Categoría: Parlamento de Galicia

O portavoz do Grupo Popular na Comisión de Investigación sobre a contratación pública da Administración autonómica, Roberto Rodríguez, asegurou, logo da comparecencia esta mañá do conselleiro maior do Consello de Contas, que “non hai caso” ao incidir, do mesmo xeito que se recolle no propio informe da entidade, que a alternativa da licitación separada da obra e dos servizos do Hospital Público Álvaro Cunqueiro “era imposible e esixiría a renuncia da Administración á execución de gasto corrente ou doutros investimentos para cumprir co obxectivo de déficit para os efectos de estabilidade orzamentaria”.

Roberto Rodríguez felicitouse porque a oposición “recoñeza xa publicamente que non houbo sobrecusto na construción do Hospital Público Álvaro Cunqueiro”, unha cuestión sobre a que tamén se pronunciou o propio conselleiro maior e confirmou que “as únicas referencias do Consello de Contas ao sobrecusto son para evidenciar que non se produciu ou para indicar que entraba no risco da adxudicataria”.

ALTERNATIVA SÓ NUN ESCENARIO ÓPTIMO

“Comparecentes como o señor Menéndez, a señora Mosquera ou a señora Currás xa afirmaron categoricamente nesta Comisión que esa alternativa da licitación separada, da obra por un lado e dos servizos por outro, non era posible, pois calquera modelo de financiamento que supuxera que o investimento computara como débeda da Comunidade galega, a efectos de estabilidade financeira, era imposible por dúas razóns: porque non tería sido autorizada polo Goberno do Estado e porque, no caso de selo, as condicións de financiamento serían inalcanzables ou inasubmibles á vista da liquidación negativa de 2.500 millóns de euros herdada do Goberno bipartito e polas condicións do mercado existentes nos anos 2010 e 2011”, indicou. Neste sentido, o conselleiro maior concretou que este modelo de construción por separado só podería ser unha alternativa “nun escenario óptimo, que non era o caso”.

Respecto da superficie construída do Hospital Público Álvaro Cunqueiro, Roberto Rodríguez asegurou que “non hai tal redución pese á modificación do plan funcional” e explicou que o informe do Consello de Contas unicamente ten en conta a superficie útil hospitalaria, sen ter en conta os 22.600 metros cadrados da quinta planta que alberga todas as instalacións do edificio que de estar distribuídas polo edificio como estaban no proxecto básico, terían sido computadas”.

CONTRATACIÓNS DE EMERXENCIA AUDITADAS

Sobre as contratacións de emerxencia realizadas pola Xunta durante a pandemia, o portavoz popular lembrou que estas actuacións “foron auditadas polo Consello de Contas e tamén fiscalizada polo Goberno de España”. Ademais, confirmou que todos os expedientes tramitados de emerxencia polo SERGAS tiveron a necesaria xustificación do carácter de emerxencia, sen formular reparos de legalidade e incluso poñendo de manifesto que a mecánica seguida era plenamente xustificable debido á situación de anormalidade á que había que facer fronte”.

Por último, Roberto Rodríguez salientou que o conselleiro maior asegurou que, “de ter constatado o Consello de Contas calquera indicio que implicara a existencia de responsabilidades contables, que puidera constituír ilícitos penais ou que supuxera responsabilidades de calquera outra natureza, terían posto estes feitos en coñecemento da Fiscalía do Tribunal de Contas ou da Fiscalía de Galicia, con quen ten asinados convenios de colaboración e intercambio de información”.

 

O Parlamento de Galicia aprobou hoxe a proposición non de lei do Grupo Popular, que non contou co apoio do BNG e do PSdeG, a través da que se demanda ao Goberno de España que manteña a presenza da Garda Civil en todos os cuarteis de Galicia, mesmo estudando a posibilidade de reapertura daqueles clausurados nos últimos anos, e dote de máis medios persoais e materiais que garantan a atención presencial as 24 horas do día.

A través desta iniciativa parlamentaria tamén se pide executar un plan integral destinado á construción, renovación, mellora e ampliación dos acuartelamentos da Garda Civil no medio rural galego; crear os instrumentos e protocolos, negociados cos concellos, para que de forma práctica e efectiva se incremente a cooperación da Garda Civil coa Policía Local; reforzar de maneira urxente, con medios materiais e humanos, os postos da Garda Civil en todas aquelas zonas que carecen de Policía Local; e ocupar a totalidade das prazas que aparecen definidas no catálogo de postos de traballo das distintas provincias galegas e que están vacantes na actualidade, elaborando incentivos profesionais e económicos para que os axentes queiran ocupar os postos de baixa demanda no medio rural.

