Categoría: Parlamento de Galicia

O Grupo Popular incorpora nas súas emendas aos proxectos de Lei de orzamentos da Comunidade galega para 2025 e de medidas fiscais e administrativas dúas iniciativas para incrementar o mercado de vivendas en aluguer en Galicia a través de incentivos aos pequenos propietarios con inmobles baleiros para que os poñan no mercado con deducións no IRPF dos gastos derivados da súa adecuación ou polo simple arrendamento da vivenda.

O portavoz do Grupo Popular, Alberto Pazos, acompañado polos conselleiros de Facenda, Miguel Corgos, e de Vivenda e Planificación de Infraestruturas, María Martínez, informou que as emendas ao proxecto de Lei de medidas fiscais e administrativas incorporan novas exencións fiscais orientadas a estimular que as persoas propietarias de vivendas as poñan no mercado de aluguer.

En concreto, o conselleiro de Facenda explicou que “o obxectivo é incrementar un 3 por cento o número de alugueres, o que supón incrementar a curto prazo o mercado con 1.000 novas vivendas”.

DEDUCIÓNS NO IRPF

Para iso, en primeiro lugar, introdúcese unha dedución do 15 por cento na cota autonómica do IRPF dos gastos derivados da adecuación dun inmoble baleiro para destinalo ao arrendamento como vivenda, cun importe máximo de 3.000 euros por vivenda e ano durante tres anos; e, en segundo lugar, establécese unha dedución de 500 euros na cota autonómica do IRPF polo arrendamento de vivendas baleiras.

Os destinatarios destas dúas deducións serán as persoas propietarias dun máximo de tres vivendas, cun límite de 700 euros do prezo mensual do aluguer, un arrendamento por un tempo mínimo de tres anos e que as vivendas leven, polo menos, un ano baleiras.

A conselleira de Vivenda manifestou que estas bonificacións fiscais “enriquecen as medidas xa impulsadas pola Xunta” e resaltou a colaboración dos concellos, pero lamentou “a deixadez do Goberno central e dunha lei estatal que non é só que non axude, senón que está a prexudicar claramente aos pequenos propietario que non se atreven a alugar as súas vivendas”.

Por este motivo, reclamou que “o Estado modifique esta Lei claramente lesiva e que se está demostrando tan ineficaz” e afirmou que o Goberno galego actúa “para dar solucións efectivas ás limitacións e á inseguridade xurídica creada coas propostas de creación de zonas tensionadas ou de limitación dos prezos, que da lugar a que os propietarios, ben sexa promotores privados ou ben particulares, non poñan as vivendas no mercado do alugueiro”.

EMENDAS AO ESTADO DE GASTOS

Previamente, Alberto Pazos informou que o Grupo Popular presentou 7 emendas ao estado de gastos do proxecto de Lei de orzamentos, entre as que destacan principalmente o incremento de 500.000 euros das axudas para as federacións deportivas galegas, co obxectivo de colaborar o máximo posible no seu correcto funcionamento; un axuste de 400.000 euros da partida destinada a axudas a partidos políticos, de xeito que se adecúe á evolución do IPC xa que leva conxelada desde o ano 2017; ou a apertura da posibilidade para que as asociacións sectoriais sen ánimo de lucro poidan beneficiarse tamén das subvencións para o financiamento de accións formativas con compromiso de contratación de desempregados.

Dentro das emendas ao proxecto de Lei de medidas fiscais e administrativas, Alberto Pazos apuntou que se reforma a implantación do imposto sobre as estadías turísticas, concretando aspectos substantivos do tributo, que xa figuraba no artigo 8 da Lei de medidas. Deste xeito, esta taxa autonómica estará bonificada ao 100 por cento por parte da Xunta e se habilita aos concellos a establecer unha recarga de carácter municipal, que poderán aplicar a partir do 1 de xaneiro.

Outra das cuestións que o Grupo Popular incorporou nas súas emendas ao proxecto de Lei de medidas fiscais e administrativas ten relación co sector eólico. En concreto, van dirixidas a catro aspectos. En primeiro lugar, a repotenciación dos parques eólicos, establecendo a obriga de repotenciar os parques eólicos cunha antigüidade superior aos 25 anos, agás que nos proxectos autorizados se fixase unha vida útil dos aeroxeradores superior, que, en todo caso, terá un máximo de 30 anos.

