Categoría: Parlamento de Galicia

O Pleno do Parlamento de Galicia aprobou hoxe a proposición non de lei do Grupo Popular, que non contou co apoio dos deputados do BNG, a través da que se solicita ao Goberno de España unha serie de actuacións para mellorar o estado no treito internacional do río Miño, como avaliar o cumprimento do caudal ecolóxico, desenvolver un plan de loita contra especies invasoras, promover a dragaxe sostible e controlada, harmonizar normativas e facilitar a xestión da biomasa, actualizar o regulamento de navegación, reforzar a inspección de embarcacións de pasaxeiros ou protexer estrutural e patrimonialmente as pesqueiras.

O viceportavoz popular, Julio García Comesaña, explicou que esta iniciativa parlamentaria recolle demandas realizadas por alcaldes, veciños, clubs deportivos, pescadores e empresarios turísticos “ante os problemas gravísimos que se cronificaron no treito internacional do río Miño pola desidia do Goberno de España e a conivencia dos seus socios”.

COMPROMISO DA XUNTA

En concreto, referiuse á xestión irregular do caudal ecolóxico; á proliferación de especies invasoras, que están desprazando a fauna e a flora autóctonas; a sedimentación do leito fluvial, agravada pola prohibición absoluta do dragado; a falta de harmonización normativa entre as dúas marxes do río; a obsolescencia do regulamento de navegación; o descontrol no transporte fluvial de pasaxeiros; e a necesidade de preservar as tradicionais pesqueiras.

“A Xunta leva anos demostrando o seu compromiso co Miño, pero a dimensión transfronteiriza e multisectorial dos problemas deste río esixe a implicación activa do Goberno de España, implicación que ata o día e hoxe brilla pola súa ausencia”, sinalou o viceportavoz popular. Neste sentido, asegurou que “a Xunta ten cumprido coa súa parte, con investimentos reais, coa promoción do río como recurso turístico e ambiental, e con iniciativas para a conservación do ecosistema, pero sen unha implicación do Goberno central moitas destas actuacións atopan un muro de incompetencia e silencio”.

García Comesaña pediu que o Goberno central “se sente a falar cos alcaldes do territorio e que trate ao Miño como o que é: un patrimonio natural e cultural único, un activo para o desenvolvemento rural e un exemplo de colaboración internacional”. “Estamos ante un problema real que afecta directamente á calidade de vida dos veciños e á sustentabilidade ambiental do territorio”, apuntou.

RÍO IGNORADO POLO GOBERNO CENTRAL

“Non podemos permitir que o Miño se converta nun río ignorado polas administracións, nin pola súa historia, nin pola súa riqueza ecolóxica, nin polo que representa para a identidade galega e para a cooperación entre pobos irmáns como Galicia e o norte de Portugal”, manifestou.

Para rematar, o viceportavoz popular cualificou de “oportunista” a preocupación amosada en días pasado polo BNG pola situación do río Miño, propoñendo a creación dunha autoridade única de gobernanza transfronteiriza, “unha fórmula maximalista que nin concretan, nin executan, nin defenden ante o seu socio preferente: o PSOE”. “Non deixa de chamar a atención que, mesmo nesta cuestión, o BNG evite criticar con claridade ao Goberno de Pedro Sánchez, chegando incluso a evitar o seu apoio neste Pleno a esta iniciativa aprobada polo Grupo Popular”, subliñou.

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta de Galicia a iniciar os trámites para reclamar o traspaso das competencias executivas en materia das autorizacións iniciais de traballo das persoas migrantes, de xeito que poida habilitar un proceso que reduza os prazos para obter esta documentación. “Non hai argumento técnico algún que xustifique que estas competencias se quedan en Madrid, e moito menos a día de hoxe cun Goberno central que está colapsado, desaparecido ou directamente distraído noutras cuestións máis turbias”, manifestou a portavoz popular de Emprego, Noelia Pérez.

