Categoría: Parlamento de Galicia

A portavoz de Educación do Grupo Popular, Cecilia Vázquez, considerou “paradóxico” que o PSdeG “pida no Parlamento de Galicia un incremento do profesorado no ensino galego asociado á previsible supresión da taxa de reposición, cando a previsión é que esta taxa se elimine nos orzamentos do Estado de 2025 e hoxe o Goberno de Pedro Sánchez pospuxo a tramitación do teito de gasto para o vindeiro ano ao non contar cos apoios necesarios para sacalo adiante no Congreso”.

“Queren vendernos fume porque os socialistas galegos non teñen propostas para Galicia, e limítanse a ser os altofaltantes do Goberno de Pedro Sánchez”, sinalou Cecilia Vázquez, quen apuntou que “esta iniciativa é a mellor maneira de demostralo”.

Vázquez asegurou que “Galicia traballa con certezas, con feitos, e foi quen de anticiparse a todo isto, e hoxe temos unha das taxas de interinidade máis baixas de España no ensino logo da convocatoria de 18.500 prazas de oposición desde o ano 2009 que permitiron renovar un terzo da plantilla docente”.

Ademais, lembrou que “as clases arrincaron este curso cunha caída de 3.289 alumnos respecto ao curso pasado, pero cun aumento do profesorado ata os 31.603 docentes, a cifra máis elevada da historia de Galicia”. “Hai máis profesores que cando gobernaba o goberno bipartito, a pesar da enorme caída do alumnado, o que demostra que o cadro de persoal é suficiente para atender correctamente as necesidades de todo o alumnado”, apuntou.

A portavoz de Educación do Grupo Popular, Cecilia Vázquez, salientou hoxe no Pleno do Parlamento galego que “Galicia é a comunidade autónoma máis inclusiva de toda España”, xa que no ano 2023 o 94 por cento dos alumnos con necesidades educativas especiais está integrado en centros ordinarios e so o 6 por cento nos de educación especial, co apoio da rede de 4.000 profesionais de atención á diversidade.

Cecilia Vázquez explicou que a atención á diversidade “é todo ese conxunto de medidas e accións deseñadas coa finalidade de adecuar a resposta educativa ás diferentes características, potencialidades, ritmos de aprendizaxe, motivacións, intereses e situacións sociais e culturais de todo o alumnado”.

“A diversidade non so significa valorar as diferenzas, senón velas como unha oportunidade para aproveitar as potencialidades de cada persoa, que se sintan incluídas e conten con espazos de participación e de desenvolvemento en liberdade”, apuntou.

DEPARTAMENTOS DE ORIENTACIÓN

A portavoz popular lembrou que “desde o ano 1998 foise dotando aos centros educativos de departamentos de orientación, polo que a día de hoxe todos os integrantes da comunidade escolar teñen acceso aos recursos da orientación educativa e, polo tanto, poden realizar unha escolarización sen exclusións e en equidade”.

Así mesmo, Cecilia Vázquez manifestou que os orientadores “contan co apoio do Goberno galego a través de diversas medidas como é a formación tanto sobre orientación, para o conxunto do profesorado, como específica para os orientadores”. En concreto, dixo que a formación céntrase en ofrecer competencias que permitan aos profesionais estar capacitados nas competencias das áreas pedagóxicas e sociais para desenvolver a atención á diversidade e á inclusión do alumnado, a orientación educativa e profesional deste, e o asesoramento á comunidade educativa nos procesos de ensinanza e aprendizaxe.

Respecto da atención pediátrica en centros de saúde, salientou que “o 90 por cento dos casos son atendidos por pediatras, grandes profesionais perfectamente formados para identificar as necesidades especiais que lle poidan remitir os informes de orientación”. “Estamos de acordo na importancia de realizar diagnoses áxiles nos especialistas e, por este motivo, Galicia é un exemplo de como facer ben as cousas ao situarse como a quinta comunidade con mellores tempos de espera para conseguir consulta co especialista”, engadiu.

A portavoz de Sanidade do Grupo Popular, Encarna Amigo, pediu hoxe no Pleno ao BNG que “deixe de mentir tan descaradamente sobre un tema tan sensible e capital como é a sanidade”, porque incidiu que “o Hospital Álvaro Cunqueiro é un centro público e todos os servizos sanitarios que presta son públicos”.

