Categoría: Parlamento de Galicia

O portavoz de Medio Ambiente do Grupo Popular, Gonzalo Trenor, afirmou hoxe no Parlamento galego que “a paralización do desenvolvemento das enerxías renovables, provocada polo Goberno de Pedro Sánchez, co apoio incondicional do BNG, ten un custo de 2,5 millóns de toneladas de CO2 ao ano, a mesma cantidade que emitirían dous millóns de vehículos”.

Gonzalo Trenor salientou que “Galicia é a comunidade con maior capacidade de absorción de CO2, chegando a case unha de cada cinco toneladas capturadas en España, situándose, ademais, como a comunidade que máis reduciu as súas emisións netas de gas de efecto invernadoiro”. “En concreto, desde 1990 reducimos un 62 por cento as emisións netas de gases de efecto invernadoiro, cando o descenso medio a nivel nacional foi do 12,6 por cento, o que supón que superamos o obxectivo do 55 por cento establecido pola Unión Europea para 2030”, anotou.

Respecto da vaga de incendios deste pasado verán, o portavoz popular destacou que “o amplo dispositivo despregado permitiu protexer os nosos espazos naturais e a nosa biodiversidade e hábitats, conseguindo que a afección a estes territorios fora mínima”. En concreto, dixo que houbo cinco hectáreas afectadas no Invernadeiro, outras cinco hectáreas nas Fragas do Eume, 10 hectáreas no Xurés e uns centos de metros cadrados en Corrubedo.

“E a Xunta xa está actuando para previr as posibles consecuencias dos lumes nos ríos, con medidas orientadas a crear barreiras anticontaminación nas contornas fluviais das zonas afectadas”, manifestou o portavoz popular, quen demandou que o Goberno central “faga o mesmo que está a facer o Goberno galego nos ríos que son da súa competencia”.

O Pleno do Parlamento de Galicia aprobou hoxe a Conta Xeral da Xunta correspondente aos anos 2023 que “amosan que vivimos nunha Galicia saneada, con capacidade de investimento e que, a pesar do insuficiente financiamento do Goberno de Pedro Sánchez, é capaz de prestar uns servizos públicos cada vez de maior calidade ás galegas e aos galegos, que elección tras elección seguen a confiar no Partido Popular e no Presidente Alfonso Rueda”, manifestou a viceportavoz do Grupo Popular, Cristina Sanz.

A modo de resumo, Cristina Sanz afirmou que as contas xerais aprobadas hoxe no Pleno “acreditan que Galicia cumpriu cos obxectivos de débeda e de déficit, acadando resultados que incluso melloran a previsión inicial; que Galicia cumpriu na execución dos orzamentos, que foi superior ao 99 por cento en ambos exercicios; e que Galicia reduciu case á metade o período de pago a proveedores: mentres a media española está en máis de 27 días, Galicia pagou en menos de 15 días”.

GALICIA CUMPRIU

“Galicia cumpriu, a diferenza do que vemos noutras comunidades ou no propio goberno de España, que nin sequera foi quen de aprobar un proxecto de orzamentos nesta lexislatura estatal: unha anomalía constitucional e democrática, pero sobre todo un prexuízo para todos os cidadáns”, subliñou.

Así mesmo, Cristina Sanz destacou que, coa aprobación destas contas xerais, “neste momento non existe informe de fiscalización do Consello de Contas pendente de render neste Parlamento”. “Hoxe poñémonos ao día con todos os informes pendentes gracias ao esforzo extraordinario, tanto da Consellería de Facenda como, sobre todo, do persoal do Consello de Contas, que conseguiron reducir o tempo de tramitación á metade”, sinalou.

O portavoz do Medio Rural, Miguel Ángel Viso, acusou hoxe ao PSdeG de reclamar “unha comisión espectáculo” sobre os incendios forestais “cando Galicia non precisa teatro burocrático senón reforzo das faixas secundarias, cambios legais para obrigar a limpar fincas, mobilización da terra agraria e un dispositivo sen precedentes con 7.000 persoas, motobombas, buldóceres, brigadas e medios aéreos”.

Miguel Ángel Viso subliñou que “dous terzos do persoal do servizo de prevención e extinción de incendios traballa todo o ano e o resto pasará de 8 a 9 meses en 2026”. “Hoxe hai 1.000 traballadores máis que en 2008, con EPI renovados, melloras salariais e concursos de traslados”, apuntou.

