Categoría: Parlamento de Galicia

O portavoz de Medio Ambiente do Grupo Popular, Gonzalo Trenor, salientou hoxe no Pleno do Parlamento galego que Galicia “seguirá sendo un referente no patrimonio natural e destacando pola súa natureza, a súa biodiversidade e pola riqueza das súas paisaxes, e esa imaxe é un dos motivos polo que cada vez máis persoas nos visitan e polo que moitos queren vivir aquí”.

Gonzalo Trenor lembrou que “a nosa identidade, a nosa cultura e o noso patrimonio está entrelazado, de forma indisoluble, co noso medio ambiente, e por iso non é estraño que o medio ambiente estea na axenda de prioridades do Partido Popular de Galicia e do Goberno galego”.

ALTO NIVEL DE PROTECCIÓN

“A nosa máxima é conservar o patrimonio natural e tamén garantir a sustentabilidade tendo en conta as necesidades económicas, sociais, culturais e a nosa especial relación co medio ambiente, en liña, ademais, co que marcou no seu día Europa coa creación da Rede Natura”, indicou.

Neste sentido, salientou que “temos un nivel de protección da biodiversidade tan alto que case a metade de Galicia está protexida por algún dos instrumentos de conservación”. “Pero non nos conformamos, e a Xunta impulsará a candidatura dunha oitava reserva da biosfera, que terá o seu núcleo central no Parque Marítimo-Terrestre das Illas Atlánticas e que suporá que Galicia acade 1,2 millóns de hectáreas protexidas”, concluíu.

O portavoz do Medio Rural do Grupo Popular, Miguel Viso, asegurou hoxe que a Xunta “manterase vixiante”, especialmente na vertente agrogandeira, no cumprimento do acordo de libre comercio entre Mercosur e a Unión Europea, pero avogou por “aproveitar o prestixio dos nosos produtos para afrontar as novas posibilidades de cooperación con estes países ao outro lado do Atlántico”.

“O acordo entre a UE e Mercosur é un importantísimo paso para que Europa comece a mirar cara a América do sur como un socio prioritario, asegurando non só a apertura de novos mercados para os nosos produtos e o acceso a materias primas clave para o desenvolvemento dunha industria sostible, senón tamén abrir novas posibilidades de cooperación con estas países e de crecemento e expansión para os nosos socios americanos”, sinalou.

MEDIDAS DE CONTROL ESTRITAS

Miguel Viso recoñeceu que “existen preocupacións lexítimas no sector agrogandeiro sobre a competencia de produtos procedentes de países con estándares produtivos diferentes aos europeos”, pero asegurou que “desde a Xunta non se vai permitir que os nosos gandeiros e agricultores compitan en condicións desiguais”. Así, avanzou que “dentro das nosas competencias, impoñeremos medidas de control estritas para garantir que todos os produtos que entren en Galicia cumpran coa normativa europea, ao tempo que esixiremos ao Goberno de España que reclame a implantación das chamadas cláusulas espello, para que ningún alimento importado desde Mercosur poida venderse aquí sen respectar os mesmos estándares de calidade, seguridade e benestar animal que se lles esixen aos nosos”.

En concreto, o portavoz popular indicou que “poremos especial atención ao control da sanidade animal e vexetal, implementando probas específicas para detectar patóxenos, residuos de fármacos e fitosanitarios prohibidos na Unión Europa”. “E tamén seremos esixentes no etiquetado, garantindo que os consumidores poidan identificar con claridade a procedencia dos alimentos e os seus compoñentes”, anotou.

“O noso punto forte é o prestixio dos nosos produtos, porque conseguimos que o consumidor identifique con calidade todas as materias primas e alimentos que saen de Galicia”, salientou Viso.

Ademais, referiuse á cláusula de salvagarda existente no acordo da UE con Mercosur, en virtude da cal poderase suspender temporalmente a concesión de forma unilateral en caso de que estas importacións provoquen, ou simplemente ameacen, cun dano grave aos sectores agrogandeiros europeos.

 

 

 

O viceportavoz do Grupo Popular, Julio García Comesaña, asegurou hoxe que a nova Lei para o desenvolvemento e impulso da intelixencia artificial en Galicia, que continuará a súa tramitación parlamentaria logo de superar o debate de totalidade no Pleno, “asegura os beneficios que os cidadáns e o tecido produtivo poderán obter con esta nova tecnoloxía, ao tempo que garante os dereitos aos galegos e galegas cando na súa relación coa Administración galega interveña a intelixencia artificial”.

