Categoría: Parlamento de Galicia

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta a formalizar a colaboración en materia de protección do patrimonio cultural entre a Dirección Xeral de Patrimonio Cultural e a Dirección Xeral de Emerxencias e Interior para mellorar a protección e salvagarda do bens culturais de Galicia.

O deputado popular José Luís Ferro afirmou que “para que a colaboración entre estas dúas direccións xerais sexa máis precisa e eficaz débese formalizar e protocolizar, establecendo as actuacións da policía autonómica a prol dun eficaz cumprimento da normativa sobre protección do patrimonio cultural de Galicia derivado da lexislación galega vixente”.

“Con este instrumento poderemos garantir un axeitado coñecemento do marco legal de aplicación por todos os implicados e incrementar a calidade na prestación deste servizo público, que ambas unidades directivas consideran de especial preocupación e sensibilidade”, indicou Ferro.

AMPLA COLABORACIÓN

En concreto, apuntou que as actuacións de colaboración poderían abarcar desde a vixilancia e control dos bens de patrimonio cultural e do seu ámbito de protección; ata indentificación dos presuntos responsables das actuacións irregulares; así como as pescudas para reunir probas e información; apoio policial na paralización de obras ilegais; colaboración nos casos de emerxencia; control dos rexistros obrigatorios para as entidades dedicadas ao comercio de bens do patrimonio cultural; ou a vixilancia das actuacións realizadas nos ámbitos de protección dos Camiños de Santiago.

Para o desenvolvemento de todas estas actividades, o deputado popular indicou que a Dirección Xeral de Patrimonio “poñerá a disposición da Policía Autonómica o inventario de bens integrantes do patrimonio cultural de Galicia”, ao tempo que a colaboración tamén implicará o asesoramento técnico e xurídico necesarios para facer unha mellor planificación e coordinación das actividades entre os responsables da Dirección Xeral de Patrimonio Cultural e os da Policía Autonómica, establecéndose así unhas canles áxiles e continuas de comunicación.

O Parlamento de Galicia aprobou hoxe a proposición non de lei do Grupo Popular, que non contou co apoio de PSdeG e Grupo Mixto, a través da que se solicita ao Goberno de España que tome as medidas necesarias para asegurar a continuidade na asistencia sanitaria a todo o colectivo docente adscrito a MUFACE. “Vemos como BNG e PSdeG usan moitas veces ao profesorado de parapeto aos seus intereses partidistas, pero á hora da verdade esquecen a este colectivo, como está a acontecer nesta ocasión coa posible desaparición desta mutualidade”, sinalou a deputada popular Felisa Rodríguez.

O pasado 5 de novembro coñeceuse que a licitación do concerto para prestar asistencia sanitaria no ámbito de MUFACE quedara deserto debido a un infrafinanciamento e unhas coberturas máis esixentes das que presta o propio Sistema Nacional de Saúde nalgúns aspectos. “A día de hoxe, a incerteza segue a ser absoluta, tanto para os 1,5 millóns de funcionarios e familiares que reciben cobertura sanitaria en España, como para calquera cidadán que entende que a falta de planificación do Goberno central pode prexudicar ao sistema de sanidade público”, indicou Felisa Rodríguez.

GOBERNO CENTRAL DIVIDIDO

“O Goberno de Pedro Sánchez continúa dividido, porque mentres desde o Ministerio de Función Pública confían en que con este proceso MUFACE seguirá existindo, desde Sanidade xa estudan as formas para que os mutualistas poidan incorporarse á sanidade pública, cumprindo o plan da propia ministra de desmantelar unha mutualidade que leva moito tempo funcionando correctamente”, explicou.

A deputada popular engadiu que “o Goberno central parece esquecer as súas responsabilidades e non é consciente de que a desaparición de MUFACE tería un notable impacto na asistencia sanitaria pública, pois só en Galicia tería que absorber máis de 60.000 adscritos, dos que arredor de 40.000 proceden do ámbito do sector educativo”.

“Esta situación, sumada ao déficit de médicos causado tamén pola rixidez nas directrices formativas do Ministerio, incrementaría os tempos medios de espera para os pacientes, tanto en cirurxías como en consultas, ademais de que produciría unha discontinuidade asistencial, pois os pacientes deixarían de estar atendidos polo seu médico de toda a vida”, manifestou a deputada popular.