A viceportavoz popular, Paula Prado, lamentou que “nos atopamos nun contexto no que, segundo os últimos datos do Ministerio do Interior, en Galicia incrementáronse as agresións sexuais con penetración, os roubos con intimidación e os roubos con forza en domicilios, establecementos e outras instalacións”.

GARANTIR UNHA PRESENZA PERMANENTE

Diante desta situación, “o lóxico sería que o Goberno central garantise unha presencia permanente dos efectivos das forzas de seguridade as 24 horas do día, os 365 días do ano e en todo o territorio: desde as grandes cidades ata os concellos máis pequenos”, manifestou. Porén, criticou que “a situación é máis ben a contraria: nin hai efectivos suficientes, nin hai unha atención permanente, nin se garante a seguridade por igual en todo o territorio”.

No caso concreto da Garda Civil, Paula Prado explicou que “é responsable da seguridade cidadá de 300 dos 313 concellos de Galicia, é dicir, son responsables de máis dun 95 por cento da poboación, para o que deberíamos contar con máis de 5.000 efectivos, pero na realidade contamos con pouco máis de 4.000 efectivos”.

“Para facer fronte a esta situación hai dúas posibilidades: ou se aumentan os efectivos para poder dar máis servizos ou se recortan servizos para poder prestalos con menos efectivos”, indicou a portavoz popular, quen criticou que “os Goberno de Pedro Sánchez se decidiu pola segunda vía: recortes pechando os postos auxiliares en sete concellos galegos, como Somozas, Cariño, Touro, A Pobra, O Incio, Sober e Baltar; e recortes reducindo os horarios de atención presencial nos cuarteis, coa nova moda de abrir só de 9 a 14 horas”.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno central que impulse os cambios lexislativos necesarios para recoñecer ás confrarías de pescadores como organizacións de produtores pesqueiros (OPP) e, deste xeito, acabar coas diferenzas entre elas no acceso a fondos públicos. Así mesmo, pídese que defenda diante das institucións europeas o papel das confrarías de pescadores para que sexan recoñecidas polo seu papel imprescindible na Política Pesqueira Común (PPC) e na Organización Común de Mercados (OCM).

A deputada popular Dolores Hermelo salientou que “as confrarías existen e vertebran toda a costa española, aunando a maioría do tecido social e económico de moitos pobos pesqueiros”. En concreto, sinalou que existen arredor de 200 confrarías ao longo da costa española con máis de 30.000 asociados.

DESCOÑECEMENTO DAS CONFRARÍAS

Porén, lamentou que “Europa non sabe como é a nosa frota e, por suposto, descoñece frontalmente as confrarías, sendo estas as organizacións máis representativas do asociacionismo no noso sector pesqueiro”. “Pese a existir antes que a política pesqueira común e da organización común de mercados, as nosas confrarías son inexistentes para Europa, que aposta claramente polas organizacións de produtores pesqueiros”, apuntou.

Dolores Hermelo indicou que “este feito fai que as nosas confrarías non podan estar ao mesmo nivel que estas organizacións de produtores pesqueiros dentro dos obxectivos da política pesqueira común, a pesar de que no sentido práctico compren os mesmos obxectivos”.

Así mesmo, a deputada popular considerou “sorprendente que o Goberno de Pedro Sánchez se esquecera no Real-Decreto 664/2023, que regula as actividades do asociacionismo do sector pesqueiro, das confrarías de pescadores”, polo que demandou que “debe solucionar este problema modificando a súa lexislación e pedindo a Europa que asimilen as confrarías como organizacións de produtores pesqueiros, de xeito que poidan acceder aos fondos públicos para estas organizacións”.

 

O Parlamento de Galicia aprobou hoxe a proposición non de lei do Grupo Popular a través da que se demanda ao Goberno central que teña en conta as alegacións presentadas ante as resolucións da Secretaría Xeral de Pesca sobre os recortes para as pesquerías do abadexo e da raia.

