Categoría: Parlamento de Galicia

A portavoz de Sanidade do Grupo Popular, Encarna Amigo, salientou hoxe no Pleno que “Galicia marcou o paso a nivel nacional na atención ás persoas diagnosticadas con esclerose lateral amiotrofica, aprobando unhas axudas pioneiras con apoios de 12.000 euros ao ano, habilitando unha vía clínica directa en cada centro hospitalario para axilizar o diagnóstico e dando preferencia ás solicitudes de dependencia das persoas con ELA para que se tramiten en menos dun mes. Ademais, e unha vez que se aprobou a lei estatal, considerou “imprescindible acompañala cunha dotación orzamentaria e medios económicos suficientes para que as comunidades autónomas poidan poñer en marcha moitas das medidas, como os coidados especializados nos domicilios as 24 horas para pacientes en fases avanzadas da enfermidade”.

Encarna Amigo amosouse “orgullosa de que en Galicia tivemos o primeiro goberno autonómico que deu axudas directas e inmediatas aos enfermos de ELA, e de que o Partido Popular deu a batalla ata conseguir desbloquear a Lei ELA, que o Goberno de Pedro Sánchez tiña paralizada e gardada nun caixón”. “Hoxe, esta norma é unha realidade gracias ao esforzo de moitos, empezando polas asociacións de enfermos que fixeron, fan e seguen a facer unha labor impagable”, indicou.

Neste sentido, a portavoz popular criticou que o Goberno de Pedro Sánchez “chegou a bloquear a tramitación da Lei ELA ata 37 veces nun ano sen dar ningún tipo de explicación, un bloqueo inexplicable xa que o Congreso aprobara por unanimidade a súa toma en consideración, xerando unha expectativa que de frustrou de maneira inxustificada”.

“Agora, unha vez publicada esta nova lei, é necesario que o seu desenvolvemento regulamentario se leve a cabo canto antes e se lle adxudique dotación orzamentaria, condicións absolutamente necesarias para que chegue a ser de verdade unha realidade na vida diaria dos afectados”, manifestou.

REDUCIR AO MÁXIMO OS TEMPOS DE AGARDA

Amigo apuntou que “un dos grandes obxectivos do Goberno galego é reducir ao máximo os tempos de agarda nos procesos de valoración de dependencia e discapacidade, “para o que a partir de agora unicamente haberá que presentar a solicitude e nos casos que se solicite tamén a discapacidade, ambas procesos resolveranse conxuntamente”.

Ademais, a portavoz popular destacou que a Xunta incorpora, por terceiro ano consecutivo, unha partida de tres millóns de euros nos orzamentos para axudar con 12.000 euros anuais a todas as persoas diagnosticadas con ELA en Galicia. “Como novidade, a partir do vindeiro ano tamén se poderán beneficiar destas axudas os afectados por esclerose lateral primaria e amiotrofia espiral progresiva”, concretou.

 

O Grupo Popular apoiou hoxe no Pleno do Parlamento de Galicia a aprobación dunha proposición non de lei a través da que se insta ao Goberno galego a incluír a educación afectivo-sexual nos proxectos curriculares dos centros de ensino e establecer un programa específico de formación ao profesorado neste eido, así como incrementar os programas de formación en igualdade e prevención da violencia machista, actualizar o Protocolo de coordinación e cooperación institucional fronte á violencia de xénero en Galicia.

Na iniciativa aprobada hoxe tamén se pide que a Xunta presente no Parlamento de Galicia, antes de que remate o actual período de sesións ou no primeiro trimestre de 2025, un informe de seguimento da execución do I Plan galego contra a trata de seres humanos con fins de explotación sexual 2022-2024; que colabore coa Fegamp na implantación en todos os concellos galegos do Protocolo de actuación contra as violencias sexuais e LGBTI fóbicas nos espazos de lecer nocturno; e se impulsen campañas de sensibilización e información, dirixidas aos diferentes sectores de poboación, co fin de contrarrestar as mensaxes negacionistas e incrementar a concienciación e comprensión pola cidadanía das distintas manifestacións das formas de violencia contra as mulleres.