Na súa intervención, Noelia Pérez lamentou que “un dos síntomas de que o Goberno de España está totalmente desconectado da realidade é o colapso administrativo que existe no acceso aos permisos de residencia e traballo para as persoas migrantes”, que se manifesta a través da “ausencia de reforzo dos servizos públicos e que, deste xeito, as demandas do tecido produtivo estean sen atender”.

NIN MÁIS NIN MENOS

“Mentres os socialistas están á espera a ver quen se salva ou quen máis cae nesta trama de corrupción, nós estamos a ver como cubrir vacantes laborais en sectores estratéxicos como a agricultura, a hostalería, a pesca ou a construción”, indicou a portavoz popular, quen asegurou que “hai empresas que se están vendo obrigadas a rexeitar contratos porque non atopan traballadores”.

Noelia Pérez afirmou que “Galicia non pide nin máis nin menos que o que xa se lles deu a outras comunidades, porque Cataluña ten estas competencias en materia de permisos de traballo das persoas migrantes e Euskadi tamén as terá a partir do 1 de xullo”. “E esta proposta permítenos xestionar directamente as autorizacións iniciais de traballo desde Galicia, sen colapsos, sen atrasos e sen o Goberno de Pedro Sánchez polo medio, acreditando a experiencia profesional de quen ven, deseñando formacións a medida e facendo contratacións en orixe con garantías”, anotou.

A portavoz de Sanidade do Grupo Popular, Encarna Amigo, asegurou hoxe no Pleno do Parlamento galego que o Hospital da Mariña de Burela “ten hoxe máis servizos, máis prestacións, máis especialistas e máis calidade asistencial que nunca, e iso non se podería conseguir sen coordinación e sen planificación de área”. Neste sentido, asegurou que queremos seguir mellorando a atención sanitaria nesta comarca e criticou que “se disfrace de reivindicación sanitaria o que é claramente unha estratexia política partidista, como vemos en certas plataformas ateigadas de cargos públicos e militantes do PSOE e do BNG”.

Encarna Amigo manifestou que a integración do Hospital da Mariña na área sanitaria de Lugo “non supuxo perda algunha, senón todo o contrario: gracias á área sanitaria única optimizáronse recursos, ampliáronse servizos, reforzáronse equipos multidisciplinares e garantiuse a continuidade asistencial dos pacientes desta comarca lucense”.

En concreto, salientou que o Hospital da Mariña conta desde 2010 con 154 profesionais máis traballando no centro hospitalario, o que supuxo un incremento do 28,5 por cento. “Agora mesmo, profesionais dos hospitais universitarios de Lugo, de Monforte e de A Coruña estanse a desprazar á Mariña para reforzar aqueles servizos hospitalarios que o precisan, tanto en gardas como en consultas”, indicou a portavoz popular.

MÁIS ESPECIALISTAS E MELLORAS LABORAIS

“Hoxe está a piques de resolverse un concurso que xa permitiu incorporar cinco novos especialistas ao Hospital de Burela e que servirá para cubrir 17 prazas máis”, dixo Encarna Amigo, quen incidiu que “os servizos do Hospital da Mariña non fixeron máis que verse incrementados ao longo das lexislaturas do Goberno do PPdeG, en ámbitos tan importantes como a oncohematoloxía, coa que se evitan milleiros de desprazamentos cada ano; o servizo de hospitalización a domicilio ou a resonancia magnética fixa”.

Encarna Amigo apuntou que “tamén se puxeron en marcha medidas de calado a nivel laboral para mellorar as condicións dos profesionais e facer máis atractivas as prazas deste centro hospitalario”. Así, explicou que “os profesionais que apostan por traballar na Mariña reciben unha puntuación adicional e melloras para avanzar na súa carreira profesional”.

“Gracias ás medidas adoptadas pola Xunta, hoxe temos prazas clave cubertas no Hospital da Mariña e nos centros de saúde da comarca que doutro xeito seguirían vacantes, medidas que foron posible porque se puxeron en marcha leis e convocatorias que tanto BNG como PSdeG votaron en contra”, sinalou.

