Categoría: Parlamento de Galicia

O Pleno do Parlamento de Galicia acordou hoxe, a través dunha iniciativa do Grupo Popular que votou en contra o BNG, manifestar o seu apoio á rebaixa do nivel de protección do lobo e, deste xeito, restablecer o equilibrio entre a preservación desta especie e as actividades gandeiras desenvolvidas no rural. Asemade, pídese ao Goberno central que apoie ás comunidades autónomas no desenvolvemento das accións oportunas e que sexan precisas para a xestión do lobo e coas que defender os intereses dos gandeiros.

O portavoz popular de Medio Ambiente, Gonzalo Trenor, afirmou que “a convivencia entre a gandería e o lobo non é unha utopía inalcanzable, e mostra disto foi que non hai tanto en Galicia era unha realidade”. Porén, apuntou que a inclusión do lobo no listado de especies silvestres en réxime de protección especial (Lespre) derivou que o número de manadas en Galicia aumentara un 37 por cento nos últimos anos e que esta especie estea presente de forma xeneralizada en todo o territorio, ao cubrir máis do 91 por cento da superficie galega, sen contar as grandes cidades e o Baixo Miño.

MAIOR ESFORZO ORZAMENTARIO

“Este incremento de manadas e a imposibilidade de adoptar medidas de control sobre a especie foron as que contribuíron a que só desde a inclusión do lobo no Lespre os avisos por danos en Galicia aumentasen un 77 por cento e o número de reses afectadas se incrementase un 57 por cento, o que supón unha media de 10 animais domésticos atacados ao día”, explicou.

Gonzalo Trenor manifestou que esta situación “provocou que a Xunta tivese que facer un maior esforzo orzamentario, tanto en axudas para paliar os danos causados polo lobo como na adopción de medidas de prevención, como a contratación de pastores, o uso de cans pastores, a instalación de valados ou pastores eléctricos”.

Pero a situación mudou coa recente aprobación no Congreso dunha rebaixa á protección do lobo ao norte do río Douro, unha iniciativa que corrixía a errada decisión adoptada polo Goberno de Pedro Sánchez en 2021 ao incluír a esta especie no Lespre de xeito unilateral e sen aval científico. “Unha decisión que se mantivo malia que a Comisión Europea e o Convenio de Berna se mostraron favorables a rebaixar a protección da especie, ao entender que se atopa nun bo estado de conservación”, lembrou.

RESTABLECER O EQUILIBRIO

“Galicia foi unha das comunidades que liderou a demanda para retirar do Lespre ao lobo, sempre da man das principais organizacións agrarias, coa pretensión de adoptar medidas de control do lobo e restablecer o equilibrio entre a protección da especie e das actividades gandeiras desenvolvidas no rural”, destacou o portavoz popular.

Para rematar, Gonzalo Trenor manifestou que “a caza do lobo vai seguir estando prohibida, con carácter xeral, pero os cambios introducidos na resolución pola que se determinan as épocas hábiles para practicar a actividade cinexética na tempada 2024-25 supoñen incluílo na relación de especies sobre as que se poden adoptar medidas de control fronte aos danos recorrentes sobre a gandería coa debida xustificación”.

O portavoz do Medio Rural do Grupo Popular, Miguel Viso, afirmou hoxe no Pleno do Parlamento galego que a Xunta está a traballar con transparencia e anticipación para promover unha resposta coordinada cos concellos e entidades privadas co obxectivo de abordar con rigor e responsabilidade a declaración de zonas vulnerables a nitratos.

Miguel Viso lembrou que “a Administración xeral é a que determina as masas de auga afectadas por nitratos, elaborando os respectivos mapas en base aos datos dos organismos de cuncas hidrográficas”. “Posteriormente, corresponde á administración autonómica é a que debería facer a declaración das zonas vulnerables das masas afectadas, que en todo caso aínda están en fase de avaliación no proceso de discriminación da compoñente agraria do conxunto de nitratos detectados”, indicou.

Diante desta situación, o portavoz popular indicou que “a Consellería do Medio Rural xa iniciou unha serie de encontros con alcaldes, asociacións profesionais, cooperativas, empresas de distribución e industria, co obxectivo de abordar con rigor e responsabilidade a cuestión da sustentabilidade ambiental da gandaría galega e as súas perspectivas de futuro”. En concreto, explicou que “nestes encontros estase a analizar a situación da concentración de nitratos nas augas como paso previo e necesario para a declaración oficial das zonas vulnerables, conforme marca a normativa estatal”.