Encarna Amigo lembrou que “cando o PPdeG chegou ao Goberno da Xunta considerou que a área sanitaria de Vigo non podía agardar máis para ter un hospital de primeiro nivel e executou un hospital público de vangarda e punteiro nos peores anos da crise económica”. Así, subliñou que “o propio Consello de Contas recoñece que a fórmula elixida era a única maneira viable para construír un centro hospitalario, sen comprometer a estabilidade orzamentaria da Xunta, nin a prestación de servizos esenciais”.

RESPONSABILIDADE PATRIMONIAL E LUCRO CESANTE

De seguido, criticou que o BNG pida rescatar a concesión do Álvaro Cunqueiro e que a Xunta pague dunha tacada centos de millóns de euros á concesionaria en concepto de responsabilidade patrimonial e lucro cesante. “A referencia dos nacionalistas galegos é o modelo de xestión e goberno de Venezuela, pero en España vivimos nun Estado de Dereito no que os contratos públicos se compren e os asinantes deben respectar o que se recolle nos mesmos”, afirmou. Ademais, indicou que o rescate da concesión suporía “asumir a limpeza, a vixilancia, o mantemento, a xardinería, a desinfección e todos os servizos que actualmente están incluídos na concesión”.

A portavoz popular lembrou que a área sanitaria de Vigo ten un concerto singular pola existencia dun centro que colabora na prestación destes servizos, “sen custo algún para o cidadán”. Neste sentido, considerou “curioso que o BNG pida agora que a totalidade da poboación deste área sanitaria teña atención hospitalaria en centros públicos, cando foron vostedes, baixo o seu goberno bipartito na Xunta, quen lles aseguraron o negocio a POVISA por moitos anos”.

“E que fixo o goberno do PPdeG co novo concerto asinado en 2014?”, cuestionou Encarna Amigo, para responder que “estableceuse que este centro sexa de adscrición voluntaria, polo que POVISA so atende a aqueles pacientes que libremente elixan recibir a súa asistencia sanitaria neste centro”.

A portavoz de Cultura do Grupo Popular, Carmen Pomar, asegurou hoxe no Pleno que o proxecto de Lei de cultura inclusiva e accesible de Galicia, que continuará a súa tramitación no Parlamento galego logo de rexeitar as emendas á totalidade de BNG e PSdeG, “suporá un impulso á creación e ao acceso á cultura de todas as galegas e galegos, con independencia das súas condicións persoais, sociais ou territoriais, especialmente aquelas con maiores dificultades de acceso e aquelas máis vulnerables”.

Carmen Pomar salientou que “é a primeira vez que unha lei regula o dereito de acceso á cultura desde unha perspectiva da inclusión e da accesibilidade, na busca de propiciar a máxima participación na vida cultural nun diagrama de dobre fluxo: desde o punto de vista do acceso e desfrute dos produtos e servizos culturais, e, o que aínda é máis importante, desde o punto de vista da produción e creación”.

PARTICIPACIÓN EFECTIVA, AFECTIVA E PRODUTIVA

Neste sentido, puxo como destinatarias deste lei “todas as persoas que configuramos a sociedade galega”, aínda que “presta especial atención a aquelas persoas cuxa situación de desvantaxe impide ou dificulta os procesos de creación cultural”. “A regulación ofrece un amplo marco a partir de que sexa natural a participación cultural efectiva, afectiva e produtiva de todas as persoas, con especial atención ás que se atopan nun contexto de especial vulnerabilidade polas súas dificultades ou riscos de exclusión”, apuntou.

“O Goberno galego asume o papel de fomentar a creación cultural e de promocionar e visibilizar o talento dos creadores e creadoras que poidan resultar case invisibles á sociedade, e faino baixo a convicción de que todas as diferenzas e todas as capacidades a enriquecen”, manifestou a portavoz popular. Ademais, anotou que “as programacións culturais públicas estarán pensadas e adaptadas a todo tipo de públicos, facilitando, de ser preciso, recursos e ferramentas que permitan o pleno acceso e gozo da actividade”.