80% DAS RECOMENDACIÓNS REALIZADAS

Ademais, sinalou que o Pladiga 2025 “inclúe máis de 1.000 hectáreas de novas áreas cortalumes, 970 de faixas auxiliares, 400 quilómetros de pistas melloradas, tratamentos silvícolas, queimas prescritas, 4.887 puntos de auga revisados e actuacións sobre máis de 47.000 hectáreas de biomasa”.

“Desde 2017 aplicáronse o 80 por cento das 123 recomendacións aprobadas no marco da Comisión de Estudo realizada neste Parlamento galego, coa posta en marcha de leis clave, a creación de unidades especializadas e melloras laborais para os traballadores”, manifestou.

Os deputados do Grupo Popular Cristina Campero, Miguel Ángel Viso, José Luís Ferro e Víctor Baladrón, xunto aos concelleiros do PP Manuel Rodriguez e Lorena Pérez, mantiveron esta mañá un encontro con gandeiros de Montederramo para coñecer as súas necesidades logo da vaga de lumes que sufriu esta zona durante o verán, trasladar e prestar apoio para solicitar as axudas dispostas pola Xunta para avanzar na reparación dos danos, poñendo en valor a creación de pasteiros para a recuperación das zonas queimadas.

Cristina Campero, Miguel Ángel Viso, José Luís Ferro e Víctor Baladrón visitaron diversas explotacións gandeiras deste concello ourensán co obxectivo de coñecer de primeira man os danos ocasionados polos recentes incendios forestais e trasladar aos profesionais do sector o respaldo das institucións.

En concreto, destacaron o esforzo e axilidade da Xunta á hora de activar con rapidez medidas de apoio ao rural. Mostra disto é que a Consellería do Medio Rural xa atendeu a máis de 750 persoas afectadas polos lumes e tramitou ata o momento preto de 150 axudas directas que se beneficiaron das oito liñas de apoio destinadas a agricultores, gandeiros e titulares de montes, que cobren ata o 100 por cento do investimento necesario para recuperar infraestruturas, maquinaria, alimentación do gando ou producións perdidas.

PASTOS DE CALIDADE

Os deputados subliñaron tamén a importancia das accións complementarias, como o impulso aos pasteiros, nos que a Xunta investirá 4 millóns de euros este ano. Trátase dunha ferramenta clave para mellorar a dispoñibilidade de pastos de calidade para o gando, favorecer a recuperación de zonas queimadas e, ao mesmo tempo, contribuír á prevención de futuros incendios ao crear áreas de descontinuidade vexetal.

Segundo explicou Cristina Campero, “é fundamental que os nosos gandeiros saiban que non están sos, que hai un compromiso real e efectivo para que as axudas cheguen canto antes e para dotar ao rural das infraestruturas que precisa para seguir producindo con garantías”. Pola súa banda, Miguel Ángel Viso destacou que “os pasteiros son unha aposta estratéxica, porque melloran a base alimentaria do gando e ao mesmo tempo actúan como cortalumes naturais”.

Finalmente, Marco José Carballal puxo en valor “a capacidade de resposta da Xunta, que está a actuar con axilidade e con medidas realistas, pensadas desde o territorio e para o territorio”.

Os deputados do Grupo Popular Gonzalo Trenor, Rubén Lorenzo e Carmen Pomar visitaron as instalacións de Sogama en Cerceda e salientaron que a nova planta de clasificación de residuos téxtiles que se construirá será “unha oportunidade para lograr un sector máis sostible e circular”, polo que animaron aos cidadáns a incorporar nos seus hábitos diarios a correcta separación dos restos de roupa.

Acompañados do presidente de Sogama, Javier Domínguez, os deputados populares fixeron un percorrido polas instalacións do complexo, facendo unha parada específica no emprazamento no que se levantará a futura planta de clasificación de residuos téxtiles, que suporá un investimento de 22,4 millóns de euros e ocupará unha superficie de 8.000 metros cadrados, dispoñendo dunha capacidade inicial para 3.000 toneladas anuais, ampliable a 24.000.

EMPREGO VERDE E PARA COLECTIVOS CON LIMITACIÓNS

Neste momento, Sogama está levando a cabo o movemento de terras para a construción desta nova planta, co obxectivo de que estea operativa a mediados do ano 2026, xerando, nunha primeira fase, entre 16 e 30 postos de traballo, que se destinarán, con carácter preferente, a persoas con discapacidade ou en risco de exclusión social. En concreto, o proxecto configúrase como unha oportunidade para o emprego verde e a inserción de colectivos con limitacións á hora de acceder a un traballo.