O portavoz do Grupo Popular, Alberto Pazos, mantivo esta mañá no Parlamento de Galicia unha primeira toma de contacto con representantes dos grupos parlamentarios da oposición para concretar aspectos sobre o perfil profesional da persoa candidata á Dirección Xeral da Corporación de Servizos Audiovisuais de Galicia (CSAG), unha vez que no día de onte o Grupo Popular solicitou o inicio do procedemento para a súa elección.

Alberto Pazos trasladou a disposición do Grupo Popular de consensuar cos grupos da oposición o perfil da persoa que se faga cargo da dirección da CSAG, seguindo o mesmo espírito que mantivo durante a tramitación da recentemente aprobada Lei de servizos dos medios públicos de comunicación audiovisual de Galicia para a sociedade dixital. En concreto, Pazos avogou porque a elección desta persoa pivote sobre principios como a experiencia, o coñecemento do sector audiovisual e a súa valía profesional.

A portavoz de Sanidade do Grupo Popular, Encarna Amigo, demandou hoxe a PSdeG e BNG que sexan “serios, rigorosos e xustos” á hora de utilizar os datos oficiais e obxectivos que publica o Ministerio de Sanidade respecto ás listas de espera, que sitúan a Galicia como unha das comunidades autónomas con mellores resultados: o terceiro mellor de toda España en tempo medio de espera cirúrxica e tamén en menor porcentaxe de pacientes que agardan máis de seis meses para operarse.

“Resulta difícil de entender como o Grupo Socialista pode traer ao Pleno do Parlamento galego unha iniciativa ignorando deliberadamente os datos oficiais e obxectivos que publica o Ministerio de Sanidade”, sinalou a portavoz popular. Neste sentido, anotou que “poderían recoñecer que en Galicia se realizaron o pasado ano máis de 204.800 operacións, incrementando un 28 por cento a actividade en cirurxías de prioridade 1 e mantendo o tempos de espera por baixo dos 18 días”. Así mesmo, se atenderon máis de 4,8 millóns de consultas externas, se fixeron máis de 3,7 millóns de probas diagnósticas e se reduciu de maneira significativa o tempo medio de acceso en todos os ámbitos.

XESTIÓN E ESFORZO DOS PROFESIONAIS

Encarna Amigo afirmou que “todo isto foi posible gracias a un goberno do Partido Popular que xestiona e ao esforzo incansable dos profesionais do Servizo Galego de Saúde, traballadores que merecen todo o respecto e o recoñecemento”.

Porén, a portavoz popular lembrou que estes resultados “chegan nun contexto enormemente difícil debido á escaseza de profesionais médicos que non é exclusiva de Galicia, porque é consecuencia directa dunha planificación deficiente do Goberno central ao longo dos últimos anos ao non aumentar as prazas MIR, non adaptar a formación ás necesidades do sistema sanitario, non axilizar a homologación de títulos e non tomar decisións valentes, como permitir a prolongación voluntaria da idade de xubilación ata os 72 anos”.

“Enfronte, temos unha Xunta que está a actuar, con plans de fidelización, con incentivos nas prazas de difícil cobertura, coa aposta decidida pola cirurxía robótica, pola hospitalización a domicilio e polas vías rápidas de cancro, que permitan diagnósticos en menos de seis días”, indicou.

Para rematar, Encarna Amigo asegurou que “Galicia ten un sistema sanitario público que funciona, que mellora cada ano, e que responde da man e do compromiso e esforzo dos seus profesionais”, polo que demandou a BNG e PSdeG que “deixen de facer oposición baseada na destrución, na manipulación e na ocultación interesada de datos”.

O deputado do Grupo Popular Roberto Rodríguez afirmou hoxe no Pleno do Parlamento galego que “o que pretende conseguir o BNG coa súa proposición de lei para a inclusión de cláusulas sociais e de igualdade na contratación pública xa está lexislada e se está a cumprir por parte da Xunta de Galicia”. “O fomento deste tipo de criterios xa se favorece a través de previsións legais, que á súa vez foron obxecto de desenvolvemento posterior para mellorar a súa aplicación e implantación”, apuntou.

