O PPdeG da comezo á organización do XVI Congreso autonómico

Santiago de Compostela, 6 de abril de 2016.- O portavoz do populares galegos, Miguel Tellado, avanzou que o PPdeG deu comezo á organización do XVI Congreso autonómico co que o partido culminará o proceso de renovación iniciado hai sete meses coa súa ponencia política e que tivo continuidade en marzo coa celebración dos congresos provinciais.
Así, o voceiro compareceu en rolda de prensa trala constitución oficial da Comisión Organizadora do conclave que tivo esta mañá unha xuntanza para comezar a tomar as primeiras decisións que dan inicio ao proceso congresual.
Tellado anunciou que unha das determinacións acordadas é que os candidatos a presidir o partido poderán iniciar a súa campaña electoral no momento en que formalicen a súa candidatura. “Do que se trata é de fomentar a participación, que poidan recorrer Galicia para presentar o seu proxecto e facelo o máis dinámico posible”, dixo o portavoz.
Así mesmo, o voceiro asegurou que xa teñen repasado o cronograma do congreso convocado o pasado sábado pola Xunta directiva do PPdeG e que agora están no prazo aberto -ata o próximo 18 de abril- para que calquera afiliado poida presentar a súa candidatura, sendo preciso acompañala tan só de 90 firmas dos 100.000 afiliados que ten o partido. Ademais, Tellado avanzou que está xa aprobado o modelo para a recollida de sinaturas e que está dispoñible na web do partido. 
O portavoz tamén apuntou que ían participar neste proceso 2.000 compromisarios, dos que 213 son membros natos -membros da Xunta directiva e da Comisión Organizadora do congreso-. No tocante á representación da emigración, o portavoz sinalou que será de 10 compromisarios e que os compromisarios electos serán un total de 1.777 distribuídos polas catro provincias -A Coruña terá 495, Lugo 278, Ourense 466, e Pontevedra 538-.
Tellado anunciou tamén que a vindeira semana reuniranse os equipos redactores dos dous manifestos que se lerán no conclave para comezar a traballar no balance do camiño percorrido en Galicia nos últimos anos e no que presentará un proxecto de futuro do que queda por percorrer.
Dese xeito, para o voceiro popular, “agora trátase de renovar a  estrutura do PPdeG respondendo á demanda da cidadanía que pide partidos dinámicos, renovados e cos pes na rúa”.
Do mesmo modo, Tellado manifestaba que a renovación foi a clave do éxito do partido xa que no 2006, coa marcha de Manuel Fraga, moitos creron que remataba unha etapa e que o partido non volvería a ser o que era. “Afortunadamente soubemos demostrar que, coa renovación, o PPdeG podía seguir sendo o partido referente para a maioría dos galegos. Esa renovación do 2006 permitiunos recuperar a  Xunta tan só tres anos despois e a de 2012 permitiunos seguir sendo o primeiro partido de Galicia”, engadiu.
Tal e como recoñeceu, agora xa non só pretenden seguir sendo a primeira forza da nosa comunidade senón seguir sustentando o Goberno galego “porque cremos que o PPdeG é a garantía da estabilidade política e institucional que supón que Galicia siga na senda do crecemento”, concluiu. 

GPP defenderá a posta en marcha dun programa de inserción para mulleres maltratadas

A sesión plenaria da vindeira semana incorpora a comparecencia dos concelleiros de Economía e Industria, e de Facenda

O PPDEG DEFENDERÁ NO PLENO ESTENDER O PROGRAMA DE DETECCIÓN PRECOZ DO CANCRO DE COLON A TODA GALICIA E FAVORECER A INSERCIÓN LABORAL DAS MULLERES VÍTIMAS DE VIOLENCIA

·    O Grupo Popular cuestionará ao Goberno galego sobre a pretensión da UE de prohibir a actividade da flota do arrastre en augas profundas en fondos superiores aos 800 metros e sobre a programación que a Xunta desenvolverá no marco da Feira do Libro de Bos Aires

Santiago, 5 de abril de 2016.- O Grupo Popular defenderá no Pleno da vindeira semana estender o programa galego de detección precoz do carcinoma colorrectal a todo o servizo galego de saúde e a posta en marcha dun programa de inserción laboral para mulleres vítimas de violencia de xénero. A sesión plenaria inclúe, ademais, a comparecencia dos conselleiros de Economía e Industria, para dar conta do desenvolvemento do polo tecnolóxico e industrial galego de avións non tripulados no aeródromo de Rozas en Lugo; e do conselleiro de Facenda, sobre o peche do exercicio orzamentario de 2015 e o cumprimento do obxectivo de estabilidade orzamentaria.