COMPROMISO CONTRA A VIOLENCIA DE XÉNERO

A deputada popular Noelia Pérez asegurou que “non imos aceptar que se poña en dúbida nin o compromiso do Goberno galego nin do Presidente da Xunta coas mulleres e coa loita contra a violencia de xénero”, aínda que recoñeceu que “as medidas nunca van a ser suficientes mentres sigan existindo vítimas”. “Mentres BNG e PSdeG sigan instalados na política do espectáculo e traendo propostas para xerar titulares e quedar ben de cara a galería, desde o Grupo Popular imos seguir traballando con seriedade para dar respostas que realmente melloren as vidas das persoas”, anotou.

Na súa intervención, subliñou que “a Xunta imparte educación afectivo-sexual en toda a etapa escolar” e indicou que “a loita pola igualdade é unha obriga de carácter transversal que temos como sociedade”. Neste sentido, dixo que “o profesorado ten formación específica nesta materia e existe formación especializada e actualizada no ámbito sanitario, na xustiza ou nas profesións do eido social”.

Respecto dos centros de atención á muller, a deputada popular lembrou que “son recursos habilitados polos concellos, “polo que amplialos é unha decisión municipal e, se así o decide o propio Concello, contará co apoio da Xunta, tanto para mellorar as infraestruturas como para o seu mantemento e persoal”.

Noelia Pérez considerou “imprescindible a creación dun marco lexislativo estatal que permita previr e loitar contra a trata de seres humanos”. “En vez de vir a pedir aquí medidas que xa están en marcha, como o Plan galego contra a trata de seres humanos, e outras que non son competencia do Goberno galego, reclamen ao Goberno de Pedro Sánchez que saque do caixón o Pacto de Estado aprobado no último mandato do Partido Popular e aprobe dunha vez a Lei contra a trata para dar prioridade aos dereitos humanos das vítimas garantíndolles protección, asistencia xurídica e acceso aos recursos para a súa reinserción”, manifestou.

INCREMENTO DE FONDOS

Por outra parte, no debate dunha proposición non de lei do BNG sobre o incremento das prestacións periódicas ás mulleres que sofren violencia de xénero, Noelia Pérez destacou que a Consellería de Igualdade dedicará o vindeiro ano 56 millóns de euros para reforzar as políticas de igualdade e manter e ampliar recursos, servizos e prestacións. “Defendemos que o Goberno galego, que é quen mellor coñece a realidade e as necesidades das vítimas e pode tomar decisións fundamentadas, ten que ter a capacidade para decidir como implementar e onde implementar eses incrementos para garantir que as axudas sexan eficientes e co maior impacto posible”, engadiu.

“Os nacionalistas galegos veñen aquí a pedir un incremento do IPC das axudas periódicas cando acaban de solicitar un recorte de crédito de 46 millóns de euros na renda de inserción social de Galicia, que nestes momentos tamén está a beneficiar a moitas desas mulleres, porque nesta comunidade autónoma ambas prestacións son compatibles”, dixo.

Para rematar, a deputada popular salientou que, “gracias ao traballo de todos, conseguimos que Galicia sexa unha comunidade referente a nivel estatal: fomos os primeiros en ter un recurso económico propio para axudar ás vítimas, os primeiro en poñer en marcha a quenda de garda en apoio ás mulleres vítimas de violencia de xénero e aos seus fillos, os primeiros en ofrecer vivendas tuteladas para vítimas de violencia con enfermidade mental e un dos primeiros en recoñecer a violencia dixital como unha forma de violencia de xénero”.

