Categoría: Parlamento de Galicia

O portavoz do Grupo Popular, Alberto Pazos, criticou hoxe a decisión do Goberno central de reducir un 25 por cento o seu financiamento do Plan Corresponsables, “unha nova aldraxe ás políticas sociais que prestan as comunidades autónomas e que no caso de Galicia se suma aos máis de 2.500 millóns de euros que o Estado nos debe pola prestación dos servizos da dependencia”.

Alberto Pazos informou que o Grupo Popular presentou unha iniciativa no Parlamento galego a través da que se esixe ao Goberno central, e máis en concreto ao Ministerio de Igualdade, que manteña o financiamento íntegro e estable da totalidade do Plan Corresponsables, sen recortes ni demoras para que as comunidades poidan continuar prestando os mesmos servizos de conciliación familiar que viñan facilitando desde a súa posta en marcha no ano 2021.

XA SE VÍA VIR

“Estamos a falar dunha decisión que xa se vía vir desde que o Goberno de Pedro Sánchez anunciou o pasado ano que o financiamento deste plan, que ía ser bianual, so cubría o 2024, deixando as posibles aportacións para presente ano 2025 no aire”, lembrou o portavoz popular, quen lamentou que “as sospeitas convertéronse en realidade hai poucos días cando na Comisión Sectorial de Igualdade se comunicou aos representantes das comunidades autónomas que o Plan Corresponsables ía contar cun 25 por cento menos de orzamento”.

Ademais, Pazos considerou “máis grave que teñan que ser as propias comunidades autónomas as que asuman este recorte, poñendo do seu peto ese 25 por cento que nos quitan, coa ameaza de que, de non facelo, as comunidades non recibirán carto algún do goberno para a realización deste programa”. “Esta decisión adóptase cando os orzamentos autonómicos, como é o caso de Galicia, xa están executados nunha porcentaxe moi importante ou, na maioría dos casos, xa comprometidos noutras actuacións sociais, o que complica, aínda máis, a dotación dos fondos necesarios desde a Xunta para a realización deste Plan Corresponsables”, explicou.

UN AGRAVIO MÁIS CON GALICIA

O portavoz popular manifestou que esta decisión “supón un agravio máis e un novo prexuízo para as políticas sociais das que gozan todos os galegos, que se suma ao incumprimento da Lei de dependencia e á débeda de máis de 2.500 millóns de euros que xa ten con Galicia pola atención ás persoas dependentes”.

Neste sentido, asegurou que “imos seguir demandando ao Goberno de Pedro Sánchez que cumpra con Galicia e lle outorgue un trato semellante ao das demais comunidades autónomas, especialmente no caso dos máis de 2.500 millóns de euros que nos debe pola prestación dos servizos de dependencia, porque a súa submisión aos deputados vascos para manterse na Moncloa derivou esta mesma semana noutro novo desprezo a Galicia, ao facerse público que o Goberno de Pedro Sánchez comprometeuse, nun acordo bilateral asinado para manterse no Goberno, a achegar ao País Vasco o 50 por cento do financiamento dos servizos da dependencia”.

Alberto Pazos engadiu que, fronte a este trato de privilexio ao País Vasco, “en Galicia sufrimos o pasado ano unha nova rebaixa da aportación do Goberno central para a prestación dos servizos da dependencia, ao pasar dunha achega do 40 por cento no ano 2023 ao 34,9 por cento do pasado ano 2024”. “Son máis de 5 puntos que o Goberno de Pedro Sánchez lle restou ao financiamento da atención aos dependentes galegos, unha nova burla para todas estas persoas que precisan destes servizos e que non se merecen que o Goberno de España os trate como cidadáns de segunda”, lamentou.

Por último, e referíndose á sesión plenaria celebrada esta semana no Parlamento de Galicia, Pazos recordou que “asistimos, unha vez máis, ao teatro ao que nos teñen acostumados os socialistas galegos: votando en Galicia, unha e outra vez, a favor de solicitar a transferencia da AP-9 á nosa Comunidade pero boicoteando, semana tras semana, e xa van 48 prórrogas, a tramitación no Congreso da proposición de Lei que faría realidade este traspaso”.