O portavoz popular do Mar, Miguel Fidalgo, lembrou que “as propias confrarías tacharon de burla ao sector a postura do Ministerio sobre as capturas de abadexo e raia, froito das nefastas negociacións do Goberno de España no Consello de Ministros de Pesca da Unión Europea, nas que sempre priman as políticas ambientais sobre a subsistencia das comunidades pesqueiras”.

Neste sentido, sinalou que “se tiveran en conta a nosa proposta a frota galega non estaría nos apuros nos que se atopa a conta da exigua cota que se fixou para o abadexo este ano e o que ven en augas ibéricas: 70 toneladas, que se quedaron en 55,6 ao descontar as 14 toneladas que se pescaron de máis en 2023”.

Fidalgo lembrou que “desde o Partido Popular consideramos que o abadexo non debería estar sometido ao réxime de totais admisibles de captura e cotas, como tampouco o linguado, a maruca, o merlán ou a solla”.

COTA DA RAIA

Respecto da pesquería da raia, o portavoz popular explicou que as alegacións parten da cota inicial de 1.724 toneladas para as zonas 8 e 9 da augas da Unión Europea, 17 toneladas máis que na campaña pasada, pero cunha reserva do 2 por cento para evitar posibles rebasamentos ou para utilizala en intercambios con outros estados membros.

“Consideramos que reservar un 2 por cento nunha especie que xa ten unha cota inicial moi limitada, uns topes de captura reducidos e incluso unha cota de captura en modo accesorio para a raia mosaico non resulta axeitado nin proporcional, especialmente se a pretensión é utilizala para intercambios”, indicou Miguel Fidalgo.

 

O Grupo Popular levará ao Pleno do Parlamento galego da vindeira semana as solicitudes ao Goberno central para que convoque, de xeito urxente e inmediato, a mesa de seguimento do pacto de viabilidade da factoría de Alcoa en San Cibrao, así como que transfira a Galicia a competencia dos servizos de meteoroloxía e estudos oceanográficos.

Ao remate da Xunta de Portavoces, o portavoz popular, Alberto Pazos, informou que a sesión plenaria dará comezo coas comparecencias, a petición propia, das conselleiras de Medio Ambiente e Cambio Climático, expoñer os proxectos e programas a desenvolver desde o seu departamento a curto, medio e longo prazo; e do Medio Rural, para dar conta dos resultados do Plan de prevención e defensa contra os incendios forestais de Galicia, unha vez rematada a tempada de alto risco de lumes de 2024.

Dentro do apartado de proposicións non de lei, o Grupo Popular demandará diversas actuacións do Goberno central para garantir a continuidade da factoría de Alcoa na Mariña lucense. En concreto, solicitará a convocatoria inmediata da mesa de seguimento do pacto de viabilidade desta empresa, coa participación ao máis alto nivel dos titulares dos ministerios de Industria e Turismo e de Transición Ecolóxica e Reto Demográfico; unha consignación de 74 millóns de euros correspondentes ao mecanismo de compensación de custes de emisións indirectas de CO2, que non percibiu esta empresa entre os anos 2018 e 2021; a autorización dos parques eólicos de competencia estatal vencellados a contratos a longo prazo para a produción de enerxía a prezos competitivos que prevén subministrar á factoría mariñá; e a articulación dunha liña de axudas públicas e apoios extraordinarios que garantan o investimento para a modernización da planta, no mesmo sentido que as que recibiron outras empresas tamén declaradas estratéxicas polo Estado.

INCAPACIDADE DO GOBERNO CENTRAL

Alberto Pazos lamentou que “o Goberno de Pedro Sánchez está a demostrar a súa incapacidade para poñer enriba da mesa un marco enerxético estable e competitivo que garanta o futuro de Alcoa na Mariña lucense, ao que se engadiu recentemente que esta factoría non poderá optar nesta anualidade a recibir ás axudas do mecanismo de compensación de custes de emisións indirectas de CO2, nin beneficiarse dos recursos procedentes dos fondos europeos vinculados ao Perte para a descarbonización”.

Pola contra, salientou “o compromiso da Xunta con esta empresa” e mostra disto lembrou a reunión mantida polo Presidente da Xunta co Comité de Empresa, na que lle trasladou a absoluta disposición a acudir a unha reunión en Madrid ao máis alto nivel con representantes do Goberno central. “Este compromiso do Goberno galego tamén se pon de manifesto no cumprimento dos seus deberes tanto coa tramitación dos parques eólicos dependentes da Administración galega como da ampliación da balsa de lodos vermellos”.