 

 

 

O Parlamento de Galicia aprobou hoxe por unanimidade a proposición non de lei do Grupo Popular a través da que se reitera ao Goberno central a necesidade de constituír, coa máxima celeridade posible, a Comisión Mixta de Transferencias e, tras o aval do Tribunal Constitucional, facer efectivo o traspaso dos medios materiais e persoais necesarios para que a Administración autonómica poida xestionar o litoral e permita así consolidar o autogoberno pleno sobre os máis de 2.500 quilómetros de costa galega.

 

O portavoz popular de Medio Ambiente, Gonzalo Trenor, lembrou que “un ano e cinco meses despois da aprobación neste Parlamento galego da Lei de ordenación e xestión integrada do litoral e sete meses despois de que o Tribunal Constitucional nos dese a razón de xeito unánime, seguimos esperando pola transferencia a Galicia de medios e persoal”.

 

LÍDERES NA XESTIÓN INTEGRAL DA COSTA

 

“Imos ser líderes na xestión integral da nosa costa gracias ao deseño e aprobación da Lei do litoral, que inclúe a capacidade de Galicia para outorgar, prorrogar, modificar ou extinguir concesións para o uso e ocupación do dominio público marítimo-terrestre,”, sinalou.

 

Gonzalo Trenor lembrou que a Lei de ordenación e xestión integrada do litoral foi aprobada polo Parlamento galego sen o apoio de BNG nin de PSdeG e posteriormente foi recorrida polo Goberno de Pedro Sánchez ante o Tribunal Constitucional, que deu a razón á Comunidade galega ao estimar só 2 dos 72 supostos de inconstitucionalidade que denunciou.

 

“O Tribunal Constitucional recoñeceu que o Estado debe traspasar os medios materiais e persoais a Galicia, en conformidade co principio de lealdade institucional”, indicou o portavoz popular, quen apuntou que ante esta sentencia a Xunta iniciou os trámites para pedir ao Goberno central este traspaso sen que ata o día de hoxe se teña constituído a Comisión Mixta para a transferencia sobre o litoral.

A portavoz de Sanidade do Grupo Popular, Encarna Amigo, asegurou hoxe no Pleno do Parlamento galego que “todos os pacientes de Galicia teñen acceso ás unidades especializadas de reprodución humana asistida en igualdade de condicións, polo que non existe desequilibrio territorial, senón a lóxica ordenación das prestacións sanitarias para garantir aos cidadáns os mesmos niveis de calidade e seguridade nas prestacións recibidas”.

Encarna Amigo lembrou que a Xunta “prioriza o incremento da natalidade a través de diversas medidas de ámbito social, e agora damos un paso máis co Plan galega de reprodución humana asistida, que mellora as prestacións recollidas na carteira de servizos do Sergas e, adicionalmente, mellorar as ratios de natalidade de Galicia”.

ADECUADA EXPERIENCIA

Na súa intervención, a portavoz popular explicou que “tamén a nivel autonómico existen prestacións para as que é preciso un grao de especialización, concentrando recursos co obxectivo de garantir a equidade, que non é máis que a igualdade de acceso ás mesmas condicións de efectividade, calidade e seguridade nas técnicas ou tratamentos, que non estaría garantida no caso de dispersar e fragmentar a atención en unidades por falta da adecuada experiencia na súa utilización”.

“No Sergas existe unha ordenación na que en todos os seus hospitais se realizan técnicas de reprodución humana asistida, aínda que non todos os hospitais realizan todas as técnicas”, sinalou Encarna Amigo. En concreto, os hospitais comarcais realizan estudos básicos de esterilidade e indución da ovulación; os sete hospitais de área sanitaria inclúen, ademais, a inseminación artificial con seme; e, por último, nos hospitais de referencia de Santiago, A Coruña e Vigo existen unidades especializadas de reprodución humana asistida.