Roberto Rodríguez manifestou que “a posibilidade de favorecer determinadas políticas públicas a través da contratación pública e da actividade subvencionadora é unha realidade xa implantada”. Así, enumerou varias normativas existentes ao respecto, como a Lei 14/2013 de racionalización do sector público autonómico, a Lei 1/2015 de garantía de calidade dos servizos públicos e da boa administración, a Lei 1/2016 de transparencia e bo goberno ou a Lei 7/2023 para a igualdade efectiva de mulleres e homes de Galicia.

UNHA DÉCADA DE RETRASO

Ademais, a Xunta ten aprobado outras medidas de carácter non lexislativo neste eido, como a Guía para unha contratación pública socialmente responsable, o Catálogo de criterios de adxudicación para contratos de obra, o Catálogo de criterios de baremación para subvencións ou a Guía de contratación pública ecolóxica.

“Lamento que a sensibilidade sobre a responsabilidade social e sobre as cláusulas sociais lles chegue cunha década de retraso”, indicou o deputado popular referíndose á proposición de lei do BNG.

Para rematar, Roberto Rodríguez cuestionou aos nacionalistas galegos “cal é o seu modelo de contratación pública?”, ao respondeu que, “como quedou acreditado na recente comisión de investigación celebrada neste Parlamento galego, é o de Atlantic Ponte, esa consultora dirixida por persas moi próximas ao entorno da cúpula do BNG á que administracións nas que gobernan ou apoian ao goberno se lle teñen adxudicado contratos por importe de 3,6 millóns de euros, maiormente contratos a dedo”.

O portavoz de Industria do Grupo Popular, Rubén Lorenzo, criticou hoxe no Pleno “a incongruencia do BNG xa que, estando en contra dos proxectos mineiros que se presentan en Galicia, se interesen pola composición do Consello da Minaría”, ante o que lamentou que “non aproveitaran este debate para aclarar cal é o seu modelo de explotación de recursos”.

Rubén Lorenzo explicou que a composición do Consello da Minaría de Galicia foi modificado no ano 2024 co obxectivo de incluír neste órgano determinados centros da Administración autonómica ou asociacións con relación directa coa minaría e pola súa vinculación co eido económico e social. “Unicamente se incluíron na composición os organismos sectoriais competentes na tramitación de proxectos mineiros, sen prexuízo de que durante a mesma se sometan a información pública para que a cidadanía e as asociacións ecoloxistas poidan facer as achegas precisas, como viña sucedendo, e sucede, en calquera procedemento sometido a información pública”, apuntou.

“Estes cambios fixéronse escoitando aos actores implicados, con transparencia e participación, e sometendo a este Parlamento á súa aprobación”, indicou o portavoz popular, quen engadiu que os cambios “obedeceron á necesidade de dotar dunha maior practicidade e transversalidade ao Pleno do Consello da Minaría, sen prexuízo de que posteriormente poidan asistir outros membros con motivo dos grupos de traballo”.

A deputada do Grupo Popular Noelia Pérez criticou hoxe no Pleno do Parlamento galego que os socialistas “utilicen a causa nobre do colectivo LGTBI para dividir, en lugar de para construír unha sociedade máis inclusiva”. Neste sentido, lamentou que rexeitaran consensuar unha iniciativa parlamentaria para intensificar as medidas dirixidas a este colectivo, crear unha canle de denuncias sobre discriminación e acoso LGTBI ou elaborar máis guías de boas prácticas e formación en diversidade.

Noelia Pérez criticou “a incongruencia dos socialistas galegos ao apartarse da liña do feminismo do PSOE nacional, presentando unha iniciativa neste Parlamento para defender os dereitos LGTBI incluíndo a Q, a mesma letra que borraron no seu Congreso Federal de hai so catro meses”.

Neste sentido, afirmou que “pretenden instrumentalizar, unha vez máis, a loita polos dereitos das persoas LGTBI, chegando a ser incoherentes co que o Partido Socialista practica e reclamando aquí o que non fan onde gobernan”. En concreto, sinalou que piden un delegado LGTBI en cada consellería cunha titulación específica, cando “teñen 22 ministerios no seu Goberno de España e non contan en ningún deles con este delegado específico”.

POLÍTICAS ÚTILES

“As políticas útiles que serven de apoio ás persoas LGTBI non se defenden con palabras, senón con feitos”, indicou a deputada popular, quen subliñou que a Xunta “apoia e financia proxectos para visibilizar, educar, formar e previr a discriminación deste colectivo; con convocatorias públicas, campañas de sensibilización e programas educativos; e con protocolos e guías”.