Outra consecuencia negativa da desaparición de MUFACE sería a desconexión da historia clínica dos pacientes, pois o sistema IANUS de historia clínica da sanidade pública galega non conta cos datos da sanidade privada.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que intensifique as accións diplomáticas ante a Unión Europea para reclamar a inclusión de Vigo como porto nodal na Rede Transeuropea de Transportes (TEN-T), así como requirir á Comisión Europea unha revisión inmediata do regulamento vixente, solicitando o establecemento de criterios obxectivos que non se limiten ao número de toneladas e que demostren a importancia estratéxica, económica, loxística e sostible do porto vigués, así como de outros portos europeos de similares características.

A deputada popular Patricia García destacou que o porto de Vigo é na actualidade “un símbolo de innovación e sostibilidade no sector marítimo a consecuencia do seu liderado no tráfico de pesca, a súa posición como unha das principais terminais de automóbiles do Atlántico e a súa implicación en proxectos internacionais como Portos Azuis, impulsado pola FAO”.

En concreto, lembrou que o 75 por cento das mercadorías que entraron ou saíron de Galicia por vía marítima en 2023 fixérono a través do porto de Vigo, o que supuxo un aumento do 28,5 por cento respecto a 2022. Ademais, o valor total do comercio exterior deste porto situouse nos 16.897 millóns de euros, máis do 33 por cento do comercio exterior de Galicia.

Porén, Patricia García manifestou que “a decisión da Unión Europea de non incluír a Vigo como porto nodal na Rede Transeuropea de Transportes ten graves consecuencias, como que perde acceso a fondos europeos que permitirían mellorar as súas infraestruturas e adaptarse aos retos da sustentabilidade; dificúltase que compita en igualdade de condicións con outros portos europeos o que impacta negativamente na súa competitividade; Galicia queda máis afastada das principais rutas loxísticas internacionais, limitando o desenvolvemento de sectores clave mencionados; e esta exclusión perpetúa o abandono histórico cara ao noroeste peninsular, contradicindo os principios de cohesión económica e territorial promovidos pola Unión Europea”.

ESTRATEXIA AMPLA E COORDINADA

Para abordar a exclusión do porto de Vigo da rede e garantir a súa inclusión na próxima revisión, a deputada popular considerou “esencial deseñar e executar unha estratexia ampla e coordinada que inclúa medidas políticas, técnicas e diplomáticas”. Así, en primeiro lugar demandou “solicitar á Comisión Europea e aos Estados membros unha revisión dos criterios establecidos no Regulamento europeo 2024/1679, substituíndo a exclusividade do criterio baseado no volume de mercadorías por un enfoque máis holístico que inclúa o valor económico das mercadorías manexadas, a importancia estratéxica do porto nas conexións intercontinentais, a contribución á cohesión económica e territorial das rexións periféricas e a sustentabilidade ambiental e a adaptación ás políticas de transición ecolóxica da UE”.

En segundo lugar, demandou a implantación de novos indicadores clave para valorar os portos, como a súa capacidade de liderado en sectores específicos e a súa posición nas cadeas globais de subministración, así como elaborar unha proposta técnica baseada en estudos que destaquen o porto de Vigo como motor económico de Galicia, España e Europa, resaltando o seu impacto no comercio marítimo europeo e nos obxectivos climáticos da UE.

“E por último, o Goberno Central debe intensificar as negociacións coa Comisión Europea defendendo o porto de Vigo como unha infraestrutura de interese nacional e europeo”, dixo a deputada popular, quen considerou “imprescindible que o Goberno de España incorpore Vigo como prioridade nas súas axendas internacionais”.

O Parlamento de Galicia aprobou hoxe por unanimidade a proposición non de lei do Grupo Popular a través da que se insta ao Goberno de España a demandar no ámbito europeo a revisión dos criterios de reparto das cotas de Gran Sol, priorizando unha distribución máis equitativa; e apostar por melloras nos sistemas de avaliación científica, incorporando datos máis precisos sobre os stocks de pesqueiras en zonas como o Atlántico Norte, baseándose en índices que reflictan as condicións reais das augas galegas.