Pedro Puy informou que o Grupo Popular aceptou a solicitude dos grupos do BNG, AGE e Mixto para o debate da creación dunha comisión de investigación sobre a Fundación FESÁN.

A continuación, terá lugar a comparecencia do conselleiro de Economía e Industria sobre o desenvolvemento do polo tecnolóxico e industrial galego de avións non tripulados no aeródromo de Rozas de Lugo. Puy considerou esta comparecencia “moi acaída para comprobar como algún grupo parlamentario que continuamente demanda un maior peso da industria na nosa economía se opón a este proxecto, da mesma forma que se opuxeron a facilitar a continuidade da factoría de Citroën en Vigo, a de Reganosa en Ferrol e que esquecen agora, logo de que fora a principal cuestión que formulaban no último pleno, que o Tribunal Supremo blindou a decisión do actual Goberno galego sobre o concurso eólico do bipartito”.

A segunda comparecencia será do conselleiro de Facenda para informar sobre o peche do exercicio de 2015 e o cumprimento do obxectivo de estabilidade orzamentaria. Neste sentido, o portavoz popular subliñou que “Galicia foi unha das tres comunidades autónomas que cumpriu o obxectivo de déficit, polo que supoño que os eloxios que recibirá o conselleiro de Facenda serán do mesmo nivel e proporcionados ás críticas que se lle fan ao Goberno central por non ter cumprido o déficit”.


CANCRO DE COLON E INSERCIÓN MULLERES MALTRATADAS

O Grupo Popular defenderá na sesión plenaria dúas proposicións non de lei.  A primeira delas solicita a elaboración dun programa de inserción laboral para mulleres vítimas de violencia de xénero que incorpore un itinerario de inserción, formación para o emprego e actuación de apoio á conciliación. O portavoz popular considerou que “o emprego é a mellor forma de conseguir a integración social das mulleres que sofren maltrato, xa que facilita tanto a súa independencia económica como a mellora da súa autoestima”.

Unha segunda proposición non de lei ten como obxectivo a extensión do programa galego de detección precoz do carcinoma colorrectal a todas as estruturas de xestión integrada do Servizo Galego de Saúde. Puy explicou que este tipo de cancro está entre os tres máis frecuentes entre os homes e o segundo entre as mulleres da Unión Europea, polo que a Xunta xa puxo en marcha este programa de detección precoz de xeito piloto en Ferrol, ao que na actualidade sumáronse as zonas de Ourense, Verín e O Barco de Valdeorras.

Así mesmo, o Grupo Popular cuestionará ao Goberno galego sobre a pretensión da Unión Europea de prohibir a actividade da flota do arrastre en augas profundas en fondos superiores aos 800 metros e sobre a programación literaria e cultural que a Xunta desenvolverá no marco da Feira Internacional do Libro de Bos Aires.

A modo de resumo, Pedro Puy indicou que a sesión plenaria inclúe 28 iniciativas, das que dúas son comparecencias a proposta do Goberno, outras catro do Grupo Popular “e as 22 restantes corresponden aos grupos da oposición, é dicir, practicamente o 80 por cento do temas do Pleno”. Deste xeito, reiterou que “volve quedar patente que neste parlamento a oposición ten todas as oportunidades de traer a debate todas as cuestións que considera interesantes para a cidadanía”.

Feijóo destaca a creación de 25 prazas en centros de atención a persoas con autismo