Por este motivo, lamentou que os socialistas rexeitaran un acordo para que a Xunta intensifique as medidas dirixidas ao colectivo LGTBI; crear unha canle de denuncias sobre discriminación e acoso LGTBI; manter e intensificar a elaboración de guías, exemplos de boas prácticas ou cursos formativos de diversidade; elaborar ao Observatorio galego contra a discriminación por orientación sexual e identidade de xénero os informes e estudos realizados en materia de diversidade laboral LGTBI; e ofrecer formación específica sobre LGTBI ás persoas responsables de Igualdade de cada Consellería para facer seguimento das políticas transversais en materia de diversidade laboral.

O Parlamento de Galicia aprobou hoxe a proposición non de lei do Grupo Popular a través da que se demanda ao Goberno central que apoie a continuidade do diálogo de alto nivel entre a Unión Europea e Noruega en materia de pesca, realizando as xestións oportunas para a aprobación da reforma iniciada pola Comisión Europea do Regulamento 1026/2012, que permite adoptar medidas contra
aqueles países que non realizan unha pesca sostible.

A deputada popular Magdalena Pérez lembrou que “as relacións pesqueiras entre a Unión Europea e países terceiros, como é o caso de Noruega, son determinantes para garantir oportunidades económicas para as flotas comunitarias”. Neste sentido, apuntou que Noruega é un dos principais exportadores de produtos pesqueiros á Unión Europea, representando, aproximadamente, o 26 por cento das importacións de peixe no mercado europeo, polo que “a colaboración pesqueira entre ambas partes é estratéxica, non só por razóns económicas, senón tamén pola necesidade de preservar a sustentabilidade das pesqueiras no Atlántico Norte e no océano Glacial Ártico, especialmente en caladoiros clave como o de Svalbard”.

PROTEXER OS INTERESES DA FROTA EUROPEA

Magdalena Pérez lamentou as decisións unilaterais adoptadas por Noruega nos últimos anos que prexudicaron severamente á frota da Unión Europea, como a redución unilateral da cota do bacallau, o incremento nun 55 por cento da cota de xarda ou a restrición do acceso dos buques da Unión Europea ás augas do arquipélago de Svalbard. “Todas estas accións dificultan o consenso e complican as medidas conxuntas que buscan a sustentabilidade dos recursos mariños compartidos, xerando tensións coas políticas da Unión Europea no ámbito da pesca”, dixo.

Diante desta situación, a deputada popular indicou que a Unión Europea conta cun marco legal, o Regulamento 1026/2012, que establece medidas para afrontar conflitos con terceiros países que autorizan prácticas de pesca non sostibles. “En 2024, a Comisión Europea propuxo unha reforma deste regulamento para dar unha resposta máis áxil e efectiva fronte a casos como o de Noruega, protexendo así os intereses da frota europea e, particularmente, da frota galega”, recordou.

A deputada popular demandou avanzar na reforma urxente deste Regulamento europeo porque “manterse de brazos cruzados supón un risco para a sustentabilidade a longo prazo das pesqueira comprometidas; perdas económicas considerables para os pescadores europeos e, singularmente, galegos; e a diminución do peso negociador da Unión Europea fronte a terceiros países, como o Reino Unido, que observa de preto estas interaccións para os futuros acordos”.

O Parlamento de Galicia aprobou hoxe a proposición non de lei do Grupo Popular, que non contou co voto favorable de BNG nin de PSdeG, a través da que se solicita ao Goberno de España que estude a posibilidade de substituír progresivamente as bengalas ou, en todo caso, combinalas con sinais luminosos baseados en tecnoloxía LED como medida para favorecer a supervivencia en caso dunha emerxencia no mar. Así mesmo, pídese que se estude a posibilidade de sinalizar os polígonos de bateas e calquera outra instalación de acuicultura ou flotante con vértices virtuais nas cartas de navegación, de tal xeito que resulten perfectamente identificables polos plotters GPS.

A iniciativa do Grupo Popular demanda, ademais, que o Goberno central implemente formación práctica no uso de bengalas ou de calquera outro elemento co que se combinen ou substitúan, aproveitando aquelas unidades próximas á súa data de caducidade como unha maneira máis de darlle saída antes da súa destrución.

