Categoría: Parlamento de Galicia

O portavoz do Grupo Popular, Alberto Pazos, trasladou hoxe, logo da viaxe dunha delegación do Parlamento de Galicia ao campo de refuxiados saharauis de Tinduf en Alxeria, a preocupación existente entre a poboación saharaui polo “incomprensible bandazo que o Goberno de Pedro Sánchez deu as relacións de España con Sahara Occidental, que se senten traizoados e abandonados polo cambio da política exterior española ante as presións realizadas por Marrocos”.

Ademais, defendeu “o sentidiño e a plena disposición de Galicia a acoller menores migrantes non acompañados” e criticou a falta de rigor do Goberno central ao non asumir a ausencia dunha política migratoria.

Alberto Pazos salientou que Galicia, con 288 nenos que participan este ano no programa Vacacións en paz organizado pola Asociación Solidariedade Galega co Pobo Saharaui, é a segunda comunidade que maior número de nenos acollerá, só superada por Andalucía. Neste sentido, insistiu que “somos unha terra solidaria e mostra disto é a colaboración que desde hai moitos anos vén prestando a Xunta, na que xa leva investidos case 2,5 millóns de euros, para que todos estes nenos gocen dunhas merecidas vacacións nas que disfrutar de actividades de lecer e tempo libre, se lles facilita a asistencia médica que precisen e se familiarizan coa cultura e as linguas galega e castelá, coa que conviviron durante o período colonial español”.

FELICITACIÓN E AGRADECEMENTO

Neste punto, deu as gracias e felicitou polo traballo que vén desenvolvendo, ano tras ano, a Asociación Solidariedade Galega co Pobo Saharaui, capitaneada pola recentemente galardoada coa Medalla Castelao Maite Isla, e a todas esas familias que dan testemuña da xenerosidade do pobo galego.

“Foi unha viaxe moi ilusionante e satisfactoria, pola alegría e esperanza coa que os nenos e nenas acoden a disfrutar da súa estadía en Galicia e noutras comunidades autónomas españolas, e polos vínculos de cariño que se van forxando a través da relación de convivencia entre as familias e os menores, pero tamén foi unha estancia en Tinduf na que puidemos comprobar, con preocupación, a actual situación do campamento de refuxiados, trasladada directamente tanto polo primeiro ministro de Rasd, Bucharaya Hamudi Beyun; como polo Presidente da República Árabe Saharaui Democrática, Brahim Gali nas entrevistas que mantiveron coa Delegación galega e nomeadamente coa representación deste Parlamento”, dixo Alberto Pazos.

Segundo explicou, esta situación deriva “do incomprensible bandazo que o Goberno de Pedro Sánchez deu as relacións de España co Sahara Occidental, abandonando a postura tradicional mantida ao longo do tempo polos distintos Gobernos de España, que sempre defenderon a aplicación da legalidade internacional, e a defensa das resolucións da ONU que establecen a necesidade da celebración dun Referendum para que o pobo Saharaui poida decidir libre e democraticamente o seu proio futuro”.

SENTIMENTO DE TRAIZÓN

“Existe un fondo sentimento de traizón cara ao Goberno de España entre a poboación saharaui, que se sente abandonada polo cambio na política exterior do Goberno español ante as presións realizadas desde Marrocos”, sinalou o portavoz popular.

En calquera caso, Pazos asegurou que “desde Galicia seguiremos trasladando a nosa solidariedade á inmensa maioría do pobo galego coa causa saharaui, e o noso compromiso de seguir traballando ata que se cumpran os compromisos establecidos nas resolucións da ONU, que permitirían a este pobo decidir o seu futuro a través dun referendo con plenas garantías”.

Ademais, respecto da política do Goberno español cara ao Sáhara Occidental, engadiu que “manteremos a nosa posición de levar adiante unha política baseada no equilibrio das relacións con dous socios como son Marrocos e Arxelia, ao tempo que avogamos por manter unha neutralidade activa no posicionamento respecto ao Sáhara Occidental, mantendo o noso apoio as decisións adoptadas polas Nacións Unidas”.