Para rematar, a portavoz popular destacou que o Hospital da Mariña “tamén viu mellorada a súa infraestrutura desde 2018, a través da súa ampliación e remodelación integral con máis de 6.000 metros cadrados, novas habitacións e consultas, logo dun investimento de 20 millóns de euros, e xa se prevé un novo investimento doutros 30 millóns de euros para a mellora deste centro hospitalario”. Fronte a isto, lembrou que o Goberno bipartito de PSdeG e BNG prevía a integración do Hospital da Mariña na área sanitaria de Ferrol, que abarcaría as actuais áreas sanitarias do norte de Lugo e de Ferrol.

A portavoz de Sanidade do Grupo Popular, Encarna Amigo, afirmou hoxe no Pleno do Parlamento de Galicia que o novo Plan de saúde mental 2025-2028 incorporará a creación dunha rede de psicoloxía clínica en atención primaria e o reforzo da atención á saúde mental infanto-xuvenil, así como un incremento das prazas en centros de rehabilitación psicosocial, pisos protexidos e unidades residenciais.

Encarna Amigo lembrou que a Xunta “leva meses traballando no novo Plan de saúde mental 2025-2028 e faino cun enfoque participativo, contando cos profesionais e coas entidades implicadas”.

Entre as novidades deste novo Plan de saúde mental, a portavoz popular citou a creación dunha rede de psicoloxía clínica en atención primaria, “que comezará este mesmo ano coa contratación de 14 novos psicólogos e que aspira a contar con 35 profesionais en 2028 e 50 no 2030”.

“Así mesmo, procederase ao reforzo da atención á saúde mental infanto-xuvenil, ampliando a atención pediátrica ata os 18 anos, ata os 21 no caso de TEA, e reforzando a continuidade asistencial”, engadiu.

PLAN 2020-2024 PIONEIRO

Respecto do Plan de saúde mental post-covid 19 2020-2024, Encarna Amigo lembrou que foi unha “iniciativa pioneira, que contou cun orzamento de 83 millóns de euros e que permitiu crear 244 novas prazas de profesionais da saúde mental en catro anos, profesionais que hoxe xa están a traballar na nosa rede pública de saúde”.

“Gracias a este plan, a sanidade pública galega conta hoxe con 557 profesionais da saúde mental, case o dobre dos que había en 2009, ao tempo que se puxeron en marcha sete unidades de prevención intensiva do suicidio, unha por cada área sanitaria e que xa atenderon a máis de 1.500 persoas en situación de risco”, engadiu.

O deputado do Grupo Popular Ángel Rodríguez Conde asegurou hoxe no Pleno do Parlamento que “nunca antes o Servizo de Prevención dos incendios forestais de Galicia foi tan único, tan estable, tan profesionalizado e tan equipado”. Así mesmo, apuntou que no Plan de prevención e defensa contra os incendios forestais (Pladiga) “actualízase anualmente a listaxe e o mapa de parroquias de alta actividade incendiaria para poder establecer mecanismos máis adecuados na loita contra os incendios forestais”

Ángel Rodríguez lembrou que o Goberno galego do PPdeG “emendou a catastrófica xestión con SEAGA e integrou na xunta as brigadas que socialistas e nacionalistas crearon cando gobernaron, ao tempo que ampliou de tres a seis e de seis a nove meses o tempo de traballo do seu persoal fixo-descontinuo e completou a funcionarización de dous terzos do persoal laboral”.

“Nunca o Servizo de Prevención dos incendios forestais estivo tan profesionalizado a través dunha clara aposta pola formación teórica e práctica do seu persoal”, subliñou o deputado popular, quen tamén destacou o equipamento deste servizo “cun reforzo de medios e materiais como EPIS, vehículos de brigadas e motobombas, ou a rede de bases, que o sitúan como un dos mellores de España”.