En segundo lugar, a posibilidade de retramitación voluntaria daqueles parques que actualmente están en tramitación ou autorizados, pero non en funcionamento. Esta medida permitirá reactivar un sector castigado por decisións xudiciais, xa que os promotores poderán volver tramitar o parque, incluso conxuntamente coa súa liña eléctrica de evacuación, e adaptarse ás previsións da Lei 2/2024, de promoción dos beneficios sociais e económicos dos proxectos que utilizan os recursos naturais de Galicia.

NOVO PLAN EÓLICO

En terceiro lugar, establécese un novo canon eólico, de forma que a súa base impoñible dependerá da altura total dos aeroxeradores e cunha unha tarifa de 75 euros por cada metro. A previsión é que esta nova regulación entre en vigor o 1 de xaneiro de 2026, cunha recadación global prevista similar á correspondente ao sistema actual.

“E, por último, un aspecto que consideremos importante porque afecta directamente aos consumidores: en tanto non se aproba un novo Plan Sectorial Eólico, o 50 por cento da enerxía xerada polos novos parques que se atopan dentro das Áreas de Desenvolvemento Eólico, incluídas no Plan Sectorial Eólico de Galicia, deberá ser destinada a consumidores galegos, a través de contratos de subministración a longo prazo”, indicou Alberto Pazos. Esta medida está totalmente aliñada coa Lei 2/2024, de promoción dos beneficios sociais e económicos dos proxectos que utilizan os recursos naturais de Galicia, e que xa establece que, para parques que se atopen fóra desas áreas, a porcentaxe de enerxía xerada para consumidores galegos sexa do 80 por cento.

 

O portavoz do Grupo Popular, Alberto Pazos, asegurou hoxe que, “cada día que pasa e vendo os movementos e sobreactuación permanente que están a facer tanto BNG como PSdeG, estamos máis convencidos de que están arrepentidos de ter solicitado a creación da Comisión de Investigación sobre a contratación pública da Administración galega”. Diante desta situación, afirmou que o Grupo Popular “vai seguir poñendo un pouco de sentidiño á celebración desta Comisión de Investigación, que consideramos é unha oportunidade para botar abaixo definitivamente todas as falacias que nacionalistas e socialistas están a espallar sobre a exemplar xestión que os Goberno do Partido Popular están a facer en Galicia”.

Alberto Pazos manifestou que “non se entenden todas e cada unha das trabas que BNG e PSdeG intentan poñer ao normal desenvolvemento desta Comisión de Investigación se, de verdade, tiveran interese real en coñecer o proceso de construción do Hospital Público Alvaro Cunqueiro ou as numerosas contratacións que levou adiante a Xunta durante a emerxencia sanitaria derivada da Covid-19”.

UNHA TRABA TRAS OUTRA

En concreto, lembrou que “comezaron coa solicitude para ampliar o prazo de suxestións ás normas de funcionamento; cuestionaron o informe sobre as súas propostas porque a letrada o fixo de xeito verbal á Presidenta da Comisión; pediron retrasar a Mesa e a Comisión para aprobar o plan de traballo, porque non lles ía ben a data prevista; boicotearon a Mesa por un defecto formal de prazo de convocatoria, que subsanamos habitualmente en todas as Mesas das comisións deste Parlamento; tentaron retrasar a celebración da Comisión na que se aprobou o Plan de Traballo da Comisión porque alegaban que o Grupo Popular non quería negociar con eles, cando a verdade é que levabamos esperando máis dunha semana pola súa resposta á nosa chamada; e despois interpoñen un recurso para suspender a celebración desa reunión da Comisión”.

“Sen esquecernos das súas dúas últimas pataletas: a primeira, presentando un escrito na tarde do mércores para revogar o acordo do Plan de Traballo; e, a máis recente, anunciando que van impugnar a Mesa celebrada onte porque din que non se lles comunicou con antelación como ía ser a execución do Plan de Traballo”, sinalou.

Por este motivo, demandou aos deputados do BNG que “deixen de actuar, poñer paos nas rodas desta Comisión de Investigación e póñanse a traballar, se de verdade queren coñecer como foi o proceso para a construción do Hospital Público Álvaro Cunqueiro e como se desenvolveron todos os contratos realizados polos últimos gobernos do Partido Popular na Xunta”.

Alberto Pazos considerou “inexplicable que BNG e PSdeG rexeitaran a oferta realizada polo Grupo Popular para incorporar no plan de traballo 16 comparecentes que figuraban nas súas propostas entre eles altos cargos do Goberno galego e representantes de empresas que contrataran coa Xunta, pero van ter á súa disposición unha amplísima documentación e 39 comparecentes que poderán dar resposta a todas as súas dúbidas e desconfianzas respecto da actuación desenvolvida pola Xunta nestes últimos anos”.