Alberto Núñez Feijóo subliñou hoxe, durante unha visita ao centro de educación especial Coral Seoane en Ferrol, a creación neste 2016 de 25 novas prazas en centros de atención a persoas con Trastorno do Espectro Autista (TEA), a través dun investimento que ascende a 5 millóns de euros e que suma xa un total de 270 prazas públicas. “Queremos seguir acompañando o traballo que realizan asociacións como ASPANAES e centros coma este de Ferrol, para que os seus beneficios cheguen ao maior número de persoas posible”, aseverou.
Máis polo miúdo, Feijóo concretou que destas 25 novas prazas: 9 serán para o centro que ASPANAES ten no Concello das Pontes; 12 prazas concertadas no centro Castro Navás da Fundación Menela en Nigrán; e 4 máis para o centro de día da Asociación BATA en Vilagarcía de Arousa. E resaltou que con estas novas prazas, os centros de ASPANAES en Galicia disporán este ano: no Centro de Día Coral Seoane, de 46 prazas concertadas en 2016; o seu centro de día das Pontes pasará de 25 a 34 prazas públicas; no centro de día de Culleredo, de 23 prazas públicas; e no de Villestro, en Santiago, de 16 prazas en 2016.
Así mesmo, afirmou que a axuda que este ano a Xunta destina á Federación de Autismo de Galicia aumentou un 26% máis que en 2015, que era de 123.000 euros. “E aumentamos tamén a partida orzamentaria que destinamos aos convenios coas federacións integrantes do CERMI: de 3 millóns de euros en 2015 a 3,6 millóns de euros en 2016”, engadiu.
Durante a súa intervención, Feijóo referiuse tamén á posta en marcha do primeiro Protocolo para o Alumnado con Trastorno do Espectro Autista, que persegue facilitar a detección do TEA no ámbito escolar e proporcionar a esta alumnado unha atención educativa na que se implique o propio centro e as familias.
“Estamos a falar dunha ferramenta para os profesionais do ensino e para os pais, que pretende establecer o camiño que se debe seguir desde a aparición dos primeiros indicios, e orientar a intervención educativa dun xeito máis personalizado”, dixo, ao que engadiu que este protocolo propón un seguimento diario e trimestral para verificar se a atención foi a adecuada ou se é necesario artellar novas medidas.
Un compromiso coa discapacidade
O responsable do Goberno galego fixo extensivo tamén o compromiso da Xunta a todas aquelas persoas que padecen algún tipo de discapacidade. E, nesta liña subliñou que desde 2009 o orzamento dedicado a esta materia aumentou nun 45%, pasando dos 65 millóns de euros investidos en 2009 aos case 95 millóns de euros “que estamos a destinar á discapacidade este ano, 30 millóns de euros máis”.
Xunto con esta partida, Feijóo referiuse tamén a diversas iniciativas, entre as que destacou: a aprobación da Estratexia galega sobre discapacidade 2015-2020; e ao incremento de novos servizos de atención residencial e diúrna para os diferentes colectivos da discapacidade.
Nesta liña, destacou ademais axudas para implantar a Rede galega de Atención Temperá; para os servizos de promoción da autonomía persoal; para a formación do persoal das entidades do terceiro sector; para o asesoramento e formación de persoas con discapacidade; e axudas para a supresión de barreiras e a promoción da accesibilidade.
Feijóo concluíu destacando o traballo que ASPANAES está a facer coas preto de 400 persoas con trastorno autista que atende en toda a provincia da Coruña; unha labor que ten como obxectivo facilitar o apoio preciso desde o punto de vista terapéutico e educacional para que cada unha destas persoas poida desenvolver o seu proxecto de vida e favorecer a súa integración social. “Trátase de mellorar a súa calidade de vida e a das súas familias”, aseverou, lembrando que o Trastorno do Espectro Autista afecta a un de cada 100 nenos que nacen en España.

Puy traslada a satisfacción do GPP pola candidatura de Feijóo á presidencia do PPdeG

PEDRO PUY TRASLADA A “SATISFACCIÓN” DO GRUPO POPULAR POLA DECISIÓN DE FEIJÓO DE PRESENTAR A SÚA CANDIDATURA Á PRESIDENCIA DO PPDEG

·    Fixo referencia ao calendario previsto do Congreso do PPdeG e ao traballo no Parlamento para afirmar que “estamos traballando coa perspectiva de que as eleccións galegas sexan despois do verán, tendo sempre presente que a súa convocatoria é unha competencia específica do Presidente”

Santiago, 4 de abril de 2016.- O portavoz do Grupo Popular, Pedro Puy, trasladou hoxe a “satisfacción” de todos os deputados deste grupo parlamentario pola decisión de Alberto Núñez Feijóo de presentar a súa candidatura á Presidencia do Partido Popular de Galicia é, por conseguinte, á Xunta de Galicia. “Existe un amplo consenso neste grupo de que se adoptou a mellor decisión para o conxunto do PPdeG”, asegurou Puy, quen apuntou que servira para “incentivar e seguir traballando porque queda moito por facer nun país con máis de 230.000 desempregados pero que camiña na senda correcta dun traballo que Feijóo ten encabezado nos últimos anos e que o PPdeG vai seguir impulsando”.

Pedro Puy manifestou que a convocatoria do Congreso extraordinario do Partido Popular de Galicia e a confirmación da candidatura do Feijóo para a Presidencia do PPdeG é a continuación do  “profundo proceso de reflexión e renovación que se abriu no partido a raíz fundamentalmente do resultado das eleccións municipais”.

Neste sentido, indicou que este proceso deu comezo coa modificación do Goberno galego e da prioridade das súas políticas, centrándose e incrementando as dirixidas á política social; seguiu co debate das ideas no PPdeG a través dunha ponencia política; a renovación das estruturas provinciais do PP en Galicia, coa substitución de tres dos catros presidentes; e rematará coa celebración dun congreso extraordinario.