AXUDAS PARA PREVIR DANOS

Así mesmo, dentro das medidas que se están a facer desde a Consellería do Medio Rural, o deputado popular referiuse á ampliación a 5,4 millóns de euros as axudas para previr os danos causados por incendios ou desastres naturais en montes de agrupacións forestais de xestión conxunta, como en montes veciñais en man común. En concreto, estas actuacións subvencionadas céntranse fundamentalmente no control de biomasa en áreas devasa e faixas auxiliares de pista, buscando reducir a carga de combustible presente no monte e establecer zonas con discontinuidade horizontal ou vertical.

Por outra banda, Ángel Rodríguez lembrou que os mapas de combustibles forestais “serán un dos produtos resultantes do inventario forestal continuo de Galicia, froito da integración de datos recollidos tanto en campo como a través de fontes de teledetección, permitindo caracterizar con detalle a estrutura da vexetación e a dispoñibilidade da biomasa en Galicia”.

A portavoz de Política Social do Grupo Popular, Raquel Arias, salientou hoxe no Pleno do Parlamento galego que Galicia será o vindeiro ano, unha vez máis, a comunidade autónoma coa maior taxa neta de escolarización infantil de 0 a 3 anos de toda España, ao que se engade a gratuidade destas escolas para todos os nenos e nenas.

Raquel Arias concretou que a escolarización para nenos e nenas de 0 a 3 anos acada en Galicia o 60,6 por cento, cando a media de España se sitúa no 49 por cento. “Son 20 puntos por enriba da porcentaxe de escolarización de Cataluña e o dobre que o que teñen en Asturias”, apuntou.

Ademais, lembrou que desde hai catro anos as escolas infantís son gratuítas para todos os nenos de 0 a 3 anos, “sexa cal sexa o centro ao que vaian, tanto público, como privado ou dunha entidade social”. Esta medida, que as familias poden gozar ata un máximo de 8 horas ao día durante once meses cada ano, permite un aforro de cerca de 3.000 euros por fillo cada ano.

RECURSOS DE CONCILIACIÓN EN TODOS OS CONCELLOS

“En Galicia, todos os concellos, por moi pequenos que sexan, contan cun recurso de conciliación gracias ás casas-niño, das que hai un cento repartidas por toda a xeografía galega”, indicou a portavoz popular.

Porén, Raquel Arias afirmou que “a Xunta dispón para as familias de todos estes beneficios exclusivamente cos seus orzamentos, aos que dedica cada ano 65 millóns de euros”. “Lamentablemente non conta co apoio do Goberno de Pedro Sánchez, a pesar de que xa prometera a gratuidade das escolas infantís en 2018 e de que na última Conferencia de Presidentes prometeu 175 millóns de euros para este fin”, sinalou.

Para rematar, a portavoz popular asegurou que “Galicia está executando os fondos europeos e con eles vanse crear 1.000 novas prazas de escolas infantís, en colaboración cos concellos”. “1.000 novas prazas que, desgraciadamente, non se poderán beneficiar as familias de ningún concello gobernado polo BNG porque os seus alcaldes se negaron a solicitalas”, dixo.

O portavoz do Grupo Popular, Alberto Pazos, afirmou hoxe no Pleno do Parlamento galego que a proposta dun sistema de concerto económico para Galicia que demanda o BNG supón “sacrificar o benestar e a prosperidade dos galegos para alcanzar o paraíso nacionalista dunha Galicia independente”.

Alberto Pazos lembrou que a proposta de concerto económico para Galicia “é unha alternativa carente de todo respaldo e que foi desaconsellada por todos os expertos que coinciden unánime e categoricamente en que este sistema é letal para Galicia e que suporía unha perda de recursos inasumible”.