Alberto Pazos tamén se referiu á problemática existente coa acollida polas comunidades autónomas de menores migrantes non acompañados chegados a Canarias e Ceuta. Neste sentido, destacou que “fronte ao sentidiño de Galicia e a súa plena disposición a acoller os nenos e adolescentes que lle corresponde, atopámonos cun Goberno central mentireiro e desleal, co único obxectivo de botar as culpas ás comunidades autónomas gobernadas polo Partido Popular pero sen poñer enriba da mesa unha verdadeira política migratoria que dea solución a este grave problema”.

CATALUÑA, A ÚNICA QUE NON APOIOU O REPARTO

“O Goberno de Pedro Sánchez vive permanentemente na inacción e na improvisación, e neste caso concreto dos menores migrantes non acompañados volveuno a demostrar”, lamentou o portavoz popular, quen apuntou que volveu a mentir cando acusou ás comunidades autónomas de non ter acollido aos menores migrantes comprometidos en 2023. “Galicia aínda está á espera de recibir aos 28 menores que o Goberno central se comprometera a enviar o pasado ano, que non chegaron simplemente por dificultades a nivel burocrático e administrativo, como recoñeceu o propio Presidente de Canarias na reunión do mércores”, explicou.

Ademais, criticou que “a desvergoña do Goberno de Pedro Sánchez chegou ata o punto de acusar ás comunidades gobernadas polo Partido Popular de non aceptar os acordos da Conferencia Sectorial celebrada o mércores, cando todas elas votaron a favor do reparto acordado na reunión, a excepción de Cataluña, precisamente a comunidade autónoma gobernada polos seus socios independentistas e que manteñen a Pedro Sánchez na Moncloa”.

Por último, insistiu que “Galicia vai seguir amosando a súa solidariedade e tenderá as súas mans para acoller a outros 26 novos menores migrantes non acompañados procedentes de Canarias e Ceuta, actuando coa lealdade e a responsabilidade que nos caracteriza”, pero avisou que “non estamos dispostos a aguantar as insensateces do Goberno de Pedro Sánchez e a súa falta de rigor, porque o primeiro que ten que asumir é a súa falta total de política migratoria, que non é consecuencia das comunidades autónomas”.

O deputado do Grupo Popular Roberto Rodríguez asegurou hoxe no Pleno do Parlamento galego que SOGAMA manterá de media o mesmo canon do ano 2023, fixado en 66 euros por tonelada, aos concellos adscritos a esta empresa pública, de xeito que lles repercutirá unha contía moito menor que o custo real que ten o servizo, que rolda os 120 euros.

Roberto Rodríguez explicou que a empresa pública SOGAMA asumiu no último ano e medio un sobrecusto de 39 euros por tonelada pola xestión dos residuos urbanos que recibe procedentes de 295 concellos galegos provocado por decisións unilaterais adoptadas polo Goberno de Pedro Sánchez: a aplicación, desde o mes de xaneiro de 2023, do imposto estatal sobre vertido e incineración, que supuxo 9 millóns de euros de sobrecusto; a orde ministerial, de xullo de 2023, que elimina a retribución que Galicia recibía pola planta termoeléctrica de Cerceda, pese a que tiña dereito a percibila ata 2026 e que tivo un sobrecusto para as arcas galegas de 9,8 millóns de euros; e o imposto estatal de produción de enerxía, que conlevou unha suba dun 7 por cento.

SEN ALEGACIÓNS DOS CONCELLOS

“Nin a Fegamp nin a FEMP alegaron no seu momento contra esta suba provocada polas decisións do Goberno central, pero agora esixen o mantemento das bonificacións e anuncian alegacións á decisión de SOGAMA”, indicou o deputado popular, quen lamentou que “alegarán excluíndo deliberadamente do debate aos 150 concellos gobernados polo Partido Popular, máis que BNG e PSdeG xuntos pese aos seus pactos de perdedores”.