“A todo isto, súmanse determinadas novas no ámbito económico que tamén son positivas para as políticas desenvolvidas polo Partido Popular, como a concatenación de cifras de crecemento, así como que Galicia sexa unha das tres comunidades autónomas que cumpre os obxectivos de déficit; e o coñecemento hoxe do descenso do número de desempregados, nunha porcentaxe semellante á media nacional”, sinalou.

COA PERSPECTIVA DE DESPOIS DO VERÁN

Cuestionado sobre a data de celebración das eleccións autonómicas, Pedro Puy referiuse ao calendario previsto para a celebración do Congreso do PPdeG e ao traballo que se está a levar adiante no Parlamento galego para apuntar que “con todas estas cuestións estamos traballando na perspectiva de que as eleccións sexan despois do verán, pero tendo sempre presente que é unha competencia moi especificamente atribuída ao Presidente da Xunta”.

En concreto, o portavoz popular dixo que nestes momentos no Parlamento estase tramitando o Plan Estratéxico da Economía de Galicia, un documento complexo que ten que ir ao Pleno; e están e trámite os proxectos de lei do patrimonio cultural, de economía social, de coordinación das policías locais e a modificación da Lei de servizos sociais. Ademais, estase tramitando a iniciativa lexislativa popular sobre a pobreza enerxética e o custo da enerxía en Galicia, ao tempo que o Goberno galego anunciou recentemente a tramitación da Lei de espectáculos públicos, a lei de protección de animais domésticos e a lei de transporte por estrada de Galicia, á que se sumará a aprobación da Lei da Área metropolitana de Vigo.

“Queda moito por facer e o proxecto do Partido Popular ten moito que aportar, aproveitando unha situación inédita en España como é unha maioría sólida e estable que, se ben trata de chegar a acordos coa oposición, ten capacidade para aprobar normas importantes para o futuro de Galicia”, indicou.

Pedro Puy tamén valorou que Galicia teña “un calendario electoral diferenciado” das eleccións nacionais, polo que “salvo que haxa unha causa de extrema importancia, en principio estamos a traballar na perspectiva de que no caso de que haxa xerais non coincidan coas autonómicas”.

Feijóo: “Galicia é a miña decisión, a miña prioridade e a miña opción”

Santiago de Compostela, 3 de abril de 2016.- O líder dos populares galegos, Alberto Núñez Feijóo, asegurou que Galicia é a súa decisión, a súa prioridade e a súa opción e que a nosa comunidade foi o principal factor que inclinou a balanza na súa determinación de presentarse outra vez a liderar o PPdeG. “Galicia será a dona do meu destino e a que decida que vai ser Alberto Núñez Feijóo nos próximos anos”, dicía o dirixente nunha entrevista concedida á Radio Galega esta mañá. 
O mandatario popular subliñou que, ao ser presidente da nosa comunidade, decatouse da importancia de ter un pobo como o noso, que sabe que o resultado do sacrificio sempre é o éxito e viu que o camiño que fixeron os populares nos últimos anos non foi de balde, senón que nos leva agora a ser unha autonomía solvente, respectada en España, que non necesita do diñeiro dos demais para chegar a fin de mes e cuxa economía está crecendo. Así mesmo, Feijóo incidiu en que a súa posición política, dende que se presentou no 2006 a presidente do partido, é Galicia.
Do mesmo xeito, recoñeceu que, pese a que seguir en política non é fácil neste momento, “probablemente agora é cando máis aconsellable sexa para as persoas que temos interese e vocación polo servizo público dar a batalla”. Para o mandatario a opción é “non abandonar un barco que está nunha forte marexada que é a política galega e española” senón seguir trazando un rumbo que está marcado por dúas grandes ideas: ter un proxecto para Galicia e garantir a estabilidade dese proxecto, algo que, tal e como afirmou, si ten o PPdeG.
O presidente apuntou que, desde as eleccións municipais de 2015, cando viron que había unha desconfianza no ambito dos partidos políticos e  que xurdían movementos que naceron ao carón da recesión e da desilusión, entenderon que tiñan que empezar a reaccionar. Así, fixeron unha ponencia no partido, un cambio no Goberno, melloraron as políticas sociais, celebraron os congresos provincias e, “todo isto se desenvolveu conforme ao que pensabamos que era bo para o PPdeG para seguir servindo a Galicia”, dixo Feijóo.
Segundo indicou, foi precisamente tralo último congreso provincial de Pontevedra cando empezou a debuxar a decisión de continuar á fronte do PPdeG, confirmando que está preparado se os seus compañeiros así o queren e que, “a partir de aí o importante é o que Galicia diga, se quere eu estou disposto”, engadiu.
Se ben o presidente recoñece que gañar unhas eleccións por maioría absoluta vai ser moi difícil, “imos intentalo porque creo que Galicia xa está experimentando o que son cidades importantes con gobernos que non aproban os orzamentos, que non adoptan decisións de goberno porque probablemente non saiban cales son as súas prioridades e, ademais, non son capaces de pactalas coa oposición”. Segundo Feijóo, estámolo vendo non só en Galicia senón tamén en España, onde non hai goberno nestes momentos e, por iso, insistiu en que “nós non debemos pasar por aí e cometer os erros que se cometen noutros lugares”. 