En concreto, o portavoz popular referiuse ao recente análise realizado polo Foro Económico de Galicia, que descarta radicalmente o concerto económico por supoñer unha perda de financiamento de entre 2.128 e 2.647 millóns de euros; ao informe elaborado por Ángel de la Fuente para Fedea no que advirte, con datos de 2015, dunha perda de financiamento para Galicia de entre 1.400 e 1.600 millóns de euros; ou á práctica totalidade de expertos que compareceron na Comisión de estudo sobre o financiamento autonómico realizada neste Parlamento, que desbotaron este cupo que nos conduciría a unha gravísima insuficiencia financeira. “A pesar desta unanimidade, o BNG nos propón desoír toda a evidencia científica para embarcarnos nun experimento baseado no puro fanatismo, apoiándose na única opinión dun licenciado en económicas”, indicou.

Pazos lembrou que desde o Goberno galego e desde o Grupo Popular “levamos tempo reivindicando un novo sistema de financiamento autonómico máis xusto, máis equilibrado e que atenda mellor as nosas necesidades”. “Unha proposta, baseada nos principios de solidariedade e de igualdade entre os españois, que estableza como eixo fundamental de cálculo o custe real da prestación de servizos públicos, e que compense adecuadamente factores como o avellentamento e a dispersión, que tanto elevan ese custe”, apuntou.

Para rematar, o portavoz popular lamentou que “hoxe volvemos a debater sobre o xa debatido, porque forma parte do proceso de volta ás esencias do BNG, para quen é máis importante reivindicar a independencia de Galicia que reivindicar recursos para a dependencia dos galegos; é máis importante atender as consignas da UPG que as necesidades reais dos galegos; e é máis importante reclamar as chaves da caixa que garantir que haxa cartos dentro desa caixa”.

As deputadas do Grupo Popular Encarna Amigo e Katy Varela salientaron hoxe en Cervantes o compromiso da Xunta pola mellora dos servizos no rural e a colaboración permanente cos concellos para o acondicionamento das infraestruturas municipais.

En concreto, Encarna Amigo e Katy Varela visitaron as actuacións financiadas pola Xunta e realizadas en varias pistas das parroquias de Donis, O Pando e Cereixido do concello de Cervantes con cargo ao Plan marco de mellora de camiños municipais de acceso a parcelas agrícolas 2024-2025. Ademais, con cargo ao financiamento deste ano, levaranse a cabo novas obras de mantemento e mellora de vías municipais nas parroquias de Paderne, Folgoso, Balgos e Airoá.

“A Xunta pon a disposición dos concellos esta liña de axudas para as que os concellos unicamente deben cumprir dous requisitos principais: deberán ter remitidos ao Consello de Contas os datos do último exercicio orzamentario e estar ao día no cumprimento das súas obrigas tributarias”, explicaron as deputadas populares.

COLABORACIÓN CONSTANTE

En concreto, poderanse acoller a estas subvencións as actuacións de ampliación de viais que supoñan un incremento da lonxitude dos camiños, a mellora da seguridade viaria, o reforzo ou mantemento do firme ou a adecuación de obras de paso de cursos fluviais.

“Este tipo de axudas denotan a preocupación da Xunta por mellorar os servizos no rural e a colaboración constante cos concellos en investimentos necesarios e para os que as entidades locais moitas veces non dispoñen de recursos suficientes para levar a cabo estes arranxos”, incidiron.

Os deputados do Grupo Popular Rubén Lorenzo e Ethel Vázquez consideraron hoxe “indignante que a división existente no seo do Goberno de Pedro Sánchez estea a retrasar sine die o financiamento con 200 millóns de euros da Lei ELA, limitándose oito meses despois da súa aprobación a un plan de choque de 10 millóns de euros para as persoas que padecen esta enfermidade en idade avanzada”.

Coincidindo coa celebración do Día Mundial da Esclerose Lateral Amiotrófica (ELA), Rubén Lorenzo e Ethel Vázquez visitaron na Praza do Obradoiro de Santiago o stand que Asociación Galega de ELA instalou para visibilizar esta enfermidade e as necesidades das persoas que a padecen.