O portavoz popular do Mar, Miguel Fidalgo, considerou lamentable que, “unha vez máis, o Goberno de España non conseguiu, na reunión do Consello de Ministros de Pesca da Unión Europea celebrada a comezos do pasado mes de decembro, reducir os recortes que se expuñan para varias especies, entre elas e especialmente a pescada, o xurel ou a xarda”.

MELLORA DAS POSIBILIDADES DE PESCA

“O Goberno de España nin fixo ben o seu traballo nin negociou correctamente a repartición de cotas do Gran Sol”, criticou Miguel Fidalgo, quen asegurou “non entender os golpes de peito cando o acordo acadado co Reino Unido supón unha gran baixada na pescada do caladoiro do Atlántico Norte, o que repercutirá nunha perda de ingresos para a economía galega de 54 millóns de euros”.

Fidalgo insistiu que “defender a mellora das posibilidades de pesca ten que ser a principal obriga do Goberno de España alí onde se negocie, porque pescar máis e pescar mellor é compatible cos obxectivos da Política Pesqueira Común: garantir a sustentabilidade da pesca desde o punto de vista ambiental, económico e social”.

Ademais, apuntou que “as decisións comunitarias deben adaptarse á realidade das rexións pesqueiras e, por iso, desde o PPdeG esiximos un compromiso firme por parte do Estado español na defensa dos intereses do sector pesqueiro galego”.

O Grupo Popular demandará ao Goberno central no Pleno do Parlamento de Galicia da vindeira semana, ademais de insistir na transferencia da AP-9 á Comunidade galega, que libere a peaxe do tramo Vigo-Porriño desta autoestrada para mellorar a seguridade da A-55 e propoña novas alternativas ao novo trazado proposto da autovía das Rías Baixas pola grave afección que esta iniciativa provoca en parroquias de Vigo e Mos. Así mesmo, pedirá á Xunta e ao Goberno de España medidas orientadas á repotenciación de parques eólicos antigos que supoñan una mellora medioambiental e garantan un uso eficiente dos recursos.

Ao remate da Xunta de Portavoces, o portavoz popular, Alberto Pazos, informou que este primeiro pleno do novo período de sesións dará comezo co debate de totalidade do proxecto de Lei de servizos dos medios públicos de comunicación audiovisual de Galicia para a sociedade dixital, “unha nova lei que vai permitir dar un paso adiante no intenso labor que vén desenvolvendo a Corporación de Radio e Televisión de Galicia, que pasará a chamarse Corporación de Servizos Audiovisuais de Galicia, na promoción, difusión e impulso da lingua galega”.

Pazos apuntou que o novo texto legal “adapta a lexislación da CRTVG á sociedade actual, apostando pola alfabetización mediática e dixital para promover o bo uso da tecnoloxía e recoñecer as novas falsas, ao tempo que vela pola utilización responsable da intelixencia artificial”. Ademais, incorpora a normativa para a elección tanto do Consello de Administración da Compañía como do seu director xeral, “buscando, en todo momento, evitar situacións de interinidade indefinida na Dirección da Corporación, como a que estamos a vivir na actualidade, recoñecendo o excelente traballo que están a desenvolver os xestores actuais”.

De seguido, a sesión plenaria procederá ao debate do ditame da Comisión de Investigación sobre a contratación pública na Administración autonómica, que “serviu para demostrar a xestión exemplar que levou a cabo o Goberno galego para dotar a Vigo dun dos mellores hospitais públicos de España e Europa, e demostrar que toda a contratación pública da Xunta levouse e lévase a cabo con total transparencia e seguindo estritamente a normativa vixente”, asegurou Alberto Pazos.

O portavoz popular lembrou que a Comisión de Investigación “deixou claro, logo das comparecencias dos dous conselleiros maiores do Consello de Contas, que non existiu sobrecusto algún na construción do Hospital Público Álvaro Cunqueiro, constatándose, ademais, que a opción levada a cabo para facelo realidade era a única posible naquel momento, conseguindo poñelo en marcha nun tempo récord para beneficio de todos os cidadáns de Vigo e a súa contorna”.

A continuación, a sesión plenaria acollerá a comparecencia do conselleiro de Emprego, Comercio e Emigración para explicar as liñas mestras do seu departamento na procura de man de obra cualificada para a cobertura de vacantes en sectores estratéxicos de Galicia.