 

 

O portavoz do Mar do Grupo Popular, Miguel Fidalgo, incidiu hoxe no Pleno do Parlamento galego en que “para a Xunta o marisqueo é estratéxico, polo que a prioridade é recuperar a produtividade dos bancos”. Neste sentido, cualificou de “surrealista que no BNG queiran baixar o orzamento da Consellería do Mar, pero despois pidan priorizar os investimentos dirixidos a blindar a máxima protección ao sector pesqueiro e marisqueiro tradicional”.

Miguel Fidalgo lembrou que “a Xunta é moi consciente da gran importancia económica, social e ambiental que ten a actividade do marisqueo en Galicia, xa que estamos falando de máis de 3.600 permisos de marisqueo a pe, case 2.500 embarcacións na modalidade de marisqueo a flote e máis de 700 permisos con algunha das modalidades de recursos específicos”.

“É unha actividade desenvolvida por máis de 70 entidades asociativas que, no último exercicio, alcanzou unha produción superior ás 5.100 toneladas, alcanzando un valor de 62,6 millóns de euros”, apuntou.

GALICIA, REFERENTE NO SECTOR

O portavoz popular salientou que “Galicia é todo un referente neste sector e, ademais, é a única rexión en ofrecer un sistema real de cogobernanza a través de plans de xestión elaborados polo propio sector, que incorporan obxectivos tanto biolóxicos e ecolóxicos, como de carácter socioeconómico”.

Fidalgo manifestou que o marisqueo é sector “estratéxico” para a Xunta, e mostra disto é a posta en marcha do Plan de competitividade e sostibilidade do marisqueo en Galicia 2024-2025, dotado con 123 millóns de euros e que foi deseñado e consensuado co sector. Ademais, este plan irase adaptando en función do estado dos recursos e dos datos científicos técnicos dispoñibles en cada momento.

Así mesmo, o portavoz popular destacou que “a Xunta é a única administración que está dando axudas, tanto aos mariscadores afectados pola paralización da actividade extractiva nos bancos marisqueiros; como para fornecer a actividade das entidades mediante a mellora dos seus equipamentos e infraestruturas, e o apoio á diversificación das actividades; ou á formación, como vía de mellora”.

“Pero tamén se concederon axudas para contribuír a preservar e restaurar a biodiversidade e os ecosistemas mariños, e para planificar, adecuar e mellorar as zonas de produción”, engadiu.

POSTURA SURREALISTA DO BNG

Porén, Miguel Fidalgo cualificou de “surrealista” a postura adoptada polo BNG, xa que “queren baixar o orzamento da Consellería do Mar en 13 millóns de euros de fondos FEMPA, pero despois piden destinar os recursos do mesmo FEMPA preferentemente a accións de investigación sobre a perda de produtividade nas rías galegas; e tamén piden baixar o orzamento da Consellería do Mar e critican o gasto en promoción pesqueira ao mesmo tempo que demandan medidas de promoción dos produtos do mar galegos fronte á competencia dos importados e das etiquetaxes enganosas e fraudulentas”.

“Xa quedou demostrado a nula preocupación do BNG pola pesca, o marisqueo e a acuicultura en Galicia, cando estes asuntos quedaron fóra do acordo de investidura co PSOE ou cando o seu grupo no Parlamento Europeo se manifestou en contra de que o marisqueo a pe puidera ser cuberto por axudas durante a etapa máis dura da pandemia”, lembrou o portavoz popular.

Para rematar, insistiu en que “a Xunta xa está facendo todo o que depende dela, pero o Goberno de España segue a negar, entre outros asuntos, a declaración de zona catastrófica das rías de Galicia, mentres a declaran noutras comunidades na mesma situación que a nosa”.

O portavoz do Medio Rural do Grupo Popular, Miguel Viso, salientou hoxe no Pleno do Parlamento galego “o labor fundamental que están a desenvolver as oficinas agrarias de toda Galicia para xestionar as axudas da PAC 2023-2027, unha convocatoria que implicou cambios coa incorporación de novas liñas de axuda e que conlevou adaptar procesos e desenvolver novas aplicacións informáticas para xestionar eficazmente as novas liñas de apoio”.

