O presidente do PPdeG, Alfonso Rueda, fai un chamamento colectivo a todos os galegos e galegas para que sigan mantendo a unidade e o consenso de cara a recuperar canto antes a “normalidade extraordinaria” dunha Galicia que “se axuda cando máis falta fai e se mantén unida cando as cousas veñen mal” e que, lonxe da confrontación, traballa “desde a humildade” para afrontar os retos que ten por diante”.

No tradicional acto de inicio de curso político do Partido Popular celebrado hoxe en Cerdedo-Cotobade, que este ano estivo marcado polo recordo dos incendios das últimas semanas, o líder dos populares galegos subliñou que Galicia xa está no camiño desa recuperación. Proba diso é que as axudas do Goberno galego dirixidas aos afectados por estes lumes xa están publicadas desde onte no DOG e poderanse solicitar a partir de mañá.

De feito, explicou que estas axudas “non teñen límite orzamentario” e se estenderán “ata onde faga falta” grazas ao feito de que a nosa Comunidade ten aprobados os seus Orzamentos e xa traballa na aprobación dos do vindeiro ano. Algo que, na súa opinión, é froito precisamente da “normalidade extraordinaria” da que goza Galicia e que lle permite “reaccionar con rapidez cando a xente o necesita”.

“Iso é o que a xente demanda dos seus gobernantes cando deposita en nós a súa confianza: que os apoiemos cando o necesitan”, remarcou o presidente do PPdeG ao tempo que demandaba a mesma “dilixencia” por parte do Goberno central á hora de tramitar as axudas estatais comprometidas. Porque é o momento, insistiu, de que o Executivo estatal demostre “respecto, empatía e solidariedade con Galicia”.

Fronte a aqueles que “pensan que cada situación de sufrimento é unha oportunidade para montar liorta ou tentar obter rédito político” e que “sempre critican sen aportar solucións”, Rueda comprometeu o seu traballo “humilde” para “corrixir os erros cometidos, tomar todas as medidas que haxa que tomar para estar o mellor preparados posibles e concienciar á xente de que a prevención e a loita contra os incendios é unha tarefa colectiva”.

“Traballaremos por volver á normalidade desde a unidade e o consenso, mirando cara adiante e afrontando todos os retos que temos por diante”, reiterou asegurando que “a Galicia que chorou este verán e que tan mal o pasou durante tantos días vaise recuperar” e que o PPdeG “será parte fundamental desa recuperación”.

Diante do presidente nacional do Partido Popular, Alberto Núñez Feijóo, reivindicou así mesmo que o PPdeG é un partido “aliñado” para, chegado o momento, facer presidente de España “a quen ten que selo por moitas razóns de urxencia” do mesmo xeito que xa fixo presidente a Xerardo Fernández Albor, a Manuel Fraga e ao propio Feijóo ata en catro ocasións.

O MOMENTO DOS AGRADECEMENTOS

Alfonso Rueda dedicou gran parte da súa intervención tamén a dar as grazas a todos os técnicos e integrantes dos corpos de extinción da Xunta de Galicia, así como aos voluntarios que “se presentaron a traballar sen ter que pedirllo” e aos veciños e veciñas que “souberon que neses momentos de tensión era o momento de traballar unidos, coordinados e seguindo as instrución das Forzas e Corpos de Seguridade”.

Todos eles, xunto aos medios remitidos polo Goberno central “cando os deixaron vir”, fixeron un “grandísimo labor” que o presidente galego considerou de xustiza recoñecer e que quixo agradecer publicamente ao igual que a disposición e a preocupación demostradas por líderes autonómicos “de todas as cores políticas”.

“Houbo xente á que non fixo falta chamala para dicirlle o que necesitabamos e á que non fixo falta mandarlle por escrito unha relación de necesidades despois de días explicando a súa urxencia”, explicou.