INFORMACIÓN PRECISA SOBRE METEOROLOXÍA

A segunda das proposicións non de lei do Grupo Popular ten como obxectivo solicitar ao Goberno do Estado a transferencia da competencia dos servizos de meteoroloxía e estudos oceanográficos, iniciando os trámites para establecer un marco normativo propio. Alberto Pazos sinalou que “os últimos acontecemos ocorridos en Valencia e outras comunidades autónomas por fenómenos meteorolóxicos adversos, así como os acaecidos en Galicia na última alerta activada, poñen de manifesto a importancia de ter información precisa sobre os cambios meteorolóxicos, así como a potestade de poder activar alarmas, baseándose na proximidade dos servizos e a precisión aportada pola experiencia”.

Neste sentido, o portavoz popular explicou que o artigo 149.1.20 da Constitución Española establece como competencia exclusiva do Estado o servizo meteorolóxico, circunstancia que non debería ser inconveniente para que Galicia reciba a súa transferencia, xa que existe unha previsión no Estatuto de Autonomía de Galicia no artigo 27 núm. 32 que fai referencia “as restantes materias que con este carácter e mediante lei orgánica sexan transferidos polo Estado”.

“Consideramos que se o Goberno central ten verdadeira intención para traspasar a Galicia esta competencia existe un marco legal para poder facelo, aínda que, despois da experiencia que estamos a sufrir co traspaso das competencias e dos medios humanos e materiais para que Galicia asuma as súas competencias sobre o seu litoral, non somos moi optimistas para que, finalmente, as competencias en materia de meteoroloxía recaian na Administración galega”, manifestou.

Por último, o Grupo Popular cuestionará ao Goberno galego sobre as repercusións que terá na sanidade galega a posible transferencia de usuarios de MUFACE ao sistema sanitario público; as novidades que a Xunta introduciu no Plan Especial de Protección Civil ante o risco de inundacións de Galicia como consecuencia da recente actualización levada a cabo; e sobre o incumprimento dos compromisos do Goberno de Pedro Sánchez respecto de aplicar de forma inmediata os descontos comprometidos nas autoestradas estatais en Galicia, logo de que nas últimas semanas se publicaron diversas informacións sobre subas nas peaxes para 2025.

 

O deputado do Grupo Popular Miguel Fidalgo salientou hoxe no Parlamento de Galicia que a Xunta xa abonou o 82 por cento das axudas solicitadas para o fomento do autoconsumo enerxético en Galicia, xestionadas a través do Instituto Enerxético de Galicia.

Miguel Fidalgo sinalou que “a incorporación do autoconsumo con fontes de enerxía renovables é moi positiva por múltiples factores: é bo para a consecución dos obxectivos de implantación das enerxías renovables, é bo a redución de emisións, e é bo porque tamén axuda á creación de emprego, a mellorar a competitividade da nosa economía e tamén supón un apoio ao terceiro sector, entre outros beneficios”.

Na súa intervención, lembrou que “o contexto enerxético existente no momento da apertura da convocatoria deu lugar a que o número de solicitudes superaran amplamente os fondos dispoñibles inicialmente, polo que moitos proxectos non puideron recibir inicialmente a axuda solicitada”. Diante desta situación, a Xunta foi solicitando ampliacións de orzamento para poder subvencionar todos os proxectos presentados na convocatoria, incrementando un 338 por cento o orzamento inicial, ao pasar de 11,5 a 38,9 millóns de euros.

“Con estes fondos a Xunta vai poder atender todas as solicitudes presentadas, situando neste momento a Galicia como a comunidade coa porcentaxe máis alta de España en expedientes pagados: o 82 por cento xa están abonados, segundo os datos do propio Ministerio”, rematou.

 

O Parlamento de Galicia aprobou hoxe por unanimidade unha proposición non de lei do Grupo Popular a través da que se insta á Xunta a que, apoiándose na experiencia destes anos e ante os novos retos, reforce a adaptación e a integración educativa e pedagóxica dos alumnos e alumnas orixinarios doutros países e que estuden no sistema educativo galego para facilitar o seu proceso de aprendizaxe.