García Comesaña concretou que con esta nova lei “ofrécese á cidadanía un marco xurídico estable que lle dea confianza e certeza nas súas relacións coa administración pública galega e que blinde os seus dereitos”. “Este proxecto impulsa e fai seguro, dentro das nosas competencias, o uso desta tecnoloxía para ofrecer mellores servizos á cidadanía e ás empresas”, apuntou.

GARANTÍAS

En concreto, o viceportavoz popular subliñou que esta nova Lei de desenvolvemento e impulso da intelixencia artificial en Galicia “ofrece unha serie de garantías para os cidadáns, como asegurar a supervisión humana daqueles procedementos que así o esixan; a existencia dun rexistro público de todos os sistemas de intelixencia artificial que use a administración; créase a figura do Comisionado en Intelixencia Artificial, para velar polos intereses da cidadanía e os valores éticos, ou a Oficina de Intelixencia Artificial de Galicia; obriga a que calquera implantación estea precedida dun informe de avaliación de riscos; e se aposta pola formación e capacitación dos empregados públicos e os cidadáns”.

Respecto das emendas presentadas polos grupos da oposición, Julio García Comesaña considerou “decepcionante” que os socialistas critiquen que esta nova lei “se presentou con moita presa e pouco traballo detrás, cando este texto lexislativo se fixo público no mes de xullo do pasado ano e recolle as conclusións e recomendacións recollidas nun estudo realizado por un grupo de expertos das tres universidades galegas en marzo de 2023”.

Para rematar, García Comesaña destacou que esta nova Lei recolle, no seu artigo 2, “a garantía do uso normal da lingua galega nos procesos de desenvolvemento de sistemas de intelixencia artificial, así como potenciar o desenvolvemento de sistemas de intelixencia artificial de uso xeral en galego, previsión destinada a dar respaldo á continuidade das liñas de traballo iniciadas pola Xunta para a creación de modelos de IA de uso xeral adestrados con datos en galego”.

NOVA FUNDACIÓN PARA ATRAER TALENTO INVESTIGADOR

Por outra banda, sobre a proposta de creación por parte do BNG dunha Fundación Galega para a Ciencia, Julio García Comesaña cualificou de “resesa e carente de sentido” esta iniciativa parlamentaria nacionalista porque se rexistrou xusto despois de que o Presidente da Xunta anunciara no Parlamento galego, o pasado 8 de outubro, a posta en marcha dunha Fundación para a Investigación; e agora se trae para o seu debate no Pleno despois de que o Consello da Xunta xa aprobara o pasado día 3 de febreiro o Plan de I+D+i para o período 2025-2027, no que está recollido a creación dunha Fundación para a atracción de talento de alto nivel investigador.

“Ademais, o modelo do BNG non achega novidades reais ao que xa existe, xa que Galicia conta cunha ampla oferta de programas de medidas para atraer e consolidar talento investigador en todas as etapas da carreira científica”, manifestou o viceportavoz popular, quen anotou que “a Fundación que propón a Xunta se presentou con dous aspectos fundamentais que non contempla a proposta nacionalista: é unha institución deseñada para captar profesionais altamente cualificados a nivel internacional e responde ás necesidades do ecosistema galego de I+D+i en áreas estratéxicas”.

Os deputados do Grupo Popular Miguel Viso, Ángel Rodríguez e Raúl Santamaría veñen de celebrar reunións coas comunidades de montes en man común de Couselo e San Mamede de Piñeiro, pertencentes ao distrito forestal Caldas-O Salnés e destacaron a importancia destas entidades na prevención e loita contra os incendios forestais.

Os deputados populares recolleron as demandas dos representantes destas comunidades de montes relacionadas coa prevención dos incendios forestais, entre as que figuran medidas dirixidas á xestión da biomasa en zonas estratéxicas e a creación e mellora das infraestruturas preventivas, como devasas, pistas forestais ou puntos de auga, entre outros.