FIXADAS 23 DAS 39 COMPARECENCIAS

O portavoz popular informou que no día de onte celebrouse a Mesa da Comisión de Investigación na que se aprobou unha primeira fase do calendario de comparecencias e o requirimento dos 118 documentos que figuran no Plan de Traballo. En concreto, as comparecencias darán comezo o vindeiro xoves, 21 de novembro, ás 10 da mañá co subdirector xeral de Asistencia Sanitaria do Sergas entre os anos 2005 e 2009, José Ramón Gómez Fernández; ao que seguirá a conselleira de Sanidade do Goberno bipartito, María José Rubio; o ex xerente do Hospital Xeral e primeiro xerente do Hospital Público Álvaro Cunqueiro, Félix Rubial; o ex secretario xeral do SERGAS, Antolín Rodríguez Martínez; a conselleira de Política Territorial, Obras Públicas e Transporte do Goberno bipartito, María José Caride; e a ex conselleira de Sanidade entre os anos 2009 e 2011, Pilar Farjas.

Esta primeira fase de comparecencias continuará o venres, 22 de novembro (con outros 6 comparecentes); o martes, 26 de novembro (6 comparecentes); e o mércores, 27 de novembro (5 comparecentes). En total, nesta primeira fase de comparecencias pasarán polo Parlamento galego 23 das 39 persoas que serán citadas nesta Comisión de Investigación, quedando as outras 16 para unha segunda fase que será concretada nunha nova reunión da Mesa.

“O Grupo Popular está a tomarse moi en serio a celebración desta Comisión de Investigación, por respecto a este Parlamento e a todos os galegos que teñan interese en coñecer a verdade sobre a contratación pública realizada pola Xunta nestes últimos anos, pero resulta lamentable que tanto BNG como PSdeG optaran por facer todo o posible para desprestixiar esta Comisión de Investigación, intentando retrasar a súa celebración con todas as artimañas ao seu alcance”, sinalou.

Para rematar, Pazos asegurou que BNG e PSdeG “están a trasladar un día tras outro a sensación de que están máis que arrepentidos de crear esta Comisión de Investigación e agora tentan saír deste embolado no que se meteron enlodando todo o posible o terreo e poñendo todas as trabas posibles para retrasar a súa celebración”. “Nós, desde o Grupo Popular, imos poñer todo o que estea na nosa man para continuar celebrando con normalidade e celeridade esta Comisión de Investigación, que é o que defendemos desde o primeiro momento porque estamos convencidos que é o que queren de nós todos os galegos”, dixo.

 

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita que a Xunta finalice o proceso de dixitalización dos quirófanos nas sete áreas sanitarias do Servizo Galego de Saúde, ao tempo que se aborda unha dixitalización homoxénea dos consentimentos informados dos pacientes en todo o Sergas, có fin de facilitar a accesibilidade e información.

A portavoz popular de Sanidade, Encarna Amigo, explicou que a dixitalización dos quirófanos “é un avance fundamental na medicina moderna que beneficia tanto aos pacientes como aos cirurxiáns, mellorando a precisión, a seguridade e a eficiencia nas intervencións cirúrxicas”.

PRECISIÓN

“A precisión lograda mediante ferramentas dixitais permite realizar cirurxías minimamente invasivas, o que ten como beneficios para o paciente menos dor, menos risco de complicacións e unha recuperación máis rápida”, apuntou Encarna Amigo, quen apuntou que, “cunha maior precisión e menor tempo de exposición cirúrxica, os resultados finais tenden a ser mellores, o que contribúe a unha maior satisfacción do paciente e menos reintervencións”.

En definitiva, Amigo asegurou que a dixitalización dos quirófanos “representa unha evolución significativa cara a unha cirurxía máis precisa, segura e eficiente, e é unha das innovacións que impulsan a medicina cara a un futuro no que os riscos se minimizan e os resultados melloran para todos”.

A portavoz popular apuntou que “tamén se abordará a homoxeneización e dixitalización do consentimento informado, que non só facilita a accesibilidade e comprensión dos pacientes, senón que ofrece importantes beneficios para o sistema sanitario en termos de eficiencia e seguridade xurídica”.

 

O Parlamento de Galicia aprobou hoxe a proposición non de lei do Grupo Popular, co voto en contra do PSdeG e a abstención do BNG, a través da que se solicita ao Goberno de España que, ante o importante retraso que sofre a tramitación da Lei de Familias polas sucesivas prórrogas para a presentación de emendas, teña en conta as aportacións feitas pola Xunta de Galicia en relación ao concepto de familia numerosas e non bote por terra todo do traballo e o consenso social acadado neste eido ao longo dos anos.