A portavoz popular de Educación, Cecilia Vázquez, explicou que Galicia conta con arredor de 21.000 alumnos estranxeiros, o que representa o 6 por cento do total e a sitúa entre as comunidades españolas con menor número deste tipo de estudantes. Porén, afirmou que Galicia é a comunidade onde máis medra nos últimos anos o número de estudantes estranxeiros.

Diante desta situación, Cecilia Vázquez explicou que a Xunta está a traballar para presentar antes de que remate o presente ano un protocolo de acollida para alumnado estranxeiro, co obxectivo de favorecer a súa integración, non só desde o punto de vista formativo, senón tamén emocional.

ADIANTARSE AOS DESAFÍOS

“Este plan de acollida busca adiantarse aos desafíos a curto, medio e longo prazo, facilitando o labor de escolarización, acollida e benestar emocional do alumnado especialmente vulnerable polas súas condicións de procedencia, entre outras”, indicou.

En concreto, entre os obxectivos deste plan están reducir as barreiras que poidan frear a participación plena do alumnado inmigrante na contorna escolar; asegurar a expresión e a comprensión lingüística efectiva no contorno escolar; fortalecer as súas habilidades de lectura e escritura; e desenvolver actividades que promovan o entendemento intercultural a través das bibliotecas escolares.

A portavoz popular asegurou que “o ensino galego destaca pola equidade, inclusión e igualdade para o alumnado, ademais de por un bo clima de convivencia nas aulas”. “Esta situación é resultado do traballo de diferentes departamentos da Xunta, que teñen permitido que, desde hai tempo, Galicia conte con instrumentos para traballar a integración e a boa convivencia, tanto no conxunto da sociedade como, de xeito máis específico, nas aulas galegas”, apuntou.

Entre as iniciativas postas en marcha, Cecilia Vázquez referiuse á Estratexia galega da convivencia escolar-Educonvives, enfocada a afianzar un bo clima nas aulas galegas, coa previsión de accións de impacto no eido da convivencia positiva, a cidadanía dixital responsable, melloras para o benestar emocional e a coeducación.

 

O Parlamento de Galicia aprobou hoxe, sen o apoio de BNG e PSdeG, a proposición non de lei do Grupo Popular a través da que se insta á Xunta a seguir reforzando o programa Xuventude Mentoring e o Programa Xuventude Mentoring na Empresa, co obxectivo de continuar apoiando a transición da mocidade galega do ámbito académico ao laboral.

A portavoz popular de Xuventude, Nicole Grueira, cualificou como “unha ferramenta eficaz e transformadora” o programa Xuventude Mentoring, que desde a súa posta en marcha en 2021 permitiu que máis de 750 mozos e mozas melloraran as súas habilidades prácticas e as súa perspectivas laborais, ao tempo que facilitou que 140 mozos e mozas participaran en estadías formativas en empresas.

“O 30 por cento deses participantes no programa conseguiron a súa inserción no mercado laboral, unha porcentaxe importante pero que o Goberno galego quere incrementar ata o 50 por cento realizando maiores investimentos neste programa de emprego xuvenil”, manifestou.

PROGRAMA PIONEIRO

Xuventude Mentoring é un programa pioneiro, promovido polo Goberno galego e dirixido ás persoas mozas que están inscritas no Sistema Nacional de Garantía Xuvenil. “O seu obxectivo é axudar ás persoas máis novas a mellorar a súa empregabilidade, mediante accións como poden ser as de formación, orientación e mentoría, converténdose nunha ponte entre a vida académica e a vida laboral”, sinalou Nicole Grueira.

Este programa conta cunha versión adaptada ao ámbito empresarial, Xuventude Mentoring na Empresa, que permite ás persoas participantes realizar estadías formativas en empresas ou entidades galegas públicas ou privadas vinculadas a sectores estratéxicos, ofrecéndolles unha experiencia práctica e directa no mundo laboral, e favorecendo o contacto co tecido empresarial. Durante este período, os participantes reciben unha bolsa de formación dun mínimo de 661,50 euros ano mes, que pode incrementarse con axudas para desprazamentos ou en casos de discapacidade.