“Galicia é un pobo que se alimenta do traballo das súas xentes e o futuro do rural é o futuro de Galicia, polo que desde a Xunta estanse a facilitar camiños para que o relevo xeracional no campo sexa posible e para que novas mans se sumen ao traballo agrícola”, manifestou Miguel Viso.

INCREMENTO DUN 21 POR CENTO

Na súa intervención, o portavoz popular indicou que o número de solicitudes realizadas en 2024 acadou as 2.000 e para a nova convocatoria incrementouse nun 21 por cento o orzamento, ata alcanzar os 47 millóns de euros.

Miguel Viso afirmou que “o rural galego está en transformación e non podemos mirar cara outro lado” e lembrou diversas medidas adoptadas, como a ampliación da axuda a persoas de entre 41 e 55 anos; a titorización a través do persoal técnico agrario con funcións de asesorar na elaboración do plan empresarial ou na solicitude de axudas; ou no banco de explotacións, co obxecto de asegurar a remuda xeracional, favorecendo o contacto con xente interesada en compra ou alugamento coa seguridade que da as garantías da administración.

 

O Pleno do Parlamento de Galicia aprobou hoxe a nova Lei de cultura inclusiva e accesible de Galicia, unha norma que “pretende facilitar o dereito de acceso á cultura de todas as persoas, sen excluír a ninguén, e que define un claro obxectivo: conciliar a cultura coa realidade das diferenzas que presentan as persoas, facendo fincapé en todas aquelas que pertencen a colectivos cuxa desvantaxe persoal ou social acaba por supor un verdadeiro atranco no ámbito cultural”, manifestou a portavoz de Cultura do Grupo Popular, Carmen Pomar.

En concreto, Pomar sinalou que “estamos diante dunha lei de dobre fluxo que busca, explicitamente, apoiar e dar visibilidade á creatividade e ao talento de tantas persoas que pola súa situación de dificultade permanecen agochadas para o público potencial e para a sociedade en xeral, coas consecuencias sociais e económicas que isto conleva e, inherente, o dano para o seu desenvolvemento persoal”.

UN ANTES E UN DESPOIS

A portavoz popular explicou que “o ordenamento xurídico galego carece neste momento dunha norma que regule este acceso á cultura en termos inclusivos e que integre, baixo este paraugas, mesmo a creación como o consumo cultural”. “A norma está pensada para aqueles colectivos desfavorecidos ou con maiores dificultades de inclusión, polo tanto en desvantaxe, para seren removidos todos e calquera dos obstáculos que inhiban ou prexudiquen a súa participación plena na vida cultural”, apuntou.

“Unha lei que marcará un antes e un despois para o acceso á cultura das persoas, ben como consumidoras, ben como produtoras, ou en ambas as dúas perspectivas”, asegurou Carmen Pomar, quen apuntou que “trátase de recoller ao longo dos seus 21 artigos e 5 disposicións un novo escenario para ir da man dos colectivos da diversidade, desfacendo barreiras e marcando obxectivos para que a cultura sexa 100 por cento accesible para todas as persoas e para que a cultura sexa unha ferramenta de expresión para todas e todos, sen excepción”.

Respecto dos mecanismos de seguimento, Carmen Pomar explicou que a lei prevé a creación do Observatorio da Cultura Inclusiva e Accesible de Galicia, “como órgano colexiado que, aínda que dependente da Consellería con competencias en materia de cultura, poda ser participado doutros órganos da Xunta e, incluso, doutras administracións públicas ou entidades do tecido asociativo e industrias culturais, e que levará a cabo o seguimento do cumprimento desta norma, nunha dinámica viva e aberta de análise e avaliación constante”.