A portavoz de Asuntos Sociais do Grupo Popular, Raquel Arias, lembrou que esta lei, que iniciou a súa tramitación no Congreso en 2021, “márcase como obxectivo recoñecer as diferentes situacións familiares que existen en España, mellorar a protección social das familias e garantir o dereito a conciliar a vida familiar coa laboral”.

Porén, criticou que este proxecto de lei “está bloqueado nestes momentos e a Mesa do Congreso leva aprobadas 27 prórrogas do prazo de emendas, ao que se engade que o diálogo coas comunidades autónomas non existe, a pesar de que a lei invade competencias das autonomías e ten consecuencia en normas que xa se están aplicando”.

AFECTACIÓN Á NORMATIVA GALEGA

No caso da Comunidade galega, Raquel Arias concretou que a nova lei estatal “pode afectar á normativa existente respecto das familias monoparentais, dándose o caso de que lle quiten o título a centos de familias no caso de que, tal e como se recolle no texto da nova normativa estatal, os requisitos que estableza o Estado sexan máis estritos dos que agora se recollen en Galicia”.

“Tamén chama a atención que entre os 16 tipos de familia dos que fala a lei estatal ningún aluda ás familias numerosas, un concepto que desaparece para integrarse nun grupo máis amplo de familias con maiores necesidades de apoio á crianza”, sinalou a portavoz popular. Diante desta situación, Arias subliñou que “o Goberno galego considera un erro non escoitar ás familias numerosas e, por iso, segue a impulsar medidas que lle permitan facer fronte ás súas necesidades diarias, como anova dedución fiscal no IRPF ou a posta en marcha do novo título dixital”.

En definitiva, Raquel Arias criticou que “estamos ante unha nova lei estatal ideolóxica, que prexudica ás familias galegas máis vulnerables, como as numerosas ou as monoparentais; decepcionante, porque non inclúe as medidas que o propio Goberno de Pedro Sánchez prometera, como a ampliación dos permisos de maternidade e paternidade ou a renda universal para a crianza de fillos ata tres anos; e okupa, porque invade competencias das comunidades autónomas ás que lles impón cargas pero sen cartos”.

 

O portavoz de Infraestruturas do Grupo Popular, Roberto Rodríguez, criticou hoxe no Parlamento galego que a decisión do Goberno de Pedro Sánchez de iniciar os trámites para eliminar as peaxes en 1.000 quilómetros de autoestradas “supoñen o triplo da lonxitude que ten a AP-9, que se nega a rescatar e quitar os pagos polo seu uso”. “Desde o PPdeG imos seguir demandando que se cumpra o prometido aos galegos polos socialistas nas últimas campañas electorais: unha AP-9 100 por cento galega e 100 por cento gratuíta”, indicou.

Roberto Rodríguez lembrou que “hai exactamente un mes o ministro de Transportes dixo no Congreso non á transferencia da AP-9, non á súa gratuidade e non ao seu rescate, o que supón que Pedro Sánchez díxolle, unha vez máis, non a Galicia”.

NOVAS NEGATIVAS PARA GALICIA

“Pero nestes días, as novas negativas para Galicia procedentes do Goberno central incrementáronse ao coñecer que o Congreso paraliza por duodécima vez o proceso para transferir a AP-9 a Galicia”, sinalou o portavoz popular, quen anotou que, “cando os socialistas en xuño racharon en Madrid a unanimidade das forzas políticas do Parlamento galego para reclamar a transferencia da AP-9, xa preguntamos se era o anticipo de 15 novas prórrogas, pero agora xa vemos que o que realmente tiñan os socialistas en mente era bater ese récord”.

Así mesmo, onte coñeceuse que o Goberno de Pedro Sánchez planifica como liberar de peaxes a autoestrada de acceso a Madrid desde Galicia, unha autoestrada que, como o caso da AP-9, tamén abriu por tramos e viu aumentado o seu prazo de concesión orixinal. “Pero é que a Xustiza europea determinou en 2010 que a prórroga outorgada á AP-6 vulneraba as directivas comunitarias sobre contratación pública e reduciu o prazo de concesión en sete anos, pero, de acontecer unha situación semellante coa AP-9, o ministro de Transporte xa anunciou que litigará no caso dunha hipotética declaración de ilegalidade da prórroga e en ningún caso valorará o seu rescate”, explicou.