O resultado destas decisións aleatorias do Goberno de Pedro Sánchez foi un encarecemento do custo do servizo que presta SOGAMA en 21,9 millóns de euros no ano 2023, “a pesar de que a tendencia a nivel europeo está a ser a de aprobar unha moratoria á aplicación do imposto sobre incineración porque está a producir efectos contrarios aos pretendidos, xerando maior cantidade de refugallo e obstaculizando a produción de electricidade barata, autóctona, fiable e neutra”, apuntou.

Diante desta situación, Roberto Rodríguez salientou que a Xunta “fará un esforzo supletorio para causar o menor impacto posible das medidas do Goberno de Pedro Sánchez no peto dos galegos: realizará unha aportación extra de 12 euros por tonelada a través do fondo de cooperación local”. Deste xeito, subliñou que, aínda coa actualización proposta por SOGAMA, o canon medio para 2024 seguirá sendo o máis barato de España.

“SOGAMA viuse penalizada polo Goberno socialista fronte a plantas menos eficientes nas que, sobre o papel, se valoriza todo o material recibido, como Nostián ou Serra do Barbanza, que apostan polo modelo húmido-seco, en extinción xa que é contrario ás directrices europeas e que, ademais, resulta notablemente máis custoso para os concellos”, rematou.

A portavoz de Asuntos Sociais do Grupo Popular, Raquel Arias, reclamou hoxe no Pleno do Parlamento galego ao Goberno central “que abone á Comunidade galega os 2.500 millóns de euros que lle debe pola cofinanciación da prestación dos servizos de dependencia, xa que só está a pagar o 30 por cento cando por lei está obrigado a aportar o 50 por cento”, unha solicitude que foi rexeitada por BNG e PSdeG.

Raquel Arias asegurou que “cos cartos que o Goberno de Pedro Sánchez debe a Galicia en materia de dependencia poderíanse construír 138 residencias como a que se vai abrir en Lugo, duplicar o número de prazas de residencia que hai en Galicia ou pagar máis de 100 millóns de horas de axuda no fogar”.

“Pero, a pesar desta falta de orzamento por parte do Goberno central, o esforzo que está a facer o Goberno galego permitiu situarnos como unha das comunidades co mellor sistema de atención á dependencia, con mellor cobertura en centros de día para persoas maiores de 70 anos ou liderar o acollemento familiar de menores”, subliñou.

MELLORA DOS TEMPOS DE ATENCIÓN

A portavoz popular lembrou que “a Xunta é consciente das necesidades de seguir mellorando os tempos de atención á dependencia” e citou expresamente o compromiso de seguir acurtando os tempos de espera “coa recente aprobación dun decreto para axilizar os procedementos, reforzar os equipos de valoración e facer a valoración da dependencia e de recurso asignado no mesmo acto”

Respecto do servizo de axuda no fogar, Raquel Arias salientou, partindo da base de que se trata dun servizo de competencia municipal a raíz da Lei aprobada polo Goberno bipartito de PSOE e BNG, que a aportación da Xunta aos concellos incrementouse nun 24 por cento nos últimos anos, pasando de 9,7 a 12 euros por hora. “E aínda así somos conscientes de que non é suficiente, polo que o Goberno de Alfonso Rueda xa iniciou unha nova rolda de negociación coa Fegamp para revisar este importe”, apuntou.

“A Xunta fai as valoracións dos usuarios e asigna os recursos segundo o que establece a Lei estatal, pero o responsable de facer efectiva a prestación é o Concello”, explicou a portavoz popular. Ademais, indicou que o pago da prestación repártese entre os usuarios, os concellos, a Xunta e o Estado, “pero dáse a paradoxa de que o Goberno galego está a aportar o 70 por cento fronte ao 30 por cento do Goberno central”.

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España a realización de infraestruturas viarias vitais para Galicia e a execución inmediata das obras de reparación necesarias para garantir a seguridade nas autovías e estradas de titularidade estatal na Comunidade galega.