 

O viceportavoz popular, Julio García Comesaña, salientou hoxe no Pleno, no debate das emendas á totalidade do proxecto de Lei de medidas fiscais e administrativas, que “o modelo fiscal consolidado en Galicia permite facer novas rebaixas selectivas de impostos, que benefician fundamentalmente ás rendas medias e baixas e aos colectivos especialmente protexidos”. Porén, avogou por ver este proxecto de Lei como “unha oportunidade para que os grupos parlamentarios poidan achegar as súas propostas, porque hai e haberá debate sobre o seu contido e as emendas presentadas”.

García Comesaña afirmou que con esta nova Lei “séguese a consolidar as importantísimas rebaixas de impostos que o Goberno galego leva implantando desde o ano 2016, que nos levou a ser unha das cinco comunidades autónomas que mellor tratamento da ás rendas de ata 21.000 euros no IRPF”. En concreto, explicou que no imposto de sucesións apróbase unha nova redución aplicable para os irmáns, tíos, sobriños, sogros, cuñados, xenros e noras, que suporá que as herdanzas de ata 25.000 euros a favor de calquera persoa deste grupo de parentes non tribute.

ACTUACIÓNS NO ÁMBITO DA VIVENDA

No ámbito da vivenda, o viceportavoz popular indicou que “vanse establecer dúas deducións para estimular ás persoas propietarias de vivendas baleiras a súa posta no mercado do aluguer de vivenda”. “Son medidas que van a apoiar aos pequenos propietarios, xa que non se poderán beneficiar destas deducións aqueles que posúan máis de 3 vivendas destinadas ao aluguer”, apuntou.

En concreto, as persoas que teñan algunha vivenda baleira que para poñela en condicións de ser usada precise determinadas obras poderán deducirse un 15 por cento do custe das obras, sempre que o valor de mercado da vivenda non supere os 300.000 €. Ademais, incentivarase cunha dedución de ata 500 euros o primeiro ano o aluguer de vivendas por parte particulares, sempre que a renda non supere os 700 euros mensuais.

Julio García apuntou que esta nova Lei de medidas fiscais e administrativas inclúe unha serie de medidas tributarias para facilitar o acceso á vivenda dos cidadáns galegos. Así, exímese de tributación no ITP-AXD todas as operacións implicadas na construción e financiamento da vivenda protexida de promoción pública, establecendo unha dedución na cota do 100%. Ademais, equipáranse os locais comerciais que se destinen a uso de vivenda ás vivendas, de xeito que as operacións gravadas polo tributo se beneficien dos tipos bonificados recoñecidos para as vivendas, ao tempo que se estimulan as operacións de promoción, construción e rehabilitación de vivendas que se poñan no mercado do aluguer, que poderán beneficiarse dunha dedución do 75 por cento na cota do citado imposto.

RECURSOS NATURAIS AO SERVIZO DOS GALEGOS

“A Xunta ten claro que a xestión da riqueza dos recursos naturais de Galicia ten que estar ao servizo dos intereses de toda a poboación galega”, afirmou o viceportavoz popular. Neste sentido, referiuse ao proceso de diminuír o número de autoxeneradores eólicos en Galicia a través da repotenciación; equiparar os locais comerciais coas vivendas en materia impositiva; a posta en marcha da taxa turística; conxelar o canon de perdas nas traídas de augas ata o 2028; o fomento da reciclaxe con ese canon unitario de tratamento por tonelada de contía reducida; a licenza de caza ou pesca indefinida para os maiores de 65 anos; a consolidación mediante lei das redución progresivas das ratios de alumnado.

Así mesmo, a nova Lei favorecerá a simplificación e axilización do procedemento para a recoñecemento da situación de dependencia e o dereito a prestación do Sistema para a Autonomía e Atención á Dependencia; a axilización de construción de vivendas protexidas de promoción pública de titularidade autonómica; a utilización de edificacións existentes para o seu destino a vivenda; ou a garantía de duración permanente do réxime de protección da vivenda.