Gonzalo Trenor animou a concellos e cidadáns a mellorar a separación dos produtos téxtiles do resto dos refugallos a través do seu depósito no contedor axeitado para propiciar o seu posterior reciclado e, con isto, o aforro de custos, tanto ambientais como económicos. “Reciclar non só trae consigo un aforro de materias primas e enerxía, constituíndo unha importante ferramenta na loita contra o cambio climático, senón que tamén supón un alivio económico para os propios concellos, toda vez que reduce a entrega de residuos a Sogama a través do contedor xenérico, minorando as toneladas a tratar nas súas instalacións e, polo tanto, o custo da factura, á vez que os municipios reciben ingresos por parte das entidades recicladoras, posibilitando desta forma unha taxa municipal máis xusta e equilibrada”, explicou.

Así mesmo, os deputados incidiron en que a moda rápida de usar e tirar está a engrosar de forma alarmante as cifras de residuos téxtiles producidos que, na súa maioría, acaban en vertedoiro, a peor das opcións polo seu alto poder contaminante. Por este motivo, recomendaron adquirir pezas de calidade e duradeiras, procedendo á doazón das mesmas cando se atopen en boas condicións para que se poida alongar a súa vida útil, e á súa reciclaxe cando non poidan ser reutilizadas. No caso daquelas que non sexan susceptibles de ser reutilizadas nin recicladas, Sogama as someterá a recuperación enerxética, evitando con isto a súa vertedura.

Os deputados do Grupo Popular Julio García Comesaña e Manuel Santos, acompañados da portavoz local do PP, Elena Estévez, salientaron hoxe o impulso do atractivo turístico e cultural que para Bueu supuxo a ampliación e mellora do Museo Massó, no que a Xunta de Galicia realizou un investimento de 1,4 millóns de euros.

García Comesaña e Santos subliñaron que esta intervención converteu ao Museo Massó “nun referente de primeiro nivel do patrimonio mariñeiro de Galicia”, ao incorporar as naves da antiga conserveira e dúas plantas da fábrica de salgadura Piñeiro, duplicando así a superficie expositiva.

Ademais, puxeron en valor a creación da Sala Lugrís, que permitirá exhibir fondos de gran relevancia, como a serie de seis pinturas de gran formato realizadas para o comedor das traballadoras da conserveira e que ocupan preto de 300 metros lineais.

PATRIMONIO CULTURAL E MARIÑEIRO

Os deputados populares salientan tamén a mellora das condicións xerais do centro museístico en materia enerxética e medioambiental, así como na seguridade, climatización e accesibilidade, o que reforza o compromiso do Goberno galego coa conservación e difusión do patrimonio cultural e mariñeiro.

“Con esta actuación a Xunta non só preserva a memoria mariñeira de Galicia, senón que tamén fortalece a oferta cultural e turística de Bueu e de toda a comarca”, destacou a portavoz popular, Elena Estévez Freire.

 

 

As deputadas do Grupo Popular Katy Varela e Encarna Amigo destacaron hoxe o traballo que a Xunta de Galicia vén desenvolvendo pola igualdade e a loita contra a violencia contra a muller, un labor que se expande aos festivais musicais, como o Caudal Fest que se está a celebrar en Lugo e onde os mozos e mozos teñen á súa disposición un Espazo de Igualdade e un Punto Lila e Arco Iris.

Nunha visita ao recinto do Caudal Fest, as deputadas comprobaron o funcionamento destes espazos de sensibilización e de atención e asesoramento continuado ante calquera tipo de violencia de xénero o LGBTIfóbica instalados pola Consellería de Política Social, coa colaboración de Turismo de Galicia, neste festival musical.

Estes puntos están compostos por dúas zonas diferentes, pero integradas. Unha primeira, de igualdade, pensada para a aprendizaxe e a sensibilización; e unha segunda, o Punto Lila e Arco Iris, para a atención continuada durante todo o festival a posibles vítimas de agresións sexuais ou calquera tipo de violencia machista ou LGBTIfóbica, que conta, ademais, cun espazo privado para poder facer un acompañamento, de ser necesario, con total confidencialidade.