Ademais, Miguel Viso, Ángel Rodríguez e Raúl Santamaría recoñeceron a importancia do monte veciñal na creación de emprego a nivel local a través do traballo que supón a transformación industrial dos recursos que ofrece o bosque galego. “O obxectivo non é so mellorar a explotación forestal e a da biomasa, senón compatibilizar estas accións cos outros usos, como o aproveitamento gandeiro, a produción de froitos do bosque ou a potenciación de zonas recreativas e rutas de sendeirismo que afonden no coñecemento da nosa contorna”, manifestaron.

Máis de 700.000 hectáreas da superficie de Galicia corresponden a monte veciñal en man común, xestionadas por 2.800 comunidades de montes. “Esta situación revela a importancia que esta figura ten non só como sinal de identidade e da cultura da Comunidade galega, senón tamén como un claro indicador económico e produtivo”, salientaron.

O Grupo Popular propón a aprobación no Parlamento de Galicia dunha resolución pedindo á Mesa e á Presidencia do Congreso dos Deputados que desbloquee a tramitación da proposición de lei de transferencia da AP-9 a Galicia, acordando de xeito inmediato a finalización do prazo para a presentación de emendas e permitindo que este texto avance cara ao seu debate e aprobación definitiva. O portavoz popular, Alberto Pazos, apuntou que “ademais, recollendo a proposta feita polo Goberno galego, solicitamos ao Ministerio de Transportes e Mobilidade Sostible que avalíe a oportunidade do rescate da AP-9, tendo en conta que esta decisión sería máis económica que o mantemento das bonificacións das peaxes ata o remate da concesión en 2048”.

Alberto Pazos lamentou a nova decisión adoptada esta semana pola Mesa do Congreso de prorrogar, unha vez máis, o debate sobre a transferencia da AP-9 á Comunidade galega. “E van xa 18 prórrogas do prazo de presentación de emendas desde a súa toma en consideración polo Pleno do Congreso alá polo mes de xaneiro de 2024, prórrogas que ascenden a 33 se temos en conta as que sufriu esta solicitude de transferencia desde a chegada de Pedro Sánchez á Moncloa”, concretou.

“Galicia e os galegos non podemos soportar máis tempo esta tomadura de pelo constante por parte dunha Mesa do Congreso tutelada polos socialistas, que fai caso omiso a unha demanda aprobada por unanimidade neste Parlamento e que tamén contou co voto favorable á súa tramitación no Congreso de todos os grupos parlamentarios, a excepción de VOX”, sinalou.

O portavoz popular demandou aos socialistas galegos que, “por unha vez, velen polos intereses de Galicia e alcen a súa voz ante esta nova burla e desprezo de Pedro Sánchez a todos os galegos”. Neste sentido, amosou a sorpresa porque o PSdeG opte neste momento por priorizar o rescate da AP-9, “aparcando o que ata agora foi o seu obxectivo, remarcado durante a última campaña electoral polo seu candidato: a gratuidade desta autopista”.

OPORTUNIDADE DO RESCATE

Pazos asegurou que o Grupo Popular, como xa propuxo recentemente a conselleira de Planificación de Infraestruturas nunha reunión que mantivo con usuarios da AP-9, “estamos dispostos a que o Ministerio valore a oportunidade do rescate desta autoestrada, tendo en conta que, coas novas bonificacións das peaxes anunciadas polo Goberno central, que esperamos que algún día sexan realidade, tanto as anunciadas para a AP-9 como para a A-53, o custo da indemnización polo rescate e o custo das bonificacións ata o final da concesión supoñen uns importes moi semellantes, o que debería facer reflexionar seriamente aos responsables do Ministerio sobre a posibilidade e oportunidade de proceder ao rescate a curto prazo da AP-9”.

Porén, lembrou que esta proposta de rescate dos socialistas galegos “choca frontalmente coa posición que viu defendendo o ministro Puente nas súas comparecencias públicas, chegando a cualificar esta posible solución como “ “inasubmible para o Estado” ou “tremendamente difícil e custosa”.

“Desde o Grupo Popular imos seguir defendendo os intereses de todos os galegos e o único que pedimos, tanto ao Goberno de España como aos socialistas galegos, é un pouco de seriedade respecto das peaxes da AP-9, a súa transferencia e o seu posible rescate”, manifestou o portavoz popular, quen anotou que “basta xa de que a AP-9 sexa o mellor exemplo dos constantes agravios e desprezos de Pedro Sánchez con Galicia, prexudicando seriamente a súa economía e os petos dos galegos e dos usuarios desta autoestrada”.