TERRA DE CRECEMENTO ECONÓMICO E EMPREGO
Na entrevista, o máximo dirixente do PPdeG, recordou que esta semana coñecíamos datos moi alentadores que amosan que a economía galega crece máis que nunca. Por este motivo, apunta que mereceu a pena todo o que os populares fixeron os últimos anos porque estamos ante un crecemento económico e agora pódese augurar seguir baixando o paro, que é o principal problema de España e da nosa comunidade. 
“Quédannos catro anos para consolidar Galicia como unha terra de crecemento económico e de emprego”, asegurou Feijóo en referencia á que sería unha terceira lexislatura ao fronte da Xunta. Nesta liña, subliñou que, se ben agora hai camiños despexados e tense ordenado o territorio bastante ben dende o punto de vista legal, aínda hai que acabar moitas cousas entre as que salientou seguir traballando polo sectores lácteo e primairo, buscar rendabilidade no ámbito pesqueiro, finalizar as grandes infraestruturas, conseguir que o tren de alta velocidad estea aquí, preparar o Xacobeo do 2021, ou continuar poñendo os camiños de Santiago a disposición dos millóns de turistas que nos visitarán –agarda- aínda con maior intensidade. 

Feijóo anuncia a súa candidatura á Presidencia do PP de Galicia

O presidente do PPdeG, Alberto Núñez Feijóo, anunciou hoxe que volverá presentar a súa candidatura á Presidencia do partido porque “cando unha das opcións que da a vida é Galicia, non existen as outras”. “Estou na política porque creo nela, creo no meu partido, creo en xente como Mariano Rajoy e creo no servizo público, por iso, póñome a disposición do meu partido primeiro e, se os compañeiros así o queren, do conxunto dos galegos despois”, afirmou o mandatario.
Ante a Xunta Directiva do PPdeG, que aprobou a convocatoria do XVI Congreso Autonómico, Feijóo trasladou que concorrerá a este coa mesma ilusión que cando o fixo por primeira vez hai dez anos, coa experiencia de todo este tempo e coa forza necesaria para dalo todo polo seu partido e por Galicia. “Porque creo que o noso proxecto é o que máis convén a Galicia e porque creo que Galicia está por riba de todo. E non son eu, senón que son as galegas e os galegos os que teñen que elixir”, manifestou.
Así mesmo, o dirixente dixo que, despois de dez anos no PPdeG e sete na Xunta “podo mirar aos ollos a cada unha das persoas ás que me debo”, en referencia a todo os afiliados do partido e á cidadanía galega en xeral. 
Aínda que trasladou que é normal que xurdan as preguntas sobre se a política merece a pena e sobre o que un pode ofrecer ao seu partido e ao seu país, Feijóo asegurou que todas elas sempre concordaron ao longo da súa vida na mesma resposta, que é Galicia. “Sempre que tiven a honra e a oportunidade de elixir na miña vida, sempre escollín Galicia”, aseverou, e engadiu que “ante Galicia, calquera outra opción, calquera outra posibilidade faise minúscula e secundaria”.
Pese a que a política ben entendida obriga a renuncias persoais e trae sensabores, Feijóo engadiu que merece a pena cando un sente a responsabilidade do servizo público e ama ao seu país. “Merece a pena por todas as persoas ás que un se debe”, resolveu, e asegurou que iso se impón a outros sucesos que fan que moitas persoas non teñan esperanza na política e tamén provocan desencanto nos que cren nela.
“Parece que ter traxectoria de servizo público é aproveitarse da política pero se saes da política é para aproveitarte do teu paso por ela. Parece que a experiencia é un lastre en lugar de ser un valor a ter en conta. Parece máis efectivo frivolizar cunha frase que tomarse as cousas en serio e con rigor. Parece que é necesario odiar ao adversario, ser rancoroso con quen pensa diferente, poñerse barreiras e establecer vetos persoais”, dixo o presidente, e, fronte a iso, reivindicou a auténtica política na que un busca solucións aos problemas e non aproveitarse deles, puntos de encontro para non enredarse na diferenza dun país unido e non dividir a sociedade por interese, e na que poden confiar os galegos que aínda están a espera de máis solucións.
“Esa é a política que eu quero para Galicia e na que eu creo”, proclamou, e mostrouse convencido de que ese xeito de entendela permitiu dotar a España de garantías constitucionais, construír a Autonomía e axudar a crear máis oportunidades nestes últimos anos de crise económica.
Precisamente respecto a isto, Feijóo considerou unha honra que os galegos lle deran a confianza nos seus momentos máis difíciles e garantiu que non tería escollido un máis sinxelo. Neste senso, indicou que en Galicia hoxe hai máis esperanza, máis oportunidades e máis futuro e, onde antes había número vermellos, agora hai unha economía que crece; onde antes había crecemento do desemprego, agora hai baixada sostida de paro; e onde antes había risco de quebra, agora hai servizos públicos sostibles para os galegos de hoxe e os de mañá. 