Ambos espazos están a ser atendidos por un equipo multidisciplinar de profesionais especializados, entre os que se inclúen psicólogos, sexólogos, traballadores sociais, educadoras sociais ou axentes de igualdade con formación específica en igualdade de xénero, trata e prevención da violencia de xénero e LGBTIfobia.

Katy Varela e Encarna Amigo puxeron en valor a posta a disposición de todos os asistentes a este festival, nos que, en colaboración coa Consellería de Sanidade e os centros Quérote +, servirán tamén de espazos de información e prevención das infeccións de transmisión sexual.

O portavoz do Grupo Popular, Alberto Pazos, urxiu hoxe ao Goberno central a que “informe, adecuada e puntualmente, sobre o envío dos menores non acompañados a Galicia e poña enriba da mesa o financiamento necesario para facilitarlles todos os coidados que precisan e merecen”. Neste sentido, demandou a BNG e PSdeG que “colaboren desde as institucións que gobernan para a prestación das mellores atencións a estes menores”.

Alberto Pazos reiterou que “Galicia foi, é e será unha terra de acollida, pero non estamos dispostos a aceptar que se nos impoña desde o Goberno central esta distribución dos menores non acompañados, sen contar tan sequera coa opinión e as dispoñibilidades existentes en cada comunidade autónoma”.

TALANTE DITATORIAL DO GOBERNO DE PEDRO SÁNCHEZ

Deste xeito, pediu ao Goberno central que “abandone o seu talante ditatorial coas comunidades autónomas e cese neste reparto inxusto e arbitrario de menores non acompañados”, para o que considerou “fundamental que se abra unha vía de diálogo interinstitucional que permita un reparto equitativo destes menores”.

O portavoz popular pediu “que se informe, adecuada e puntualmente, ás comunidades sobre o envío destes menores, porque a súa chegada a Galicia xa provocou que a Xunta tivera que improvisar e modificar a súa política de acollemento de menores baseada na integración e convivencia en pequenos fogares”. Ao mesmo tempo, demandou que “poña enriba da mesa o financiamento necesario para facilitarlles as atencións educativas, sanitarias e sociais que precisan e merecen”.

“Non pode ser que Pedro Sánchez utilice ás comunidades autónomas ao seu antollo e as desprece un día si e outro tamén, polo que pedimos tanto a BNG como a PSdeG que, por unha vez, se poñan de lado dos galegos e apoien ao Grupo Popular na súa demanda”, sinalou Alberto Pazos.

Neste sentido, demandou aos grupos da oposición que “deixen de buscar réditos políticos a todo o que fan e colaboren desde as institucións que gobernan para a prestación das mellores atencións a estes menores”, pero avanzou que “non esperamos nada de socialistas e nacionalistas galegos e o Goberno de Alfonso Rueda terá que seguir traballando e buscando as solucións máis adecuadas para responder ao autoritarismo e falta de diálogo co que actúa habitualmente o Goberno de Pedro Sánchez”.

PLANS DE TRABALLO DAS COMISIÓNS

Respecto da actividade no Parlamento galego, Alberto Pazos lembrou a aprobación no día de onte, sen voto en contra algún, do plan de traballo da Comisión de estudo para a posible modificación da letra do himno de Galicia, que inclúe informes e comparecencias do Consello da Cultura, a Real Academia Galega e do Instituto de Estudos Galegos Padre Sarmiento, así como a comparecencia do profesor Manuel Ferreiro.

“Desde o Grupo Popular imos traballar porque a conclusión final desta comisión se elabore sen presa pero sen pausa, sen prolongar o debate máis do estritamente necesario e co obxectivo de chegar a unha conclusión que conte co maior respaldo posible”, indicou o portavoz popular.

Así mesmo, informou que esta mesma mañá se aprobou o plan de traballo da Comisión para o seguimento das políticas relativas á discapacidade e elaboración de novas propostas a prol da integración das persoas con discapacidade, que basicamente está dirixido a elaborar as conclusións finais baseándose na recompilación da extensa documentación achegada nas pasadas lexislaturas, a incorporación das cuestións relacionadas coa discapacidade que xurdiron na Comisión especial de estudo sobre a reactivación económica, social e cultural de Galicia pola crise da Covid-19; así como as transcricións das comparecencias que tiveron lugar durante a pasada lexislatura no seo desta Comisión de dependencia, entre as que figura a da propia conselleira de Política Social.