O portavoz popular de Infraestruturas, Roberto Rodríguez, lamentou que “o Goberno central leva anos deixando de lado o mantemento e o desenvolvemento das infraestruturas de comunicación viaria en Galicia, acumulando atrasos e incumprimentos de prazos e de investimentos que se traducen nun agravio comparativo co resto das comunidades españolas”.

SITUACIÓN PREOCUPANTE

Neste sentido, considerou “preocupante” a situación na que se atopan as autoestradas e estradas de competencia estatal. En concreto, referiuse ás autovías       A-6 e A-52, para as que urxiu “un reacondicionamento integral do seu firme, que día a día continúa co seu deterioro e prexudica aos usuarios da conexión de Galicia coa Meseta”; e á autovía A-8 de conexión coa cornixa cantábrica, “que segue cos mesmos problemas de néboa cos que naceu e seguen sen ter solución”.

“Non é razoable que o único anuncio do Goberno central en materia de conservación de estradas foi un investimento de apenas 23 millóns de euros para actuar en menos do 10 por cento das estradas da súa titularidade en Galicia: 10,5 millóns de euros a repartir entre as provincias de A Coruña e Lugo, e outros 12,6 millóns para as provincias de Ourense e Pontevedra”, manifestou.

A maiores desta necesidades de intervención no mantemento e conservación das autovías e estradas de titularidade estatal, Roberto Rodríguez tamén criticou que o Goberno central leva anos acumulando incumprimentos en relación á execución das novas infraestruturas viarias comprometidas por Galicia, especialmente aquelas que resultan vitais para a comunicación coa Meseta e para a vertebración interna do territorio galego: A-56; A-52, no acceso a Vigo; A-74 ou A-76.

EXEMPLO DA XUNTA

Para rematar, o portavoz popular animou ao Goberno central “a tomar nota da liña de acción da Xunta, que cada ano destina máis de 50 millóns de euros para blindar a seguridade e eficiencia das estradas da súa competencia, convertendo a rede de estradas autónomica nun referente de conservación”.

Ademais, apuntou que a Xunta destina cada ano outros 40 millóns de euros “para seguir incrementando os quilómetros de viarios de alta capacidade, cando o Estado levaba catro anos sen abrir un so quilómetro novo de autovía en Galicia, ata que a pasada semana inaugurou o Orbital de Santiago”.

O portavoz do Medio Rural do Grupo Popular, Miguel Viso, reclamou hoxe no Pleno do Parlamento galego ao Goberno de España maior axilidade na devolución ao persoal gandeiro do imposto sobre o valor engadido (IVE) pendente derivado especificamente da compra de pensos ou enerxía, aspectos que teñen unha importante incidencia na conta de resultados das explotacións leiteiras.

O portavoz popular do Medio Rural, Miguel Viso, afirmou que “se trata dunha reclamación xusta e xustificada, máis aínda tendo en conta que o leite que o produtor pon no mercado non leva IVE, pero ese mesmo produtor si que ten que facer fronte a este imposto á hora de adquirir alimento para os seus animais, combustible ou enerxía”.

Deste xeito, considerou que este trámite de devolución, que nalgún caso está pendente desde 2022, “é de vital importancia para garantir a viabilidade económica de moitas explotacións, sobre todo daquelas que realizaron un importante esforzo ao acollerse a plans de mellora e outras iniciativas de desenvolvemento”.

SECTOR ESTRATÉXICO

Miguel Viso asegurou que “a Xunta sempre considerou ao sector lácteo galego como un sector estratéxico” e para iso existe o Observatorio do sector lácteo de Galicia, co fin de elaborar informes para a toma de decisións internas e analizar as problemáticas do sector.

Así mesmo, referiuse á ferramenta Enerlácteo, unha aplicación para a optimización dos custos enerxéticos nas explotacións que avalía o consumo enerxético, compárao con outras explotacións semellantes e emite un informe de recomendacións sobre as medidas de aforro enerxético que poden ser implementadas.