EMBARCACIÓNS DE SUPERVIVENCIA

Por último, pídese que se prohiba ou condicione a navegación, tanto profesional como deportiva, en función das previsións sobre determinadas condicións meteorolóxicas; así como instalar nos pesqueiros, de certa envergadura e en función do seu número de tripulantes, embarcacións de supervivencia ou salvamento ríxidas, reguladas pola normativa, semellantes ás empregadas nos mercantes e nas que se poida abandonar o buque en condicións de sobrevivir no mar.

O deputado popular Jesús María Fernández Rosende tivo unha lembranza para o capitán e catedrático de Navegación e Instalacións Mariñas na Universidade Laboral de A Coruña, José Manuel Costas Capelo, recentemente falecido e que colaborou intensamente na elaboración desta iniciativa parlamentaria, ao tempo que tamén agradeceu as aportacións realizadas polo profesor Vicente Yáñez.

As deputadas do Grupo Popular Noelia Pérez e Cristina Campero salientaron hoxe que a futura nova Lei de cooperativas de Galicia, que a Xunta ten previsto aprobar este ano, suporá un novo incentivo para a modernización, profesionalización e fortalecemento destas entidades.

Noelia Pérez e Cristina Campero visitaron a Sociedade Cooperativa de Explotacion Comunitaria Antelana, en Xinzo de Limia, onde foron recibidas por un dos socios fundadores desta entidade, Celso Parra, quen lles informou que neste momento están en proceso de expansión e crecemento, un paso máis no seu compromiso co desenvolvemento económico da comarca e coa creación de emprego sustentable.

Pola súa banda, as deputadas populares trasladaron que “a celebración en 2025 do Ano Internacional das Cooperativas é o mellor momento para dar un paso máis no fortalecemento do cooperativismo en Galicia, como un piar fundamental da economía galega”. “Consideramos necesario impulsar as cooperativas como unha forma de emprendemento empresarial democrática, redistributiva e socialmente sostible, incentivando ao mesmo tempo esa labor promocional e informativa nos axentes intermedios”, indicaron.

COMPROMISO DA XUNTA

Na actualidade, en Galicia existen máis de 2.000 cooperativas, que facturan máis de 3.500 millóns de euros e xeran un impacto social anual superior aos 850 millóns de euros. Ademais, estas entidades contribúen á estabilidade laboral e á inclusión social, xerando emprego para mulleres, persoas maiores de 55 anos, persoas con discapacidade ou en risco de exclusión social.

Noelia Pérez e Cristina Campero destacaron “o compromiso da Xunta co cooperativismo e a economía social, que se traduce nos case 45 millóns de euros que este ano destinará a este sector e se completa con esa nova Lei de cooperativas que ten previsto aprobar este ano da man de todos os axentes implicados, que permitirá adaptar a normativa á realidade actual do sector e do seu dinamismo, co obxectivo de axilizar a creación de novas entidades e de consolidar as existentes dándollo un pulo ao rexistro autonómico de cooperativas”.

INCONGRUENCIA DO BNG

Para rematar, as deputadas populares criticaron “a incongruencia amosada polo BNG respecto do apoio ás cooperativas galegas, xa que foron capaces, en só cinco días, de votar a favor e en contra dunha mesma proposta sobre estas entidades”. En concreto, explicaron que nas negociacións das propostas de resolución presentadas polos grupos parlamentarios no Debate de Política Xeral celebrado a pasada semana, o BNG rexeitou aceptar unha emenda do Grupo Popular, co que finalmente non resultou aprobada, que recollía literalmente o que cinco días despois apoiaron e se aprobou na Comisión 5ª do Parlamento galego.

Esta iniciativa parlamentaria instaba á Xunta a seguir impulsando a Estratexia Galega de Economía Social e a mellora da orde de apoios aos centros especiais de emprego para favorecer a inserción no mercado laboral. Ademais, pedíase avanzar nun novo marco regulador coa aprobación da nova Lei de cooperativas de Galicia neste ano 2025, co obxectivo de axilizar a creación de novas entidades e consolidar ás existentes.

“O Grupo Popular defendeu o mesmo tanto no Debate de Política Xeral como días despois na Comisión do Parlamento galego, o que da mostra da coherencia e da defensa do proxecto que defendemos e polo que traballamos, unha postura que contrasta totalmente coa incongruencia que amosou o BNG neste asunto: primeiro rexeita un acordo co Partido Popular e despois apoia esa mesma proposta sen ruborizarse nin o máis mínimo”, sinalaron.