O portavoz do Grupo Popular, Alberto Pazos, manifestou hoxe que “se de verdade BNG e PSdeG están preocupados por defender os intereses de Galicia e dos galegos non terán inconveniente en apoiar a nosa proposición non de lei que se debaterá no Pleno desta semana pedindo ao Goberno socialista de Pedro Sánchez que Galicia non saia prexudicada dos posibles pactos para que os independentistas lle dean o seu voto na sesión de investidura”.
Ao remate da reunión do Grupo Popular celebrada esta mañá, Alberto Pazos lembrou que “esta semana comezará a tramitación dos orzamentos da Xunta par 2024 coas comparecencias dos membros do Goberno galego, dos presidentes das Deputacións Provinciais e de varios entes da Administración galega”.
75% DOS ORZAMENTOS PARA POLÍTICAS SOCIAIS
Neste sentido, incidiu que “non nos cansaremos de repetir que estes orzamentos son os maiores da historia de Galicia, chegando aos 13.257 millóns de euros, dos que case o 75 por cento destinaranse a políticas sociais, destacando que por primeira vez se superan os 5.000 millóns de euros para a sanidade pública galega”. “Todo iso aderezado sen recorrer a débeda, cun incremento das partidas destinadas a investimentos, e cunha nova baixada dos impostos, neste caso no imposto de transmisións patrimoniais e para a compra de vehículos de segunda man ou eléctricos”, engadiu.
Respecto da sesión plenaria que se celebra esta semana, Alberto Pazos fixo especial referencia á proposición non de lei que defenderá o Grupo Popular pedindo ao Goberno socialista de Pedro Sánchez que aclare o contido das negociacións que está a levar a cabo coas distintas forzas políticas, especialmente cos independentistas cataláns, para que voten a súa candidatura na sesión de investidura, “unha sesión de investidura que se está a aprazar sine die a pesar da urxencia que os socialistas amosaban no momento da investidura de Alberto Núñez Feijóo”.
O portavoz popular considerou “lamentable que Pedro Sánchez e a presidenta do Congreso estean manexando a actividade do Congreso ao seu antollo, intentando ademais baleirar de competencias o Senado, como está a facer impedindo a tramitación do proxecto de Lei para eliminar o imposto de sucesións e doazóns impulsado polo Grupo Popular”. Deste xeito, manifestou que “é unha auténtica anomalía democrática que a día de hoxe descoñezamos a data da sesión de investidura de Pedro Sánchez, xogando cos prazos en función dos seus intereses, cando hai máis de dúas semanas que O Rei encargou a investidura a Pedro Sánchez e el aseguraba que xa tiña todo atado e ben atado”.
DEFENDER A IGUALDADE DE TODOS OS ESPAÑOIS
“Desde o PPdeG consideramos que os galegos, e todos os españois, en xeral, merecemos saber que está disposto a ceder Pedro Sánchez aos independentistas cataláns para manterse no poder”, indicou Alberto Pazos, quen apuntou que “o futuro de España non será positivo se a súa gobernabilidade se sustenta naqueles que queren acabar coa unidade do país, que non foron capaces de condenar o terrorismo e levan a persoas con delitos de sangue nas súas listas electorais; nin aqueles que ofrecen amnistías a fugados e perseguidos pola Xustiza”.
Alberto Pazos subliñou que “hoxe é máis necesario que nunca defender a igualdade de todos os españois, con independencia do lugar no que residan, e apostar con decisión por un Goberno de España que defenda os intereses xerais, sen atallos, nin discriminacións, nin privilexios en forma de cesións a determinados partidos independentistas”.
Por este motivo, avanzou que “seguiremos traballando e pedindo o apoio, tanto do BNG como do PSdeG, para que Galicia non saia prexudicada dos posibles pactos de Pedro Sánchez, incidindo que en ningún caso estas negociacións deriven na asignación de menos recursos públicos ou competencias para a Comunidade galega que para outras comunidades autónomas”.
“Se de verdade os grupos da oposición nacionalista e socialista están preocupados por defender os intereses de Galicia e dos galegos, nos vemos inconveniente en que apoien a proposición non de lei do Grupo Popular que defenderemos no Pleno desta semana, e que non busca outra cousa que estas negociacións non deriven na asignación de menos recursos públicos ou competencias para Galicia que para outras comunidades autónomas”, apuntou.
COMPROMISOS COS ENFERMOS DE ELA
Para rematar, Alberto Pazos recordou que o Grupo Popular tamén pedirá no Pleno que o Goberno central cumpra os compromisos adquiridos en 2020 por Pedro Sánchez cos enfermos de ELA e as súas familias, mellorando o diagnóstico, o tratamento e a vida destes enfermos.
Así, destacou que a Xunta vai ser a primeira comunidade autónoma en por a disposición das persoas con ELA dunha axuda directa e inmediata de 12.000 euros por paciente, co obxectivo de apoiar nos gastos extraordinarios que teñen que realizar por mor desta enfermidade progresiva, sen cura e altamente discapacitante.