BENEFICIOS DA REPOTENCIACIÓN

Dentro do apartado de proposicións non de lei, o Grupo Popular demandará á Xunta, e tamén aos proxectos que dependan da autorización do Goberno central, a adopción de medidas, especialmente as orientadas á repotenciación de parques eólicos, que supoñan unha mellora ambiental, ao mesmo tempo que garanten un uso eficiente dos recursos existentes na Comunidade galega.

“A repotenciación inclúe beneficios adicionais, como a conexión á rede existente, un grao de aceptación pública probablemente máis elevado e o coñecemento do impacto ambiental que, en principio, é menor, ao reducirse o número de aeroxeradores dun xeito moi significativo” concretou o portavoz popular.

A segunda proposición non de lei ten que ver coa transferencia e a rebaixa de peaxes das autoestradas estatais, ampliado nesta ocasión con demandas de modificación a proxectos anunciados desde o Goberno de España para a comarca de Vigo.

En concreto, en primeiro lugar, pídese, unha vez máis, que o Goberno de España proceda á transferencia da titularidade da AP-9 nos termos aprobados por unanimidade neste Parlamento galego, ao tempo que se inicien, con carácter inmediato, negociacións coa concesionaria desta autoestrada a fin de que se proceda a liberar de peaxe o tramo Vigo-Porriño, para abordar de xeito urxente os problemas de seguridade da A-55, por ser a solución máis rápida, inmediata e economicamente mais viable ao problema da sinistralidade nesta vía.

“Unha segunda cuestión que demandamos é que, con carácter urxente, o Goberno de Pedro Sánchez propoña novas alternativas ao novo trazado proposto da autovía das Rias Baixas pola grave afección que provoca a parroquias de Vigo, como Bembrive; e de Mos, como Sanguiñeda, Petelos, Pereiras e Tameiga”, sinalou Alberto Pazos.

PROCEDER INEXPLICABLE

Neste sentido, cualificou de “inexplicable o modo de proceder do Goberno de Pedro Sánchez, que, pese ao forte impacto no seu territorio, fixo partícipe ao Concello de Vigo da definición da alternativa proposta pero non tivo ningún tipo de comunicación previa a este trámite cos demais concellos afectados, nomeadamente o Concello de Mos, que adaptou o seu Plan Xeral ao trazado marcado polo Ministerio de Fomento no ano 2015”

Por este motivo, tamén se esixe ao Goberno de España a inmediata apertura dun período de interlocución, institucional e técnica con todos os concellos afectados para definir a actuación nesta autovía, de modo que sexa respectuosa co territorio, socialmente viable e supoña unha infraestrutura axeitada e segura para a mobilidade da zona.

A primeira das preguntas que o Grupo Popular formulará ao Goberno galego tamén está relacionada coa situación das autoestradas de titularidade estatal, xa que pide a súa valoración sobre a suba de peaxes que se viviu a comezos desde ano 2025 nestas autoestradas, manténdoas como as máis caras de España. “Sen esquecernos de que os usuarios da AP-53 continúan, a día de hoxe, sen gozar de descontos nas peaxes, a pesar do anuncio feito polo Goberno central para estender a esta autoestrada as bonificacións coas que conta a AP-9”, dixo o portavoz popular.

A segunda das preguntas do Grupo Popular ten como obxectivo coñecer as melloras que está a incorporar no programa galego de cribado neonatal, mentres que a terceira versa sobre as liñas básicas do plan integral de actuación para a renovación e impulso dos centros de información á muller, logo de que neste ano 2025 a Xunta incrementara o apoio anual a estes centros en máis dun 30 por cento, superando os 6,5 millóns de euros de dotación económica.

O portavoz do Grupo Popular, Alberto Pazos, pediu hoxe a BNG e PSdeG que “abandonen as súas demagóxicas posturas contrarias a todo o que teña que ver co Goberno da Xunta ou do Partido Popular e acepten a man tendida que lles ofrecemos” para apoiar e mellorar propostas que supoñan beneficios para todos os galegos nestes próximos meses, como a consecución de novas transferencias a Galicia, a negociación dun novo modelo de financiamento autonómico ou o impulso de novos proxectos empresariais que conleven creación de postos de traballo e riqueza para Galicia”.