Malia que recoñeceu que hoxe tampouco son tempos fáciles, Feijóo rememorou a situación na que se atopaba cando asumiu a Presidencia do PPdeG e constatou que hoxe conta cos mesmos vimbios que lle permitiron lograr a confianza maioritaria dos galegos nas primeiras autonómicas ás que concorreu.
Entre eles, citou a unidade e a renovación do partido para abrirse a unha sociedade que evoluciona, así como a humildade para recoñecer erros e tentar mellorar constantemente. Igualmente, tamén recordou que o partido se mantivo fiel aos seus principios, non empregou a ideoloxía como barreira e sempre amosou o orgullo de ser galegos e españois. “Así gañamos. Así gañou o partido. E así saíu gañando Galicia”, resumiu e, posto que esa actitude segue vixente, mostrouse convencido de que “poderemos volver a gañar”.
Precisamente, Feijóo referiuse ao lema co que se presentou á Presidencia do PPdeG por primeira vez en 2006 -sumar, seguir e gañar— porque, na súa opinión, esa foi a clave do éxito do partido tanto a nivel interno como nos procesos electorais posteriores.  “Sumamos, seguimos e gañamos”, resumiu en referencia ao primeiro conclave que o elixiu presidente dos populares galegos, e asegurou que o mérito dos anos seguintes non foi seu, senón “de todo un partido que se puxo a punto namentres os outros quedaron atrapados no pasado”. Igualmente, atribuíu á motivación, ás ganas e á mobilización de todo o PPdeG as vitorias electorais de 2009 e 2012.
Con todo, en clave persoal, concluíu que nunca lle poderá devolver ao partido a súa confianza nin á maioría dos galegos a maior honra da súa vida que é presidir Galicia. “Non hai maior honra que servir Galicia”, reiterou, e insistiu en que “nada que poida ter feito antes –porque isto non é para toda a vida— nin nada que poida facer despois será minimamente comparable”.

A Xunta directiva aprobará data, prazos e manifestos do XVI Congreso autonómico

Santiago de Compostela, 1 de abril de 2016.- O voceiro dos populares galegos, Miguel Tellado, avanzou que a Xunta directiva do PPdeG aprobará mañá a data, os prazos, e os manifestos do XVI Congreso autonómico do partido.
O portavoz explicou que as datas que proporá a actual dirección dos populares galegos para a celebración do conclave –e que posteriormente terá que ratificar a Xunta directiva- será o fin de semana do 7 e 8 de maio na cidade de Ourense.
Así mesmo, a idea dos populares é elaborar dous manifestos titulados “A Galicia de hoxe: o camiño percorrido” e “A Galicia de mañá: o camiño por percorrer”. Segundo apuntou o voceiro, o primeiro deles tería como ponentes a Ángeles Vázquez, Mari Teijeiro, Cristina Romero, Nidia Arévalo e Pedro Rojo; mentres o segundo tería como ponentes a María Ramallo, Edelmira Barreira, Teresa Egerique, Juan de Dios Ruano e Antonio Basanta.
Ademais, estes dous documentos irían acompañados doutro informe presentado polo secretario xeral, Alfonso Rueda, que terá por título “O partido de hoxe, o partido de mañá”.
“Trátase de que o Congreso serva non só para elixir un novo equipo de dirección, senón para renovar ideas e pasar revista á nosa xestión na Xunta dende que os galegos nos deron a súa confianza no 2009”, engadiu Tellado ao tempo que afirmaba que, desta maneira, explicarán como xestionaron ese caudal de confianza recibida e como trasladaron tamén o apoio da súa militancia á xestión do día a día da Xunta.
Para o portavoz, o Congreso autonómico permitirá culminar un proceso de renovación que comezaba fai sete meses coa aprobación da ponencia política do partido e que continuaron no último mes cos catro congresos provinciais nos que había un grado de renovación do 75%.
“O congreso autonómico tamén nos ten que permitir fixar o eixo de actuación para que a nova dirección do partido teña como referente durante os próximos anos cal ten que ser o camiño a seguir para que o PPdeG siga sendo o primeiro partido de Galicia, sinónimo de estabilidade e de bo Goberno e para manter a confianza dos galegos e seguir á fronte da Xunta”, aseguraba Tellado.
O portavoz incidiu en que será mañá cando a xunta directiva aprobe o calendario de datas, así como os prazos de presentación de candidaturas que, segundo a proposta da dirección e co obxectivo de favorecer a participación, requirirá na fase inicial de 90 firmas das 101.000 sinaturas posibles dos afiliados. 
Xa unha vez que a Xunta directiva se posicione e adopte as decisións pertinentes, os populares darán a coñecer de forma pormenorizada o calendario e regulamento do seu XVI Congreso autonómico que, segundo Tellado, asumen con ilusión convencidos de que a renovación permanente é o que ten permitido ao partido sintonizar de forma continuada coa maioría dos galegos.