“Hai que ter moi pouca vergoña para non poñerse colorados cando os socialistas pulsan no Parlamento galego o botón a favor da transferencia ou para pedir á Mesa do Congreso que facilite a tramitación da proposición non de lei, sabendo de antemán que a situación non vai mudar porque a Presidenta socialista do Congreso vai seguir aprazando sine die a tramitación do traspaso da AP-9 a Galicia porque o Goberno de Pedro Sánchez non está pola labor de levala adiante”, afirmou.

O Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno central que estableza unha base permanente do Servizo de Vixilancia Aduaneira na ría de Camariñas en A Coruña co fin de reforzar a loita contra o narcotráfico, ao tempo que se modernizan e reforzan os medios materiais e tecnolóxicos deste Servizo, dotándoo de embarcaciónsP máis potentes e manobrables, equipadas coa tecnoloxía necesaria para interceptar narcolanchas e garantir a eficacia das operacións no litoral galego.

Así mesmo, a iniciativa do Grupo Popular solicita a ampliación da dotación de medios persoais e materiais empregados polo goberno na loita contra o narcotráfico no litoral da provincia da Coruña e en toda a costa galega, xa que os actuais están inoperativos ou son absolutamente inadecuados ao reto ao que se enfrontan; así como garantir a plena operatividade horaria do persoal do Servizo de Vixilancia Aduaneira en Galicia e unha distribución equitativa e proporcionada dos medios materiais no conxunto das súas bases e nas distintas comunidades.

POSTURA FIRME

A deputada popular Paula Mouzo afirmou que a loita contra o narcotráfico “é unha lacra que esixe unha postura firme de todos os que temos a misión e a responsabilidade de representar aos cidadáns”. “O problema segue aí e crecendo nos últimos anos, polo que está claro que a situación vai a peor, porque a droga pode descargarse nunha praia da ría de Camariñas, pero a súa man negra expándese por todo o territorio”, lamentou.

“Falamos da Costa da Morte, unha zona castigada pola droga e unha porta de entrada por onde as mafias meten a súa mercancía, polo que é necesario reforzar os medios de loita contra o narcotráfico e, en particular, establecer unha base permanente do Servizo de Vixilancia Aduaneira na ría de Camariñas”, concretou.

Así mesmo, Paula Mouzo considerou “imprescindible dotar de máis medios materiais e tecnolóxicos a este Servizo, porque é lóxico contar con medios máis potentes, aumentar a calidade e a cantidade das embarcacións, e de toda a infraestrutura técnica con persoal suficiente”.

“Precisamos dun persoal neste Servizo de Vixilancia Aduaneira ben tratado para evitar, dunha vez por todas, que por culpa dunhas horas extra se estrague unha operación contra o narcotráfico, como xa ten acontecido máis dunha vez”, sinalou.

Para rematar, a deputada popular manifestou que “as costas baldeiras de vixilancia e os medios obsoletos pola desidia do Goberno de Pedro Sánchez esixen un pulso firme contra a actividade do narcotráfico, porque é unha realidade incuestionable que os delincuentes teñen narcolanchas potentes e operativos de distribución moi efectivos pero enfronte non teñen moita oposición”.

O Pleno do Parlamento de Galicia aprobou esta tarde a proposición non de lei do Grupo Popular, que non contou co voto favorable dos deputados do PSdeG, a través da que se demanda ao Goberno de España que repoña de xeito inmediato, e sen máis dilación, todas as frecuencias ferroviarias suprimidas durante a pandemia e que aínda non se teñen recuperado, para favorecer así a mellora dos servizos ferroviarios en Galicia.

Así mesmo, pídese que elabore un plan de continxencia que avalíe as causas e posibles solucións ante as frecuentes incidencias que sofren os usuarios do tren en Galicia, tanto nas conexións interiores como nas liñas de media distancia, e garantir deste xeito o cumprimento dos tempos de viaxe e dos horarios.

A iniciativa aprobada tamén inclúe a solicitude para que o Goberno central adopte cantas medidas sexan necesarias para planificar os investimentos e obras precisas para dotar ás cidades de Lugo e de Ferrol de alta velocidade e, polo tanto, que as súas estacións tamén reciban trens AVE.

INCUMPRIMENTO DE COMPROMISOS

Por último, pide que o Goberno de Pedro Sánchez cese na discriminación que para Galicia supón as diferentes políticas de venda anticipada de Renfe, de tal xeito que tamén os usuarios galegos poidan adquirir billetes en prazo superior aos catro meses de antelación, o que facilita a planificación das viaxes e o acceso a prezos máis competitivos.