TRANSFORMAR O SECTOR LÁCTEO

O portavoz popular lembrou a presentación no día de onte do proxecto Smartz4milk, deseñado para impulsar a transformación do sector lácteo, impulsado polo clúster alimentario de Galicia e cun total de 11 empresas. O principal obxectivo deste proxecto é transformar o sector lácteo, minimizando o seu impacto no medio ambiente, reducindo o desperdicio alimentario, dixitalizando ao máximo os seus procesos e afrontando o reto da descarbonización.

“Esiximos que o Goberno central controle, respecte e cumpra a lei de cadea alimentaria en todas as comunidades autónomas por igual”, sinalou Viso, quen sinalou que “temos as ferramentas pero o Goberno de Pedro Sánchez ten que facelas cumprir, co fin de minimizar as diferenzas de prezos pagados entre distintos territorios”.

Para rematar, Miguel Vigo manifestou que “en breve se porá en marcha o Banco de Explotacións, co fin de garantir a substitución xeracional e de facilitar o contacto entre as persoas titulares de explotacións agroforestais que vaian abandonar a actividade e persoas interesadas nas mesmas.

O Pleno do Parlamento de Galicia aprobou hoxe por unanimidade a proposición non de lei do Grupo Popular a través do que se solicita ao Goberno central que complete a dotación de 15 millóns de euros solicitados por Galicia no marco do PERTE Nova Economía da Lingua para o financiamento do Proxecto NÓS, unha iniciativa da Xunta e a Universidade de Santiago que situará ao galego ao mesmo nivel que as grandes linguas do mundo no ámbito tecnolóxico.

O portavoz popular de Lingua, José Luís Ferro, explicou que o PERTE Nova Economía da Lingua “presentouse polo Goberno central como unha oportunidade para aproveitar o potencial do español e das linguas cooficiais como factor de crecemento económico e de competitividade internacional en áreas como a intelixencia artificial, a tradución, a aprendizaxe, a divulgación cultural, a produción audiovisual, a investigación e a ciencia. A nivel económico, conta cun orzamento de 1.100 millóns de euros de investimento público, co obxectivo de mobilizar outros 1.000 millóns de investimento privado.

FERRAMENTAS GRATUÍTAS

Pola súa banda, o Proxecto NÓS, presentado hai pouco máis dun ano, “naceu para que o galego non perda o tren da dixitalización, pois a nosa lingua non pode ficar excluída dos novos recursos tecnolóxicos presentes e futuros”, sinalou José Luís Ferro. En concreto, dixo que esta iniciativa “traballa en incorporar o galego ás novas linguaxes dixitais, para o que se desenvolveron tres aplicacións sen precedentes en Galicia, que permitirán a interacción da lingua galega entre as persoas usuarias e os dispositivos tecnolóxicos: un tradutor neuronal multilingüe, un recoñecedor de fala e un sistetizador de voz.

“Estes avances están a disposición de calquera persoa, empresa ou proxecto para que os poida utilizar de xeito gratuíto, permitindo non só reforzar a proxección exterior da nosa lingua, senón tamén a expansión económica do galego como vehículo de comunicación nos mercados globais”, sinalou o portavoz popular.

O Proxecto NÓS foi introducido no PERTE Nova Economía da Lingua “e suporá o maior investimento directo na promoción do galego de toda a historia de Galicia”, manifestou José Luís Ferro, quen engadiu que “a evolución deste proxecto respecto ás tecnoloxías favorecerá que a tradución e o uso das linguas cooficiais en todo tipo de institucións e foros poida ser posible en igualdade de condicións coas grandes linguas”.

O deputado do Grupo Popular Gonzalo Trenor lamentou que o radicalismo do BNG privara de consensuar hoxe no Pleno do Parlamento de Galicia un acordo sobre o recoñecemento da diversidade e a política contra a discriminación nas aulas por razón de orientación sexual.