“É intolerable que o ministro de Dereitos Sociais, da rama de Sumar, dixera con todo o seu orgullo esta semana que xa remitiran ao Ministerio de Facenda, da rama do PSOE, a proposta para financiar con 200 millóns de euros o que se recolle na Lei ELA, cando os enfermos e os seus familiares levan moitos meses esperando polas axudas que se recollen nesta norma, aprobada despois de que o Goberno de Pedro Sánchez a tivera paralizada dous anos e medio no Congreso”, lamentaron.

COMPROMISO DA XUNTA

Por este motivo, os deputados populares esixiron ao Goberno de España que “cumpra coa súa responsabilidade institucional e orzamente de inmediato unha partida económica suficiente para facer realidade a Lei ELA, xa que ata o momento os enfermos máis avanzados e as súas familias só poideron acceder a unha mínima partida extraordinaria para poder facer fronte ás súas necesidades máis urxentes”.

Fronte a esta situación, salientaron o compromiso da Xunta cos enfermos de ELA e os seus familiares, que se traduce nunha partida orzamentaria anual de tres millóns de euros, que se traduce en 12.000 euros para cada enfermo, para que poidan facer fronte aos custos derivados da enfermidade, como coidados persoais, adaptación de vivendas e vehículos, fisioterapia, produtos de apoio ou alimentación asistida, entre outros.

“A este compromiso sumouse este ano a concesión pola Xunta da Medalla Castelo á Asociación Galega de Esclerose Lateral Amiotrófica, un dos máximos galardóns que concede a Comunidade galega e que vén recoñecer o compromiso, a loita e a dignidade coa que esta entidade traballa desde hai moitos anos por mellorar a vida das persoas afectadas por esta enfermidade en Galicia”, salientaron os deputados populares.

As deputadas do Grupo Popular Loli Hermelo e Patricia García anunciaron hoxe en Cangas a presentación dunha iniciativa no Parlamento galego solicitando ao Goberno de España que facilite aos tripulantes españois de buques que faenen fóra das augas españolas a posibilidade de gozar da exención tributaria existente sobre os rendementos do traballo obtidos no estranxeiro, co fin de paliar o problema de escaseza de traballadores neste sector e estimular o relevo xeracional.

Nun encontro co capitán de buque bacaladeiro José Otero, as deputadas populares lembraron que esta exención fiscal “é unha ferramenta valiosa para aqueles traballadores que realizan as súas actividades laborais no estranxeiro e desexan aproveitar os beneficios fiscais desta normativa”. En concreto, para poder beneficiarse desta exención, os traballadores deben prestar servizos para unha empresa ou entidade non residente en España, ou ben para un establecemento permanente situado no estranxeiro, ao tempo que no país onde se leva a cabo este traballo debe existir un imposto de natureza idéntica ou similar ao IRPF español.

DE 30.000 A 35.000 EUROS DE AFORRO ANUAL

“Porén, esta exención fiscal está tendo consecuencias negativas, desde fai tempo, ás empresas pesqueiras españolas con buques de bandeira española, posto que os seus tripulantes non poden desfrutar destes beneficios, mentres que si poden facelo aqueles traballadores españoles que presten os seus servizos en busques pesqueiros con bandeiras estranxeiras”, indicaron as deputadas populares.

Así, a realidade é que o tripulante que se pode acoller a esta exención fiscal goza dun aforro de entre 30.000 e 35.000 euros anuais, “o que está a orixinar un efecto chamada a embarcarse en buques con bandeira estranxeira”.

Loli Hermelo apuntou que esta situación “prodúcese ademais nun momento de escaseza de traballadores e de falta de relevo xeracional, xa que o feito de que dita exención non se aplique aos tripulantes dos buques españoles está a provocar que a
dispoñibilidade de titulados en ponte e máquina que queiran traballar en ditos buques sexa cada vez menor”.

Por iso, Patricia García concluíu sinalando que “defender a pesca galega é defender a nosa economía, o emprego e o noso patrimonio marítimo, porque este incentivo fiscal non debe ser un privilexio para uns poucos, senón un dereito efectivo para todos os tripulantes galegos e para as empresas que tributan en España, e que loitan por manter vivo un sector estratéxico para Galicia”.