 

A viceportavoz do Grupo Popular, Paula Prado, salientou hoxe no Pleno do Parlamento galego, no debate de totalidade dos orzamentos da Xunta para 2025, que os gobernos do PPdeG “levan anos demostrando que Galicia pode funcionar ofrecendo cada vez máis e mellores servizos públicos, ao tempo que se baixan os impostos”. Así mesmo, cualificou a BNG e PSdeG como “a esquerda dos recortes, porque non só pretenden subir impostos, senón que pretenden ademais recortar servizos”.

Paula Prado concretou que, “a efectos prácticos, os orzamentos de 2025 significan que as familias galegas seguirán sendo as únicas de España que gozan dunha educación pública gratuíta desde a escola infantil ata a universidade; que a mocidade teña reservadas ata o 40 por cento das máis de 1.500 vivendas de promoción pública que está a desenvolver o Goberno galego; que as mulleres galegas de máis de 40 anos poidan acceder á reprodución asistida na sanidade pública; que as vítimas de violencia de xénero teñan a súa disposición cinco centros de atención 24 horas; ou que os galegos que reciban unha herdanza de parentes colaterais non teñan que pagar o imposto de sucesións”.

A ESQUERDA DOS RECORTES

Pola contra, a viceportavoz popular sinalou que BNG e PSdeG “son a esquerda dos recortes”. Así, explicou que “o BNG que se vende como defensor dos máis desfavorecidos quere recortar en máis de 50 millóns de euros a Risga e as axudas de inclusión social; o BNG que se vende como defensor da sanidade pública pretende recortar na compra de material sanitario; ou o BNG que di estar ao carón das familias pretende recortar as actividades da campaña de verán da Xunta, deixando a 11.500 nenos galego sen campamento”.

“Así mesmo, e logo do que vimos padecer aos valencianos estes últimos días a consecuencia da DINA, o BNG cre que a mellor opción é reducir o investimento na Axencia Galega de Emerxencias ou recortar en tres millóns de euros a partida destinada á adquisición de vehículos equipados para a defensa contra o lume”, apuntou.

RECORTES NA SANIDADE

Respecto das emendas do PSdeG, Paula Prado manifestou que “os mesmos socialistas que se manifestan en defensa da sanidade pública, queren aplicar recortes no pago das liñas telefónicas do Sergas ou no pago dos servizos postais, necesarios para que a cidadanía reciba as comunicacións derivadas de programas como o de cribado de cancro”.

“Pero é que o mesmo PSdeG que propón agora a gratuidade e supresión das peaxes nas autoestradas galegas é o que na campaña das pasadas eleccións autonómicas deu a súa palabra de que a AP-9 e a AP-53 ían ser gratuítas, e a día de hoxe estas autoestradas seguen sen ser gratuítas e para o vindeiro xaneiro percorrer a AP-9 custará 27 euros”, indicou a viceportavoz popular, quen engadiu que “os socialistas son os responsables de paralizar no Congreso a transferencia da AP-9, que xa leva 12 ampliacións do prazo de emendas”.

 

O portavoz do Grupo Popular, Alberto Pazos, criticou hoxe no debate de totalidade no Pleno do Parlamento dos orzamentos da Xunta para 2025 que para BNG e PSdeG “nada é imposible, cando mentes” e explicou que “reducen as súas emendas a unha enorme e impúdica mentira, na que basta desexar algo para que se converta en realidade”. “Os galegos nos demandan menos ruído e máis diálogo, e máis acordos e menos confrontación, pero tamén unha xestión eficiente dos recursos públicos e non fantasiosas contas carentes do máis elemental rigor”, apuntou.

Alberto Pazos manifestou que “o Parlamento debería recuperar de maneira inmediata a súa capacidade para xerar consensos, pero iso non será posible se non superamos o actual clima de confrontación, que nace da aparente incapacidade da oposición para asumir o resultado das urnas do pasado mes de febreiro”.