En concreto, Gonzalo Trenor criticou que o BNG “rachara co consenso acadado na aprobación hai dez anos da lei de igualdade de trato e non discriminación integral para o colectivo LGTBI”. “Volvemos atoparnos co nacionalismo galego máis radical, que fuxe de calquera acordo que supoña beneficios e atención para calquera galego, sexa cal sexa o seu pensamento político, crenza ou orientación sexual”, indicou.

DECLARACIÓN DE INTENCIÓNS

“Máis aló do contido concretou daquela lei, a aprobación desa norma supuxo unha declaración de intencións, unha mensaxe de apoio a todo os galegos e galegas gais, lesbianas e transexuais e ás súas familias, e supuxo a mellor declaración a favor da igualdade e contra a discriminación que podía facer este Parlamento”, lembrou.

Á vista da negativa do BNG a negociar un acordo, Gonzalo Trenor anunciou que “rexistraremos unha nova iniciativa neste Parlamento co obxectivo de negociar cos demais grupos unha postura conxunta que recoñeza os dereitos do colectivo LGTBI, especialmente no ámbito da educación”.

Esta iniciativa do Grupo Popular, que partirá da emenda rexistrada para o seu debate no Pleno de hoxe, insta á Xunta a realizar un estudo sobre a situación das persoas LGTBI no eido educativo galego; mellorar a atención dos casos de acoso ou ciberacoso a persoas LGTBI; continuar coa formación do profesorado en cuestións como a mellora da convivencia e a coeducación; desenvolver un programa piloto de educación afectivo-sexual cun enfoque integral; favorecer a igualdade das persoas nos centros educativos; e remitir ao Parlamento un informe sobre a nova situación dos centros Quérote++, así como o informe de aplicación da Lei pola igualdade de trato e a non discriminación de lesbianas, gays, transexuais, bisexuais e intersexuais en Galicia.

O deputado do Grupo Popular Miguel Fidalgo afirmou hoxe no Pleno do Parlamento galego que a Xunta ten ultimado o borrador do Plan Director do sector de automoción, que será presentado proximamente tal e como o PPdeG se comprometera durante a campaña electoral. Ademais, Fidalgo demandou ao Goberno central a descentralización dos fondos europeos destinados á industria para a súa xestión directa por parte da Xunta, de xeito que se poidan garantir a viabilidade dos principais proxectos tractores galegos.

Miguel Fidalgo garantiu que “a Xunta estivo, está e estará sempre apoiando o futuro da automoción en Galicia, sobre todo nun momento como o actual no que este sector afronta un proceso de cuasi reconversión”.

Neste sentido, criticou que o BNG “trate de facer crer que o Goberno de Galicia non atende ao sector da automoción, ao que ten destinado nos últimos anos máis de 100 millóns de euros”. Ademais, avanzou que a Xunta, continuando coa súa folla de ruta, presentará proximamente o borrador do Plan Director do sector da automoción, “un proxecto con medidas a curto, medio e longo prazo para impulsar a competitividade, a innovación, a internacionalización e a formación neste sector industrial”.

COMPRA NO TERRITORIO

O deputado popular lembrou que “Pedro Sánchez anunciou no seu momento que os fondos europeos nos ían saír polas orellas, pero a realidade é que en Galicia caeu un reintegro mentres o gordo foi para Cataluña, País Vasco, Estremadura e Valencia”. “33.500 millóns de euros en pertes industriais, dos que o 50 por cento están sen convocar a día de hoxe e cunha baixísima execución por parte do Estado”, resumiu Fidalgo sobre a tramitación de fondos europeos por parte do Goberno central.

“Cando o Goberno socialista redacta o PERTE da automoción, en ningún momento se pon como requisito a compra no territorio, o que provoca que se acaben deslocalizando as compras”, manifestou Miguel Lorenzo, quen anotou que para paliar esta situación a Xunta vén de sacar unhas axudas de 18 millóns de euros para apoiar os investimentos que teñen que facer as empresas auxiliares, para poder rebaixar os seus custes e poder competir con empresas de economías emerxentes.