Outra das comisións non permanentes que se retomarán a vindeira semana é a de Igualdade e para os dereitos das mulleres, co obxectivo de seguir afondando no estudo e na busca de medidas para avanzar nunha sociedade máis igualitaria e na que poidamos felicitarnos porque conseguimos acabar coa violencia contra a muller. Para iso, o portavoz popular avanzou que “imos solicitar a presenza neste Parlamento galego de expertos e responsables políticos, así como o envío dunha ampla documentación que nos sirvan de base para unha proposta de medidas que axuden no obxectivo de que a sociedade galega sexa cada día máis xusta e igualitaria e poñamos en marcha accións que nos permitan deixar atrás esa lacra social que é a violencia machista”.

INCREMENTO DAS CONDENAS POR DELITOS SEXUAIS

Por último, Alberto Pazos considerou un “escándalo” o fallo nas pulseiras telemáticas que levan os maltratadores, denunciada pola propia Fiscalía Xeral do Estado na súa memoria de 2025. “Non pode ser que un país como España deixe ás mulleres vítimas de violencia de xénero totalmente desprotexidas dos seus agresores por unha chapuza do Goberno de Pedro Sánchez ao cambiar de sistema”, dixo.

O portavoz popular sinalou que “esta polémica coincide xustamente coa publicación do novo informe do Instituto Nacional de Estatística, no que se pon de manifesto o incremento dun 37,3 por cento das condenas por delitos sexuais o pasado ano, o que confirma que coas decisións e as accións deste Goberno de España non imos polo bo camiño: beneficiando aos condenados por este tipo de delitos a través da Lei do si é si, e agora deixando aos maltratadores total liberdade durante máis de 8 meses a consecuencia da nefasta xestión no cambio do operador das pulseras de seguimento”.

O Parlamento de Galicia aprobou hoxe por unanimidade a proposición non de lei do Grupo Popular a través da que se reitera a esixencia ao Goberno de España para que cumpra co establecido na Lei de Dependencia e asuma o financiamento do 50% do custo dos servizos e prestacións, garantindo un reparto equitativo dos recursos entre o Goberno de España e as comunidades autónomas; e que abone de maneira inmediata a débeda acumulada con Galicia, que supera os 2.500 millóns de euros, permitindo así fortalecer o sistema de atención á dependencia na nosa Comunidade.

Así mesmo, pídese que o Goberno central incremente os fondos destinados ás comunidades autónomas para a atención á dependencia, asegurando que todas as persoas con dereito a prestacións poidan acceder a elas sen demoras inxustificadas; e estableza un plan de financiamento estable e plurianual, que permita ás comunidades autónomas planificar e mellorar os servizos de dependencia con previsibilidade e seguridade orzamentaria.

INTERIORIZAR A GRAVIDADE

A portavoz popular de Asuntos Sociais, Raquel Arias, afirmou que con esta nova proposta “queremos que interioricen a gravidade que ten para as persoas dependentes a débeda de 2.500 millóns de euros do Goberno central con Galicia, demandando aos socialistas galegos que esixan a Pedro Sánchez que trate igual a Galicia que ao País Vasco e ao BNG que lle retire o seu apoio se esa equidade non se da”.

“Porque esta actitude do Goberno central con Galicia está a prexudicar a calidade de vida dos maiores e dependentes galegos, causa un gran prexuízo económico e pon aos concellos ao borde da quebra”, apuntou.

A SITUACIÓN EMPEARA DÍA A DÍA

Raquel Arias lamentou que “a situación empeora día tras día porque Pedro Sánchez, en vez de incrementar a súa aportación para a prestación dos servizos de dependencia, reduciuna nos últimos anos, pasando dunha achega do 40 por cento en 2023 a menos do 35 por cento ao ano seguinte”. “Iso si, comprometéndose co País Vasco a aboarlle o 50 por cento sen escusas, e co aplauso tanto do BNG como do PSdeG”, indicou.

Ademais, criticou que, “a medida que o Goberno central recorta as aportacións, vai modificando a Lei de dependencia para dar máis prestacións e máis servizos aos dependentes, pero en absoluto acompañadas do orzamento correspondente para levalos a cabo”. “Esta situación está a levar á quebra aos concellos, afecta ás políticas xerais da Xunta e, o que é peor, crea unha gran frustración entre os dependentes que ven sobre o papel uns servizos aos que non teñen acceso por falta de financiamento”.