Así mesmo, nesta lei aparece contemplado o desenvolvemento de ferramentas dixitais e tecnolóxicas para garantir que os contidos culturais cheguen a todas as persoas, especialmente ás que estean en risco de exclusión social, favorecendo, ademais, a alfabetización dixital ao longo da vida.

FROITO DO DIÁLOGO

A viceportavoz popular lembrou que este proxecto lexislativo “foi concibido pola Consellería de Cultura e froito do diálogo con máis de 50 asociacións e colectivos” e destacou que a norma incorpora “mecanismos de seguimento, como é o Observatorio da Cultura Inclusiva e Accesible de Galicia, e compromete prazos concretos para cuestións importantes como a posta en marcha deste observatorio ou a elaboración do plan de accesibilidade e inclusión cultural”.

Para rematar, Pomar criticou que, coas súas emendas á totalidade, BNG e PSdeG “estean votando en contra de que Galicia teña unha lei que garanta o acceso universal á cultura e que garanta a oportunidade para que todos os galegos e galegas formen parte dela como suxeitos activos e creadores”. “Non cabe en ningún caso cuestionar unha lei que, sen excluír a ninguén nin a ningún ámbito cultural, ten como obxecto regular o acceso á cultura a todas as persoas, cun articulado que se redacta coas lentes dos que teñen máis problemas neste acceso”, concluíu.

O Pleno do Parlamento de Galicia aprobou hoxe a Conta Xeral da Comunidade Autónoma de Galicia correspondente a 2021, na que se pon de manifesto que “Galicia cumpriu un ano máis cos obxectivos de déficit e de débeda pública recollidos no orzamento”, subliñou a viceportavoz do Grupo Popular, Cristina Sanz. Ademais, a proposta do Grupo Popular, o Consello de Contas fiscalizará a todos os concellos que non renderon as súas contas no prazo que marca a lei, neste caso os de Verín, Redondela e A Rúa.

Cristina Sanz concretou que a Conta Xeral recoñece “que Galicia pechou o ano cun déficit do 0,15 por cento, a pesar da situación excepcional derivada da pandemia; que Galicia foi capaz de reducir a súa ratio débeda/PIB, sendo a terceira comunidade de réxime común con medio ratio de débeda; que Galicia acadou unha execución do seu orzamento por enriba do 95 por cento, acadando unha porcentaxe aínda maior no que se refire ao gasto corrente, que superou o 105 por cento; que Galicia acadou un aforro bruto de 864 millóns de euros, o que permitiu incrementar o volume de investimento sen recorrer ao endebedamento; e que Galicia foi unha das comunidades que liderou o tempo de pago a provedores: 15 días, fronte aos 25 días de media nacional”.

Respecto das propostas de resolución, a viceportavoz popular lamentou que “non puidemos aceptar a gran maioría das feitas pola oposición porque o 90 por cento eran corta e pega das rexistradas en anos anteriores ou demandaban cuestións imposibles de realizar”.

Porén, Cristina Sanz indicou que se aprobaron propostas relativas ao control das fundacións de investigacións sanitarias e á delimitación de competencias municipais, “ademais da solicitude para que o Consello de Contas fiscalice a todos os concellos que non renderon as súas contas no prazo que marca a lei, neste caso os de Verín, Redondela e A Rúa”.

O portavoz do Grupo Popular, Alberto Pazos, demandou hoxe a BNG e PSdeG que, “se realmente queren e defenden os intereses de Galicia, aparquen a súa defensa dunha quita de débeda e apoien ao Presidente Rueda nas súas esixencias ante o Goberno de Pedro Sánchez: a mellora das infraestruturas, a dotación de fondos europeos, a transferencia de competencias e medios para exercer o noso autogoberno, a posta en marcha de medidas para a incorporación de profesionais sanitarios, o abono da débeda pola atención aos dependentes e a promoción e impulso do Xacobeo 2027”.

Alberto Pazos referiuse á entrevista que celebran esta mañá na Moncloa o Presidente da Xunta e o Presidente do Goberno como “un encontro longamente esperado e reiteradamente solicitado que finalmente vai ter lugar enmascarado na rolda de entrevistas que Pedro Sánchez vai celebrar con todos os presidentes autonómicos, onde, por moito que lle pese, non podía deixar fóra ao presidente galego”

CAER NA TRAMPA

“Non podemos caer na trampa, nin desaproveitar a ocasión, de centrar a reunión no financiamento das comunidades autónomas ou nunha quita da súa débeda”, porque “fixar o foco nesta cuestión é facerlle seguidismo ao que realmente interesa ao independentismo catalán e ao propio Pedro Sánchez para manter o seu apoio e conseguir atornillarse na Moncloa”, dixo.