Para rematar, Fidalgo tendeulle a man aos nacionalistas galegos “para que Galicia siga sendo referencia no ámbito da industria automobilística e para que haxa diálogo e paz social; pero se veñen facer demagoxia, a meterlle o medo no corpo á xente e atacando a Stellantis aí non nos van atopar”.

O portavoz do Grupo Popular, Alberto Pazos, criticou hoxe no Pleno do Parlamento galego a “incongruencia” do BNG ao pedir unha comisión de investigación sobre a ampliación da concesión da AP-9: “unha infraestrutura de titularidade estatal, cunha concesión outorgada polo Goberno central e que está sendo obxecto dun expediente de infracción reservado pola Comisión Europea”.

“O auténtico fin que perseguen con esta iniciativa é manipular, porque solicitan a constitución dunha comisión de investigación cuxas conclusións xa teñen perfectamente redactadas, incluíndo aos supostos responsables duns inventados delitos e irregularidades que ninguén está a investigar ou perseguir”, apuntou.

Alberto Pazos incidiu que “a proposta que hoxe nos traen os nacionalistas galegos é un cúmulo de incongruencias evidentes, omisións interesadas e de groseiras falsidades, que teñen como único obxectivo establecer un relato que permita salvar a cara á señora Pontón ante o seu enésimo ridículo electoral”.

PRÓRROGAS DE GOBERNOS DE PSOE E DE PP

“Non existe responsabilidade xudicial ou política no ámbito galego, non obra documentación nas institucións galegas, os posibles comparecentes non terían obriga legal de atender os requirimentos deste Parlamento e, como colofón, non podemos acceder ao expediente reservado da Comisión Europea”, sinalou respecto da proposta de comisión de investigación.

Na súa intervención, o portavoz popular explicou que “o BNG omite que o que está a investigar a Comisión Europea é se as dúas prórrogas da concesión da AP-9, tanto a concedida polo Goberno socialista de Felipe González por 10 anos ou a do Goberno de PP de José María Aznar por 25 anos, que contaron co visto bo dos servizos técnicos do Estado que fiscalizaron o procedemento, se adecúan ou non á normativa europea de competencia”. En concreto, ambas prórrogas, aprobadas por Real Decreto, foron informadas favorablemente polo Consello de Estado e a Avogacía do Estado.

Respecto das peaxes da AP-9, Alberto Pazos sinalou que “o incremento que sufrimos nos últimos anos ten unha orixe moi clara: a inflación e un convenio para a ampliación da ponte de Rande que incrementou as peaxes en todo o trazado da autoestrada, a razón do 1 por cento de suba anual durante 20 anos”. “O Goberno socialista de Zapatero, a través do ministro galego José Blanco, asinou o convenio de ampliación 48 horas antes dunhas eleccións xerais, ocultando ata despois da cita electoral o custo que supoñía para todos os galegos e, despois de perder as eleccións, esixiron revertelo para que a obra se fixera con cargo aos orzamentos do Estado”, lembrou.

“Nós non imos participar nesta cerimonia da confusión que pretende o BNG e imos seguir centrados nas dúas cuestións que centran os intereses dos galegos en relación á AP-9: a súa cesión á Galicia e a gratuidade das súas peaxes, que BNG e PSdeG prometeron antes das eleccións”, rematou o portavoz popular.

O viceportavoz do Grupo Popular, Julio García Comesaña, amosou hoxe a preocupación pola situación das estradas de titularidade estatal en Galicia, polo que pediu unha actuación urxente do Goberno central tanto na construción das novas autovías comprometidas como no arranxo e mantemento das estradas da súa competencia.