Roberto Rodríguez referiuse á decisión do Goberno galego de rescatar catro autovías autonómicas con peaxe na sombra, xerando un aforro de 330 millóns de euros aos galegos, que permitirá dispoñer de 30 millóns de euros adicionais para as arcas públicas. “Non entendo por que lles parece mal o rescate destas catro autoestradas galegas por parte da Xunta”, cuestionou aos socialistas galegos, “porque o Goberno de Pedro Sánchez tamén prepara nestes momentos a recuperación de tres autoestradas e dez tramos de autovías con peaxes na sombra”.

“En Galicia temos 334 quilómetros de autoestradas de pago, o que nos sitúa como líderes nacionais, das que apenas 60 quilómetros corresponden a autoestradas de titularidade autonómica”, indicou o portavoz popular, quen criticou que o Goberno central manteña a AP-9 como a autoestrada máis cara de España e Europa e a AP-53 como a única autoestrada de España sen bonificación ningunha”.

 

O deputado do Grupo Popular Roberto Rodríguez asegurou hoxe no Parlamento galego que “calquera persoa ten dereito a escoller ante os órganos xudiciais de calquera xurisdición a lingua na que se desenvolverá o procedemento e a lingua na que fará as súas intervencións orais ou escritas, de xeito que a elección dunha ou outra lingua non conleva prexuízo de ningún tipo para el administrado”.

Roberto Rodríguez explicou que a Xunta “está a impulsar o emprego do galego na Xustiza mediante distintas iniciativas, mais non pode impoñer o uso do galego nin promover iniciativas para eliminar o uso do castelán”. En concreto, puxo de manifesto a existencia de equipos lingüísticos, aplicacións de tradución automática e cursos de capacitación lingüística para todo o persoal da Administración de Xustiza.

IMPULSO DO GALEGO

Así mesmo, apuntou que estanse a desenvolver outras medidas, como a creación de Lex.gal, o maior portal de lexislación e xurisprudencia en galego; os cursos de linguaxe xurídica exclusivos para fiscais; a colaboración coa Irmandade Xurídica Galega; ou a utilización de documentos en galego dentro do entorno Omnibus.

“Na actualidade, hai órganos xudiciais e letrados da Administración de Xustiza que ditan as súas resolucións en galego; fiscais que redactan as súas resolucións, ditames e escritos en galego; e profesionais da avogacía e da procuradoría, forenses e equipos psicosociais que empregan o galego no día a día”, destacou o deputado popular, quen engadiu que “os órganos xudiciais, en calquera xurisdición, teñen as ferramentas precisas para o desenvolvemento do procedemento xudicial na lingua escollida polas partes”.

 

A viceportavoz do Grupo Popular, Paula Prado, salientou hoxe no Parlamento de Galicia “a profesionalidade e o compromiso co cumprimento da lei de todos os compoñen o sistema xudicial na Comunidade galega, nuns momentos nos que a Fiscalía está desprestixiada pola situación xudicial do fiscal xeral do Estado”. “Esta situación abochorna á carreira fiscal, aos xuristas e a todos os demócratas, porque nin as institucións do Estado nin os fiscais profesionais e honrados merecen que se dane así á Fiscalía Xeral”, indicou.

Na comparecencia do fiscal superior de Galicia para presentar a Memoria desta institución correspondente a 2024, Paula Prado criticou a “indisimulada dependencia funcional e ideolóxica do fiscal xeral do Estado respecto do Goberno de Pedro Sánchez, situación que está a xerar un inmerecido desprestixio da carreira fiscal que ningún Estado democrático pode permitir”.

COLONIZACIÓN DE INSTITUCIÓNS

“Lamento ter que dicir isto, do que o fiscal superior de Galicia non é responsable, pero a situación de colonización das institucións do Goberno de Pedro Sánchez está afectando tamén á Fiscalía”, apuntou.

Respecto da memoria da Fiscalía da Comunidade Autónoma de Galicia, Paula Prado salientou a “colaboración total” existente entre esta entidade e a Xunta, todo ilo acordado a través da Comisión Mixta entre Xunta e Fiscalía.

A viceportavoz popular centrouse nos casos de violencia de xénero recollidos na memoria da Fiscalía e lembrou que o número total de mulleres vítimas ao longo de 2023 foi de 7.438, o que representa o 3,79 por cento do total de vítimas rexistradas en España. Así mesmo, lamentou as tres mulleres asesinadas por violencia de xénero nese ano e aproveitou a intervención para condenar o último caso de violencia de xénero vivido en Galicia, concretamente en Baiona.