Así, destacou que, gracias as políticas responsables e acertadas que levaron adiante os gobernos do PPdeG na Xunta, Galicia situouse no primeiro trimestre deste ano como a 5ª comunidade autónoma con menor débeda por habitante (4.582 euros, é dicir, 2.473 euros menos que a media das comunidades autónomas), ao tempo que a débeda representa o 16,2 por cento do PIB. “A primeira consecuencia desta situación é que neste momento Galicia estea a pagar os intereses pola súa débeda máis baixos de España, polo que a quita da débeda non é o que máis nos preocupa nin urxe neste momento”, afirmou..

Pazos comparou estes datos financeiros de Galicia coa realidade que se vive en Cataluña: no primeiro trimestre deste ano, era a comunidade española con maior deda por habitante: 10.878 euros (2,5 veces o que debe cada galego); ao tempo que o seu porcentaxe de débeda sobre o PIB era do 31,1 por cento (practicamente o dobre que en Galicia e so superada a nivel estatal polas comunidades valenciana, Murcia e Castela-A Mancha).

“Esta é a verdadeira razón pola que socialistas e nacionalistas galegos insisten tanto en que a Xunta, e o seu Presidente na reunión de hoxe, dea o seu brazo a torcer e acepte unha quita da débeda, porque non o fan porque estean a defender os intereses de Galicia, senón única e exclusivamente por cumprirlle o gusto a Pedro Sánchez e aceptar os desexos dos independentistas cataláns para o seu único beneficio”, explicou..

NECESIDADES REAIS

O portavoz popular insistiu na necesidade dun “novo modelo de financiamento autonómico, froito dunha negociación multilateral na que participen todas as comunidades autónomas, que sexa xusto e permita pagar o custo de todos os servizos que presta a Administración galega, atendendo especialmente as súas peculiaridades de dispersión e envellecemento da súa poboación”. Neste sentido, apuntou que este novo modelo facilitaría unha solución ao problema de déficit de máis de 600 millóns de euros que cada ano ten que afrontar a Xunta porque o actual sistema non chega para atender todas as necesidades dos galegos”.

Por todo isto, pediu a BNG e PSdeG que “deixen de enganar aos galegos con propostas de quita de débeda á Comunidade galega que non están pensadas para nós, porque o que non imos permitir é que o que lle corresponde a Galicia sirva para pagar os desfalcos e despilfarros feitos por outras comunidades autónomas”.

“Confiamos que así o entendan e nacionalistas e socialistas galegos se poñan, dunha vez, do lado de Galicia e na defensa das súas necesidades reais”, reclamou Alberto Pazos, quen solicitou que “deixen de facerlle a onda a Pedro Sánchez e ao independentismo catalán, porque Galicia precisa de todos e neste momento temos outras prioridades máis urxentes que unha quita da nosa débeda, que non ten como obxectivo dar solución aos problemas de Galicia, senón atender os intereses de Pedro Sánchez e os seus aliados independentistas cataláns”.

A Comisión 6ª do Parlamento de Galicia aprobou hoxe o ditame do proxecto de Lei de promoción dos beneficios sociais dos proxectos que utilizan os recursos naturais de Galicia, co que o texto queda en disposición do seu debate definitivo en Pleno. O portavoz popular, Alberto Pazos, asegurou que esta nova norma “suporá un antes e un despois para a sociedade galega, porque con ela Galicia garante que a nosa riqueza natural se transforme en riqueza social para o conxunto dos galegos”.

Alberto Pazos salientou que o texto que sae do debate en ponencia deste proxecto de lei, ao que se incorporaron directamente seis emendas da oposición e se transaccionaron outras dúas, “cumpre os dous requisitos fundamentais que motivaron a súa creación: garantir que calquera proxecto que implique o aproveitamento dos recursos naturais de Galicia redundará en beneficios directos e medibles para o conxunto da poboación; e garantir o mantemento das máximas esixencias ambientais para a implantación deses proxectos”.