NOVA DEPUTADA DO GRUPO POPULAR

Alberto Pazos comezou a súa comparecencia ante os medios informando que no vindeiro Pleno tomará posesión como nova deputada do Grupo Popular Magdalena Pérez, que vén substituír a Pablo Prieto, recentemente elixido Presidente da Federación Galega de Fútbol.

Concelleira delegada de réxime interior, persoal e administración no Concello de Porto do Son, Magdalena Pérez é licenciada en Pedagoxía pola Universidade de Compostela e conta cun ciclo superior en animación sociocultural e turística, ademais dunha ampla experiencia na xestión de servizos sociais, así como na realización de actividades de tempo libre.

O Parlamento de Galicia aprobou hoxe a proposición non de lei do Grupo Popular, sen o voto favorable de BNG nin PSdeG, a través da que se reclama ao Goberno de España os fondos necesarios que permitan poñer en marcha programas específicos de emprego, a raíz do éxito dos proxectos piloto existentes na Comunidade galega.

A portavoz popular de Emprego, Noelia Pérez, lembrou que “Galicia está a afrontar retos en materia laboral, como cubrir as necesidades das empresas coas capacidades das persoas que están buscando activamente emprego, así como reter e atraer talento para seguir sumando capacidades ao noso tecido produtivo”. “E todo isto facéndoo dun xeito ordenado e poñendo un enfoque especial na mocidade”, apuntou.

PROGRAMAS INNOVADORES

Noelia Pérez referiuse aos programas innovadores orientados a conectar a formación coa realidade do mercado laboral que vén desenvolvendo a Xunta, como a estratexia Mocidade Activa, as bolsas de excelencia Mocidade Exterior, os programas Xerme ou Alento, e o proxecto Fixar, “cuxo éxito levou a que Galicia fora recoñecida como Rexión Emprendedora Europea 2025”.

“Son accións que non só buscan a xeración de emprego de calidade, senón tamén a fixación de poboación nas nosas vilas e cidades, cuxos resultados evidencian unha tendencia crecente cara o autoemprego, a aposta pola volta ao rural e a consolidación de novos modelos laborais, como os colivings”, indicou a portavoz popular.

Porén, manifestou que estas medidas e estes resultados “certifican que as políticas de emprego desenvolvidas pola Xunta van polo bo camiño, pero precisamos do apoio do Goberno de España a través dunha distribución equitativa dos fondos europeos e estatais, fundamentais para garantir que todas as comunidades autónomas poidan desenvolver programas adaptados á súa realidade socioeconómica, en especial proxectos relacionados coa xeración de emprego”.

O Parlamento de Galicia aprobou hoxe a proposición non de lei do Grupo Popular, que non contou co apoio dos deputados do BNG, a través da que se insta á Xunta a publicar un modelo de gobernanza do espazo de datos do sistema sanitario galego que permita mellorar a prestación de asistencia, investigación e innovación.

A portavoz popular de Sanidade, Encarna Amigo, salientou que o servizo galego de saúde “foi pioneiro en incorporar avances tecnolóxicos e dixitais aos seus sistemas”, como a historia clínica electrónica ou as plataformas e-Receita ou e-Saúde.

“Todos estes avances tecnolóxicos derivaron en que o SERGAS almacene na actualidade máis de 3.000 millóns de datos de saúde, o que supoñen arredor de 10 petabytes de almacenamento, unha cantidade inxente de datos en boa parte relacionados con proxectos de medicina xenómica ou procedentes de dispositivos electro-médicos, como os parches de medición de insulina ou dispositivos cardioimplantables”, concretou.

Encarna Amigo afirmou que “esta tecnoloxía vai permitir facer a medicina máis preditiva e máis personalizada”, polo que destacou o feito de “reunir nunha infraestrutura única os datos que permiten a asistencia aos máis de 2,65 millóns de galegos por parte dos máis de 40.000 profesionais sanitarios”.

