
Pola súa banda, Patricia García incidiu en que estas verteduras non son un contratempo ambiental puntual e apuntou á ameaza directa para a saúde pública e para o sector marítimo-pesqueiro da comarca.

“A ría de Vigo é o motor económico de miles de familias. Cada vez que o saneamento municipal colapsa e as augas fecais chegan ao mar, ponse en risco a clasificación das zonas de produción de moluscos e o traballo diario do noso sector do mar, tal e como nos transmitiron desde confrarías como a de Cangas”, dixo García, quen reclamou aos gobernos locais de Cangas e Vigo un compromiso con feitos para poñer fin dunha vez ás verteduras.

Por último, “fronte á irresponsabilidade” dos executivos locais, salientou o investimento de 151,7M€ que o Goberno galego destina a Augas de Galicia: “De cada 10 euros deste orzamento, 7 van destinados especificamente a abastecemento e saneamento”. Tras salientar que o ano pasado o Goberno galego concedeu máis de 7,6 millóns en subvencións para obras locais e auditorías, lamentou que “haxa concellos que non sexan capaces de dar o paso para captar estes fondos finalistas e arranxar os seus problemas”.

“De nada serve que a Xunta constrúa estacións depuradoras, se despois os concellos de Vigo e Cangas teñen as súas redes locais cheas de fendas, sen mantemento e sen investir un só euro do seu orzamento en evitar que as súas canalizacións rebenten cada vez que chove”, engadiu. As deputadas exixen aos rexedores destes municipios que abandonen a “política de escaparate e confrontación coa Xunta”, asuman as súas competencias legais e executen de forma urxente plans de choque para arranxar e profesionalizar os sistemas de saneamento locais.