VISIÓN DE CONXUNTO

“Ambas cuestións se funden nun único informe que permitirá unha visión de conxunto de calquera proxecto, pero garantindo que non cabe compensación económica das esixencias ambientais, nin cabe eliminar beneficios sociais polo mero cumprimento das esixencias ambientais”, indicou.

O portavoz popular dixo que a “coherencia” foi o motivo para que o Grupo Popular rexeitara moitas das emendas dos grupos da oposición, “ben por amosar unha evidente incoherencia co obxecto deste proxecto de Lei ou ben por amosar unha fonda incoherencia entre as propostas realizadas e a súa actuación política alí onde gobernan, como o demostra o feito de que criminalicen permanentemente a colaboración público-privada, pero non dubidan en abrazala en cada lugar e ocasión que teñen de gobernar”.

Pazos criticou que “insistan na necesidade de introducir nesta lei unha zonificación para o desenvolvemento eólico, que non forma parte do obxecto desta norma, do mesmo xeito que insisten en regular cuestións que xa están reguladas noutras normativas”. Porén, lembrou que “xa existe unha zonificación vixente, a través do Plan sectorial eólico, que pode ser revisada por quen lle interese”, e subliñou que “non é a Xunta quen permite a instalación fóra dos límites territoriais establecidos nin que alixeira as esixencias medioambientais, senón o Goberno de España”.

O Parlamento galego aprobou  a proposición non de lei do Grupo Popular, que non contou co voto favorable por parte dos deputados socialistas, a través da que se insta ao Goberno central para que modifique o Imposto sobre a Renda das Persoas Físicas e as leis dos Impostos sobre Sociedades, sobre a Renda de non Residentes e sobre o Patrimonio, ao fin de recoller entre as exencións deste imposto as axudas que sexan outorgadas a deportistas, adestradores, técnicos, árbitros ou xuíces de alto nivel polas administracións autonómicas.

O portavoz popular de Deportes, Pablo Prieto, explicou que na actualidade a modificación do artigo 7 da Lei 35/2006 do IRPF “beneficia so aos deportistas que reciben axudas de contido económico por parte do Consello Superior de Deportes, o Comité Olímpico Español, o Comité Paralímpico Español e a Asociación de Deportes Olímpicos polo que os deportistas galegos non poden acceder a esas vantaxes fiscais se so reciben axudas por parte da Xunta”.

“É unha cuestión que non debemos de deixar pasar por alto, polo que esiximos ao Goberno central sensibilidade e criterio para garantir a igualdade para os deportistas no conxunto do Estado, ademais dunha medida que garanta o pleno exercicio de competencia exclusiva que a Comunidade galega ten en relación co deporte”, indicou Pablo Prieto.

Na súa intervención, subliñou que “Galicia xa fixo os deberes neste ámbito” e lembrou a modificación lexislativa realizada en 2019 para establecer unha nova dedución na cota íntegra autonómica do IRPF referida ás axudas obtidas polos deportistas de alto nivel de Galicia da Administración galega”. Ademais, destacou que a Xunta realiza unha labor de acompañamento e protección integral e transversal cara os deportistas de alto nivel a través do Programa de Axuda ao Deportista, “que axuda aos deportistas tanto durante como despois da súa carreira deportiva a través de orientación, información e apoio en xeral.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita a incorporación do Goberno central no Consorcio para a Promoción da Música da Coruña, co obxectivo de consolidar a súa actividade no plano institucional e económico.

A portavoz popular de Cultura, Carmen Pomar, salientou que a Xunta leva investidos neste organismo 36 millóns de euros desde o ano 2009, “o que demostra o firme compromiso con esta institución dedicada á difusión da música en Galicia”.

Carmen Pomar subliñou que o Consorcio para a Promoción da Música da Coruña “é un dos grandes proxectos culturais de Galicia, no que non só desenvolve o seu labor a Orquestra Sinfónica de Galicia, senón tamén un coro senior, as orquestras e coros infantís e xuvenís e a adscrición da Escola Municipal de Música, conformando un verdadeiro ecosistema de formación e difusión cultural de alta calidade e de indubidable pegada, tanto na formación de músicos e profesionais como na formación dos públicos máis diversos”.