“Galicia debe ser pioneira en adaptarse ao novo regulamento do espazo europeo de datos sanitarios, que faga posible aproveitar o enorme potencial que Galicia posúe no marco dos datos sanitarios para fomentar a investigación científica, desenvolver mellores tratamentos e optimizar a atención aos pacientes”, concluíu.

O Grupo Popular insistirá no Pleno da vindeira semana na solicitude ao Goberno de España para que cumpra a Lei de dependencia e salde a débeda de máis de 2.500 millóns de euros que ten con Galicia para o cofinanciamento da prestación deste servizo aos dependentes galegos.

Así mesmo, pedirá que axilice os trámites necesarios para a posta en marcha do proxecto da Biblioteca Pública do Estado en Vigo, nunha sesión plenaria na que se procederá ao debate de totalidade do proxecto de Lei para o desenvolvemento e impulso da intelixencia artificial en Galicia e comparecerá a conselleira de Vivenda para informar sobre as actuacións postas en marcha polo seu departamento neste ámbito.

Ao remate da Xunta de Portavoces, o portavoz popular, Alberto Pazos, manifestou que “somos conscientes do inxente esforzo económico e humano que precisa a atención aos dependentes, pero lamentablemente atopámonos cun Goberno de España que incumpre sistematicamente a súa obriga de cofinanciar o 50 por cento da prestación da dependencia”. En concreto, indicou que o Goberno central “achega escasamente o 30 por cento do custo da dependencia, o que supón que día a día se incremente a súa débeda coa Comunidade galega neste eido, que nestes momentos xa supera os 2.500 millóns de euros”.

PLAN DE CHOCE PARA A DEPENDENCIA

“Temos moi presente que os tempos de agarda para a dependencia son superiores aos desexados, polo que desde o Goberno galego xa decidiron poñer en marcha un plan de choque co único obxectivo de reducir os tempos de agarda ata seis meses”, sinalou o portavoz popular. Deste xeito, unha das preguntas que o Grupo Popular formulará ao Goberno galego no Pleno versa sobre as accións que está desenvolvendo para reducir os tempos de agarda da dependencia, que basicamente se centran na desburocratización, xa que só será necesario presentar a solicitude; a creación dunha vía preferente para maiores de 80 anos; a habilitación dun procedemento conxunto para a discapacidade e dependencia; ou os incentivos económicos ao persoal que realiza as valoracións.

A segunda proposición non de lei que defenderá o Grupo Popular no Pleno ten como obxectivo que o Goberno de España axilice todos os trámites necesarios para a posta en marcha do proxecto da Biblioteca Pública do Estado en Vigo. “Logo de 17 anos de espera, o Concello vigués aprobou a finais do pasado ano o Plan Especial de Infraestruturas e Dotacións que permite ceder ao Ministerio de Cultura o chan onde está prevista a construción desta Biblioteca Pública do Estado”, lembrou Alberto Pazos. En concreto, se trata de dúas parcelas, entre as rúas Lalín e A Coruña, cunha extensión de 6.578 metros cadrados.

“Estamos a falar dun paso moi importante, pero non definitivo, xa que este chan deberá ser agora cedido ao Ministerio para licitar o proxecto e posteriormente executar a obra, de cuxa xestión se encargará a Xunta, polo que está claro que o futuro da nova Biblioteca Pública do Estado en Vigo está nas mans do Goberno de Pedro Sánchez e do Concello de Vigo”, indicou,

INTELIXENCIA ARTIFICIAL ÉTICA, SEGURA E FIABLE

A sesión plenaria inclúe o debate de totalidade do proxecto de Lei para o desenvolvemento e impulso da intelixencia artificial en Galicia, “unha norma coa que Galicia será a primeira rexión europea que regula por lei o deseño, adquisición e uso desta ferramenta, tanto por parte da Administración como da sociedade en xeral”, salientou Pazos.

Así, apuntou que “o obxectivo principal é garantir unha implantación da intelixencia artificial na Comunidade galega dun xeito ético, seguro, fiable e centrado nas persoas, porque estamos convencidos de que Galicia está en condicións de liderar a nivel español e europeo a implantación das novas tecnoloxías que marcarán o futuro da humanidade”.

A orde do día do Pleno incorpora, ademais, a comparecencia da conselleira de Vivenda e Planificación de Infraestruturas, para informar sobre as actuacións postas en marcha polo seu departamento en materia de vivenda. Pazos sinalou que “estamos a falar dun dos ámbitos nos que a Xunta está a facer un esforzo moi especial, co obxectivo de que o acceso en Galicia a unha vivenda digna e a un prezo asequible non sexa un problema”.