Julio García lembrou que o Grupo Popular defenderá no Pleno da vindeira semana unha proposición non de lei a través da que se solicita ao Goberno de España un compromiso real e efectivo para a construción de infraestruturas viarias vitais. “Estamos a falar de novas autovías fundamentais para a conexión por estrada de Galicia coa Meseta, así como a propia vertebración interior da nosa comunidade, como son as autovías A-56, entre Lugo e Ourense; A-52, no acceso a Vigo; A-74, que conecta A Mariña Lucense; e A-76, de Ourense a Ponferrada”, concretou..

NO FURGÓN DE COLA DAS PRIORIDADES DO GOBERNO CENTRAL

“Lamentablemente, todas elas deben figurar no furgón de cola entre as prioridades do Goberno de Pedro Sánchez, porque ano tras ano os galegos asistimos con resignación a súa ausencia nos plans de actuacións viarias estatais”, indicou, para incidir que “este agravio comparativo respecto ao trato que reciben outras comunidades autónomas non nos vai facer decaer no desánimo e desde o Partido Popular de Galicia imos seguir insistindo na solicitude ao Goberno de España para que se poña mans á obra e leve adiante estes proxectos vitais para a nosa comunidade”.

O viceportavoz popular tamén demandou ao Goberno central atención ás infraestruturas da súa competencia xa existentes en Galicia, levando a cabo as actuacións necesarias de mantemento para garantir un tránsito seguro e cómodo polas mesmas.

Así, referiuse á A-8, que conecta Galicia con Asturias, na que “seguimos á espera de que o Ministerio de Transportes adopte unha solución definitiva ao problema de tráfico nesta vía cada vez que a néboa aparece polos cumios de Mondoñedo ou Abadín”.

“Pero é que, o que resulta moi preocupante, é que a vía alternativa a A-8 cando a néboa obriga a prohibir o tráfico por esta autovía, é dicir, a estrada N-634, presenta un estado máis que deficiente, o que fai preciso unha actuación urxente para a renovación da capa de rodadura, a mellora da sinalización, o balizamento e o peche de tramos para evitar a entrada de animais á calzada”, dixo o viceportavoz popular, a pesar de que existe un proxecto de intervención redactado polo Goberno de Mariano Rajoy en 2017, “pero que o Goberno de Pedro Sánchez ten gardado nun caixón desde hai sete anos, facendo caso omiso das reclamacións realizadas desde distintas institucións, entre elas este Parlamento de Galicia”.

AGOCHAR O ABANDONO DE ANOS DA A-6 E A-52

Respecto das autovías A-6 e A-52, García Comesaña sinalou que “de pouco serve que o Ministerio de Transportes teña recoñecido o mal estado do firme destas dúas autovías, froito do abandono que sufriron durante moitos anos sen actuación algunha nas mesmas”. Neste sentido, apuntou que agora o Ministerio de Transportes “intente agochar este abandono coa realización de actuacións de emerxencia no firme destas dúas autovías, cando o que realmente precisan estas autovías é un reacondicionamento integral do firme, para o que fai falta vontade e orzamento que, lamentablemente, o Goberno de Pedro Sánchez non ten con Galicia”.

Para rematar, Julio García Comesaña referiuse á AP-9 e avanzou que o Goberno de Pedro Sánchez “vai xustificar a súa negativa tanto a transferencia a Galicia desta autopista como a eliminación das peaxes en motivos económicos, máis desde que comprobamos que, cada vez que o señor Puente fala, sube o prezo da transferencia e da concesión: pasou dunha cifra de entre 1.260 millóns e 2.600 millóns de euros para a transferencia; á última cifra de 6.000 millóns para esa mesma concesión”. “Son cifras que van incrementando segundo aumentan as incongruencias e as contradicións dos dirixentes socialistas respecto da AP-9”, engadiu.

“Desde o Grupo Popular nunca nos cansaremos de pedir rigor ao Goberno de Pedro Sánchez á hora de afrontar tanto a transferencia como a gratuidade da AP-9, máxime cando os propios socialistas prometeron durante a campaña electoral o levantamento das peaxes nesta autopista”, manifestou