O portavoz popular de Mobilidade, Gonzalo Trenor, manifestou que “a precariedade do servizo ferroviario en Galicia é a constatación do agravio continuo do que é obxecto a Comunidade galega por parte do Goberno central”, referíndose en concreto a que “fixeron que sexa a normalidade o incumprimento dos horarios, e por iso ampliaron os tempos de demora para recibir indemnizacións; e quixeron substituír trens do Eixo Atlántico por outros con menor capacidade e menor velocidade”.

En materia de infraestruturas ferroviarias, Gonzalo Trenor indicou que “levamos anos agardando o Plan Director do Corredor Atlántico, pero non podemos perder de vista tampouco as melloras necesarias nas conexións A Coruña-Ferrol, A Coruña-Lugo, Ferrol-Ribadeo ou Vigo-Ourense, sen esquecer obras importantes para optimizar o AVE Galicia-Madrid, como o impulso da variante exterior de Ourense, a dotación de dobre vía nos treitos nos que aínda non a hai e a mellora dos túneles do Padornelo”.

“A este servizo deficiente hai que engadir o incumprimento dos compromisos adquiridos polo Goberno central, tanto en frecuencias como en tempos de percorrido”, lamentou o portavoz popular, quen concretou que “seguimos coas mesmas dez frecuencias que tiñamos cando o AVE chegou a Ourense en 2021”.

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se solicita á Mesa do Congreso para que poña fin á actitude obstrucionista e permita avanzar na tramitación final ante o Pleno da proposición de lei orgánica de transferencia da titularidade e competencias da autoestrada AP-9 á Comunidade galega, aprobada por unanimidade no Parlamento galego. “Non lles pode saír tan barata a súa hipocrisía, porque hoxe volveron levantar aquí a man a favor da transferencia desta autoestrada, cando esta mesma mañá baixaron os pantalóns en Madrid coa aprobación da 48 prórroga á tramitación da proposición de lei”, afirmou o portavoz popular de Infraestruturas, Roberto Rodríguez, dirixíndose aos deputados do BNG e do PSdeG.

“Os galegos non queremos celebrar o vindeiro mes as 50 prórrogas de Pedro Sánchez e o BNG ao debate no Congreso da transferencia da AP-9 a Galicia, non queremos celebrar as 50 labazadas ao acordo unánime deste Parlamento”, incidiu Roberto Rodríguez, quen asegurou que “os galegos queremos que se cumpra coa palabra dada, máis aínda cando non é que a Galicia se lle estea a negar a transferencia, é que a Galicia se lle está a negar mesmo o debate”.

FALTA DE RESPECTO

Neste sentido, o portavoz popular considerou “unha total e absoluta falta de respecto a un acordo unánime da primeira institución de Galicia” e cualificou de “inxustificable este bloqueo da proposición de lei, que só pode entenderse desde a ansia do goberno de socialistas e nacionalistas en Madrid non xa de discriminar a esta comunidade, senón de humillar ao pobo de Galicia que é ao que representa este Parlamento”.

Roberto Rodríguez explicou que “non hai que condicionar a transferencia da AP-9 ao seu rescate, nin este é inviable, porque o custo das bonificacións actuais supoñen ata o final da concesión preto de 1.900 millóns de euros, unha cifra que se asemella xa ao custo da indemnización por rescate”.

“Teñen a obriga de poñer fin a esta dobre humillación: á súa propia, por tragar con prórroga tras prórroga, traizoando a promesa feita aos galegos; pero, sobre todo, para por fin á que o Goberno de Pedro Sánchez lle está a infrinxir, coa súa complicidade, a Galicia”, afirmou o portavoz popular.

A portavoz de Política Social do Grupo Popular, Raquel Arias, salientou hoxe que a Estratexia galega contra a soidade non desexada, dotada con 145 millóns de euros, incorpora medidas dirixidas á detección, sensibilización, prevención e intervención para favorecer un envellecemento saudade. Así mesmo, considerou “inaceptable o recorte do Goberno de Pedro Sánchez nas súas aportacións pola aplicación da Lei de dependencia, ao pasar do 40 por cento en 2023 ao 34,9 por cento en 2024, co agravante que vimos de coñecer de que chegaron a un acordo bilateral co País Vasco para garantir o pago do 50 por cento como marca a Lei”.