O Goberno galego xa ten dado pasos importantes nestes últimos meses para acadar os seus obxectivos de duplicar o parque público residencial, o que supón a construción de 4.000 novas vivendas; ou o desenvolvemento de solo para posibilitar a construción doutras 25.000 vivendas: 20.000 protexidas e 5.000 libres. “Todo iso cunha especial atención a facilitar o acceso á vivenda aos mozos, a través da construción de aloxamentos temporais para alugueiro; a reserva do 40 por cento das vivendas públicas en alugueiro para menores de 36 anos e do 25 por cento das que se poñan á venda; as axudas para a compra de vivenda en municipios de menos de 20.000 habitantes; ou o recentemente coñecido Bono Emancípate”, matizou.

Por último, dentro do apartado de preguntas ao Goberno galego, o Grupo Popular interesarase sobre o estado da transferencia á Comunidade galega das competencias sobre o litoral galego e a necesaria convocatoria dunha Comisión Mixta de Transferencias para ratificar o pacto e que se traspasen canto antes os medios materiais e humanos precisos para exercer esta competencia clave para Galicia; e sobre a posibilidade de facer un Pacto pola Lingua entre todas as forzas políticas parlamentarias, logo das xuntanzas mantidas polo conselleiro con todos os grupos parlamentarios na procura dos consensos necesarios para impulsar e prestixiar o uso do galego en todos os contextos.

O portavoz do Grupo Popular, Alberto Pazos, afirmou hoxe que “solicitaremos ao Goberno central que manteña as rebaixas do IVE para a electricidade e os alimentos, medidas que foron retiradas do novo Decreto-Lei minibús, ao que sumaremos a demanda para que aplique unha rebaixa do IVE, e considere de primeira necesidade, produtos tan significativos para a economía de Galicia como a carne e o peixe”.

Alberto Pazos criticou “o novo sometemento de Pedro Sánchez á chantaxe dos independentistas cataláns, pasando dun decreto-lei omnibús a un minibús de 29 medidas”, e subliñou o apoio do Partido Popular ao novo texto que permitirá sacar adiante a revalorización das pensións, as bonificacións ao transporte ou as axudas para os afectados pola DANA de Valencia e do volcán da Palma.

BOTAR ABAIXO A INQUIOKUPACIÓN

Porén, afirmou que o apoio do PP a estas medidas non suporá que “sigamos traballando ata conseguir botar abaixo outras cuestións que figuran no novo decreto e que para nada estamos de acordo, como a posta en marcha de medidas que facilitan a inquiokupación e defenden a todos aqueles que de maneira ilegal okupan propiedade privada, ante o que seguiremos demandando actuacións que faciliten o desaloxo inmediato destes okupas”.

Ademais, o portavoz popular lamentou que o novo Real-Decreto deixe fóra a mellora do financiamento das comunidades autónomas, xa que as partidas das entregas a conta volverán a niveis de 2023 e suporá unha merma de ingresos e un atraso nos abonos desas transferencias económicas. “E iso tendo en conta ademais que ao longo do pasado ano se rexistrou un incremento dun 8 por cento na recadación de tributos por parte do Estado e que debería traducirse nunha suba de transferencias económicas ás comunidades autónomas e aos concellos”, apuntou.

Unha segunda cuestión que tamén quedou fóra deste Decreto minibús é a referida ao mantemento das rebaixas do IVE para a luz e os alimentos, “unha decisión do Goberno de Pedro Sánchez que xa se está a notar de xeito importante no peto de todos os cidadáns, a través dos recibos da luz que lles están a chegar estes días ou na súa compra diaria no supermercado”, sinalou Alberto Pazos.

REBAIXAR IMPOSTOS E MANTERA RECADACIÓN

“Desde o Grupo Popular seguimos defendendo que é posible rebaixar os impostos e manter unha recadación fiscal suficiente para prestar os mellores servizos aos cidadáns e, por este motivo, imos seguir insistindo, tanto desde Galicia como a nivel nacional, para que o Goberno de Pedro Sánchez manteña un IVE reducido para a electricidade e para os alimentos de primeira necesidade, dando continuidade ás medidas fiscais vixentes ata o pasado mes de decembro e que supoñían aforros importantes para todos os españois”, dixo.