Respecto aos procedementos incoados, Prado explicou que pasaron de 7.631 en 2022 a 8.643 en 2023, o que representa un incremento do 13,2 por cento. “Iso quere dicir que as vítimas denuncian cada vez máis, pero estes datos demostran que aínda queda moito por facer para erradicar por completo a violencia de xénero da nosa sociedade”, dixo.

Neste sentido, destacou a aprobación pola Xunta o pasado ano do protocolo autonómico de actuación na asistencia integral ás vítimas de delitos, con especial consideración ás vítimas de violencia de xénero e outras vítimas especialmente vulnerables. Este protocolo outorga un maior recoñecemento ás oficinas de atención ás vítimas, que agora prestarán unha protección integral, coordinada e especializada ás vítimas dunha maneira máis adecuada, gracias á harmonización e unificación das funcións do persoal adscrito a estes servizos e ao reforzo da coordinación entre os diferentes organismos públicos implicados.

DELITOS NA CONTORNA DIXITAL

Paula Prado criticou que o Goberno central “segue sen dar cumprimento ao Pacto de Estado contra a violencia de xénero, pero ten no seu haber unha lei con consecuencias absolutamente monstruosas como a do ‘só si é si’”. “Unha lei, aprobada co apoio e a complicidade do BNG, coa que prometían protexer ás vítimas pero unicamente acabaron beneficiando a máis de 1.400 agresores sexuais, violadores e pederastas”, apuntou.

Para rematar, a viceportavoz popular sinalou que “compartimos coa Fiscalía a súa preocupación polo aumento dos delitos na contorna dixital, especialmente daqueles nos que se ven envoltos menores debido a un mal uso das redes sociais”. Así, destacou que Galicia foi pioneira ao restrinxir hai dez meses o uso dos teléfonos móbiles durante a xornada escolar, “unha medida ambiciosa e arriscada cuxos resultados xa son apreciables cun descenso da conflitividade, a erradicación de situacións de ciberacoso e o aumento da interacción entre os alumnos”.

 

A celebración o vindeiro 25 de novembro do Día Internacional da eliminación da violencia contra a muller marcará a orde do día do Pleno ordinario da vindeira semana, coa comparecencia da conselleira de Política Social e Igualdade, e o debate dunha proposición non de lei do Grupo Popular a través da que se pide a renovación do Pacto de Estado contra a violencia de xénero, a revisión dos defectos que se están a detectar no sistema VIOGEN e a promulgación dunha lei estatal contra a trata de persoas. Así mesmo, o Grupo Popular insistirá na necesidade de que o Goberno central traspase a Galicia os medios materiais e persoais necesarios para que a Xunta poida xestionar o litoral galego, cando xa pasaron sete meses desde a sentenza do Tribunal Constitucional que daba a razón a Galicia na defensa do seu autogoberno.

Ao remate da Xunta de Portavoces, o portavoz popular, Alberto Pazos, informou da celebración do vindeiro luns, 18 de novembro, do pleno específico para o debate de totalidade dos orzamentos da Xunta para 2025, “as contas máis altas da historia de Galicia, ao acadar os 13.954 millóns de euros, o que supón un incremento do 2,6 por cento respecto ao 2024”.

“Falamos duns orzamentos que, como obxectivos principais, buscan crear máis benestar, prosperidade e futuro para todos os galegos, con medidas específicas para impulsar a oferta de vivenda; sentar as bases da Galicia futura, con máis innovación; reforzar os servizos públicos; e apostar polos sectores produtivos e a transición verde”, concretou o portavoz popular, quen destacou que “tres de cada 4 euros destes orzamentos destinaranse a gasto social, superando por primeira vez a cifra de 10.000 millóns de euros”.

Pasando xa á orde do día do Pleno ordinario, Alberto Pazos explicou que, como novidade, dará comezo coas habituais preguntas ao Presidente por parte dos grupos da oposición, un cambio motivado pola viaxe que o Presidente Rueda fará ao Brasil a vindeira semana, que no seu día tivera que aprazar pola reunión á convocado polo Presidente do Goberno de España para abordar asuntos relacionados co financiamento autonómico.

APROBACIÓN DA LEI DE CULTURA INCLUSIVA

A sesión plenaria continuará co debate, para a súa aprobación, do proxecto de Lei de cultura inclusiva e accesible de Galicia, “unha norma pioneira que ofrece un amplo marco a partir do que sexa natural a participación cultural efectiva, afectiva e produtiva de todas as persoas, con especial atención ás que se atopan nun contexto de especial vulnerabilidade polas súas dificultades ou riscos de exclusión”, lembrou Pazos.