“Estamos a falar dun novo escándalo do Goberno central, que ten cómplices aos socialistas e nacionalistas galegos, que mentres aquí reclaman coa boca pequena o abono dese 50 por cento da Lei de dependencia, en Madrid din si a todo o que lle pide Pedro Sánchez, preferindo apoiar a nacionalistas vascos e cataláns antes que a Galicia”, sinalou.

PARTE ACTIVA DA SOCIEDADE

Dentro da Estratexia galega contra a soidade non desexada, Raquel Arias afirmou que a Xunta xa traballa para poñer en marcha un mecanismo que faga que as persoas de máis idade formen parte activa da sociedade, “porque teñen moito que aportar e para que gocen da mellor calidade de vida durante o maior tempo posible”.

“Por iso, o Goberno galego segue avanzando no impulso de medidas que nos permitan garantir unha vida activa, saudable e independente, entendendo o envellecemento activo non só como a actividade física, senón tamén a intelectual e a participativa”, sinalou. En concreto, lembrou que dentro dos programas de envellecemento activo e loita contra a soidade non desexada figuran medidas como o Benestar en Balnearios, o programa Xuntos polo Nadal, o Carné +65 ou as aulas senior.

Así mesmo, apuntou que, “desde esta nova perspectiva, estase redactando a estratexia galega contra o idadismo, cuxas liñas xerais xa foron presentadas polo Goberno galego, porque ese 27 por cento dos galegos que teñen máis de 65 anos merecen poder elixir a vida que queren levar e o seu papel na sociedade”.

O voceiro de Medio Ambiente do Grupo Popular, Gonzalo Trenor, salientou hoxe no Pleno do Parlamento galego que “Galicia foi a primeira comunidade autónoma en contar cunha estratexia de infraestrutura verde e de conectividade e restauración ecolóxicas. Na actualidade, o Goberno galego está a traballar na elaboración do Plan de seguimento e implementación da infraestrutura verde de Galicia, co obxectivo de proceder á súa aplicación no período de vixencia ata o ano 2050.

Gonzalo Trenor explicou que o obxectivo desta estratexia “é a creación dunha rede de espazos e elementos que melloren a resiliencia ante o cambio climático e que contribúan á conservación da biodiversidade e beneficien ás poboacións das contornas”.

CAMBIO DE PARADIGMA

“A estratexia representa un cambio de paradigma na ordenación do territorio, clave para o benestar da poboación, xa que permitirá reducir a fragmentación de hábitats que albergan ecosistemas”, apuntou.

O portavoz popular sinalou que a estratexia de infraestrutura verde “fai especial fincapé nas urbes e impulsa iniciativas como a creación de rúas verdes coa plantación de especies autóctonas”. Neste eido, dixo que “tamén se fortalecerá a coordinación entre as distintas administracións públicas para garantir o éxito da implementación desta infraestrutura verde, dando prioridade á información, á formación e á participación da cidadanía nesta materia”.

Respecto da creación de vías verdes, Gonzalo Trenor lembrou o compromiso, xa anunciado polo Presidente da Xunta, Alfonso Rueda, de planificar unha rede de sendas que conectarán todo o litoral galego, desde Ribadeo ata A Guarda

A portavoz de Emprego do Grupo Popular, Noelia Pérez, criticou hoxe no Pleno do Parlamento galego que os socialistas “pretendan xestionar os desafíos laborais actuais cun manual de hai 15 anos, porque na actualidade existen órganos moito máis operativos, máis activos e eficaces que o Consello Autonómico de Emprego ou os consellos provinciais creados hai xa dez anos”.

Noelia Pérez indicou que “Galicia precisa de ferramentas modernas, útiles e adaptadas á realidade do mercado laboral actual, e non o que propón hoxe o Partido Socialista, que, curiosamente, hai dous anos xa consideraba que era un modelo superado e que era necesario adaptar”.

