A unha semana das eleccións, Alfonso Rueda pediu, nun mitin en Sanxenxo, aos galegos que acudan as urnas coa ilusión e a convicción de que nada é imposible e de que Galicia votará por unha maioría ampla para Alberto Núñez Feijóo o próximo domingo.

Ana Pastor: “Feijóo xa demostrou do que é capaz como presidente de todos os galegos e agora chegou o momento de que volva demostralo como presidente de todos os españois”

Telmo Martín apela ao voto útil para evitar o que ocorreu en Sanxenxo en 2019, cando case 1.000 veciños votaron a outros partidos de dereita que non obtiveron representación: “Eses votos prexudicaron ao PP e facilitaron que o PSOE conseguise un deputado máis por Pontevedra”

O presidente do PPdeG remarcou que a capacidade de traballo en beneficio dos seus veciños e a vocación de servizo aos demais son dúas das características que definen a Telmo Martín e, ao mesmo, a tempo a liña a seguir de todo político

Neste sentido asegurou que o compromiso co ben común é algo intrínseco dos galegos e, por suposto, dun Alberto Núñez Feijóo que non ten máis aspiración que a de volver unir a todos os españois e que ten na súa xestión o mellor aval

Alfonso Rueda aposta por deixar atrás estes cinco longos de sanchismo e liortas e ter por fin un Goberno como o que ofrece o PP, que mire polo conxunto do territorio, sen favoritismos nin menosprezos, senón con rigor e solvencia

Pero para lograr ese cambio, subliñou, é fundamental concentrar o voto no PP e obter na provincia de Pontevedra un gran resultado: “Para que Feijóo conte coa forza necesaria, temos que ir a polo cuarto deputado”

En clave local, o líder dos populares galegos recordou que o Goberno central ten actuacións pendentes na costa de Sanxenxo ao tempo que afirmaba que estas débedas son o resultado de tomar decisións sen saber do que se fala, pretendendo lexislar sen pisar o terreo, sen dialogar, nin atender a razóns

Reivindicando a Lei do litoral de Galicia, subliñou que ninguén mellor que os propios galegos para salvagardar a súa costa e salvagardar así tamén o crecemento económico que esta xera: “Somos unha terra con moitísimo potencial e o xusto é que nos deixen aproveitalo e faciliten o noso crecemento”

Explicou que derrogar o sanchismo non só é botar da Moncloa a Pedro Sánchez, senón tamén facer un cambio nas políticas e volver de novo a gobernar para os cidadáns desde a política útil que ofrece Alberto Núñez Feijóo

É o momento, engadiu, de abrir as portas das institucións á xente, de investir na xente e no seu futuro, de mellorar a economía, de apostar pola educación, pola industria e polas infraestruturas e de que chegue a política do sentidiño ao conxunto de España

“España perdeu o rumbo durante os últimos cinco anos e ninguén mellor que un galego como Feijóo para atopalo de novo”, concluíu

ANA PASTOR: “ESPAÑA NECESITA ESTABILIDADE, MIRAR CARA AO FUTURO E AVANZAR, NUNCA RETROCEDER”

A número 1 co Congreso pola provincia sinalou que “España necesita estabilidade, mirar cara ao futuro e avanzar, nunca retroceder” e que por iso precisa un Goberno do PP “cunha maioría forte para cambiar o ciclo político”

Expuxo que Alberto Núñez Feijóo representa “o mellor estilo de política”, que é a política “á galega” e que consiste en “gobernar con responsabilidade, con profesionalidade, con entrega, diálogo, ideas reformistas e construtivas pero, sobre todo, con palabra”

Ana Pastor pediu o voto a “todas as persoas que aínda non o decidiron ou que noutras eleccións votaron por outros partidos pero teñen claro que a partir do 23 de xullo queren un cambio”

“Feijóo xa demostrou do que é capaz como presidente de todos os galegos e por iso recibiu o apoio de catro maiorías absolutas á súa xestión. E agora chegou o momento de que volva demostralo como presidente do Goberno de todos os españois”, engadiu

TELMO MARTÍN: “QUE GOBERNE FEIJÓO É NECESARIO PARA SANXENXO”

Tamén o alcalde de Sanxenxo apelou ao voto útil para evitar o que ocorreu neste concello en 2019, cando case 1.000 veciños votaron a outros partidos de dereita que non obtiveron representación na provincia

“Eses votos prexudicaron ao PP e facilitaron que o PSOE conseguise un deputado máis por Pontevedra”, recordou mentres remarcaba que “non votar ao PP o próximo domingo é impedir o cambio”

Para Telmo Martín é necesario que goberne Feijóo para recuperar proxectos importantes e fundamentais para Sanxenxo, como a recuperación do patrimonio arqueolóxico da Lanzada ou a recuperación da fachada marítima entre as praias de Barreiros e Canelas

Sobre este último proxecto, o rexedor recordou que xa contaba cun convenio de 6 millóns de euros co Ministerio de Medio Ambiente no Goberno de Mariano Rajoy e que “quedou paralizado co Goberno de Pedro Sánchez”