IMPLICACIÓN

Na súa intervención, lembrou que a Xunta asinou en 2004 un convenio de colaboración co Concello de A Coruña co fin de financiar con fondos autonómicos a Orquestra Sinfónica de Galicia, a través do que viu realizando unha achega económica mínima de tres millóns de euros anuais. “Este importe mantívose inalterado ata o 2011, cando descendeu a dous millóns de euros motivado polo impacto da caída dos recursos públicos no contexto da gravísima crise económica que se vivía naquel momento, pero posteriormente volveu incrementarse progresivamente ata chegar de novo aos tres millóns de euros no presente ano 2024”, sinalou.

“O feito de establecer no convenio entre a Xunta e o Concello de A Coruña unha cantidade mínima de investimento debe interpretarse como a mostra dunha implicación real por parte da Administración autonómica na pervivencia dun proxecto cultural de envergadura da Orquestra Sinfónica de Galicia”, salientou a portavoz popular, quen engadiu que “a Xunta nunca abandonou o proxecto da Orquestra Sinfónica de Galicia nin a súa colaboración no Consorcio”.

Carmen Pomar dixo que na última Comisión de Goberno do Consorcio para a Promoción da Música da Coruña aprobouse, a petición da Xunta e do Concello, a elaboración dun plan estratéxico desta institución, que valore a situación actual e propoña un horizonte de obxectivos e actuacións que permita asegurar os seus fins fundacionais.

Deste xeito, e no marco de elaboración deste plan estratéxico, Pomar considerou “necesario aumentar o apoio institucional e económico mediante a implicación decidida doutras entidades públicas e privadas, como é o caso do Goberno central, que a día de hoxe non ten consignado apoio algún ao Consorcio para a Música da Coruña a diferenza do que fai con outras entidades culturais de relevancia como o Liceu ou o Palau en Cataluña, a programación de clásica e lírica de Bilbao ou actividades culturais en Oviedo”.

O Parlamento de Galicia aprobou hoxe por unanimidade a proposición non de lei do Grupo Popular a través da que se pide ao Goberno de España que adopte as medidas necesarias no desenvolvemento do Regulamento europeo sobre a información alimentaria facilitada ao consumidor para evitar a información confusa na etiquetaxe de produtos de orixe vexetal baixo a denominación de peixe.

Así mesmo, ínstase á Comisión Europea para que na próxima revisión do Regulamento da organización común dos mercados (OCM) no sector dos produtos da pesca e da acuicultura se inclúa unha proposta lexislativa para reservar calquera definición comercial, designación e descrición de venda de ‘peixe’ aos produtos pesqueiros.

O portavoz popular do Mar, Miguel Fidalgo, sinalou que “a irrupción no mercado de produtos aptos para veganos derivados de proteínas vexetais elaboradas que imitan a aparencia de presentacións de peixes e mariscos, coa pretensión de desprazalos das preferencias do consumidor, constitúen un gran problema para o sector, xa que non son o mesmo nin para a saúde, nin para o medioambiente, nin desde o punto de vista ético”.

BALEIRO LEGAL

Neste sentido, manifestou que “na actualidade existe certo baleiro legal ao redor deste tipo de produtos vexetais que imitan a outros de orixe animal, dado que non hai unha normativa específica que os regule de forma expresa”, polo que considerou urxente “unha revisión da normativa de etiquetado, a fin de dotar dunha información veraz á cidadanía que lles protexa de adoptar decisións alimenticias erróneas mediante estratexias de greenwashing que os devanditos produtos veganos adoitan aproveitar”. “Só mediante unha información veraz e unha competencia leal entre operadores aseguraremos un marco alimentario sostible, seguro e nutritivo”, dixo.

Miguel Fidalgo explicou que o Regulamento comunitario “permite aos Estados membros, por ser as autoridades máis indicadas, actuar en situacións de etiquetaxe inadecuada sobre as conservas de orixe vexetal que induce a erro sobre a verdadeira natureza e composición do produto”, polo que sinalou que “non hai tempo que perder, polo que é necesaria unha resposta por parte das autoridades comunitarias e do Goberno de España”.