 

A portavoz de Cultura do Grupo Popular, Carmen Pomar, avogou hoxe no Parlamento de Galicia porque a Xunta manteña o seu compromiso co Consorcio para a Promoción da Música da Coruña, de acordo coas liñas que estableza o plan estratéxico acordado co Concello coruñés e aumentando a súa aportación económica nos orzamentos do vindeiro ano 2025.

Carmen Pomar manifestou que Xunta e Concello de A Coruña “concordan en que o Consorcio para a Promoción da Música é un proxecto estratéxico para Galicia, tanto na súa relevancia no ámbito musical como na proxección exterior da Comunidade galega”.

“De feito, na última comisión de goberno do Consorcio aprobouse, a petición da Xunta e do Concello, a elaboración dun plan estratéxico desta institución, que valore a situación actual e propoña un horizonte de obxectivos e actuacións, a curto, medio e longo prazo, que permita asegurar os seus fins fundacionais”, sinalou.

En concreto, a portavoz popular afirmou que “no marco de elaboración deste plan estratéxico do Consorcio estímase necesario aumentar o apoio institucional e económico mediante a implicación decidida doutras entidades públicas e privadas”.

Pomar lembrou que a Xunta leva investidos 36 millóns de euros no Consorcio para a Promoción da Música da Coruña desde o ano 2009, “o que demostra o firme compromiso da Xunta con esta institución dedicada á difusión da música en Galicia”. “Con este nivel de achegas, a Orquestra Sinfónica de Galicia é unha das institucións culturais ás que o Goberno galego destina máis apoio económico”, subliñou.

 

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que renove canto antes o Pacto de Estado contra a violencia de xénero, ampliando as súas medidas coa incorporación de accións específicas contra a violencia vicaria, a violencia dixital, económica ou pornográfica, e acelerando o cumprimento do Pacto naqueles aspectos aínda non desenvolvidos. Así mesmo, pídese que revise os erros do sistema Viogen, á hora de valorar o risco das vítimas de violencia de xénero; e aprobe unha lei orgánica contra a trata e a explotación de seres humanos, acordando coas comunidades autónomas un marco conxunto de traballo e financiamento e mellorando o protocolo-marco de protección das vítimas de trata de seres humanos coa experiencia acumulada.

A portavoz de Asuntos Sociais do Grupo Popular, Raquel Arias, salientou que “en Galicia somos referentes en igualdade e contra a violencia de xénero, coas leis contra a violencia de xénero e de igualdade máis avanzadas e progresistas do Estado, ás que agora se sumará a primeira Lei de violencia dixital de España”.

PEDRA ANGULAR

“A nivel estatal, a pedra angular contra a violencia de xénero é o Pacto de Estado, que marca as liñas xerais para todas as institucións e, desde aí, para as distintas entidades, asociacións e mesmo a sociedade en xeral”, explicou. Neste sentido, indicou que o Pacto de Estado contra a violencia de xénero aprobouse en 2017 cun período de execución de cinco anos, pero, ademais de lembrar que dous anos despois de que rematara o seu prazo de execución aínda está sen renovarse, lamentou que presenta “un balance de cumprimento moi pobre por parte do Estado, xa que, segundo os datos de seguimento do mesmo, só ten cumprido o 60 por cento das medidas que lle correspondería, fronte ao 96 por cento do executado por parte da Xunta”.

Raquel Arias demandou, así mesmo, que o Goberno central incorpore medidas específicas contra a violencia vicaria e a violencia dixital. “Galicia foi unha das primeiras comunidades autónomas en lexislar sobre a violencia vicaria e agora ímolo facer sobre a violencia dixital, pero tendo presente que ten que ser o Estado quen poña en marcha os mecanismos que permitan modificar o Código Penal co fin de perseguir axeitadamente estes delitos”, manifestou.

A portavoz popular lembrou que desde Galicia “tamén levamos tempo pedindo que o Goberno central revise de forma urxente os erros do sistema Viogen para mellorar a protección das mulleres vítimas de violencia de xénero e as súas fillas e fillos, así como que promulgue dunha vez por todas unha lei orgánica contra a trata de seres humanos con fins de explotación sexual, unha lei que reclaman todas as organizacións non gubernamentais expertas na materia, incluída a Rede Galega contra a Trata”. Neste ámbito, salientou que “Galicia xa vai un paso por diante logo de aprobar en 2022 o I Plan galego contra a trata, con medidas de prevención, sensibilización e, sobre todo, prestacionais”.