Feijóo anuncia licitación do proxecto básico e de execución da intermodal da Coruña

Santiago, 31 de marzo de 2016.- O presidente do PPdeG, Alberto Núñez Feijóo, avanzou a licitación do proxecto básico e de execución da nova estación intermodal da Coruña, que terá “un período de entrega de doce meses”. Este contrato terá un importe de 600.000 euros, que será aboado integramente polo Goberno autonómico, “aínda que as actuacións van ser cofinanciadas polo Concello”.
 
Trátase da cuarta intermodal que a Xunta está a fomentar en Galicia, dentro do esforzo por “facer que os autobuses e os trens cheguen ao mesmo sitio e desde alí parta o transporte público ás principais arterias da comunidade autónoma”, segundo dixo Feijóo. O proxecto construtivo da estación intermodal de Vigo xa está a ser redactado, mentres que nos casos de Ourense e Santiago este acaba de licitarse. Tal e como recordou o presidente, a Xunta ten consignados 34,4 millóns de euros, en parte procedentes de fondos europeos, para o fomento da intermodalidade.
 
A nova estación intermodal da Coruña vaise situar onde está agora mesmo a estación do tren de San Cristóbal e elevarase en altura ata a cota da avenida da Sardiñeira. O edificio terá tres plantas: na baixa estarán os aparcadoiros e a plataforma ferroviaria; na primeira, trinta dársenas para autobuses interurbanos e, á altura da devandita avenida, unha praza pública e cinco dársenas para autobuses metropolitanos e 1.000 metros cadrados que se reservan para servizos varios.
 
Proxecto a tres bandas
“Calculamos que a execución do edificio terá un custo de entre 17 e 18 millóns de euros —explicou o presidente—, dos cales a Xunta de Galicia pon 10 millóns e o Concello da Coruña os outros 7 ou 8, destinados a urbanizar a praza e facer os aparcadoiros”. A esta cifra habería que sumar o custo dos accesos, que corresponde executar ao Concello.
 
Por último, a ADIF corresponderíalle redactar os proxectos das obras da estación ferroviaria, executalas e financialas, así como ceder os terreos necesarios para que se execute a nova estación. “Deste xeito, finalizamos a licitación dos proxectos construtivos de todas as estacións intermodais”, concluíu Feijóo.
[iframe width=”600″ height=”350″ src=”https://www.youtube.com/embed/aYZAGTOW56Q” frameborder=”0″ allowfullscreen ]

Feijóo avanza a reforma da antiga sede da Xunta en Pontevedra

Santiago, 31 de marzo de 2016.- O presidente do PPdeG, Alberto Núñez Feijóo, avanzou hoxe a reforma da antiga sede da Xunta en Pontevedra, situada na rúa Benito Corbal, co obxectivo de concentrar alí dúas oficinas de emprego que agora mesmo están situadas nun local de alugueiro e para converter o inmoble nun edificio de usos múltiples.
 
Nesta liña, o mandatario indicou que está prevista unha remodelación integral do edificio, que conta con case 6.000 metros cadrados, está en desuso dende que a Xunta se trasladou ás novas instalacións en Campolongo e lembra que a última reforma no inmoble fíxose xa hai máis de 30 anos.
 
Por tanto, a proposta da Xunta propón instalar nas primeiras plantas do edificio as oficinas de emprego, unificando nun único espazo a atención ao cidadán e aforrando os 150.000 euros ao ano que custaba o alugueiro das oficinas.
 