PRODUTO CADUCADO DA OPOSICIÓN

“A suposta alternativa que BNG e PSdeG ofrecen hoxe aos galegos non é máis que unha reprodución exacta do debate celebrado hai un ano, convenientemente remaquetado para presentar aos galegos, como se fose novo, o que non é máis que un produto longamente caducado”, sinalou. Así, criticou que os seus argumentos son “a mesma análise catastrofista, as mesmas conclusións equivocadas, as mesmas receitas rexeitadas unha e outra vez polos galegos, e, como non, a mesma actitude altiva que lles impide recoñecer nin un só logro a un Goberno que acaba de conseguir a súa quinta maioría absoluta consecutiva”.

O portavoz popular afirmou que Galicia “precisa alcanzar certos acordos básicos en materias fundamentais para o seu futuro”, como un pacto sobre a lingua, un pacto pola industria ou unha estratexia de acción exterior. Pero, puntualizou que “eses acordos se teñen que articular necesariamente en torno a un programa, a uns prantexamentos e a uns principios compartidos e validados por unha inmensa maioría dos galegos”.

“Chegou o tempo de que asuman que os galegos non comparten a súa compulsiva teima por subir impostos ou por inventar novos tributos, e de recoñecer que os galegos non comparten o seu recorrente mantra de que viven nunha Galicia asolada por falsos recortes que só existen no seu imaxinario partidista”, asegurou.

Pazos criticou que “gracias á visión positiva e creativa da esquerda galega podemos implementar novidosísimos programas en materia de vivenda ou de igualdade mediante a simple fórmula de deixar de pagar a débeda ou de eliminar concertos educativos, aínda que iso supoña deixar a milleiros de nenos galegos sen escolarizar, simplemente porque se lles esqueceu incluír nas súas emendas un centro educativo alternativo onde cursar os seus estudos”.

FISCALIDADE REAL, EQUILIBRADA E CONSECUENTE

Respecto das propostas en materia fiscal de BNG e PSdeG, o portavoz popular indicou que “cada ano reiteran a creación de novos impostos e o aumento dos tipos nos xa existentes, pero variando o cálculo da recadación para facelo coincidir milimetricamente coas cantidades que necesitan para cadrar a súa contabilidade creativa”. En concreto, dixo que “as mesmas figuras fiscais que para o BNG recadaban o pasado ano 209 millóns de euros, este ano alcanzan milagrosamente os 255 millóns de euros”.

“A Xunta vai seguir optando por manter unha fiscalidade real, equilibrada e consecuente”, subliñou Alberto Pazos, que contrapuxo co “Goberno de Pedro Sánchez, que incrementou a fiscalidade dos autónomos, os impostos aos hidrocarburos, ao diésel, ás bebidas azucaradas, aos plásticos dun so uso ou ao tratamento do lixo, e todo iso namentres incrementaba a recadación do Estado gracias aos perniciosos efectos da inflación e á negativa do Goberno a deflactar impostos”.

O portavoz popular destacou “o modelo fiscal xusto de Galicia, que nos sitúa entre as comunidades que mellor tratamento fiscal proporciona ás rendas máis baixas”. “Un modelo que garante unha maior xustiza social, como amosa o feito de que durante 15 anos consecutivos mantivésemos unha taxa de pobreza inferior á media estatal ou que o índice de GINI presente resultados sensiblemente mellores en Galicia que no conxunto de España”, matizou.

Respecto da condonación da débeda proposta polo PSdeG, Alberto Pazos criticou que fixen en 115 millóns de euros a suposta condonación para Galicia fronte aos 15.000 millóns de euros para Cataluña. Deste xeito, sinalou que “unha cousa é que defendan unha condonación da débeda, que nós consideramos un pésimo negocio para Galicia, e outra ben distinta é que en sede parlamentaria os socialistas lle falten ao respecto aos galegos asumindo unha cifra absolutamente ridícula”.