Alberto Pazos comezou a súa comparecencia ante os medios “trasladando, no nome propio e no do conxunto dos deputados que formamos parte do Grupo Popular, o noso máis sincero pésame á familia e amigos do ex-conselleiro e ex-deputado Jesús Pérez Varela, a quen todos lembraremos polo seu traballo a fronte da comunicación da Xunta nos gobernos de Manuel Fraga e o impulso que deu á cultura e ao audiovisual de Galicia o seu paso como conselleiro do ramo”.

“Nestas primeiras datas do novo período de sesións, quero reiterar a solicitude aos grupos da oposición para que muden a súa actitude negacionista e contraria a todo o que estea relacionado co Partido Popular, e acepten a nosa man tendida para avanzar conxuntamente en todos aqueles proxectos que supoñan beneficios para todos os galegos”, incidiu Pazos

Porén, lamentou que tanto BNG como PSdeG “manteñan a súa negativa a sumarse a calquera iniciativa ou proposta que veña ou na que participe o Goberno da Xunta ou o Partido Popular”. En concreto, o portavoz popular lembrou a contraprogramación feita polos nacionalistas galegos ao acto de homenaxe celebrado o pasado 7 de xaneiro, organizado pola Fundación Castelao, con motivo do 75 aniversario do pasamento do escritor. “Unha mostra máis do empeño dos nacionalistas por apropiarse da figura de Castelao e non aceptar que todos os galegos o consideremos unha figura senlleira da nosa cultura e da nosa lingua, que pertence a todos nós e non é patrimonio de ninguén”, sinalou.

SITUACIÓN DO GALEGO

Alberto Pazos tamén lamentou “as voltas que lle están dando os nacionalistas á súa participación no Pacto pola Lingua proposto directamente polo conselleiro de Cultura, chegando incluso a propoñer a creación dunha mesa de traballo, á marxe deste Pacto, para a posta en marcha de medias no ámbito da educación”. Así, recoñeceu que “somos plenamente conscientes da situación que está a vivir a nosa lingua, e por iso pensamos que é moi oportuna a iniciativa da Consellería de sentarnos a todos e valorar distintas propostas para reverter esta situación”.

“Pero tamén somos conscientes de que a situación do galego non é tan inmensamente alarmante como queren facer ver os nacionalistas galegos, porque, se lles fixéramos caso ás súas agoreiras previsións, o galego xa hai moitos anos que tería desaparecido”, indicou Alberto Pazos. Neste sentido, apuntou que “levamos varias décadas escoitando que cada día que pasa a nosa lingua se fala menos, cando a conclusión á que chegan todos os estudos é que o galego conta co nivel competencial máis elevado entre todas as linguas cooficiais que se falan en España”.

“Esta situación real do galego, lonxe do apocalipsis que queren facer ver os nacionalistas, non nos debe servir de escusa para adoptar medidas que fomenten a práctica e o prestixio do galego, sobre todo entre a xente máis nova, para o que é fundamental que nos poñamos todos a traballar e, baixo o paraugas do Pacto pola Lingua e das distintas comisións postas xa en marcha, fagamos as nosas aportacións polo ben e o futuro da nosa lingua”, manifestou.

Relacionado coa aprendizaxe de idiomas, Alberto Pazos felicitou ao Goberno galego “polo traballo que está a facer na extensión do inglés entre os nosos estudantes e, por extensión, entre a sociedade galega”, logo de que o máis amplo estudo a nivel internacional realizado por Education Fisrt situara a Galicia como líder de España en inglés.

PROPOSTAS QUE SUPOÑAN BENEFICIOS

Tamén coa perspectiva do traballo parlamentario dos vindeiros meses, o portavoz popular pediu a BNG e PSdeG que “recapaciten e centren os seus esforzos nas propostas que realmente supoñan beneficios para os galegos”. En concreto, citou como iniciativas a abordar a Comisión para a posible reforma da letra do himno de Galicia; a solicitude de novas transferencias para ampliar o autogoberno de Galicia, tanto en materia de meteoroloxía, como nos medios para exercer as competencias sobre o litoral; ou o traspaso da AP-9.