As dúas plantas seguintes poñeranse a disposición de entidades e asociacións de interese social e sanitario para que poidan situar alí as súas oficinas e locais. No que atinxe ás plantas superiores, ofreceranse á Universidade de Vigo para que sitúe nelas os servizos e proxectos que decida.
 
Segundo Feijóo, con esta actuación non só se facilita ao servizo de emprego, ás asociacións e á Universidade un lugar idóneo para desenvolver a súa actividade, senón que tamén se rehabilita e recupera para a cidade de Pontevedra un edificio agora en desuso.
 
Así mesmo, o presidente indicou que, de forma inmediata, presentarase este proxecto por parte da Vicepresidencia e da Consellería de Facenda á cidade de Pontevedra e, posteriormente, licitarase o proxecto construtivo toda vez que a Xunta xa conta cun proxecto básico.
 
Aproveitar o patrimonio da Xunta
O líder do PPdeG sinalou que se trata de proseguir co camiño de diminución de alugueiros.
 
Como sinalou, búscase o máximo aproveitamento do patrimonio da Xunta a través da concentración de espazos administrativos, da unificación da imaxe corporativa dos espazos pertencentes á Administración e da implantación dunha xestión integral e unificada do patrimonio do Goberno galego.
 
Trátase, por tanto, dun paso máis na busca de integrar todos os servizos da Xunta dentro dos edificios de titularidade autonómica. Este esforzo intégrase no Plan de Alugueiros, que vai permitir un aforro de 5,65 millóns de euros cada ano.
[iframe width=”600″ height=”350″ src=”https://www.youtube.com/embed/2c10RfJQe3w” frameborder=”0″ allowfullscreen ]

Feijóo di que a Xunta convocará axudas de 3,5M€ para empresas non agrícolas no rural

Santiago, 31 de marzo de 2016.- O presidente do PPdeG, Alberto Núñez Feijóo, anunciou hoxe que o Consello da Xunta acaba de coñecer a aprobación unha nova liña de axudas destinada a fomentar a creación e desenvolvemento de pequenas empresas non agrícolas no rural, dotada con 3,5 millóns de euros para este 2016. “Sen dúbida é importante impulsar a diversificación do tecido produtivo no noso mundo rural”, explicou o presidente.
 
Estas axudas son totalmente novas. Teñen como precedente máis próximo unhas axudas para implantar as TIC nas microempresas rurais. Agora “ábrese o abano de posibilidades”, tal e como dixo Feijóo, pois elévase o limiar de persoal (de menos de 10 traballadores a menos de 50) e de facturación anual (de 2 a 10 millóns de euros) para que as empresas poidan acceder ás axudas. Ademais, tamén eliminamos a necesidade de que as empresas estean orientadas a sectores ou actividades concretas.
 
O importe das axudas alcanzará o 45% do investimento total, cunha achega máxima de 200.000 €, e poderá cubrir proxectos como industrias, fábricas e locais destinados á produción de bens e materiais, agás empresas de maquinaria agrícola e forestal e de servizos enerxéticos; iniciativas de servizos sociais coma garderías, coidado de anciáns, persoas con discapacidade ou granxas-escola; actividades nos sectores da enxeñería, arquitectura, servizos técnicos, limpeza industrial e veterinaria; comercio polo miúdo e restauración turística, agás actuacións en bares e cafeterías.
 
Criterios de valoración
Entre os criterios que se terán en conta á hora de conceder as axudas están: a localización do proxecto —“imos valorar positivamente os que se sitúen en zonas de montaña ou en concellos moi envellecidos”, indicou—; a tipoloxía do promotor, primando ás mulleres, persoas menores de 35 anos, con discapacidade ou desempregados maiores de 55 anos; a tipoloxía do proxecto e o número e calidade dos empregos creados.
 
“Estas axudas ás empresas non agrícolas do mundo rural complementan coa liña de axudas de subvencións que puxemos en marcha en 2016 e que totalizan 85,3 millóns de euros para o mundo rural”, lembrou o presidente. Isto engloba as axudas aos investimentos en explotacións agrícolas, para a creación de empresas polos agricultores mozos e para o desenvolvemento de pequenas explotacións (que ascenden, en conxunto, aos 57,5 millóns de euros); os 10 millóns de euros que investimos en apoiar o sector forestal nos seus investimentos en tecnoloxía e comercialización dos seus produtos e os 14,3 millóns de euros consignados para axudas para o sector agroalimentario.
 
[iframe width=”600″ height=”350″ src=”https://www.youtube.com/embed/FBg2WfQA64E” frameborder=”0″ allowfullscreen ]