A continuación, e con motivo da celebración o 25 de novembro do Día Internacional da Eliminación da Violencia contra a Muller, o Pleno inclúe a comparecencia, a petición propia, da conselleira de Política Social e Igualdade, para informar sobre as medidas impulsadas polo Goberno galego na loita contra a desigualdade entre homes e mulleres e contra a violencia de xénero.

Tamén relacionada coa loita contra a violencia de xénero é a primeira das proposicións non de lei que defenderá o Grupo Popular. Neste caso, solicítase ao Goberno central que renove, canto antes, o Pacto de Estado contra a violencia de xénero, que leva conxelado desde 2022, coa incorporación de medidas específicas contra a violencia vicaria ou a violencia dixital.

A través desta iniciativa parlamentaria pídese, ademais, que o Goberno central revise os erros que se están a detectar no sistema VIOGEN, para mellorar a protección das vítimas de violencia de xénero que denunciaron ao seu agresor, así como que promulgue unha lei contra a trata de persoas, onde Galicia xa foi pioneira e conta desde o ano 2022 cun plan anti-trata.

A segunda das proposicións non de lei do Grupo Popular pide ao Goberno de Pedro Sánchez que constitúa, coa máxima celeridade posible, a Comisión Mixta de Transferencias para, entre outras cuestións, facer efectivo o traspaso dos medios materiais e persoais necesarios para que a Xunta poida xestionar o litoral galego, respectando deste xeito o seu autogoberno sobre os máis de 2.500 quilómetros de costa galega.

“Pasaron xa sete meses desde que o Tribunal Constitucional avalara a Lei de ordenación e xestión integrada do litoral de Galicia, pero seguimos sen ter noticias sobre a disposición do Goberno central de cumprir esta sentenza, o que constitúe unha nova e evidente mostra de deslealdade institucional do Goberno de Pedro Sánchez con Galicia, nun asunto que consideramos esencial para o ordenamento, desenvolvemento e o impulso económico e social da nosa costa”, criticou Pazos.

AGRADECEMENTO AO OPERATIVO DESPRAZADO A VALENCIA

Por último, dentro do apartado de preguntas ao Goberno galego, o Grupo Popular interesarase pola valoración do continxente de emerxencias que mobilizou Galicia en apoio ás persoas afectadas pola DANA en Valencia. Neste punto, o portavoz popular agradeceu “a plena disposición dos milleiros de galegos e galegas anónimos, xunto cos profesionais das emerxencias que traballan neste tipo de situacións, que voluntariamente se ofreceron para botar unha man nos concellos afectados pola DANA en Valencia, colaborando naquilo que resultaba máis urxente e de necesidade para atender ás familias afectadas pola catástrofe”.

Así mesmo, o Grupo Popular cuestionará polas medidas que o Goberno galego puxo en marcha para o fomento do alugueiro accesible, ao carón do Pacto de Vivenda de Galicia 2021-2025; e interesarase polas repercusións que, para as arcas da Comunidade galega e dos concellos, terá a imposición da nova Lei estatal de residuos, a través da que se impoñen novos impostos ao vertido e á incineración, ademais dunha taxa diferenciada aos concellos pola xestión e tratamento dos residuos que reflicta os custes reais do servizo, incluíndo o das campañas de concienciación social.

 

A Comisión de Cultura do Parlamento galego aprobou esta tarde o ditame do proxecto de Lei de cultura inclusiva e accesible de Galicia, co que este texto lexislativo queda pendente da súa aprobación definitiva en sesión plenaria. “Estamos a falar dunha lei pioneira que ofrece un amplo marco a partir do que sexa natural a participación cultural efectiva, afectiva e produtiva de todas as persoas, con especial atención ás que se atopan nun contexto de especial vulnerabilidade polas súas dificultades ou riscos de exclusión”, manifestou a deputada popular Carmen Pomar.

Na súa intervención, Pomar indicou que “a diversidade, lonxe de ser un elemento inhibidor ou obstaculizador, debe ser un elemento facilitador e multiplicador para a cultura”. “Por este motivo, o Goberno galego decidiu elaborar unha norma que facilitase o acceso e participación efectiva á cultura de todas as persoas, ao temo que se puxeran en valor todas as manifestacións culturais procedentes de calquera comunidade, grupo ou persoa en situación de desvantaxe”, lembrou.

APOIAR ÁS PERSOAS E COLECTIVOS MÁIS VULNERABLES

“O obxectivo é promover as condicións e remover os obstáculos que impidan ou dificulten que a participación na vida cultural sexa efectiva, inclusiva e accesible para todas as persoas, con especial atención ás que presentan algún factor de risco ou exclusión cultural”, sinalou.