AXENDA MODERNA

“En Galicia trabállase cun modelo solvente, planificado e coordinado, que xa incorpora a visión territorial”, sinalou a portavoz popular, quen apuntou que “se fai a través da escoita activa dos traballadores, das empresas, da patronal e dos sindicatos no marco do Consello Galego de Relacións Laborais e do Diálogo Social de Galicia”. “Os novos tempos esixen unha axenda moderna de políticas activas de emprego”, manifestou.

Para rematar, Noelia Pérez subliñou que “Galicia é a comunidade que máis peso dedica no seu orzamento á formación para o emprego”, aínda que lamentou que “dentro das posibilidades que temos, porque os fondos finalistas de emprego que nos pertencen chegan teledirixidos desde Madrid polo Goberno de Pedro Sánchez e non podemos utilizalos onde vemos que é necesario”.

A portavoz de Política Social do Grupo Popular, Raquel Arias, saliento hoxe no Pleno do Parlamento galego que “en Galicia temos un dos modelos de protección de menores máis integrador de toda España, no que se incrementou o orzamento nun 45 por cento nos últimos cinco anos para situarnos como a segunda comunidade autónoma con maior porcentaxe de acollemento familiar”.

“O obxectivo é claro: que ningún menor sufra desprotección nin discriminación, buscando unha solución adaptada a cada situación persoal e apostando pola prevención, pola intervención temperá, polo acompañamento ás familias e por unha ampla rede de profesionais formados e comprometidos”, indicou Raquel Arias.

Na súa intervención, incidiu que “a primeira opción para a Xunta é sempre o acollemento familiar” e destacou que neste momento o 60 por cento dos menores do sistema de protección viven en familias de acollida, fronte a unha media do 51,6 por cento do conxunto de España. Ademais, apuntou que “somos un referente no contexto estatal polo noso modelo residencial descentralizado, con 868 prazas distribuídas en 80 pequenos e medianos fogares por toda Galicia que permiten un trato personalizado e garanten unha contorna educativa e afectiva segura”.

Raquel Arias destacou tamén que “somos unha comunidade tremendamente solidaria cando se trata de acoller a menores non acompañados, de xeito que estamos acollendo de forma voluntaria ao 16 por cento deses menores, cando por poboación nos correspondería só o 6 por cento”. “Rexeitamos crear guetos e rexeitamos as imposicións, ao tempo que esiximos financiamento e trato igualitario con outras comunidades de España”, dixo.

O deputado do Grupo Popular José Luís Ferro avogou hoxe no Pleno do Parlamento galego por “facer entre todos que o galego sexa atractivo para as novas xeracións, e para iso precisamos o Pacto pola Lingua impulsado pola Xunta e no que se reúnen forzas de todas as institucións, entidades culturais e cidadanía para articular un marco de acción común, sólido e libre de confrontacións partidarias”. “A lingua non debería ser obxecto de debate ideolóxico, senón de consenso, respecto e compromiso, pero tamén é fundamental que quen non queira contribuír para chegar a un pacto, quen non queira axudar, polo menos que non estorbe”, indicou.

José Luís Ferro lamentou que o BNG protagonizara hoxe no Pleno “un novo intento de converter a nosa lingua nun campo de batalla político”. Así, apuntou que “o que hoxe se nos propón non é unha defensa real da lingua, senón un xuízo político ao sistema educativo galego, á liberdade das familias, ao traballo profesional do profesorado e, por suposto, ao modelo educativo que deseñou un goberno do PPdeG”.

“O que o BNG chama Decreto da vergoña é en realidade unha norma que garantiu un equilibrio, un sistema plurilingüe que permite que as nosas nenas e nenos saian do ensino obrigatorio sabendo galego, castelán e inglés”, sinalou o deputado popular.

TENDER PONTES

Así mesmo, Ferro manifestou que “o galego non se defende desde a imposición, senón desde o orgullo”, polo que apuntou que, “se queremos avanzar de verdade, o camiño non é a confrontación política, senón o consenso e o Pacto pola Lingua que está a impulsar a Xunta, da man de todas as forzas políticas que estean dispostas a traballar con lealdade institucional”.

José Luís Ferro criticou que o BNG “non suma, divide; non propón, impón; e non constrúe, enfronta”, pero avanzou que “non renunciamos a tender pontes, porque o futuro do galego está nas nosas mans e ás xeracións futuras non podemos darlles unha lingua que sexa motivo de conflito, senón unha lingua útil, viva e querida”.