Así mesmo, o portavoz popular engadiu que “non nos imos esquecer de recordar ao Goberno central a necesidade de que tamén aplique unha rebaixa do IVE, e considere de primeira necesidade, produtos tan significativos para a economía de Galicia como a carne e o peixe, de xeito que se estimule a súa demanda e se melloren as previsións de crecemento destes importantes sectores económicos”.

“Non entendemos como o Goberno de Pedro Sánchez mantén inalterado o IVE de produtos do mar e da carne, mentres baixou o doutros produtos alimenticios considerados de primeira necesidade, como o pan, o leite, os ovos, as legumes ou as froitas, sen esquecernos do aceite ou as pastas”, sinalou Pazos, quen anotou que “esta decisión supuxo unha evidente desvantaxe competitiva para os produtores de carne e o sector pesqueiro e marisqueiro de Galicia, e un serio prexuízo para o seu consumo”.

Por este motivo, asegurou que “desde o Grupo Popular seguiremos demandando que o Goberno central atenda esta petición de rebaixa do IVE, non só para a electricidade e os alimentos, senón tamén para os produtos da carne e do peixe, que deberían gozar dun imposto superreducido do 4 por cento, o mesmo que teñen outros alimentos básicos cento, e non do 10 por cento, co que tributan na actualidade”.

O Grupo Popular reiterou hoxe o seu apoio á declaración do 2025 como Ano Castelao, con motivo do 75 aniversario do seu pasamento, pero rexeitou recoñecer a este insigne galego como o primeiro Presidente de Galicia porque nunca foi elixido. “O recoñecemento dos méritos de Castelao non pode implicar o demérito do primeiro Presidente democrático de Galicia: un galeguista íntegro e exemplar chamado Xerardo Fernández Albor”, sinalou o portavoz popular, Alberto Pazos.

“Non debería existir dúbida algunha sobre que a figura de Castelao pertence ao pobo galego no seu conxunto, e os intentos duns poucos por denostalo ou doutros por apropiarse del minusvaloran a figura deste rianxeiro universal”, sinalou o portavoz popular. Neste sentido, apuntou que “os que renegan del por non compartir o seu pensamento político minusvaloran a capacidade do pobo galego de recoñecer a un dos seus máis aló de matices ideolóxicos, e os que se queren apropiar del o minusvaloran ao restrinxir o seu recoñecemento á escasa representación que lles deron os galegos”. “Nin Castelo nin Galicia caben nas estreituras ideolóxicas do BNG”, dixo.

O BNG IMPEDIU A DECLARACIÓN INSTITUCIONAL

Alberto Pazos asegurou que o PPdeG “comparte a conveniencia de que o Parlamento de Galicia apoie a declaración do 2025 como ano Castelao” e lembrou que “tanto é así que xa o propuxemos a través dunha declaración institucional que o BNG non aceptou”. Por este motivo, cualificou de “sorprendente que hoxe, despois de impedir esa declaración institucional, validada pola Fundación Castelao, nos pidan que apoiemos a que aprobou o Consello da Xunta, idéntica á que rexeitaron con anterioridade neste Parlamento”.

Porén, manifestou que “non podemos recoñecer a Castelao como primeiro Presidente de Galicia porque nunca foi elixido Presidente de Galicia”, porque “os galegos elixen aos seus presidentes de xeito democrático, mediante sufraxio libre e universal, e en cada ocasión na que foron consultados rexeitaron elixir a un Presidente nacionalista”. “O primeiro Presidente de Galicia foi un galeguista íntegro e exemplar chamado Xerardo Fernández Albor, ese Presidente de todos que fixo canto foi posible por recuperar os símbolos de todos, como a bandeira ou o himno galegos”, destacou o portavoz popular.

“O labor de Castelao é impagable porque acelerou o proceso autonómico ao permitirnos como nacionalidade histórica acollernos ao réxime especial previsto na disposición transitoria segunda da Constitución Española, feito de enorme relevancia que xustifica o recoñecemento como precursor do autogoberno galego que lle fixo este Parlamento”, salientou Alberto Pazos.