Esta nova lei pretende, ademais, visibilizar e apoiar os talentos das persoas e colectivos que presentan condicións de especial vulnerabilidade polas súas dificultades ou riscos de exclusión, ao tempo que as programacións culturais estarán pensadas e adaptadas a todo tipo de públicos, facilitando, de ser preciso, recursos e ferramentas que permitan o pleno acceso e gozo da actividade”.

Carmen Pomar afirmou que nesta nova lei “tamén aparece contemplado o desenvolvemento de ferramentas dixitais e tecnolóxicas para garantir que os contidos culturais cheguen a todas as persoas, especialmente ás que estean en risco de exclusión social, favorecendo, ademais, a alfabetización dixital ao longo da vida”.

 

O Parlamento de Galicia aprobou hoxe a proposición non de lei do Grupo Popular, que non contou co apoio dos deputados do BNG nin do PSdeG, a través da que se pide ao Goberno de España, e nomeadamente ao Ministerio do Interior, que articule un concurso de méritos na Policía Nacional que permita cubrir vacantes na Unidade de Policía Adscrita (UPA) á Comunidade Autónoma de Galicia ata os 500 efectivos que lle corresponden.

A viceportavoz popular, Paula Prado, comezou a súa intervención amosando “o sentimento de admiración e recoñecemento polos integrantes dos corpos e forzas de seguridade do Estado, así como nos profesionais de emerxencias, que desde hai días traballan nas zonas da Comunidade Valenciana afectadas pola dana, especialmente aos 200 profesionais de emerxencias que, baixo a coordinación da Xunta, se trasladaron ata alí nestes últimos días para apoiar ás persoas afectadas por esta terrible catástrofe”.

Respecto da unidade de policía adscrita a Galicia, a viceportavoz popular considerou “lamentable que foi perdendo efectivos ao longo dos últimos anos ata situarse nos mínimos históricos que rexistra na actualidade”. En concreto, apuntou que dos 500 axentes que corresponden a esta unidade de policía adscrita por catálogo, a día de hoxe só están operativos 344 efectivos, o que supón un déficit do 30 por cento e sitúa a Galicia como a segunda comunidade autónoma coa taxa de cobertura de prazas máis baixa.

Paula Prado engadiu que cada unha das sedes da UPA “deberían ter un número adecuado de policías e nunca por debaixo dos 60, polo que na actualidade só a sede de Santiago cumpre este criterio: Ourense e Pontevedra teñen 40 efectivos, mentres que Vigo e Lugo teñen 38 e A Coruña, 37”.

“Nunca antes a plantilla deste corpo policial estivera tan mermada”, sinalou a viceportavoz popular, quen incidiu que “o grave non é so este novo desprezo a Galicia e a este corpo policial, senón as consecuencias que derivan del”. Neste sentido, afirmou que esta redución de efectivos “supón unha inasumible carga de traballo para os efectivos activos, que os obriga a priorizar o máis importante e, polo tanto, tamén a renunciar a atender coa suficiente calidade algunhas das súas funcións”.

Prado asegurou que “non estamos dispostos a asumir que cada vez haxa nas rúas galegas menos efectivos das forzas e corpos de seguridade do Estado, e menos cando os datos do propio Ministerio do Interior falan dun incremento da criminalidade no que vai de ano e dun aumento dos delitos, especialmente os relativos á liberdade sexual, á ciberdelincuencia e aos homicidios”.

Por outra banda, respecto do convenio asinado entre o Goberno central e a Xunta para o mantemento desta unidade de policía adscrita, a viceportavoz popular amosou a disposición do Goberno galego para renovar este acordo, “pero nas mesmas condicións que había e non cunhas novas condicións que son abusivas e lesivas para Galicia”.

Paula Prado lembrou que no convenio anterior o Ministerio era quen pagaba o 100 por cento do salario base dos policías e a Xunta asumía os complementos e os custos das dotacións materiais e de infraestruturas. “Agora, o Ministerio quere que, ademais deses custes complementarios, a Xunta asuma o 50 por cento do salario dos policías, o que suporía un incremento de 10,5 millóns aos 3,5 millóns de euros que asume na actualidade”, concretou.

“O que queremos é un convenio como o último que asinou o Ministerio de Interior cunha comunidade autónoma con policía adscrita, o mesmo que tiña Galicia desde hai anos e o mesmo que lle ofreceu o ministro á Comunidade Valenciana cando o presidente era un socialista”, rematou.