“Sen esquecernos da necesaria negociación para a posta en marcha dun novo sistema de financiamento autonómico, onde nos atopamos moi alonxados da proposta de cupo que manexa o BNG e que, como aseguran a práctica totalidade dos expertos na materia, sería extremadamente prexudicial para os intereses de Galicia; ou tamén do apoio a todas aquelas iniciativas empresariais que conleven a creación de postos de traballo e riqueza para Galicia, especialmente naquelas zonas que despuntan pola súa escasa presencia industrial”, rematou.

O Partido Popular da provincia da Coruña reclamou aos rexedores dos concellos de Arzúa, Melide e Santiso que deixen de “facer demagoxia” con Altri e coa mina de Touro. Nunha reunión na que participou o deputado autonómico voceiro de Industria, Rubén Lorenzo, e os responsables populares nos municipios de Arzúa, Melide e Santiso, Rafael Rivadulla, Dalia García, Víctor Pereiro, o concelleiro de Palas de Rei, José Ramón García, e o alcalde de Monterroso, Eloy Pérez, os populares cargaron contra aqueles que “tratan de intoxicar” á cidadanía con declaracións que, na súa opinión, están moi lonxe da realidade.

“A xente ten que estar tranquila. Estamos a falar dun proceso totalmente regulado sobre a instalación dunha empresa que ten que cumprir uns requisitos”, din os populares.

Neste sentido, desde o PP móstranse “moi sorprendidos e preocupados” despois de escoitar como os rexedores destes municipios instan á Xunta de Galicia a prevaricar. “Pedir a unha administración que non siga os trámites correspondentes é pedirlle que prevarique. Estamos a falar dun asunto moi grave”, indicaron.

Os populares aproveitaron tamén para subliñar que “todo ten os seus prazos”, en referencia a que a Xunta de Galicia está á espera de recibir toda a documentación para levar a cabo a declaración de impacto ambiental correspondente. “As cousas levan o seu tempo. Estamos ante un proxecto complexo é necesario recibir toda a documentación, darlle a oportunidade á empresa a que faga as alegacións correspondentes e logo tomarase unha decisión”, afirmaron.

MIRAR POLO BEN COMÚN

Á espera de coñecer os informes e de saber se a empresa cumpre ou non coas esixencias legais, os populares lamentaron que os alcaldes de Arzúa, Melide e Santiso estean máis ocupados de “defender as súas cores política” que de analizar en profundidade a necesidade de dotar á comarca de proxectos industriais que permitan consolidar á poboación que vive na zona e, de paso, converter á comarca nun “motor económico” que logre atraer a máis xente.

“Espero que na súa xestión diaria cumpran a lei, de non ser así, augúrolles moitos problemas na súa labor como alcaldes, pero o que creo que non lle perdoarán os seus veciños é o feito de que, por defender intereses partidistas, poidan prexudicar o futuro económico e social da comarca”, concluíron.

O Parlamento de Galicia aprobou hoxe por unanimidade a proposición non de lei do Grupo Popular a través da que se reitera ao Goberno de España que habilite os procedementos necesarios para que as empresas que desexen poidan patrocinar actividades turísticas ao abeiro do Xacobeo 2027. Neste sentido, portavoz popular de Turismo, Borja Verea, pediu explicacións ao PSdeG pola negativa do Goberno de Pedro Sánchez a admitir a trámite esta proposta nas Cortes Xerais.

Borja Verea lembrou que “xa é a terceira vez que debatemos esta iniciativa no Parlamento de Galicia” e agradeceu aos grupos da oposición “a unanimidade no apoio a esta solicitude, porque iso representa unha mensaxe conxunta que se envía ao Goberno do Partido Socialista en Madrid, pero agora queda se traduza en efectos prácticos para que as empresas interesadas poidan comezar a colaborar coa organización do vindeiro Xacobeo 2027”.

OUTRAS VÍAS Á MARXE DOS ORZAMENTOS

Porén, o portavoz popular manifestou que este debate “tamén é unha oportunidade para que os deputados socialistas aquí presentes nos expliquen por que desde o Goberno central non se procede a activar esta declaración do vindeiro Xacobeo como
Acontecemento de Excepcional Interese Público, logo de que esta proposta fora rexeitada polos socialistas nas Cortes Xerais”.

“Esta proposta debería vir recollida nos orzamentos do Estado para o presente ano, pero, polo que se ve, o Partido Socialista non ten capacidade para tramitar estes presupostos”, lamentou Borja Verea, quen explicou que “de ter interese en conceder esta declaración, o Goberno de Pedro Sánchez pode activalo a través de calquera outro instrumento legal”.

Verea lembrou que o pasado Xacobeo 2021-22 contou coa colaboración de arredor de 40 empresas, que fixeron aportacións a través destes beneficios fiscais de máis de 28 millóns de euros.

O Parlamento de Galicia aprobou hoxe, co voto en contra de BNG e PSdeG, unha proposición non de lei do Grupo Popular a través da que se insta á Xunta a comprometerse con todas aquelas medidas favorables ao binomio industria e enerxía xerada nos territorios e, en particular, con todas aquelas que esixan aos promotores dos proxectos vender unha parte da enerxía xerada ás empresas da contorna, unha demanda que tamén se fará ao Goberno de España.

O portavoz popular de Industria, Rubén Lorenzo, lembrou que en Galicia “xa se teñen impulsado medidas lexislativas dirixidas a promover a sinatura de contratos de compravenda de enerxía a longo prazo e a un prezo competitivo (PPA) que permitan ás empresas galegas optar a un prezo enerxético estable e predicible, e así contar con certa estabilidade”.

NOVO PLAN SECTORIAL EÓLICO

“En concreto, a través do outorgamento dunha figura de axilización administrativa que comporta prioridade no despacho e redución de prazos á metade na emisión de informes, promoveuse a sinatura deste tipo de contratos a favor da industria galega”, indicou Rubén Lorenzo, quen puxo como exemplo do resultado desta medida os acordos acadados por Alcoa con Enel ou Greenalia; Cortizo con Iberdrola; Leite Celta e Magnesitas do Rubián polo parque eólico de Castro Valente; ou Ferroglobe con Adelanta.

Así mesmo, a través da Lei de promoción dos beneficios sociais e económicos dos proxectos que utilizan os recursos naturais de Galicia, aprobada o pasado ano, promoveuse a sinatura deste tipo de contratos.

Rubén Lorenzo engadiu que a evolución tecnolóxica do sector e o tempo transcorrido desde as últimas modificacións do Plan Sectorial Eólico motivou que desde o Goberno galego se optara pola tramitación dun novo Plan Sectorial, que permitirá facilitar o binomio enerxía-industria, achegando as infraestruturas enerxéticas ás zonas empresariais; ofrecer máis potencia en menos superficie; reducir o impacto das infraestruturas enerxéticas; e dar unha maior seguridade xurídica.

Para rematar, o portavoz popular salientou “a importancia que ten nestes momentos poñer no centro o binomio industria e enerxía, para o que compre promover eses contratos de compravenda de enerxía de forma xenérica, porque é de vital importancia contar cun prezo enerxético competitivo e estable ao longo prazo para as empresas ao efecto de que sexan viables e máis competitivas coas que se localizan noutros territorios”.

O portavoz de Infraestruturas do Grupo Popular, Roberto Rodríguez, asegurou hoxe no Parlamento galego, nun debate sobre a gratuidade da autovía AG-55 entre A Coruña e Carballo, que “o PPdeG nunca se comprometeu á gratuidade das autoestradas autonómicas, pero tampouco o descarta no momento que existan recursos económicos para levalo adiante, do mesmo xeito que se fixo recentemente coas catro autovías con peaxes na sombra rescatadas”.

Roberto Rodríguez salientou que as autoestradas de titularidade autonómica “son as máis baratas de España gracias ás bonificacións establecidas pola Xunta” e criticou a BNG e PSdeG por “querer desviar a atención cunha iniciativa sobre a peaxe na AG-55 para non falar da estafa aos galegos que foi a súa promesa dunha AP-9 galega e libre de peaxe, mentres en Madrid tragan con prórroga tras prórroga na tramitación da Lei de transferencia de titularidade desta autoestrada a Galicia”.

Na súa intervención, o portavoz popular lamentou que “Galicia sexamos líderes nacionais en quilómetros de autoestradas de pago: temos 334 quilómetros, dos que 273 son de titularidade estatal, que lle custan aos galegos máis de 155 millóns de euros anuais fronte aos pouco máis de 11 millóns de euros que os usuarios pagan polas autoestradas de titularidade autonómica”.